SENESI 14
14
Malo a Apalamo i te u hau
1Nee hoko leva ki te temi o Amilafele ko te hau o Sinea, mo Alisoke ko te hau o Elasa, mo Ketolaome ko te hau o Elame, pea mo Titeale ko te hau o Kosimi, 2nee natou tau leva kia Pela ko te hau o Sotoma, mo Pilisa ko te hau o Komola, mo Sineapi ko te hau o Atema, mo Semepele ko te hau o Sepoimi, pea mo Soale ko te hau o Pela.
3Ko natou aeni nee natou fakatahi leva i te vaevaeliua o Sitimi, ae ko te tai Mate. 4Koteuhi nee natou fakalogo kia Ketolaome ia tau e hogofulu ma lua; kae i te tau hogofulu ma tolu nee natou agatuu leva kia ia.
5Koia i te tau hogofulu ma fa, nee alu ai leva ia Ketolaome mo te u hau ae nee kau mo ia, o taui te kau Lefaimi i Asiteloti-Kalenaimi, mo te kau Susimi i Ami, pea mo te kau Emimi i Save-Kiliataimi, 6mo te kau Holi i tonatou mouga ko Seili, o kaku ki te ulu sene o Palani, ae e ovi ki te toafa. 7Pea nee natou liliu leva mai ai, o olo ki Ene-Misipati, ae ko Katesi, o taui te kau Amaleke i tonatou fenua, pea mo te kau Amole ae nee nonofo i Asasoni-Tamale. 8Koia nee olo ai leva te hau o Sotoma, mo te hau o Komola, mo te hau o Atema, mo te hau o Sepoimi, pea mo te hau o Pela ae ko Soa; pea nee natou tau leva, i te vaevaeliua o Sitime, 9kia Ketolaome, hau o Elame, mo Titeale hau o Kosimi, mo Amilafele, hau o Sinea, mo Alioke, hau o Elasa: ko te u hau e fa ki te u hau e nima.
10Nee fonu te vaevaeliua o Sitime i ni vaikeli pupulu. Nee feholaki leva te hau o Sotoma mo te hau o Komola, o fetooki ki te u vaikeli aia; kae nee hola leva ki te mouga te potu o te solia ae nee toe. 11Nee ave leva e te kau malo te u koloa fuli o Sotoma mo Komola, mo anatou tokonaki magisi fuli; pea nee natou olo leva. 12Nee natou ave foki mo ia Lote, foha o te tehina o Apalamo, ae nee nofo i Sotoma mo ana mea fuli; pea nee natou olo ai leva.
13Nee hau leva he tagata nee hola o fakaha te mea aia kia Apalamo, te tagata Hepeleo; kae nee nofo ia Apalamo i te ulu sene o Mamele, te tagata Amole, ko te tehina o Esekoli mo Anele, ae nee kau mo Apalamo. 14I te mau e Apalamo te logo kua ave popula tona tehina, nee ina tufa leva ni mahafu ki te toko tolugeau mo te toko hogofulu ma valu o ana tagata faifekau loto toa, ae nee tupu i tona fale, pea nee ina kapu leva te u hau o kaku ki Tane. 15Nee ina vae leva tana solia, ke ohofi natou i te pouli. Nee ina tamatei leva te u hau o kaku ki Sopa, ae e tuu i te fahai hema o Tamaso. 16Nee ina toe mau leva te u koloa fuli; pea nee ina toe mau leva ia Lote, tona tehina, mo ana mea fuli, mo te u fafine mo te hahai.
Tapuaki o Apalamo e Melekiseteke
17I te liliu mai a Apalamo i te osi o tana malo ia Ketolaome mo te u hau ae nee kau mo ia, nee alu leva te hau o Sotoma o fakafelavei kia ia i te vaevaeliua o Save ae ko te vaevaeliua o te hau.
18Nee fakatotonu leva e Melekiseteke, hau o Salemi, ke avake he pane mo he vino: nee pelepitelo ia ia o te Atua Maoluga. 19Nee tapuaki leva ia ia kia Apalamo, o ui: Ke tapuakina ia Apalamo e te Atua Maoluga, ko te pule o te lagi mo te kele! 20Ke tapuha te Atua Maoluga, ae kua ina tuku ou fili ki ou nima! Pea nee foaki leva e Apalamo kia ia te vaega hogofulu o te u mea fuli.
21Nee ui leva e te hau o Sotoma kia Apalamo: Foaki mai kia au te hahai, kae ke ke too ma au te u koloa. 22Nee tali leva e Apalamo ki te hau o Sotoma: E au hiki toku nima ki te Eteleno, ko te Atua Maoluga, ko te pule o te lagi mo te kele: 23e mole anai au too he mea i au mea fuli, tatau aipe pe ko he filo e tahi, pe ko he kaui uka hai sulie e tahi, o tupu ke aua naa ke ui: Kua au fakakoloa ia Apalamo. E mole pe he mea kia au! 24Kae gata pe ki te mea ae nee kai e te kau tupulaga, pea mo te vaega o te u tagata ae nee olo mo au, ia Anele, mo Esekoli, mo Mamele: ko natou aena e too anai onatou vaega.
© 2011, Eglise évangélique, chez Lotoato Logote Hihifo, Vaitupu, Wallis
- Les droits sont administrés par Midi Bible, une branche de la Société Biblique de Genève
- Rights are administrated by Midi Bible, a branch of Société Biblique de Genève, 1032 Romanel-Sur-Lausanne, Switzerland