Joani 1
1
1Hatachi hadiŋi Izu, Izu dadiŋi naNzambi. Izu dadiŋi Nzambi. 2Diyi wadiŋi naNzambi hamu, kufumisha kutachi. 3Yuma yejima ayileŋeli kudi yena. Hikwekala chuma chaleŋeluwu chakubula yena kuchileŋaku. 4Mudi yena mwadiŋi wumi, wumi owu wadiŋi chejeji chawantu. 5Chejeji ochu chatoŋekaŋa mumwidima, mwidima hiwatwesheli kujima chejejuku.
6Kwenjili iyala wumu atemesheluwu kudi Nzambi, ijina dindi Yowanu. 7Yeniwu wenjili ekali chinsahu chachejeji ochu, kulonda ejima aketiyi chakushimunayi yena Yowanu. 8Yena hadiŋi diyi chejejuku; wenjili kulonda akekali chinsahu chachejeji ochu. 9Chejeji chalala chenzaŋa mumpata yamunu mwishina, chatoŋekaŋa mudi antu ejima. 10Yena wadiŋi munu mwishina; mpata yamunu mwishina ayileŋeli kudi yena, akwampata yamunu mwishina hiyamwilukiluku. 11Wenjili kuyuma yindi yomweni, antu indi yomweni hiyamutambwiluku. 12Ilaŋa ejima amutambwili, wayinkeli Ŋovu yakwikala anyana kaNzambi, wowenawa akukuhwelela ijina dindi. 13Wena chavwalikiluwu, hiyavwalikili kumashi hela mwatopwelaŋawu antu hela mwavwalikaŋawu antuku, avwalikili kudi Nzambi.
14Izu dabalumukili kwikala muntu; washakamini mukachi ketu, hitukubanjila lubanji lwakulema kwindi, kulema kwaMwana kaTata wumu hohu, wasweja luwi ninsaŋu yalala.
15Yowanu hakwikala chinsahu chakumushimuna, hakubidika nindi, Yeniwu diyi nateneni, nami kukunlondela wambadikami, muloŋa yena wadiŋi kwoku ami kanda nivwaliki. 16Kukwinzala kwindi wejima wetu tunatambuluku, niluwi lwakulunjika haluwi. 17Muloŋa nshimbi ajiheni kudi Mosi, hakwila luwi ninsaŋu yalala yenjili naYesu Kristu. 18Hikwekala muntu wamonahu dehi Nzambuku, owu Mwana wumu hohu wekala muntulu yaTata, diyi namulumbululi chachiwahi.
19Diwu wunsahu washimwini Yowanu, hatemesheluwu aYudeya atupristu nawaLevi afumi kuYerusalema ayi kudi yena, amwihuli nawu, Yeyinyi? 20Hakuyileja chalumbuluka chikupu nindi, Ami hiniKristuku. 21Wena hiyakumwihula nawu, Indi dinu yeyinyi? Yeyi Elija tahindi? Yena nindi, Nehi. Nawu, Wuyenowu kaprofwetu tahindi? Yena hakwakula nindi, Nehi. 22Dichi hiyakumwihula cheŋi nawu, Yeyinyi? Muloŋa tunakeŋi kutwala mazu kudi antu atutemesha. Eyi aweni waditenaŋa neyidi? 23Yena nindi, Yami mbila nabidikaŋa mwisaŋa nami, Ololenu njila yaYehova; mwomwahosheli kaprofwetu Isaya.
24Hadi owu atemesheluwu hadiŋi aFwarisi; 25hiyakumwihula nawu, Neyi eyi hiwuKristu hela Elija hela yenowu kaprofwetuku, ochu wapapatishilaŋadi? 26Yowanu hakwakula nindi, Ami naŋapatishaŋa mumeji; mukachi kenu munemani namutu mwabula kwiluka; 27yena wukunlondela, ami hinateli kumusubula nkwabiluku. 28Yumiyi ayilili muBetani kwishinadi daYodana, kwapapatishilaŋayi Yowanu.
29Chikunachi, hakumona Yesu wudi nakwinza kudi yena, nindi, Talenu Mwana kaMukoku waNzambi, mukwakufumisha nshidi yawantu ampata yamunu mwishina. 30Diyi iwu nateneni nami, Kukunlondela iyala wambadikami, muloŋa yena wadiŋi kwoku ami kanda nivwaliki. 31Hela ami, hinamwilukiluku. Chinenjili nakupapatisha mumeji, nalondeli nami nakamumwekeshi kudi aIsarela. 32Yowanu hakushimuna wunsahu nindi, Namweni Spiritu nakusuluka mwiwulu neyi katela, hakushakama hadi yena. 33Hela ami, hinamwilukiluku; ilaŋa owu wantemesheli nakupapatisha mumeji, diyi wanlejeli nindi, Muntu iwakamona Spiritu hakusuluka nakushakama hadi yena, diyi wapapatishaŋa mudi Spiritu Wajila. 34Ami namoni namesu, hinukwikala chinsahu nami, Diyi Mwana kaNzambi.
35Chikunachi nawa cheŋi, Yowanu hakwimana niatumbanji twindi ayedi hamu. 36Hakushinshika Yesu chakwendayi nindi, Talenu Mwana kaMukoku waNzambi. 37Awa atumbanji twindi ayedi hiyakumutiya chakuhoshayi, niwena hiyakumulondela Yesu. 38Yesu hakushetumuka, hakuyimona chadiŋi nakumulondelawu, hakuyila nindi, Mukukeŋadi? Wena hiyakumwakula nawu, Eyi Rabi; chaya mukwila nawu Nkuluŋaŋa; washakama kudihi? 39Yena hakuyila nindi, Inzenu mutali. Dichi ayili, amweni kwashakaminaŋayi; ifuku odu hiyakushakama nindi; kwela dehi melela. 40Wenawa ayedi atiyili chahosheliyi Yowanu amulondeli Yesu, wumu wadiŋi Anderi, mana kwaShimona Petulu. 41Diyi wásambilili kuwana mana kwindi yomweni, Shimona, hakumuleja nindi, Tunawani dehi Mesiya; chaya mukwila nawu Kristu. 42Yena hakumuleta kudi Yesu. Yesu hakumutala swi-i, nindi, Eyi wuShimona, mwana kaYowanu, akakutumba nawu Kefasi; chaya mukwila nawu Petulu.
43Chikunachi cheŋi, hakwila nindi, Tukuya muŊaliliya. Awana niFwilipu. Yesu hakumwila nindi, Nlondi. 44Fwilipu wadiŋi muntu wakuBeteseda, mukala waAnderi naPetulu. 45Fwilipu hakuwana Nataneli, hakumwila nindi, Tunawani muntu atenenuwu kudi Mosi munshimbi, nikudi atuprofwetu, diyi Yesu wakuNazareta, mwana kaYosefu. 46Nataneli hakumwila nindi, Chuma chachiwahi chitweshi kufuma muNazareta? Fwilipu hakumwila nindi, Inzaku wutali. 47Yesu hakumona Nataneli wudi nakwinza kudi yena, hakumutena nindi, Talenu kaIsarela kakeni wakadi makasu. 48Nataneli hakumwila nindi, Wunaŋiluki ŋahi? Yesu hakumwakula nindi, Chiwadiŋi mwishina dachikuyu, Fwilipu kanda akutambiki, nakumona. 49Nataneli hakumwakula nindi, Eyi Rabi, yeyi Mwana kaNzambi, yeyi Mwanta waIsarela. 50Yesu hakumwakula nindi, Wunetiyi nanochu chinakwili nami nakumona mwishina dachikuyu, tahindi? Wamba kamona yacheŋi yakubadika yeniyi. 51Hakumwila nindi, Chalala chalala, nukuyileja nami, mwamba kamona iwulu hidikwenzuluka, niaŋelu aNzambi hiyakukandama nakusuluka hadi Mwana kamuntu.
The Bible in Lunda: Ndembu (Lunda of Kalunda) © B. F. B. S. 1962.