Gyi Mukenye
Mukenye
Ɛzoanvolɛma Gyima ne le Luku Edwɛkpa ne nzɔzo. Mɔɔ buluku ne gyi zolɛ ɛsesebɛ la a le kɛ Sunsum Nwuanzanwuanza ne zile manle Gyisɛse ɛdoavolɛma mɔɔ lumua la bɔle Gyisɛse anwo Edwɛkpa ne nolo “wɔ Gyɛlusalɛm nee Dwudiya amuala nee Samɛlea bɛhɔdwule aleɛabo ɛleka biala” la (1.8). Ɔle Keleseɛn fane ne abobɔlɛ wɔ Dwuuma avinli na ɔkile kɛ ɔzile ɔhɔle zolɛ na ɔrayɛle ewiade amra amuala diedi la anwo edwɛkɛ. Ahenle mɔɔ hɛlɛle la eza kulo kɛ ye kengavolɛma nwu kɛ Keleseɛnema anyɛ Wulomu maanle maanle ne anwo asiayɛ, yɛɛ bɛanyɛ bɛ nwo maanyɛlɛ fane bie mɔɔ kulo kɛ ɔdidi Wulomu maanle maanle ne mɔ abo a, na bɛkile kɛ Keleseɛn diedi ne si Dwuuma nyamenlezonlenlɛ ne pi.
Ɛzoanvolɛma Gyima ne gua ekpunli nsa, na ɔkile kɛ Edwɛkpa ne mɔɔ fane Gyisɛse anwo la anwo nolo zile dɛlɛle na ɔrayɛle asɔne la: (1) Keleseɛn fane ne abobɔlɛ wɔ Gyɛlusalɛm wɔ mekɛ mɔɔ Gyisɛse hɔle anwuma la, (2) ye ɛdɛlɛlɛ mɔɔ ɔdɛlɛle ɔhɔdwule Palɛsetanye afoa nu; nee (3) ye ɛdɛlɛlɛ bieko mɔɔ ɔdɛlɛle ɔhɔdwule Mɛdetɛlenia maanle maanle ne mɔ anu toonwo ɔhɔdwule Wulomu sua zo la.
Debie ko mɔɔ hyia Ɛzoanvolɛma Gyima ne anu la a le Sunsum Nwuanzanwuanza ne gyima kpole mɔɔ di la; bɛhile ɛhye wɔ ndenle ngakyile dɔɔnwo anu wɔ buluku ne anu. Ɔvale tumi ɔrɛlɛle diedima ne wɔ Gyɛlusalɛm wɔ Pɛntekɔso kenle ne na ɔzinzale bɛ ɔmanle bɛ nee bɛ asɔne mgbanyima ne mɔ anwosesebɛ wɔ bɛ gyimalilɛ nu. Keleseɛnema mɔɔ lumua la nrɛlaleɛ ne bɛhɛlɛ ye sikalɛ wɔ Nyamenle edwɛkɛ ne nolobɔlɛ dɔɔnwo anu, na mɔɔ bɛhɛlɛ ye wɔ Ɛzoanvolɛma Gyima ne anu la kile tumi mɔɔ wɔ nrɛlaleɛ ne anu wɔ diedima ne ɛbɛlabɔlɛ nee asɔne ne koyɛlɛ nu la.
Mɔɔ wɔ nu la
Anwomoalɛ wɔ edwɛkɛ ne ɛhanlɛ nu 1.1-26
1. Gyisɛse edwɛkɛ mɔɔ li amozi nee ye ɛwɔkɛ ne 1.1-14
2 Dwudase Kɔliagya 1.15-26
Edwɛkɛ ne ɛhanlɛ wɔ Gyɛlusalɛm 2.1—8.3
Edwɛkɛ ne ɛhanlɛ wɔ Dwudiya nee Samɛlea 8.4—12.25
Pɔɔlo ɛzonlenlɛ nwo edwɛkɛ 13.1—28.31
1. Edwɛkpa ne anwo adendulɛ mɔɔ lumua 13.1—14.28
2. Gyɛlusalɛm ayia kpole ne 15.1-35
3. Edwɛkpa ne anwo adendulɛ mɔɔ tɔ zolɛ nwiɔ 15.36—18.22
4. Edwɛkpa ne anwo adendulɛ mɔɔ tɔ zolɛ nsa 18.23—21.16
5. Pɔɔlo efiadelalɛ wɔ Gyɛlusalɛm, Sizalia yɛɛ Wulomu 21.17—28.31
Bible in Nzema © Bible Society of Ghana, 1998.