YOHANES 1
1
Jipic juwas “Atakam,” jiwnenakas, ow batatamtotor ipic ara
1Jipic juwas “Atakam” awamec. Ametnak ara, Allah a capinmi bakenemtiw opok ara, bare e jipic juwas “Atakam” emeememawirien. E “Atakam,” Allah cowkon aemapawirisen. E “Atakamam” Allah arawen. 2Ametnak ara, e “Atakam,” Allah cowkon aemapawirisen. 3E “Atakam,” e pokin pokin takas akenemapomefen. E pok ji arma bwerap opok cowok arawen. 4E “Atakam,” jiwnenakas, ow batatamtotor ipic arawen. E jiwnenakas aomomames ow, bi binip umuton aceceremames. Aram sereas aman ajarmes. 5E sereas e jiwic asan aseremtiwma. E jiwicas nat, e sereas bwemsapimapom asan opok.
6Bare, Allah jipic cowok atewosomef. E ipic juwas Yohanes ara. 7E ipic e sereas atakam botaw aapenawef. Ar ow takas e atakam jen baji, wunam e atakam basicim, inim aapenawef. 8E Yohanes, e sereas baseremapom ipic opok. E nat, ar e sereas baseremapom ipic atakam botaw aapenawef. 9E sereas baseremapom ipic, bare anakat ara. Aram awames capinmi aenawef. Aram ow takas aseremapomama.
10Aramat ipic awames capinmi aemapawiri. Aram a capinmi akenemtiwef. E nat, a capinmi ow e aramat ipic amsom opok aemapfes. 11E aramat ipic e asamat ameromef. E nat, e ajowow e aramat ipic batewet opok aemfes. 12E wun ow nat, e aramat ipic atewetfes. Aram e aramat ipic asicimfes. Aramat ipic masirin, e ow, Allah atiperes atawemef. 13E ow Allah atiperes aememfes ara, ar asmat jiwi cimin bajisames opok. Aricipic, bare asmat ipic opok. Aricipic Allah ara.
14E “Atakam” asmat ipic ajaworemef. Aram dar akac aomomforow. Daram e arakatnakutas aporfom. E akatnakutas e aricipic e atiw cowokut atetamefas ara.
15Yohanesam e ipic atakam afakayotawef. “E atakam aotawawiru ipic awamec ara. E aotawawiru atakam, ‘Aramat ipic dofa asep aenawcema. E nat, do bajisames opok emof, aramat ipic bap a takam emcaememef. Inimas aramat ipic ow awut ara. Dor masirin ow kanim.’ Inim aeawiru.” Yohanes inim aeef.
16Bare, e “Atakam,” damos awutnakut dar ajiomawiruw. Aram asan akatnakut dar atatamawiruw. 17Bare, Allah e a Jirmec Musa atetamefen. Musa masirin, eJirmec e wun ow aotetamefen. E nat, Allah e Yesus Kristus atewnemef. E aramat ipic msirin, asan akat, asmat ow aomef. Aram atakamnak, e ow atatitamef. 18Owam Allah bi bwempor asan opok cowok. E atiw cowokut, bare Allah cowkon aemapma. Aramat ipicam Allah atakam aotawkurumforow.
Yohanes Bwi Babwim Ipic e atawef atakam
(Mat. 3:1-12; Mrk. 1:1-8; Luk. 3:1-18)
19-20Bare, e Yerusalem Yahudi ow, Allah atakam mamtaw tugas owam, Lewi samat owam, e Yohanespu atewosomfes. “E Yohanes ca ipicamnew?” inim jonow batowpor atewosomfes. E Yohenas masirin, atakam umuton cowok aotawef. “Dor e Allah Aeremtewef Ipic opok.” Inim aeef. 21E owam, jonow, aotowporfes. “O nat, ca ipicam? Ametnak ara, Allah atakam botaw ipic juwas Elia aememefen. Or e Elia aranew?” Inim aefes. Yohanes masirin, “Doram Elia opok.” Inim aeef. E owam, “Or e Allah atewenamcow atakam botaw ipicut aranew?” Inim aefes. E Yohanes nat, “Doram e ipic opok.” Inim aeef. 22E ow masirin, “O nat, ca ipicamnew? Or ucimas aemamemnew? Dar e jirmec ajirimenamforow ow inim atakam botaw.” Inim aefes. 23Aramat ipic masirin, “Dor cem opok asan atakam bafakaytaw ipic ara. ‘E Tuhan aenawcema. Car e aramat ipic ajarcow bokotpu tarowat mamkenemtiwey.’ Inim aemin.” Yohanes inim aeef. Bare, e atakam, e ametnak aemawiri Allah atakam botaw ipic juwas Yesaya, e atawef atakam jipu ara. 24Bare, e Yohanes aenawomfes ow e Parisi ow jirmec ajirimenamfes ow ara. 25Aram jonow aramat ipic aotowporfes. “Or e Allah Aeremtewef Ipic arapoknew, or e Eliam arapoknew, or e Allah atakam botaw ipicam arapoknew, or ow bwi abwimamem ucimaram?” Inim aefes. 26E Yohanes masirin, “Dor ow bwi abwimamin. E nat, e awamcokom ow aman ara, jipic cowok awamec. Caram e ipic camsom opok. 27Ar e dofa asoromcan ipic ara. Ar ow awut ara. Dor kanim. Inimas dor e asandal somen bwemsurumtam asan opok.” Inim aeef. 28Bare, eras takas e Betania capinmi aemfes. E capinmi e Yordan jo poman ara. Er e Yohanes bwi abwimef asan ara.
Allah aDomba Jiwi
29Ajofay ara masirin, e Yesus e Yohanespu aapenef. E Yohanesam aramat ipic aporef. Ar masirin, “Jakaperey. E aapenawmar ipic, e Allah aDomba Jiwi ara. Aram asmat dosa bakokoromosomtam ipic ara. 30E atakam aotawawiru ipic awamec ara. E aotawawiru atakam, ‘Aramat ipic dofa asep aenawcema. E nat, do bajisames opok emof, aramat ipic bap a takam emcaememef. Inimas e ipic ow awut ara. Dor masirin, ow kanim ara.’ Inim aeawiru. 31Doram e ipic nomsom opok aememof. Do nat, aenawof. Doram ow bwi abwimof. Eras e Israel ow e ipic amsom boporemapas ara.” Yohanes inim aeef.
32Bare, e Yohanes atakam aotawef. “Dor e Allah Roh, e onam op ewneyef aporof. Ar pari cimin, e aramat ipic dam ton aneyapef. Aram inim aatamemapef. 33Doram e ipic namsom opok aememof. E nat, e ow bwi babwim atewenamfan ipic, atakam dor aotawfan. ‘Or e Allah Roh, jipic cowok dam ton baneyap aporcemem. Bare, e ipic e Roh Kudus, asmat ow jak aman bafimimtam ipic ara.’ Inim aefan. 34Bare, doram eras emcaporof. Doram atakam emcaotawof. ‘Aramat ipic Allah atiw ara.’ Inim aeof.” Yohanes inim aeef.
E Yesus bap ajamkawifes ow
35Bare. Ajofay ara, e Yohanesam, e amamkawi ipic jamnukam, aememfes. 36Yohanes e Yesus erasan aokorsakayenef aporef, aram atakam aotawef. “Jakaperey. Ewamec ipic, Allah aDomba Jiwi ara.” Inim aeef. 37E amamkawi ipic jamnuk e atawef atakam jen ajifes. Ar masirin, Yesus ajamkawifes. 38Yesusam asep asamanam ajief, wunam e ow e a mamkawi aporef. Ar masirin, jonow atowef. “Car ucim pokam?” Inim aeef. E ow masirin, “Rabi! Or ca cem jamememamem?” Inim aefes. (“Rabi,” daratakam juw buwumtew “guru” ara.) 39Aramat ipic masirin, “Deyo. Caram baporey.” Inim aeef. E ow masirin, akac aapenfes. Aram e aramat ipic aememef asan aporfes. Er porow jam empat aranew. Aram e jofay e aramat ipic akac aemapfes. 40Bare. Jipic jamnuk e Yohanes atakam jen ajifes, wunam e Yesus ajamkawifes. E wun ipic cowok juwas Andreas ara. Ar Simon Petrus arewec ara. 41Aramat ipic e arepwec juwas Simon asarimpowtewef. “Dar e Allah Aeremtewef Ipic apowtewfom.” Inim aeef. “E Allah Aeremtewef Ipic,” Yunani atakam juw buwumtew, “Kristus” ara. 42Aram e Simon, Yesuspu atowocenef. Yesus masirin, e Simon manmok apematamef, wunam. “O Simon, Yohanes atiw ara. E nat, o juwas Kefas aamamin.” Inim aeef. (E “Kefas,” Ibrani atakam ara. E Yunani atakam masirin, juwas “Petrus” ara. E daratakam juw buwumtew, juwas “Ek” ara.)
Yesus e Filipusam, e Natanaelam, a mamkawi jirmec ajirimef
43Bare. Ajofay ara, Yesus e Galilea capinmi baysos atakam asakamtiwef. Aram Filipus apowtewef, wunam atakam e aramat ipic aotawef. “Mamkawican.” Inim aeef. 44E Filipus kota Betsaida ipic ara. E Andreasam, e Petrusam, kota Betsaida ow ara. 45E Filipus masirin, Natanael apowtewef, wunam atakam e aramat ipic aotawef. “E musa, jipic cowok atakam, e Allah Jirmec surat aman aeapomefen. E Allah atakam botaw owam, e ipic atakam, surat aeapomfesen. Bare. Daram e ipic apowtewfom. Er e Nasaret ipic juwas Yusuf atiw ara. Ajuwas Yesus ara.” Inim aeef. 46E Natanael nat, “Akatas e Nasaret aewenawcemare?” Inim aeef. E Filipus masirin, “Dey. Baporey.” Inim aeef. 47Bare, Yesus e Natanael a bwenawom aporef, wunam atakam aotawef. “Jakaperey. A ipic Israel ipic anakat ara. Aram tarowatnak ipic ara.” Inim aeef. 48E Natanael masirin, “E dor atakam omsom ucim emfem?” Inim aeef. E Yesusam, “E Filipus o bayte opok eman, doram or e os juwas ‘arā’ bopan emaperem aporey.” Inim aeef. 49E Natanael masirin, “Guru! Or Allah atiw ara. Or e Israel ow aRaja Ipic ara.” Inim aeef. 50E Yesus atakam, “Dor atakam or aotawey, ‘Dor or e arā os bopan emaperem aporey,’ inim aeey. Or inim atakam apormem, wunam asicimamenemnew? E atawey atakam nat, junum bweas, kanim inim ara. Asep jofay oram awutas aoporcemem.” Inim aeef. 51Yesus masirin, wun atakamam aotawef. “Atakamnak ara, car e onam op bamuap aporcomokom. Car masirin, Allah amalaikat, e Asmat Anakat Ajaworemef Ipic dampu, cenes juw uwuneya, op juw uwutometa, inim aeces aporcomokom.” Yesus inim aeef.
LAI 1985