Fêt 7
7
Sìtifèn jis ha ghɨt a sakana
1Ngàŋ à ndâ Fùyèn yì ngaŋtena buf ha Sìtifèn na, “Gha ghɨ̂n ghɨ jîsà kum wò mò hamok agha?”
2Sìtifèn jis na, “Bom ghɨ̂n nì wana noma ghàn yuti. Yèn fe fu kəta ban yi chiki tì bên ha bè ghàhnà wù shyə̂ Ablàhâm wu baha chyə a Mèsòbòtemiyà shyəma wù lo yê hi chyə a Halàn.” 3Jis ha wun na, ‘De lak ya, nì sah ya yi nda ma wò yen a yi lak afa mu nè chwûtè ha wò.’ 4Ablàhâm ki dê lak yi Chyàdiyà mi yê, yen hì chyə a Halàn. Te bè wun kpo, Yènfù nî wù lo ben hì chyə a wu lùk afân ghàn chyə atɨ̂n chin ni. 5Yènfù tà tì fo jə̂ nâ luklà fu chyə fu ha wûn na à mò wu wun wu ngɨŋu, biyani chwûnà na yi bè folò chyə fu tɨnfu ha wûn nì ngwìk à wûn yì sah yi nda. Biyani, Yènfù tì fo chwunu wûn ha Ablàhâm wu kəta wi mwəlà. 6Yènfù jis ha wun na ngwìk yâ yi sah yi nda bè chyə lò yi lak yi tumi, ma ghɨ bê ni ghɨna ma ghɨna fet afû a wu kwòs, ma nyabli nì ghɨna a wu lɨ̀m yi ghə yì kìk. 7Biyani nâ yi Yènfù bè chəbhèlò ghɨta yi lak afû, yi bàm yi tɨ̂n, nâ ngwìk à wûn mi yê bê fwo ben ma yì hi ngumle ha yi wu lùk afân. 8Yènfù tî yə kànû ghê Ablàhâm jis na, ghɨ kəta hi tè bwə nâbi wùni wan a wo yi sah yi nda ghɨ fate wûn ha chwena hi chwùtì na sah ya yi nda ti bimi kàn mu muna. Ablàhâm bwə Isìk tuku chyâ sàmba, à hì mô a mu tuk fama, wù fati wûn. Isìk ben ni kəbi yâ ha wâ wûn Jakòb. Jakòb be boŋ ni kəbi yâ ha wana wuna, be ghàhnà ghɨ shyə njwòsù bà.
9Yu wule ben kwok kpên, be ghàhnà ghɨ shyə ghɨ̂n hì ghə̂kà wâ nè ghɨna Josèf bəkli wun na wù ye hi fêtà kwôsà a Ijìb. Biyani Yènfù hì tôknè ha wûn, 10fihi wûn a wun atɨ̂n à sù ngə̂k nâ sù jɨ̀m Josèf tî timi a fə̀n à Ijìb ashyə̂, Yènfù fo tofu kananu ha wûn, ni na fə̀n wunâ hi kòŋà wûn. Fə̀n àtɨ̂n yen ni, ni na Josèf hi kəta luk wu chiku yi lak yi Ijìb, fê tôknè nâbi nì ghə ghe ghɨ mô a wun a tôk. 11Jìŋ yì tâ kwo lak yi Ijìb nì Kanà, ben nì ngəksu su dô kə ni. Be ghàhnà ghɨ shyə hì kəta wi nâ shyə hi yə̂. 12Jakòb yu na mwə̀ mù yə̂mù làwû a Ijìb tum a be ghàhnà ghɨ shyə na ghɨna yen afû. 13Ghɨna yen ni, ne fî kûmtì yenlò, Josèf chwûtì mihì ngɨŋ à wûn ha wana ne wuna, fi chwûtì ghɨna ha fə̀n à Ijìb, wù hì khə ghɨta a Josèf yi sah yi nda. 14Josèf chinhi tum ha bè wûn Jakòb na wù ben a Ijìb nì ghɨt a wuna ghɨ sah yi nda nâ à jɨ̀m. Ghɨna chîntè mô msàmba njwòsù tân. 15Jakòb yu lo yen yi lak yi Ijìb ghê ghɨt a wuna ghɨ sah yi nda. Ghɨna be kputi kə afû. 16Ghɨ be kaha bên nì gun tu ghɨna tu gûmà a Shekèm yi sì yile a Ablàhâm tì yuna ha wana Amò.
17À hì mô te yu we Yènfù tì chwùne Ablàhâm te wu kpene bênà, ma ghɨt a ghàhnà a Ijìb ti fî dû kpenhî. 18Tuk wule ben kpên ghɨ tuk wùt lè ha fə̀n à Ijìb wu khə wi Josèf. 19Fə̀n mu wunâ lehe ghɨt a ghàhnà, hì nyâblè nì be ghàhnà ghɨ shyə kan na ghɨna fihi mwəlà mù bot a ghɨna sù ndâ yê lêmà bɨn ma ghɨna tahi kputî. 20À ndùku mô a mu tuk afân ni, a ghɨ tì bwə Musìs, wù hì mô njoŋ sù tât ghɨ tôknè kwoka kə nì wûn a bè wun a ndâ, wu jwôfà kə ni a Yènfù ashyə̂. 21À hì mô te ghɨ fihe lema Musìs a bɨn, wan tok à Ijìb wùlè lyi wûn, ha wun a wan, lyi kwok nì wûn. 22Ghɨ yiki Musìs, wù hì kəta tof wu ghɨt a Ijìb kə yì jɨ̀m, wù ləma hì jîsà tof wu kananu, nê agha bəmana.
23“Te Musìs ləma tana lɨ̀m mkìk, yi kwok a wun a tû na wù yê jikti ghɨt a Isalì, wana ne wuna. 24Wù yen ni, yen wùt à Ijìb wu nyâblè nì wâ nè wûn wùt à Isalì. Wù yen hi gâmtì, sam ywi wùt à Ijìb mu wê. 25Te wù ne ni hì kwâktè na ghɨt a wuna nè yena khɨlelò na Yènfù nè bònhè ghɨna tohne a yi wùn, biyani ghɨna tê yen a khɨlî. 26Tuku yû, Musìs yen ghɨt a Isalì à bà nô, yen hi jyàhè ghɨna, ki buf ha ghɨna na, ‘Ghàn mò wana ne fê nyàblè nì ngɨŋ sanisu nì njwô ghə?’ 27Wùt we wù tì nyâblè nì wùt lè we chin buf ha Musìs nâ, ‘À lem nde wò na wo sak ghàh agha? 28Wò khɨŋa kəbi hi ywe mu te wò che ywe wùt à Ijìb we yi yoni ma?’ 29Te Musìs ywo gha yîn ni, kə wu yu tet yi lak afû yen hì chyə a Midìyàn a mô lak yi tumi, ghê ywê wûn bwɨ mwəlà mù lɨmà afû mù bà.”
30“Lɨ̂m mkìk chyâ, anjèl à Fùyèn ben ha wun a yi lak yi sùsi, a ngwùŋ à kùn à Sinà atɨ̂n à chwù tu wùstu a tô wù ghə̀n. 31Musìs yen hì mô nì kani yen hi yê yen na à gànà ghə agha, hì bakhe yênà yu jyə̀ Fùyèn yi jîsà na, 32‘Mu mò Yèn fe bì ghana ghɨ shyə Ablàhâm nì Isìk nì Jakòb ndùku ngumle.’ Musìs yu ni fânì kwo wûn, wù tê fè mòmhì hi kî. 33Bâba Yènfù jis ha wun na, ‘Chwokti gwusu wùsu sasu beka luk we wò time atɨ̂n ni, à mò luk wu yulenu.’” 34Mu ti yen mihì nyâblì ye ghɨt a Ijìb nyàblè nì ghɨt a ma atɨ̂n. Mu ti yû jî ghɨna chwo ben hi bònhè ghɨna. “Mu te tumalò wò chîn na wò chwo yen a Ijìb!”
35Sìtifèn jis ni fî jis na, “Musìs mu wùna mò wut we ghɨt a Isalì tì tunhe hì bufa ha wun na, ‘À lem nde wò na wò hi saka ghàh agha?’ À mô wûn we Yènfù tì tuma na wù nê hi saka ghɨta fê bônhè ghɨna. Yènfù tî tum anjèl à wûn na yì bê laka tum yìna ha Musìs a wu ghə̀n afa wusu ndùku bame atɨ̂n yâ. 36Wù ni agha kanana fî chwûtì chwesu bəmasu a su ndùku chwûtè jyak a Fùyènà a Ijìb, lyi fwu nì ghɨt a Isalì afû. Wù tì ni kəbi gha kanana a jwô yì Bàŋana afâ, fî ni kəbi ale a lak yi sùsi a wu lɨ̀m mkìk. 37Musìs wunâ mò wut mu we a wù tì jìsa ha ghɨt a Isalì na Yènfù bè chwoka tumalò wùt a ghàn à fùtɨ̂n ha fòktì wù chìk ma wù tum ha ghàn kəbi te fu tì tuma mu. À bê hì mô a wut ma ghɨ chwok kə a ghàn a yi sah yi nda. 38À mò kəbi wûn a wù ndùku mô nì wana Isalì yi lak yi sùsi. Wù ndùku mô nì be ghàhnà ghɨ shyə nì anjèl à Bâba yê yi tì jìsa ha wûn a kùn à Sinà fo tu sak te tu tì faŋa hamok ha ghàhnà.
39“Be ghàhnà ghɨ shyə bɨlì tunhi hi yu ha wûn chin lem wûn yi bè a ghɨna təm hì jyê hi kaha yèn a Ijìb, 40ki jîs ha Alòn na, ‘Fati yèn mùlè ha ghàhnà, shyəma mù nê hi yênà ashyə̂. Ghàh khə wi nâ à gan ghə ha Musìs we wù tì lye fwo nì ghàhnà yi lak yi Ijìb agha?’ 41Ghɨna fati fù mosò, fu kə̂kà te wâ nyàm à mbòloŋ, ghɨna hì fo tufô a tu nkì a tu nkì, saŋlê nâ jûŋ kum nì shyə mi ghê ghɨna fate nì wo yâ. 42Yènfù fit jɨ̀m ha ghɨna de ghɨna na ghɨna hi ngumle njə̀n me a mù mò a nyə̂ kəta ghɨ nyàka a ŋwàklù fòktì su chiksu, kumtè ha ghɨna na,
‘Ghɨt a Isalì ba ghàn khə na,
ghàn chehì sete nyamsu fo wijə te yi fô ha mu a lɨ̂m afân mkìk a ghàn chyə kwoka yi lak yi Sùsi?
43Ghàn ndùku bɨlà bêkà chyâ nì ndalàfù Yènfù Molòk
nì mosò fù jên, ghɨ toŋte na Lefàn yâ, a mosò me ghàn fate hì ngumle, kum ni,
mu nè nê ma ghɨ jûmà fihi ghàn a yi lak afân ma ghàn yê chya nâ yi lak yi Babilòn’.
44“Be ghàhnà ghɨ shyə tì kəta fù ndalà fu lefu, fu chwûtè na Yènfù làwû a ghɨna fùtɨ̂n yi lak yi sùsi. Ghɨ tì ba ndalà fu tɨnfu kə wu lum afa Yènfù tì chwûtì ha Musìs na wù ba. 45À hì mô yi bàm yi tɨ̂n be ghàhnà ghɨ̂n ghê Joshwà, bêkà ndalà fu tɨnfu yen nì funfu a tu lak afa Yènfù tì jùma fihe ghɨta atɨ̂n fo ha ghɨna. Ndalà fu tɨnfu mô ma ghɨna tì fyi kəbi ha be ghàhnà. Fu hì mô afân hi chem a fə̀n Defìt wu tuk. 46Defìt nî a ghâ Yènfù hì saŋle ha wûn nâ jûŋ. Wù chyati na Yènfù fo jyaka ma ba ndâ ha funfu a mô Yèn fe Jakòb ndùku ngumle. 47Yènfù nî à bɨlì ba lô fə̀n Sòlomùn ndâ àtɨ̂n.
48“Biyani, Yèn fe fu ngaŋte kpene, chyə wi a ndâ ma à ba à ghɨ̂t. Fòktì wù chìk tî jis na Yènfù jis na,
49A nyə̂ mò kpok wu mu we mu ndòkò atɨ̂n saka mbyî,
chyə mô luk we mu tomte wulu mu atɨ̂n.
Ghàn mò hi ba a yìni nki ndâ ha mu agha?
Mu mò hi tè chyə na afa agha?
50Ba à tì fati mu nì mwə̀ muna nâ mù jɨ̀m!”
51Sìtifèn jis ni jis na, “Ghàn ta nì tu ni. Ghàn ti fə̂ntì tûŋlu, tahi təm ghana, ghàn mò kə te be bì ghana, ghàn ghɨ hì mô kəbi te ghɨt ghe ghɨ khə wi Yènfù. Ghàn ti faŋ hì tunhe kə yi tunhî na ghàn wi hi ywo gha ye Yohnà Yulena jìsà. 52À ndùku mô nâ yini fòktì yì chìk a bì ghana ghɨ shyə tì faŋa hi fo ngə̂k ha yinì agha? Ghɨna tì ywiti ghɨt ghe ghɨ tì bèna ashyə̂ hì fòktè bên yì wùt wù chilichili wù Fùyèn, a mô wun we ghàn ti bəkle fî ywilò. 53À mò ghàn ghe anjèlsù Fùyènsu tì bèna fo sak yi Fùyènì ghàn fyî biyani tê lêmà jə̀ saktu tɨntu.”
Ghɨ tumli ywi Sìtifèn nì te
54À hì mô te ghɨt a sakana ghe ywo kwoka nì gha ghe Sìtifèn jìsa, là mù ghɨna bâŋ nâ haŋaŋ. 55Biyani, Yohnà Yulena tihi Sìtifèn wù ki kokhi yen a nyə̂ yen ban yi Fùyènì yi chiki, fî yen Jisòs, wù mô a Yènfù bàh à kpen wu wo ta. 56Wù jis na, “Ghàn yen à ke! Mu ti yen te nyə jìme, fî yen Wâ Wùt, wu mô a Yènfù kpen wu wo ta.”
57Ghɨna yu ni, bwat jî nâ a jyə̂ yì tâ fə̂ntì tûŋlu ghɨna shɨŋ yen kə ghɨna à jɨ̀m a wun wu wùn, 58guf fwu nì wûn a yi tèk afû yîmì hi tè tumle wun nì te. À ndùku mô yâ ma ghɨt ghe ghɨ ndùku mô afû ti chwokti waf wu ghɨna lem a wan wù kpuŋ wùlè ashyə̂ yet yi wuni mô Sôl.#7.58 Sôl ndùku mô kəbi wùt we ghɨ tì kahi hì toŋte na Bôl. 59Ghɨna faŋ hì tumle kə yi tumlî Sìtifèn wù hì jə̂mà jîsà na, “Bâba Jisòs lyi yohnà ma.” 60Wù fî tum a lwe wuna a chyə̂ ji nâ a jyə̂ yì tâ jis na, “Bâba lèhifo be ghɨna yinâ.” Wù jis ni kə wu yu kpulò.
© Wycliffe Bible Translators, Inc.