Joani 3
3
1Kwadiŋi iyala wumu, kaFwarisi, nyuli yawaYudeya, ijina dindi Nikodemu. 2Yeniwu wayili kudi yena nawufuku, hakumwila nindi, Eyi Rabi, etu tuneluki netu eyi wunkuluŋaŋa wafuma kudi Nzambi; muloŋa yinjikijilu iyi yiwelaŋaeyi kwosi muntu niwumu wukutwesha kuyila, chiŋa wekala naNzambi. 3Yesu hakumwakula nindi, Chalala chalala, nukukuleja nami, muntu kutwesha kumona wanta waNzambi chiŋa avwalika chachiha. 4Nikodemu hakumwila nindi, Muntu wakula dehi wukutwesha kuvwalika ŋahi? Wukutwesha kwijila mwivumu damama yindi kamuchiyedi avwaliki cheŋi, tahindi? 5Yesu hakwakula nindi, Chalala chalala, nukukuleja nami, muntu kutwesha kwijila muwanta waNzambi, chiŋa avwalika nikumeji nikudi Spiritu. 6Chavwalikaŋa kumujimba himujimba; chavwalikaŋa kudi Spiritu hispiritu. 7Bayi wuhayama chinakwili nami chiŋa muvwalika chachihaku. 8Mpepela yakunkaŋa kwokuyinakeŋi kuya kwoku, eyi watiyaloŋa chiyikuvuma, ilaŋa kwiluka kuyikufuma, hela kuyikuya nehi, dichi chaduwu ejima akuvwali ka kudi Spiritu.
9Nikodemu hakumwihula nindi, Yumiyi yikutwesheka ŋahi? 10Yesu hakumwakula nindi, Eyi yeyi nkuluŋaŋa yawaIsarela, wubuli kushinshika mwalumbulukila yumiyi? 11Chalala chalala, nukukuleja nami, twahoshaŋa yitweluka, twashimunaŋa wunsahu wayuma yakumona namesu, enu kwitiya mutwashimunaŋa nehi. 12Chinayileji yuma yahamaseki enu kwitiya nehi, indi chinukuyileja yuma yamwiwulu mukwitiya ŋahi? 13Hikudi muntu wakandamahu dehi mwiwuluku, chiŋa yowu wasulukili mwiwulu, diyi Mwana kamuntu wekala mwiwulu. 14Chanyamwiniyi Mosi kapela hewulu mwisaŋa, dichi chakanyamunawu ni mwana kamuntu hewulu; 15kulonda muntu wukwitiya chakukuhwelela amoni mudi yena wumi wahaya nyaka.
16Chaswejeliyi Nzambi kukeŋa mpata yamunu mwishina, waheni Mwanindi wumu hohu, kulonda muntu wukumukuhwelela aheti wumi wahaya nyaka, akabuli kunoŋa. 17Chatemesheliyi Nzambi Mwanindi mumpata yamunu mwishina, halondeli kusompesha antu ampata yamunu mwishinaku, walondeli nindi antu amunu mwishina ahandili mudi yena. 18Muntu wukumukuhwelela hakufwa namuloŋaku; muntu wukubula kumukuhwelela nafwi nachu, muloŋa naleli kukuhwelela ijina daMwana kaNzambi wumu hohu. 19Kufwa namuloŋa kunafumi hakwila chejeji chenjili dehi mumpata yamunu mwishina, ilaŋa antu hiyakeŋeli chejejuku, akeŋeli mwidima muloŋa nyidimu yawu yatama. 20Muloŋa antu ejima akoŋaŋa yatama ahelaŋa chejeji, hiyenzaŋa kuchejejuku kuchina nyidimu yawu kuyikonkolola. 21Ilaŋa muntu wakoŋaŋa yalala wenzaŋa kuchejeji kulonda nyidimu yindi akayimwekeshi nawu anayikoŋi mudi Nzambi.
22Kulondela hayumiyi Yesu niatumbanji twindi hiyakuya mwituŋa daYudeya; hakulaba nawu kwenoku nakupapatisha. 23Yowanu niyena wadiŋi nakupapatisha kuEnoni kwakwihi naSalimi, muloŋa kwadiŋi meji amavulu. Antu hiyakwinza akayipapatishi. 24Henohu Yowanu wuchidi kanda amushi mukaleyaku.
25Dichi hasaŋumukili ntadi hadi atumbanji twaYowanu nakaYudeya wumu hansaŋu yakuditookesha. 26Wena hiyakwinza kudi Yowanu nakumwila nawu, Eyi Rabi, ona wadiŋi naneyi kwishinadi daYodana, iwashimwineyi wunsahu, tiya dinu, niyena hakupapatisha, antu ejima hiyakuya kudi yena. 27Yowanu hakwakula nindi, Muntu kutwesha kutambula chuma, chiŋa anamwinkichu kwiwulu. 28Enu aweni mukunshimwina wunsahu chinahoshelaŋa nami ami hiniKristuku, nami anantemeshaŋahu dehi kumbidi. 29Muntu wukweti mumbanda diyi nsumbuli; ilaŋa ibwambu dansumbuli, chakwimanayi nakumutiya, wazaŋalalaŋa nankashi chakutiyayi izu dansumbuli. Dichi iwu muzaŋalu wami wunawanini dehi. 30Chiŋa yena atohi, ami nikehi.
31Wafuma mwiwulu wabadika ejima; wahamaseki hiwahamaseki kwindi, watenaŋa yahamaseki. Wafuma mwiwulu wabadika ejima; 32washimunaŋa mwanamoniyi nimwanatiyiyi; ilaŋa kwosi muntu wetiyaloŋa mwashimunaŋayuku. 33Muntu netiyi mwakushimunayi, nashuku mufunda wakwila nindi, Nzambi walala. 34Muloŋa iwu atemesheluwu kudi Nzambi wahoshaŋa mazu aNzambi, muloŋa hahanaŋa Spiritu nakwesekelaku. 35Tata wakeŋa a Mwana, nenki yuma yejima muchikasa chindi. 36Muntu wukukuhwelela Mwana wukweti wumi wahaya nyaka; hakwila muntu wabulaŋa kwovwahila Mwana hakamona wumuku, kuzuwa kwaNzambi kwashakama hadi yena.
The Bible in Lunda: Ndembu (Lunda of Kalunda) © B. F. B. S. 1962.