Fêt 8

1Ghɨ ndùku nyâblè nì Sìtifèn nì Sôl mô afû tòkà jîsà kə na yi jwôfà na ghɨ ywi wûn.

Sôl hi fo ngə̂k ha ghɨt a bimena

À ndùku mô kəbi mu tuk afû, ghɨt a bimena ghe ghɨ ndùku mô a Jèlusalèm yîmì hì yena ngə̂k yìlè, yi bəma kə ni. Ghɨ shihi fo ngə̂k ni, ghɨna tet kə nâ ghɨna à jɨ̀m yen a sù ngunsu Jùdiyà nì Sàmaliyà, à faŋ kə ghɨt a tuma Jisòs afû. 2Ghɨt ghe ghɨ ndùku ngumle Yènfù gûmà Sìtifèn ji kpu wuni nâ jûŋ.

3Biyani, Sôl yîmì hì khɨŋa ghɨt a bimena lye kə ndâ nì ndâ khɨte à lɨmà nì ywena, lêmà a ndâ chyâk.

Filîb fôktì tum yì jùŋ ha ghɨt a Sàmaliyà

4Ghɨt a bimena ghe ghɨ teta hì yênà nâbi afa, fôktè yênà kə nì tum yì jùŋ. 5Filîb lo yen nì lumu a tèk yi chik yile a Sàmaliyà fôktè a gha afû kum nì wùt we Yènfù chwoka lema. 6Nôn à ghɨ̂t ghe ghɨ ndùku mô afû yen gha kanana ghe Filîb ndùku nê fî fati yuti nâ gha à jɨ̀m ghe wù ndùku jîsà. 7À ndùku mô yâ ghɨt a dona afû kəta wu yohnù be. Filîb jum fihi yohnù tɨnu nâbi ghɨ̀ni hì jyê kə a jyə̂ yì tâ fwo teta kə yi têt. Ghɨt a kəblena tâ, ghɨt a ngəhana tâ. 8Yi ni ghɨt ghe ghɨ ndùku mô yi tèk afû hì saŋle kə yi saŋlî.

Samùn wùt à sù njwòk

9À ndùku mô ni wùt à lûm wùlè mô yi tèk afû yet yi wuni mô Samùn, wu nê gha fintena, ghɨta a yi lak afû hì mô nì kani. Wù ndùku nê ni fate na yi mò nâ wùt wu bəmana. 10Ghɨta ta nâ à jɨ̀m nì ghɨt a fufana hì ywo kə ha wûn, jîsà na, “Yèn fe ghɨ toŋte na Yènfù jyak a chika fu tî bên tohna a Samùn wu wùn.” 11Ghɨna hì ywo kə ha wûn beka wù ndùku nê gha fintena a ghɨna fùtɨ̂n nâ wu yu dâ. 12Biyani, à hì mô te ghɨna bime tum yì jùŋ ye Filîb fòkte kum fə̂n wù Fùyènù, na Jisòs mò wùt we Yènfù chwoka lema, ghɨ fo mòlû ha ghɨna, fo ha lɨmànà fo ha ywena, 13nâ Samùn a wuna ngɨŋ boŋ bimi tum yì jùŋ mi yê fyi mòlû faŋ kə ghê Filîb, hì boŋa mô nì kani kum nì chwena se a Filîb ndùku chwûtè nì gha kanana ghe wù ndùku nê.

14À hì mô te ghɨt a tuma Jisòs ywo a Jèlusalèm na ghɨt a Sàmaliyà ti bimi tum à Fùyèn, ghɨna tum Bità ghê Jon ha ghɨna. 15Bità ghê Jon yen jəm ha ghɨt a bimena atɨ̂na shyəma Yohnà Yulena ben ha ghɨna; 16beka Yohnà Yulena ndùku mô teka ghɨ ben ha ghɨna; ghɨna mô ma ghɨ fyi kə mòlû a Bâba Jisòs yi yet. 17Bità ghê Jon lem wu wô a ghɨna tû na Yohnà Yulena ben ha ghɨna.

18À hì mô te Samùn yena na ghɨta tuma ti lem wo a ghɨt a bimena tû, Yènfù fô a Yohnà Yulena ha ghɨna, wù hì fo wu kâ ha Bità ghê Jon jîsà na, 19“Ghàn fo kəbi jyak ghe ghàn kəta ni ha mu, shyəma mu nê hi lêmà wo nâbi a nde a tû Yohnà Yulena boŋ ben ha wûn.”

20Biyani Bità fîsì jis na, “Fùshâŋ, wò nì ka wa mu we ləha, beka wò kwàktè na wò làhi yun a fo Fùyènì nì ka. 21Wò kəta wi nâ yi gha yile a ghàh a fùtɨ̂n à yì fèt afân, beka Yènfù yenalò təm ya khə na wò wijə chilichili. 22Kwuna kwâktì ya yi be yê ma wò jəm ha Bâba na wù lehêfo gha ye wò ye hì kwâktè a wò yi təm, 23beka mu ti yen na wò kəta ghə̀k yì kanana mô a kwôs ha be.”

24Samùn mu we jis ha Bità ghê Jon na, “Ghàn hi jə̂mà ha Bâba kum mu, kə nâ na gha yile atɨ̂n à gha afân ghàn jìsa ni kə nè gânà ha mu.”

25À hì mô te ghɨna fòkte mihe gha ghe ghɨna khə kum Bâba nì yiki wuni, Bità ghê Jon kaha kolo a Jèlusalèm, hì kolê fôktè yênà kə nì tum yì jùŋ a tu tèk tu dotu a Sàmaliyà.

Filîb fôktì tum yì jùŋ ha wùt ma wù lo a Ìtobiyà

26Anjèl à Bâba tî jis ha Filîb na, “Lo chwo ndù lumu a bàh à nchwô a lum afa wu lo a Jèlusalèm chwo a yi tèk yi Gasà yâ.” Lumu tɨnu tohna chyâ yi lak yi sùsi. 27Filîb lo hì yênà, yen wùt à Ìtobiyà wùlè, à mò nâ wùt wù tâ, tôknà nì ka wùt ywên we wù ndùku saka Ìtobiyà, ma wù kwok hi kokhe Fùyèn a Jèlusalèm, 28hì kaha kole yi kolô, nyɨŋa a tô fùchyâk fu lefu a gûfà sù nyâm, taŋa kole bênà nì ŋwàklù fòktì Ìsayà kə nâ a jyə̂ yì tâ. 29Yohnà Yulena jis ha Filîb na wù yê bakha a ngwùŋ à fùchyâk afâ shyəma ghê wùt àtɨ̂n hi gbê yênà amok. 30Filîb nyiŋ yen bakha ha wûn, yu te wù taŋa gha a ŋwàklù fòktì Ìsayà. Filîb buf ha wun na, “A wò ywo khɨlelò gha ye wò taŋa agha?”

31Wùt fètana mu we fîsì na, “Mu mò hi ywo khɨle yàni, a bu kə na wùt fati fôkti lô ha mu?” Wù jis ni jis ha Filîb na wù kwok à bê ndòko a wun a tô fùchyâk shyəma ghê wûn hi gbê yênà amok. 32Luk wu ŋwàklù we wù ndùku taŋa yani ndùku jîsà na,

‘Wù hì kəta wi nâ gha tetani yile hi jìs, kəbi te bwu njyə̀ a wu yu afa ghɨ gûfà yênà hi sê

makə te wâ njyə̀ a wu yu afa ghɨ kwoma nyuŋsu wunsu.’

33Ghɨ wumhi wûn, wùt tê fwu jə̀ hi tòk à wûn.

“Wùt bè fôktè wijə gha kum mwəlà mù wûn

beka wù hì mô ma wù ti kpû kəta wi wan.”

34Wùt fètana wuna jis ha Filîb na, “Mu chyate wò, fòkti ha mu nâ, wù ndùku jîsà gha ghɨ̂n kum ngɨŋ à wûn ma, ma wù ndùku jîsà kum wùt lè agha?” 35Filîb yîmì luk wu ŋwàklù wûn fôktì kwok nì tum yì jùŋ kum Jisòs. 36-37Ghɨna hì gbê yênà yen tan wu lùk wule, yen fu chɨmlâ, wùt wu fètana we jis ha Filîb na, “Yen ke chɨm a mòla, a mò hi tàhè ghə chin na kə mu fi mòlû agha?”#8.36-37 Ŋwàklù su mwu su lesu ti kpenhi gha yile wu lùk afan na, “Ghɨ làhi fo mòlû ha wò a yu wu afa wò bime. Wù fîsì ha wun na, ‘Mu ti bimi na Jisòs we ghɨ chwoka lema mò Wâ Fùyèn.’” 38Wùt fètana àtɨ̂n jis ha wùt we wù ndùku tihe chyak fê, wù timî Filîb ghê wùt fètana àtɨ̂n chwô lyi yena a chɨ̀m afâ. Filîb fo mòlû ha wûn. 39À hì mô te ghɨna fwo kwoka bena afû, Yohnà Fùyènà bûŋhì lyi lo nì Filîb. Wùt fètana mu we faŋ hi fè yen a wûn, lô hì kole yênà saŋle nâ haŋaŋ. 40Te Yohnà Bâba lye Filîb ni, wù bûŋhì yen kə ngɨŋ à wûn a wu lùk wule ghɨ toŋte na Àsotùs gbi tohna nâ tèk tù jɨ̀m afû, fôktè yênà kə nì tum yì jùŋ, gbi kə ni ben tan a Sìsaliyà, a mô tèk yi chik ye yi ndùku mô afû.

선택된 구절:

Fêt 8: bmv

하이라이트

복사

모든 기기에 하이라이트를 저장하고 싶으신가요? 회원가입 혹은 로그인하세요

Ŋwàklù Fùyèn Kàn Mù Fê (Cameron) - 더 알아보기

Fêt 8

Fêt 8
- 인기 성경 구절

듣기 Fêt 8

성경:

Bum

번역본: Ŋwàklù Fùyèn Kàn Mù Fê (Cameron) - bmv

Fêt 8

Fêt 8

Fêt 8 - 인기 성경 구절

듣기 Fêt 8

성경:

Bum

번역본: Ŋwàklù Fùyèn Kàn Mù Fê (Cameron) - bmv

Fêt 8

Fêt 8
- 인기 성경 구절