Luka 23
23
1Izaza dawantu dejima hidikunyamuka, hidikumutwala kudi Pilatu. 2Hiyakutachika kumwinka nyiloŋa nawu, Muntu iwu tunamuwani wudi nakuluwaŋesha muza wetu, nakulekesha kusonka kudi Kesari, nakwila nindi yomweni diyi Kristu, mwanta. 3Pilatu hakumwihula nindi, Komana eyi wuMwanta wawaYudeya? Yena hakumwakula nindi, Mwomwenomu muwunahoshi. 4Pilatu hakuyila awakulumpi jawatupristu nimazaza awantu nindi, Muntu iwu hinamumoni namuloŋaku. 5Wena hiyakusweja kutata nawu, Wayikoleshaŋa antu hamesu, nakuyileja muYudeya mwejima, kutachika kuŊaliliya nikunu. 6Pilatu chanachitiyiyi hakwihula nindi, Iwu muntu hikaŊaliliya, tahindi? 7Chanelukiyi nindi himuntu wakuwuloŋu waHerodi, hakumutemesha kudi Herodi, muloŋa yena wadiŋi kuYersalema hawena mafuku owu.
8Herodi chanamumoniyi Yesu, hakutiya kuwaha nankashi, muloŋa hakeŋeleliyi kumumona hanalehi dehi, muloŋa wamutiya dehi nsaŋu jajivulu. Hakukuhwelela nindi kwiji keŋa amumoni nakwila chinjikijilu chimu. 9Hakumwihula mazu amavulu, yena kumwakula nehi. 10Akulumpi jawatupristu niansonelu hiyakwimana kwenoku nakumwinka nyiloŋa naŋovu yayeni. 11Herodi hakudibomba namashidikindi nakumusawula nikumuseha. Hakumuvwika mahina awanta, hakumufuntishilayi cheŋi Pilatu. 12Herodi naPilatu akwata niwubwambu dena ifuku odu, muloŋa hásambilili adiŋi adikwata nkunyi.
13Pilatu hakupompesha awakulumpi jawatupristu nianyuli niantu hamu. 14Hakuyila nindi, Munanleteh muntu iwu nenu himuntu waluwaŋeshaŋa antu; talenu, munamoni chinamweseki dehi muntu iwu, ami hinamumoni namuloŋa wansaŋu yimunamwinkeli muloŋaku. 15Kaŋanyahu Herodi; natufuntishiliyi. Tiyenu, hanakoŋi chuma chakutela kufwaku. 16Dichi nukukumina dakumuvupula, nimuumbuku. 17Hachawija ochu wenjilila dehi kuyumbilaku muntu wamukaleya wumu.
18Wejima wawu avwakuka niipumba nawu, Iwu muntu waadi! Tuumbiluku Baraba; 19yena amushili mukaleya hansaŋu yakuleta njita muŋanda, niyawubanji. 20Pilatu hakuyihosha cheŋi, muloŋa wakeŋa eli kumuumbaku Yesu. 21Wena hiyakubidika nawu, Mupopelenu kukulusu! Mupopelenu kukulusu! 22Hakuyila kamuchisatu nindi, muloŋanyi? Chuma chatama chanakoŋiyi iwu muntu, chumanyi? Hinamumoni nachitelaku. Nukukumina dakumuvupula, nimuumbuku. 23Wena asweja nikuvwakuka naŋovu, hiyakulomba nawu amupopeli kukulusu. Mwahosheluwu musweja niŋovu. 24Pilatu hakuketula nsaŋu nindi eli mwanalombuwu. 25Hakumuumbaku owu alombeluwu, ashiluwu mukaleya hansaŋu yanjita niwubanji; hakwinza Yesu hakumuhana nindi amwili mwomwaya muchima wawu.
26Chadiŋi nakumutwalawu, hiyakukwata muntu, Shimona wakuKireni, wadiŋi nakufuma mwisaŋa, hiyakumutwika kulusu amusendeluku Yesu munyima. 27Hikukumulondela izaza dawantu deneni, nidawambanda hiyakutumpa makumbu akumudila. 28Yesu hakushetumuka kudi wena nindi, Enu anyana awambanda amuYerusalema, bayi mundilamuku, didilenu enu aweni, ni anyanenu. 29Tiyenu, mafuku akenza akela nawu, Anakooleki anshinta, nimavumu abulili kuvwala nimayeli abulili kwamwisha. 30Henohu amba katachika kuyila mapidi amaneni nawu, Tuhinukilenu; nimpidi janyanya nawu, Tubutenu. 31Mutondu wutuuta awila chochichi, indi mutondu wawuma amba kawila ŋahi?
32Kwadiŋi amakwawu ayedi, akwanyiloŋa, atweluwu hamu nindi kulonda ayijahi. 33Chanashikuwu oku kwatenaŋawu nawu, Kuchaŋu, hiyakumupopela kukulusu kwenoku, niakwanyiloŋa, wumu kuchikasa chindi chachidiilu, mukwawu kuchimunswa. 34Yesu hakwila nindi, Tata, yanakeni; chadi nakwilawu hiyanachilukuku. Hiyakudipaŋila mahinindi nachinjikijilu chakusakula nachu. 35Antu hiyakwimana nakutalaku. Anyuli niwena hiyakumuseha nawu, Waamwinini akwawu, muleki adamwini yomweni, neyi diyi Kristu waNzambi, windi atondayi. 36Mashidika niwena nawa hiyakumuseha, hiyakwinza kudi yena nakweseka kumwinka walwawabatuka, 37nakwilanawu, Neyi wuMwanta wawaYudeya, damwini. 38Hewulu hadiŋiyi ashiluku mukanda wakusoneka nawu, Iwu diyi Mwanta wawaYudeya.
39Mukwanyiloŋa wumu wawena apopeleluwu kumakulusu, hakunamutuka nindi, Eyi hiwuKristuku? Damwini eyi aweni ninetu kumu. 40Mukwawu hakumuhoshola nindi, Eyi kweyi, hela Nzambi hiwamutiyaloŋa womaku? kutoŋa nineyi anakuhishili kumu. 41Etu kwetu chinatuteleli, hitukutambula wufwetu wanyidimu yetu; hakwila iwu muntu hakweti kamuloŋa nikantuku.
42Hakwila nindi, Eyi Yesu, kaŋanukaŋa chiwakenza muwanta weyi.
43Yesu hakumwila nindi, Nukukuleja chalala nami, lelu nukwi kala neyi muparadisa.
44Henohu hashika dehi neyi kwiji ora yamuchitanu nayimu, mwidima wuholoka ni mwituŋa dejima, ndo nikwora yamuchitanu nayiwana. 45Itaŋwa diiyila nibwi, niihina dakujika mutembeli mwajila ditabuka nihakachi. 46Yesu chanabileliyi nezu daŊovu, hakwila nindi, Tata, nashi spiritu yami mumakaseyi. Chanahoshiyi mwenomu yotula niwumi windi. 47Senturinu chanamoniyi yuma yejimiyi, hakulemesha Nzambi nindi, Iwu chalala wadiŋi muntu waloŋa. 48Mazaza ejima awuŋili nakutala chumichi, chanamonuwu yuma yeliluwu, hiyakufunta kwaawu nakudetola hantulu jawu. 49Ejima adilukiliyi nawu niambanda afuminiyi nawu kuŊaliliya, hiyakwimena hahalehi nakutala yumiyi.
50Kutala iyala ijina dindi Yosefu, wakumukala wawaYudeya ijina dawu Aramateya, 51wadiŋi mukwachota chawu; muntu wamuwahi waloŋa, hetejeli mpùŋa yawu, hela mwakoŋeluwuku; wadiŋi nakutalila wanta waNzambi. 52Yeniwu Yosefu hakuya kudi Pilatu, hakulomba mujimba waYesu. 53Hakuwukulula, hakuwujiŋajiŋa mwihina ditooka, hakuwukamika mwijamu dakupokola mwilola, kanda ajiikaŋamu dehi muntuku.
54Dadiŋi ifuku dakuloŋesha paseka; sabata hiyikuswila kwakwihi.
55Ambanda afuminiyi nawu kuŊaliliya, hiyakulondela munyima, hiyakutala ŋamu nichakamikiluwu mujimba windi. 56Hiyakufunta nakuloŋesha nyitondu yamavumba amawahi, nimalasha. Hasabata hiyakunooka mwaya lushimbi.
The Bible in Lunda: Ndembu (Lunda of Kalunda) © B. F. B. S. 1962.