EVASELIO A SOANE 2
2
Faiohoana i Kana
1Nee hili te u aho e tolu, nee i ai leva he faiohoana i Kana i Kalilea; nee nofo i ai te fae a Sesu, 2pea nee fakaafe foki ia Sesu mo ana tisipulo ki te faiohoana. 3I te mole kei he vino, nee ui leva e te fae a Sesu kia ia: E mole kei hanatou vino. 4Nee tali leva e Sesu kia ia: Fafine, pe e i ai he mea i te vahaa o oku mo koe? E heeki hoko mai toku hola. 5Nee ui leva e tana fae ki te kau tagata faifekau: Koutou fai te mea e ina ui atu anai kia koutou. 6Koeni, nee tuu i ai ni foi hina maka e ono, nee fakaaoga ki te fakamaa a te kau Sutea, pea nee lite fagofulu ape te hina e tahi. 7Nee ui leva e Sesu ki te kau tagata faifekau: Kotou fakafonu te u hina aena ki te vai. Pea nee natou fakafonu gutugutu leva natou. 8Nee ina ui leva kia natou: I te temi nei koutou ohu, pea koutou ave ia ki te pule o te kaitahi. Pea nee natou ave leva ia kia ia. 9I te ahiahi e te tagata pule o te kai te vai kua liliu o vino, nee mole ina iloi pe nee hau mai fea te vino aia, kae nee iloi lelei tona hauaga e te kau tagata faifekau ae nee natou ohu te vai, pea nee ina paui leva te tagata ohoana, 10pea nee ina ui age leva kia ia: Ko te tagata fuli pe, i te faimahani, e kamata i te fakahoa o te vino lelei, pea ka kamata konahia te hahai, e ina fakahoa leva te vino maamaa; kae ko koe, nee ke taofi te vino lelei o kaku mai ki te lakaga nei.
11Ko te uluaki milakulo leva aia, nee fai e Sesu i Kana i Kalilea. Nee ina fakaha leva tona kololia, pea nee tui leva ana tisipulo kia ia.
12I te hili o te mea aia, nee hifo leva ia Sesu ki Kafanaume mo tana fae, mo ona tehina, mo ana tisipulo, pea nee natou nonofo leva i ai i he u aho veliveli pe.
Kapu o te kau faifakatau i te fale tapu
13Nee kua ovi mai te Pasikate o te kau Sutea, pea nee hake leva ia Sesu ki Selusalemi. 14Nee ina mau leva i te fale tapu te kau fakatau vitulo, mo te kau fakatau ovi mo lupe, pea mo te kau fetogi paaga, kua natou nonofo i ai. 15Nee ina fai leva he suipi aki ni maea, pea nee ina kapu leva natou fuli mai te fale tapu, mo te u ovi, mo te u vitulo; pea nee ina veuki leva te paaga a te kau fetogi paaga, pea nee ina tokatokahi leva anatou laupapa. 16Pea nee ina ui leva ki te kau fakatau lupe: Koutou ave kehe te u mea aena i heni, aua takotou fakaliliu te fale o taku Tamai ko he fale faikoloa. 17Nee manatui leva e ana tisipulo nee kua tohi:
E tutu au e te ofa ki tou fale.
18Nee ui leva e te kau Sutea kia ia: Kotea te milakulo e ke fakaha mai kia matou, o uhiga mo te mea aeni e ke fai? 19Nee tali leva e Sesu kia natou: Koutou maumaui te fale tapu aeni, pea e au toe lagai anai ia i ni aho e tolu. 20Nee ui leva e te kau Sutea: Nee aoga ni tau e fagofulu ma ono ki te fakatuu o te fale tapu aeni, pea ko koe, e ke toe lagai ake anai ia i te u aho pe e tolu! 21Kae nee palalau ia ki te fale tapu o tona sino. 22Koia i tana toe tuuake mai te kau mate, nee manatui leva e ana tisipulo nee palalau ia o uhiga mo te mea aeni, pea nee natou tui leva ki te Tohi mo te folafola nee fakaha e Sesu.
23I te nofo a Sesu i Selusalemi i te aho o te Pasikate, nee tui leva he hahai kaugamalie ki tona huafa, i tanatou sio ki te u milakulo nee ina fai. 24Kae nee mole pe falala ia Sesu kia natou, koteuhi nee ina iloi ia natou fuli, 25pea nee mole aoga kia ia ke fai age he fakamooni o uhiga mo he tagata; koteuhi nee ina iloi te mea i te loto o te tagata.
© 2011, Eglise évangélique, chez Lotoato Logote Hihifo, Vaitupu, Wallis
- Les droits sont administrés par Midi Bible, une branche de la Société Biblique de Genève
- Rights are administrated by Midi Bible, a branch of Société Biblique de Genève, 1032 Romanel-Sur-Lausanne, Switzerland