Mateo Kutontolola
Kutontolola
Ncango zaziwahe* atikitile Mateo zikututongweza bya ncango zaziwahe ngayi Yeshu niye Mupulwishi uya wakulupishiwile kupitila mumwendi, Nyambi ukenzalishilila bikulupisho ambile ku bantu bendi mu Kulimama kwa Mwaka. Eze ncango zaziwahe kaliha za Bayunda tuhu, kuya ahemuwile Yeshu na kuya ayoyelenga ngoboni za kaye nimwako.
Ncango atikita Mateo zatantikiwa shiwahe. Zatatika na ncango za kuhemuwa kwa Yeshu, zatontolola bya kuzubikiwa na kwezekiwa kwendi, noho bya mulimo wendi wakushimikila na kulongesha, na kunyongomanisha bantu mu Ngalileya. Munyima yanebye, ncango zaziwahe zinatontololo bya lwendo lwa Yeshu, hakufuma ku Ngalileya na kuya ku Yelushalema* nanebye byatendiwile mu shunda ya mamaninino ya Yeshu, bya kukolekiwa ha shishempakano na bya kushanguka kwendi ku bafu.
Eze ncango zaziwahe zinatontololo ngayi Yeshu niye Mulongeshi wamunene ou uli na ngovu za kulubulula Mazu a Nyambi kami niye mukakulongesha bya Wene wa Nyambi. Wingi wanebye analongeshe bikuwaniwa muneye mintanti mutanu. (1) Ncango zaha Lipili, muya mukuwaniwa biheka na milimo na biya binafwanini baya bakaya na kukekala mu Wene wa muyilu (matapululo 5–7). (2) Biya Yeshu atongwezele bandongesha likumi na babili oho abatumine (litapululo 10). (3) Zinguli ambile Yeshu habya Wene wa muyilu (litapululo 13). (4) Kulongesha habya kutontolola kwa wundongesha (litapululo18). (5) Kulongesha ha nebye biliko ha shikati shino na kwiza kwa Wene wa muyilu (matapululo 24–25).
Biya bili munebye byatikitiwa
Shihemwinino na kuhemuwa kwa Yeshu Kilishitu 1:1–2:23
Milimo ya Yowano Mukakuzubilisha 3:1-12
Kuzubikiwa na kwezekiwa kwa Yeshu 3:13–4:11
Milimo ya Yeshu ku bantu babengi mu Ngalileya 4:12–18:35
Yeshu ukufuma ku Ngalileya ukuya ku Yelushalema 19:1–20:34
Shunda ya mamaninino mu Yelushalema 21:1–27:66
Mwene ukushanguka na kulimonekesha 28:1-20
New Testament in Nkoya © The Bible Society of Zambia, 2008.