Yohánɛs 2
2
Minɛ́ŋ mí ɔ́sū mí Yésus á ŋgand aúg á Kána
1Ŋgand aúg ɛ ɓɛ́ɛ́ á tísɔn nyí Kána á Galiléa á ɔlɔ́ vá yáhɛ́ áŋháa; Malía nyaŋɛ́ á Yésus, a ɓɛ́ɛ́ á nyíŋ ŋgand aúg. 2Yésus la ɓayége ɓɛ́ɛ́ ki bí yáŋlɛ́ɛ átē. 3Kasig milɔg mí manáá, nyaŋɛ́ á Yésus ɔ lága nyɛ nɛ́: «Ŋ̀gɛ̄n bíh byɛ́ɛ́ ɓé pɛ milɔg.» 4Ndí Yésus ɔ pélē nyɛ nɛ́: «Á míndīgá, yéé ɔ ŋgɔ sōmle ma é? Ŋgɛ́ŋ yáma ɛ lɛ́ ŋgí lí kɔlan.» 5Nyaŋɛ́ ɔ lága ɓáɛɛle á ŋgand nɛ́: «Ɓɔŋán yé ɛ́sɛ a ŋga lága ɓɛ́nɛ.» 6Bilógá bísáama, mvegéeg la ŋgɔg bí ɓɛ́ɛ́ váŋ ányúū esala-miɓé mí ɓɔ́ɔ̄n bí Élōg-Yúda. Yá sig ɛ́ ŋga lá li nyɔŋ lí jam-kaa eɓógo ɛ́ líta. 7Yésus ɔ lága ɓáɛɛle á ŋgand nɛ́: «Yááhánɛ mindím á bí bilógá»; la ɓaɛɛle bú yáhɛ́ míndīm á bílōgá tɛɛla á ányu. 8Yésus ɔ laga sīg-pɛ ɓɔ́ nɛ́: «Áán hɔ́ vɔ́ŋɔ́ɔ, miní tí m̀wɛɛhɛ ŋgand.» La ɓɔ́ bú áá, bú kɛ li tíi lí m̀wɛɛhɛ ŋgand. 9Nyɔ́ŋ ɔ cégē míndīm mí má yaán milɔg. M̀wɛɛhɛ ŋgand ah yíí ɓé véé míŋ milɔg mí sɔ́léé, Amáh ɓaɛɛle ɓá bí áá míŋ mindím nɛ bí ŋgí yí. 10Váŋ nɛ́ a lága mut a lɔ́mɓan nɛ́: «Joó nɛ́ mut ag dúgu yágá lí pámɛ lí bílɔ̄ŋgɔ bí mílɔg, eceg ɓayáŋlɛ á ŋgand ɓá péé, ndí ɓá pámɛ hɔ́ mí máh loohan ɓé lí ɓɛ́ lí m̀ɓɛɛŋ. Ndí wá, wa náŋɛ̄ bílɔ̄ŋgɔ bí mílɔg tɛɛla vɔ́ŋɔ́ɔ!» 11Míŋ nɛ́ mí lɛ́ mínɛ́ŋ mí ɔsú Yésus a ɓɔŋ á tísɔn nyí Kána á Galiléa. A étɛ́ lipém jɛ́ɛ́, la ɓayége ɓɛ́ɛ́ bú yéɓé la nyɛ́. 12Ámbúh náŋ, ɔ suh á Kafalnáum elɔŋ la nyaŋɛ́, elōgnyāŋ la ɓayége ɓɛ́ɛ́ ápah bí tɔɓéé ja puh álɔ̄.
Esala-miɓé á ndáá-ēcɛ́ŋ-Ɔlolómɛ̄
13Kasig ŋgand Páska nyí Elōg-Yúda ɛ́ ɓɛ́ɛ́ ɓɛɓɛ, Yésus ɔ ɓét á Yélūsalɛm. 14Ɔ níŋgí á ndáá-ēcɛ́ŋ-Ɔlolómɛ̄, la nyɛ́ ɔ kɔ́p ɓánuŋu nyaga, ɓanuŋu mitómbɛ́ la aɓeŋ la ɓaveŋghanɛ-mɔní bí tɔ́ɔ̄ átē. 15Váŋ nɛ́ a óŋ ɔ́so la mikɔɔ, ɔ dúhú ɓɔ́ bísɛ á ndáá-ēcɛ́ŋ-Ɔlolómɛ̄, ɔ dúhú ki mitómbɛ́ la nyaga; ɔ lée mɔní mí ɓáveŋghanɛ-mɔní á sí, ɔ sógɛ́ ki téɓeli yáɓá á sí. 16La nyɛ́ ɔ lága ɓánuŋu aɓeŋ nɛ́: «Ɓógtánɛ bí byoóm bísɛ vá; miníh yaanɛ́gɛ́ ɓé ndáá Etāa, ndáá nyuŋgá.» 17Váŋ nɛ́, ɓáyēge ɓɛ́ɛ́ ɓá ɔ́ŋɔ nɛ́ yá ciiɓɛ́ nɛ: «Ekɔ́ɔ́ yé mi byɛ́ɛ̄ ányúū ndáá yɔ́ɔ á Ɔlolómɛ̄, yá nyɔ̄ŋ ma m̀mím.» 18La mikanʼyɛ mí Élōg-Yúda mú nyɔ̄ŋ mpɔ́t, mú bíhī nyɛ́ nɛ́: «Yɔɔ́yɔ́ɔ ndembye ɔ ŋgɔ étɛ ɓɛ́hɛ á li ɓɔŋ nɛ́ bi yí nɛ́ ɔ byɛ́ɛ́ kundɛ li ɓɔŋ náŋ é?» 19Yésus ɔ pélē mɔ nɛ́: «Búgán nyí ndáá-ēcɛ́ŋ-Ɔlolómɛ̄, li pám lí álɔ̄ áŋháa, mag kɛ yɔ li tɛ́ɛ́yɛ.» 20Váŋ hɔ́ nɛ́ ɓáŋ ɓɔɔ́n bí Élōg-Yúda ɓá lagá nyɛ nɛ́: «Mióŋ mí nyí ndáá-ēcɛ́ŋ-Ɔlolómɛ̄ má nyɔŋ muúmínáa mí mímbú la mísáama, ndí wa ɔg tɛ́ɛ́yɛ yɔ li pám lí álɔ̄ áŋháa é?» 21Ndí ndáá-ēcɛ́ŋ-Ɔlolómɛ̄ Yésus a ŋgí pɔ́tle ɛ ɓɛ́ɛ́ ja nyuú yɛ́ɛ̄ nyɛ́-mɛ̄n. 22Jɔ́ nɛ́, eceg a ŋga kɛ́ li pahye á póla ɓá bí wúēē, ɓayége ɓɛ́ɛ́ bíg kɛ li ɔ́ŋɔ nɛ́ a pɔ́tɔ́ɔ́ náŋ; la ɓɔ́ bí yéɓé Licii-Lipúán la eɓaŋgá a lagléé ɓɔ́.
Yésus ag yí nzáá a lɛ mut-a-binam
23Eceg Yésus a ɓɛ́ɛ́ á Yélūsalɛm á lí loɛ lí ŋgand Páska nyí Elōg-Yúda, ŋgandag ɓot yú yéɓé la nyɛ́ ányúū minɛ́ŋ a ŋgí ɓɔŋ. 24Ndí Yésus á ɓɛ́ɛ́la ɓé lipitá la ɓɔ́ ánsī nɛ́, a ŋgí yí ɓɔ́ bísɛ. 25Ah ɓɛ́ɛ́la ɓé kóó nɛ bí lagá nyɛ́ jam tɔ já likɔlɓan la mut-a-binam, átɔm nɛ́ a ŋgí yí nzáá a lɛ mut-a-binam.
© 2023, CABTAL