LUCAS 17
17
Juchapi urmanaca, jatun llaquimi
(Mat. 18:6-7,21-22; Mar. 9:42)
1Jesusca, paipaj yachajujcunatami cashna nijurca: “Gentecuna nitijachinshna pandachinaca tiangapachami. Ashtahuangarin maijan pandachijca, ¡aij imachari tucunga! 2Maijandapash cai huahuagushna ñucata crijcunata pandachij runataca, jatun molino rumita cungapi huatashpa, mama cuchapi shitashpachari ashtahuan ali canman. 3Cangunallata aliguta yarishpami, causana canguichi. Maijan crijpash, canda fiñashpa juchata rurajpica, jarcashpa rimangui. Shina rimajpi ninanda llaquirijpica, pai canda imata rurashcatapash cungangui. 4Shinallata chai punllalla canchiscaman canda fiñachishpami, juchata ruranga. Chashna rurashpapash: ‘Ninanda llaquiripanimi’ ningapaj, canchiscaman shamujpica cunganguilla” nijurcami.
Ashtahuan ali crina ushaita carahuai nishcami
5Villachun Apunchi Jesús agllashcacunami:
—Ashtahuan ali crina ushaita carahuai— ninajurca.
6Shina nijpimi Apunchi Jesusca, cashna nirca:
—Jamzi mostaza muyu valigutallapash crishpa, cai sicómoro nishca quiruta: ‘Sapindi llujshishpa, mama cuchapi shayaringapaj ri’ nijpica, cazushpa rinmanllami.
Servij runagu imatalla ruranatami villajun
7¿Canguna purapica maijanda, yapushpa causaj, na cashpaca michishpa causaj shuj servij runaguta charinguichi? Pambamanda pai muyumujpica, ¿maijanda: ‘Shamupai, micungapaj caigupi tiaripai’ ninguichi? 8¿Nacha ashtahuangarin cangunaca: ‘Ucha yanushpa, ali chumbilirishpa ñuca micuchun ufiachun carahuai. Chai jipami, cambash micushpa ufiashpa tiajungui’ ninguichi? 9¿Chashna mandashcata tucuita rurajpipash, chai servij runataca pashi ninllu? Na chashna ninmanllu yanimi. 10Mandashcata tucuita pactachishpaca, cangunapash shinallatami cashna nina canguichi: ‘Ñucanchica, yanga servij runacunami canchi. Imata rurana cashcatallami rurarcanchi’ ninami canguichi— nijurcami.
Lepra nishca ung:uihuan huañunajuj chunga runacunami, mapa illaj tucushca
11Jerusalenman Jesús rijushpaca, Samaria shuti llactahuan, Galilea shuti llactahuan chaupitami yalijurca. 12Shuj uchilla llactaguman Jesús chayajujpimi, lepra ung:uihuan huañunajuj, chungapura runacuna tuparingapaj shamunajurca. Paicunaca, carullapimi shayarinajurca. 13Shina shayarishpami:
—¡Ñucanchita llaquihuayari, Yachachij, Apunchi Jesús!— nishpa caparinajurca.
14Shina caparijpi, Jesús ricushpaca:
—Curacunapajman rishpa ricurigri— nircami.
Shina nijpi rinajushpami, chai ung:uimanda mapa illaj tucurca. 15Shinamandami, paicuna puramanda shuj runaguca, ña ali tucushcata ricushpa, Taita Diostaca punchapambagumi cangui nishpa caparishpa, Jesuspajman tigramurca. 16Shina tigramushpaca, cungurishpa alpaman chayajta cumurishpami, pashi nijurca. Chai runaguca, Samaria llactamandami carca. 17Shinamandami Jesusca, cashna nirca:
—Lepra ung:ui illaj tucushcacunaca, ¿nachu chungapura carca? ¿Iscun puracunaca maipita? 18Taita Diosta punchapambagumi cangui ningapaca, ¿nachu maijambash tigramuna carca? ¿Shuj llactamanda cai runagullachu tigramuna carca?— nircami.
19Shina nishpallami Jesusca, cashna nirca:
—Jatarishpa rilla. Canga, ñucata crishcamandami quishpirishcangui— nircami.
Dios mandangapaj shamunatami villajun
(Mat. 24:23-28,36-41)
20—Taita Dios mandanaca, ¿ima punllata callaringa?— nishpa, huaquin fariseocuna tapujpimi Jesusca, cashna nijurca:
—Taita Dios mandanaca, imatapash ricuchishpami shamunga yanguichiman. 21‘Caipimi mandajun, chaipimi mandajun’ nitallapash, pipash na ningachu. Ricuichi, Taita Dios mandajuca cangunapimi— nijurcami.
22Shina nishpallami Jesusca, paipaj yachajujcunaman cashna nijurca:
—Runa Aichayu tucushca ñucata, shuj punllagullapash caipi mandajushcanman nishpa, canguna ricunayachina punllacunami chayamunga. Ashtahuangarin na ricushpami causanguichi. 23Cangunataca cashnami ninajunga: ‘Caipimi mandajun, chaipimi mandajun’ ninajungami. Chashna nijpipash, na catishpa rinachu canguichi. 24Runa Aichayu tucushca ñuca tigramuna punlla chayamujpica, jahua pachamanda tucui cai pachapi punchapamba shitamunshnami shamusha. 25Ashtahuangarin pundaca, cunan cai viñaicuna ninanda na ricunayachishpa llaquichijpi, llaquita apanarapachami cani. 26Runa Aichayu tucushca ñuca shamui punllapica, ñaupa taita Noé causajui punllacunapi tucushcashnami tucunga. 27Chai punllacunapica, jatun huambuna huasiman Noé yaicungacamanmi, gentecunaca micushpa, ufiashpa, cazarashpa, cazarachishpa causanajurca. Shina causanajujpimi, Taita Diosca yacuhuan tucuilla tucuchirca. 28Shinallatami, ñaupa taita Lot causajui punllacunapipash tucurca. Chaipica, gentecunaca micushpa, ufiashpa, imatapash randishpa, jatushpa, tarpushpa, huasichishpami causanajurca. 29Ashtahuangarin Sodoma shuti pueblomanda Lot shuti runa llujshijpica, jahua pachamandami ninahuan, azufrehuan tamiamushpa tucuillata tucuchirca. 30Chashnallatami, Runa Aichayu tucushca ñuca tigramui punllapipash tucunga. 31Chai punlla chayamujpica, huasi jahuapi tiajushpaca, huasi ucumanda imata apangapajpash, ama yaicuchun ninimi. Pambapi purijushpapash, huasiman ama tigrachun ninimi. 32Lot runapaj huarmi ima tucushcata yaringuichi. 33Maijambash paipaj causaita quishpichingapaj munashpaca, chingaitami chingagringa. Ashtahuangarin paipaj causaita na llaquishpa huañushpaca, quishpiringami. 34Cangunataca cashnami nini: Chai tutapica, ishcai purami shujlla camapi puñunajunga. Paicunataca shujtallami apanga, shujtaca saquingami. 35Shinallata ishcai huarmicunami cutanajunga. Paicunatapash shujtallami apanga, shujtaca saquingami. 36Shinallata ishcai runacunami, pambapi purinajunga. Paicunatapash shujtallami apanga, shujtaca saquingami— nijurcami.
37Shina nijpimi, paipaj yachajujcunaca:
—¿Maipita chashna tucunga, Apunchi Jesús?— nishpa tapunajurca.
Shina tapujpimi Jesusca, paicunata cashna nirca:
—Huañushcacuna maipi sirijpipash, chaipimi jatun angacunaca jundanga— nircami.
Quichua Imbabura Bible © United Bible Societies, 1994.