Yohanes 1
1
Ebe Wene iti abat ageikhe wene
1Ebekeram erlo baga nen, wene Ebe Wene welageikhe. Ebe Wene iti, Allah ipisagat dogolik, ebe Allah at. 2At iti ebekeram erlo baga nenat Allah ipisagat dogolik, 3yi meke ti meke tha'bokhogonat Allah nen walhasikhe iti, at Ebe Wene nenat walhasikhe. At ebe dek dogolepma, opakiat ageikhe walhelep degat o. 4Ninilugutninakherek meke erlo arat welagarek iti nen, nit akhuni liatninabi ageikhe. 5Nit o mummo werekma liatninabi ageikhe meke yibarlek werekma, o mum iti nen, o lia etnogo damutdusak erlok dek nen yibarlegat welagarek.
6-7O liatninakherek meke iti ilu meke nen abok yoknisoagaluk, ap etaga Yohanes iti Allah nen ayoko 'biluk la'i ageikhe. La'i ageikhemo wageikhe iti, o liatninakherek meke iti, abok yogeisugunem, akhuni tha'bokhogonat inetaiken at oba hakotduagaluk wageikhe iti. 8At ebe liatninakherek meke iti 'buk. At liatninakherek meke iti abok yogeisa ageikhe. 9At lia ebe meke iti, agat oba yoma waga dogolik, nit akhuni tha'bokhogonat ninebe dopok liatninabi ageikhe.
10At nenat pogot agat walhasikhe meke re, at ebe agat oba yoma wageikhesik werekma, it akhuni agat oba meke yoma nen, at ebe hutdigidek welagoukha. 11At ekaerek ailaat wageikhe meke re, at oe agot nen ebe waganhidek thogotdisukha. 12Itithogon thogotdisukha meke re, it akhuni aperek nen, at ebe waganiluk nen, inetaiken at oba hakotdisukhama, Allah a'buri ebeat meke asuagaluk iterinakhikhe. 13Iterinakhikhemo, at a'buri agoukha iti, akhuni ina'buri itaginabu warlok nen inamep meke dogum walogo itaginakharek iti hakene 'buk. At Allah nenat itaginakhikhe o.
14Ebe Wene etnogo abat ageikhesik ninomat welagagu. Ninomat dogolik, at ebe iti Allah a'but irlagapi itago etnogo, hogorakharek meke ninileken hasugu o. At obabut hano nen, hanorogo hagatninakhik, wene ebe wene yoknisigik, hagakho motok werekma ninileken hasugu.
15Wene at ebe hasik Yohanes nen men yogeisasikhe,
“An noporlik yabokane ap ageikhe wisigin, iluk abok yokhisekhe lagei etnogo, ebe yiat o. At yi yabokane an noporlik waga meke re, ebe an aban itaklagidek werek korlek, at alebat welagaikhe iti nen, an nebe erlok dek o. Kok he, arat o,” iluk, ane kokhogon yogeisasikhe.
16Nen, at obabut hano motok nen ninebe tha'bokhogonat eran-alep hanotninakho motok werek o. 17Wene Allah nen ninasuk wakhikhe wene etnogo yakulnisoagaluk, alebat Musa la'i ageikhemo, yakulnisasikhe meke re, Allah obabut hano nen hanotninakhik, ebe wene yakulnisigik, hagasuagaluk, Yesus Kristus la'i ageikhemo yakulnisa ageikhe iti o. 18Akhuni nen Allah ebe inileken motok higidek meke re, at a'but irlagapi itago opase alilu ipisak welageikharek meke iti nenat Allah ebe hutukhogo yakulnisa ageikhe iti.
At Yohanes ekaerek hasik abok pilinerogo yogeisasikhe wene
(Matius 3:1-12; Markus 1:1-8; Lukas 3:1-18)
19At Yohanes nen wene itithogon yogeisekho werekma, it ap Allah iteerek meke men, inukuloak etaga Lewi meke men, inom nen,
“Yohanes. Hat hebe tha hak nogo,” iluk oba hinok waganuagaluk, ap Yahudi meke o Yerusalem nen la'isa agoukhama Yohanes oba wagoukha. 20Wagoukhasik, at oba hinok waganhukhama, at Yohanes nen ekaerek abok la'belogo yogeisigidek, pakhogonat yogeisekhe dogolik, men yogeisasikhe,
“An nebe re, akhuni tilninabuagaluk Allah nen ayoko 'biluk la'isigin isikhe etnogo 'buk. Dek o,” iluk yogeisasikhe. 21Itithogon yogeisasikhemo it nen, men yogokhukha,
“Halok he, hat hebe tha nogo? Hebe Elia a?” iluk yogokhukhama, at nen,
“An nebe at iti 'buk, ninat o,” iluk, yogeisekhe lageikhemo, it nen men yogokhukha,
“Halok he, ap ageikhe Allah ane yoknisekhe dogoagaluk ayoko 'biluk la'isigin isikhe etnogo a?” iluk yogokhukhama, at nen,
“Iti an degat o,” iluk yogeisasikhe. 22Itithogon yogeisasikhemo it nen, men yogokhukha,
“Halok he, hat hebe tha nogo. Nit wene hutukhogon yoknisaumo, it ap nit la'inani ageikha meke, nit nen wene ageikhe yogeisa luok nen, hat hekaerek habok hasik nikithogon egetek. Ninilu asuak nen, yoknisan o,” iluk yogokhukha. 23#Yesaya 40:3 Itithogon yogokhukhama, at Yohanes nen, men yogeisasikhe,
“Ap Yesaya Allah ane yogeisekhe lageikhe meke etnogo nen, men isikhe,
Ap ageikhe o limo akhuni dekma etoma ane, kokhogon ekhe dogolik,
Ninoe Etagapogot wisiginke holak mothogon yakhe dogoni o, iluk ekhe dogogin,
iluk isikhemo holal waganek werek etnogo re, nebe anat o,” iluk yogeisasikhe. 24Yogeisasikhemo, it ap wagoukha iti, it ap Farisi meke nenat la'isa agoukhama wagoukhasik nen, ageikhe men yogokhukha,
25“Hat nen,
An nebe, Allah nen akhuni tilninabuagaluk ayoko 'biluk la'isigin isikhe etnogo dek o. Nen, Elia degat o. Nen, Allah ane yoknisekhe dogoagaluk la'isigin isikhe etnogo degat o, egen meke re, nenaluk akhuni ima usa'isekhe lagan?” iluk yogokhukhama, 26at Yohanes nen, men yogeisasikhe,
“An nen akhuni ima usa'isekhe lagei anek meke re, ap ageikhe hit nen ebe hutdigidek meke hinaklake metek werek o. 27Ap iti ebe an noporlik yabokane wisigin meke re, at ebe motok kok. An nebe yekerek iti nen, at isok agot herle warek meke iti, an nen hisalusak erlok dek o,” iluk yogeisasikhe. 28Wene itithogon isukha iti, i Yordan aik ilibaganke, Yohanes nen akhuni ima usa'isasi lageikhe baga, o etaga Betania dogolik nen isukha.
Yohanes nen Yesus ebe yakulisasikhe wene
29Wene itithogon isukhasik nen, noge iluk, hubuluke, at Yesus Yohanes oba wagunem ileken lakhalok nen, wene men yogeisasikhe,
“Allah adomba eak meke nit akhuni agat oba yoma weak hagakhorek meke korogo thogotdisagein meke etnogo waga ili hinileken lakhani o. 30Alebat wene an nen yokhisekhe dogolik,
Ap ageikhe noporlik wisigin mekeat he, an aban itaklageidek werek korlegat welageikhe iti nen, an nebe yekerek meke re, at anek motok kogat o, iluk, abok yokhisekhe lagei etnogo, ebe waga ithiat o. 31Alebat, at ebe an nokodekma, at ebe tha heat, hutdigidek welagei meke re, akhuni Israel meke at ebe inilu asuagaluk ima usa'isekhe dogeigiluk wagei iti,” iluk yogeisasikhe.
32Itithogon yogeisasikhesik nen, yabokane at ileken hasikhe meke pakhogon men yogeisasikhe,
“Allah Agoreke thue merpati yogeik negen pogot oba nen usa'agasik Yesus oba labek werekma an nileken higi o. 33Itinem, at ebe tha heat an nokodek welagei meke re, Allah nen an akhuni imaat usa'isekhe dogoagaluk la'ani ageikhe meke etnogo nen yoknekhe dogolik, men yoknikhikhe,
An Nagoreke ap ageikhe oba labi usatluk werekma hileken hegen halok he, at iti nen akhuni ima usa'inabu hak, Nagoreke inoba usa'aga dogogin o, iluk, yoknikhikhemo nogo nen, 34at ebe an nileken hutukhogo higirik nen hutdigi o. Itithogon hutdigirik, at iti Allah a'but eberogonat o, iluk, abok hit pakhogo yokhisekhe lagei yi,” iluk yogeisasikhe.
At Yesus agarumi ebekeram oporlik lagoukha wene
35Itithogon yogeisasikhesik noge iluk hubuluke, at Yohanes ebe men, agarumi at ane waganhe lagoukha meke inebe pere men, inomat etoma metek welagoukha. 36Itithogon metek werekma, at Yesus holak iti baga lagaluk wagunem Yohanes ileken lakhalok nen, men yogeisasikhe,
“Allah adomba eak meke etnogo waga ili hinileken lakhani o,” iluk yogeisasikhemo, 37at agarumi inebe pere eranogo at ane yogeisasikhe meke inasuk holhukhasik nen, Yesus oporlik lagoukha. 38Itithogon oporlik lagunem, Yesus nen ileken dagakhogon 'birisekhe dogolik, men yogeisasikhe,
“Nagarumi. Hit nena meke herarik wagap,” iluk yogeisasikhemo, it nen, nit ninane baga,
“Wene yakulnisegetek meke noe,” iluk u hak, inane baga,
“Rabi noe. Hat hai o koma welagatek meke,” iluk yogokhukhama, 39at nen,
“Hit nen hinileken tomok hobageik nen witni o,” iluk yogeisasikhe. Itithogon yogeisasikhemo, it ipisagat inom lagoukhasik, o hiamaganeke jam 4 hakene at welageikhemo inileken hasukhasik, inom welagoukha.
40Nen, it ap inebe pere Yohanes ane isinem inasuk holhukhasik, Yesus oporlik lagoukha meke eta ap ageikhe etaga Andreas, Simon Petrus etnogo agot. 41Yesus oporlik lagoukhasik inom welagoukhasik nen, at Andreas iti tak oe Simon etnogo herarik lageikhesik, ipisak abuk agoukhasik nen, men yogokhikhe,
“Mesias etnogo nit arat ninom abuk ago,” iluk yogokhikhe. (Mesias isukha iti, nit ninane baga Kristus Allah nen akhuni tilninabuagaluk la'isigin isikhe etnogo u hak, it inane baga Mesias egarek.) 42Itithogon yogokhikhesik Yesus oba wolok wageikhemo, at Yesus ileken at oba lakhasikhesik nen, men yogokhikhe,
“Simon Yohanes a'but yi, nagot. Hat hetaga Kepas ekhe dogoagaluk thalhakhi o,” iluk yogokhikhe. Itithogon yogokhikhe iti, nit yoma ninane baga etaga helekit u hak, it Yunani inane baga Petrus egarek hak, Ibrani inane baga etaga Kepas iluk thalhikhe iti.
At Yesus nen Filipus Natanael ipisak inayoko 'bisasikhe wene
43Itithogon isikhesik noge iluk hubuluke, at Yesus o Galilea dageisigiluk akla apasikhesik nen dagei ageikhe hak, ap etaga Filipus ipisak abuk agoukhasik nen, men yogokhikhe,
“Nagot. An noporlik eme o,” iluk ayoko 'bisikhemo oporlik lageikhe. 44At Filipus iti, Andreas Petrus ipisak inom inai ukul o Betsaida opakimo meke. 45Oporlik laga dogolik, at Filipus etnogo nen yabokane Natanael herakhikhesik men yogokhikhe,
“Natanael. At Musa nen wene Allah nen ninasuk wakhikhe wene etnogo baga, ap ageikhe abok ekhe dogolik, holal waganhik, nen, it ap Allah ane yogeisekhe lagoukha meke emenogo nen abok ekhe dogolik, holal waganhik, hagakhukha meke etnogo, nit arat herakho. At ebe re, Yusuf a'but o Nazaret meke Yesus at o,” iluk yogokhikhe meke re, 46at Natanael nen, men yogokhikhe,
“A! O Nazaret eloma nen hano meke ageikhe erlok wisusak a? Erlok dek o,” iluk yogokhikhemo, at Filipus nen,
“Hat hileken tomok 'bikhanok nen eme o,” iluk yogokhikhe. 47Itithogon yogokhikhemo, at Natanael Yesus oba wisigiluk wagunem, at Yesus ileken lakhalok nen, at abok men yogeisasikhe,
“Ap ithi ebe Israel meke eberogonat meke. Ane pere ekherek motok dek meke ithi lakhani o!” iluk yogeisasikhemo, 48at Natanael nen,
“Eiye! Noe. An hagakherek meke nobabut nikithogon nen hilu agama o?” iluk oba hinok waganhikhemo, at Yesus nen, men yogokhikhe,
“Nagot. Filipus nen hat aban wahikhidek werek korlek, hat hebe o ara erloma hurek welagan etnaga, an tak nileken hiigi o,” iluk yogokhikhemo, 49at Natanael nen, men yogokhikhe,
“Noe. Allah a'but nit Israel meke ninoe kok Hetagapogot harat hiigi o,” iluk yogokhikhe. 50Itithogon yogokhikhemo, at Yesus nen, men yogokhikhe,
“An nen,
Hat o ara erloma hurek welagan etnaga an tak nileken hiigi o, iluk, yokhikhi iti baga nen tetaiken an noba ebekhen a? Iti we herlekha'bugat negen hagakhunem neegen meke re, yabokane kokhogon hagakhunem hileken neegein o,” iluk isikhesik, 51yabokane wene ageikhe men yogeisasikhe,
“Yabokane pogot kagoukhogon it malaikat Allah nen yoko la'isa agarek meke emenogo an abat itaklasi agagi etnogo noba dageigik usigik hagakhunem hinileken neekhe dogogun o, iluk nane eberogonat yokhisigi,” iluk yogeisasikhe.
