Mateo 2
2
Aantu ya maano ya ku kafumandaaka
1Yesu pano wafiilwe um-Betleemu ya Yudea, pano Yelodi waali umwene, lola, antu ya maano aya ku kafuma ndaaka yayiile uku Yelusalemu, yatondosha, yaati: 2“Ali kwi wino watafyaalwa umweene wa a Yudea? Kuno twawine ulutaanda lwaakwe uku kafuma ndaka. Nga neswe twishile tumtukamila.” 3Ngu mweene Yelodi, pano wapulika fiyo, washima ndi, poonga na ya um-Yelusalemu yooshi. 4Nga wakonganiike ayikolo ayakapeelo yoshi na yakaandika ya yaantu, asita ukuti amanye kuli yeneyo, Klisto alufyaalwa kwi? 5Nayo yannena, yaati: “Uku Betleemu um-Yudea; kuno ifino chaandikwe na kalausha:
6Newe Bethleemu, insi yi Yuda,
usi nnoono naanti kache unjeene yi Yuda.
Kuna kuli wewe alufuma Katongolola,
wino aluchema aantu yaane aIslaeli,’”
7Apano Yelodi waisile aantu ya mano ukumbali, nu kuyatondosha niingo pano ulutaanda luo lwalolike. 8Wayatuma uku Betleemu, ayanena, ati: “Pitini, mukatondokeshe nkaani amaswi ya mwaana, na pano mwandola, mundeetele amaswi, kuti nene kwene inje nkamfukamile.” 9Nayo pano yapulika amaswi ya mweene, yalondela insila; nga lola, ulutaanda luno yaluwine uku kufuma ndaaka, lwayakolelela, lwafika lwimilila apiyulu pano umwaanali. 10Nayo pano yawine ulutanda luo, yachimbile nkaani nkaani. 11Yingila un-ng'anda, yalola umwaana poonga na Malia nyina, yapona yamfukamila. Nayo pano yasapula ififuunda fyao, yampa ifilongelelwa fyaao: Saabu, Ubani na Mane-mane. 12Nayo pano yanenwa na Leesa un-chiloto, fino yatachisuwilila kuli Yelodi, yapita ukumwao ku sila yiniina.
Ana yanoono yumolwa
13Nayo walaangi yapita, lola, malaika wa Mweene waloliike kuli Yosefu un-chilooto, waati: “Katuka, useenda umwaana na nyina, uwitukile uku Misili, uwikale kweneko kufika na lino nacha nakuneena; kuno Yelodi akasime ukusita umwaana, andole.” 14Wakatuka, waseenda umwaana na nyina uushiku, wapita uku Misili. 15Awikala kweneko kufika na lino Yelodi wafwiile; kuti lifikilile iswii lino uMweene wafwashile na kalausha, ati: “Ukufuma uku Misili niisile umwaanane.” 16Nga pano Yelodi wawiine fino wasulwa na yaya aantu ya maano, walakaliike nkaani, watuma aantu yakumoole aanche yooshi ayooshi, yano yali uku Betleemu numbali mbali mooshi kweene, ukufuma aya imyaaka yiili na apisika ya myaaka yiili, uku maanda yano wamanyikishe uku yantu ya maano. 17Apano lyawa iswii lino kalausha Yelemia wafwashile, waati:
18“Iswi lyapuliikwe uku Lama,
indoosha na malilo tupu;
Lakeli angalulilila anakwe,
akana ukutusha,
kuno yasiko.”
Yosefu na Malia yawela kufuma uku Misili
19Nga pano Yelodi wafwile, lola, malaika wa Mwene walolike un-chiloto kuli Yosefu uku Misili, 20ati: “Katuka, useende umwaana na nyina, uleme ishila ya kuya ku nsi ya Islaeli, kuno yafwa yano yasitaanga ukumola umwaana.” 21Nga wakatuka, waseenda umwaana na nyina, afika uku nsi ya Islaeli. 22Leelo pano wapulike, fino Akelao walâsile insi ya Yudea apa wene wi Yelodi isi, wofile ukuya kweneko; nawe pano wanenwa na Leesa un-chiloto, waile uku Galilea 23Wapita waaya wikala umunsi uno yataangi: Nazaleti; kuti liwe iswi lino lyavwashilwe na malau: “Alwiitwa umNazaleti.’
New Testament in Fipa © United Bible Societies, 1988. Bible Society of Tanzania.