Gyi 11
11
Pita bɔ ye amaneɛ ahile Gyɛlusalɛm Asɔne ne
1Ɛzoanvolɛma ne nee diedima mɔɔ wɔ Dwudiya la dele kɛ menli mɔɔ ɛnle Dwuuma la noko ɛlie Nyamenle edwɛkɛ ne ɛli. 2Yemɔti mɔɔ Pita hɔle Gyɛlusalɛm la, bɛdabɛ mɔɔ bɛmɛ bɛ adwenle wɔ mrenyanu nzonlɛyɛlɛ zo la dendɛle ye nwolɛ, 3na bɛbizale ye kɛ, “Kɛ ɔyɛle mɔɔ ɛhɔle menli mɔɔ ɛtɛyɛle bɛ mrenyanu nzonlɛ la sua nu na ɛ nee bɛ dole bɛ sa ɛyɛba ko anu ɛ?” 4Na Pita bɔle ɔ bo hanle edwɛkɛ ne nee mɔɔ zile la amuala hilele bɛ.
5Ɔse, “Ɛnee mewɔ suakpole ne mɔɔ bɛfɛlɛ ye Dwɔpa la azo melɛyɛ nzɛlɛlɛ, na me nye hɔle dɔɔnwo, na menwunle debie bie mɔɔ le kɛ ɛdanlɛ mɔɔ bɛdedɛ ɔ nloa nna ne amuala anu la kɛ ɔvi anwuma na bɛlɛdwula ye aze, na ɔradwule me nyunlu ɛkɛ ne la, ɔgyinlanle. 6Mɔɔ meneanle nuhua la menwunle nane, nwɔlɛ, yɛɛ nloma ngakyile wɔ nuhua. 7Na mendele kɛ ɛnelɛ bie se, ‘Pita, dwazo na ku bie di!’ 8Na menganle kɛ, ‘Kyɛkyɛ, Awulae, debie mɔɔ le kyibadeɛ anzɛɛ nwolɛ ɛnde la metɛdile bie ɛlɛ.’ 9Na ɛnelɛ ne vi anwuma rale bieko kɛ, ‘Debie biala mɔɔ Nyamenle ɛde nwolɛ la mmabu ye kɛ nwolɛ ɛnde!’ 10Ɛhye zile fane nsa, na nzinlii bɛhwenle ye bɛhɔle anwuma. 11Mekɛ ne anu ala yɛɛ menli nsa mɔɔ ɛnee bɛzoa bɛ vi Sizalia wɔ me nwo ɛkɛ ne la rale sua nu ɛkɛ a. 12Na Sunsum Nwuanzanwuanza ne zele me kɛ me nee bɛ ɛhɔ, memmasi aze. Mediema nsia ɛhye mɔ mɔɔ vi Dwɔpa la bokale me nwo manle yɛ muala yɛhɔle Sizalia wɔ Kɔnileɛse sua nu. 13Kɔnileɛse hanle kɛ ɔzile ɔnwunle Nyamenle soanvolɛ bie wɔ sua ne anu na ɔzele ye kɛ, ‘Soa maa bɛhɔ Dwɔpa bɛhɔva nrenya bie mɔɔ bɛfɛlɛ ye Saemɔn Pita la, 14na ɔbaha edwɛkɛ mɔɔ kɛmaa ɛ nee wɔ sua nu amra kɛnyia ngoane la.’ 15Na membɔle ɔ bo kɛ metendɛ ala la yɛɛ Sunsum Nwuanzanwuanza ne rale bɛ nwo zo, kɛmɔ mɔlebɛbo ne ɔrale yɛ nwo zo la a. 16#Gyi 1.5 Na mengakyele mɔɔ Awulae hanle la, ɔse, ‘Dwɔn vale nzule a zɔnenle a, na bɛmɛ, bɛbava Sunsum Nwuanzanwuanza ne a bɛazɔne bɛ a.’ 17Na saa Nyamenle ɛmaa bɛdabɛ mɔɔ bɛnle Dwuuma la ahyɛlɛdeɛ, kɛmɔ mɔlebɛbo ne ɔvale ɔhyɛle yɛ kɛ yɛlie Awulae Gyisɛse Kelaese yɛli la a, ɛnee mame a le nwane, mɔɔ ɔwɔ kɛ metua Nyamenle adenle a!”
18Bɛdele ɛhye la, bɛgyakyile bɛ nvefenu ne na bɛyeyɛle Nyamenle bɛzele kɛ, “Nyamenle ɛmaa bɛdabɛ mɔɔ bɛnle Dwuuma la noko adenle kɛ bɛnlu bɛ nwo na bɛnyia ngoane mɔɔ ɛnlɛ awieleɛ.”
Anteɔko asɔne ne
19 #
Gyi 8.1-4
Sitivin ɛhunlɛ ne anzi, kpɔdekpɔde mɔɔ bɛyɛle diedima ne la manle bɛbɔle asande, bie mɔ hɔvindele Fonehyea, Saepelɛse nee Anteɔko bɛhɔhanle Edwɛkpa ne bɛhilele Dwuuma mɔɔ wɔ lɔ la ala. 20Diedima ne bie mɔ mɔɔ vi Saepelɛse nee Saelin la noko hɔhanle Edwɛkpa ne wɔ Anteɔko hilele bɛdabɛ mɔɔ bɛnle Dwuuma la. 21Awulae lile bɛ nzi manle menli dɔɔnwo liele lile na bɛhakyile bɛrale Awulae ɛkɛ.
22Gyɛlusalɛm asɔne ne dele ɛhye, na bɛzoanle Baanabase wɔ Anteɔko. 23Mɔɔ ɔhɔdwule na ɔnwunle kɛ Nyamenle ɛzi ɛlo menli ne la, ɔlile fɛlɛko na ɔzile bɛ kɛnra kɛ bɛva bɛ ahonle muala bɛzɔ diedi ne anu kpalɛ na bɛli nɔhalɛ bɛmaa Awulae. 24Baanabase mumua ne le sonlakpalɛ mɔɔ diedi nee Sunsum Nwuanzanwuanza ne ɛyi ye tɛkɛɛ la ati, ɔhwenle menli dɔɔnwo ɔrale Awulae ɛkɛ.
25Baanabase akee hɔle Taasɛse kɛ ɔkakpondɛ Sɔɔlo. 26Mɔɔ ɔnwunle ye la ɔ nee ye rale Anteɔko. Bɛ mu nwiɔ bɛ nee asɔnema ne dɛnlanle ɛvolɛ ko na bɛhilehilele bɛ. Na Anteɔko ɛkɛ yɛɛ bɛlumuale bɛvɛlɛle ɛdoavolɛma ne Keleseɛnema a.
27Mekɛ ne anu ala Nyamenle kpɔmanvolɛma bie vi Gyɛlusalɛm rale Anteɔko. 28#Gyi 21.10-11 Bɛ nuhua ko mɔɔ bɛfɛlɛ ye Agabɛse la dwazole luale Sunsum ne tumi ne azo hanle dole ɛkɛ kɛ ɛhɔne kpole bie bara ewiade amuala. (Ɛhye yɛle zɔhane wɔ Maanle Maanle Belemgbunli Kolɔdeɛse mekɛ zo.) 29Yemɔti diedima ne bɔle kpɔkɛ kɛ bɛkeha bɛ sa aze na mɔɔ bɛkɛnyia ye la bɛava bɛahɔboa mediema mɔɔ wɔ Dwudiya la. 30Bɛyɛle ɛhye na bɛvale mɔɔ bɛnyianle ye la bɛmanle Baanabase nee Sɔɔlo hɔmanle mgbanyima ne mɔ wɔ Gyɛlusalɛm.
Bible in Nzema © Bible Society of Ghana, 1998.