Yohánɛs 4
4
Yésus la ŋgɔn Samália
1Eceg Yésus a yíí nɛ́ Elōg-Falísái yá ámblé pɔ́l nɛ́ ag yaanɛ ɓot ŋgandag ɓayége ɓɛ́ɛ́, la nɛ́ ag tíi nzoɓan li loo lí Yohánɛs. 2Á mbálɛ, nyɛ́-mɛ̄n ɓé nɛ a ŋgí tíi nzoɓan, ndí ɓayége ɓɛ́ɛ́. 3Váŋ nɛ́ a ɓógo á Yúdēa, lí timan á Galiléa. 4Ndí ɛ́ ŋgí ɓat nɛ́ a yáɓé épah-ékombo yé Samália. 5La nyɛ́ ɔ pám á tísɔn Samália ya nyí ɛ ŋga yáŋlɛ nɛ́ Sikáal, ɓɛɓɛ la sí Yákob a tíéé mɔɔ́n wɛ́ɛ̄ Yósɛp, 6ápah eɓél míndīm ɛ́ Yákob ɛ́ lɛ. Kasig Yésus a tɔmbɔ́ɔ́ dúwɛ, ɔ tɔ́ɔ̄ á m̀ɓel á yéŋ eɓél míndīm. Náŋ a ɓɛ́ɛ́ mam mí kɔsi. 7Váŋ nɛ́ ŋgɔn Samália ya, ya sɔ́ lí áá lí míndīm, la Yésus ɔ lága yɔ nɛ́: «Tí ma míndīm mí lí nyú.» 8Ɓayége ɓɛ́ɛ́ bí kɛ̄nɛ́ɛ́ á tísɔn á lí sóm lí yoóm lí lidí. 9La nyíŋ ŋgɔn Samália yu bíhī Yésus nɛ́: «Ɛ́g wɛɛ láá, wa mɔɔ́n Élōg-Yúda, ɔ ŋgɔ ɓāt ma ŋgɔn Samália mindím mí li nyú é?» Á mbálɛ, ɓɔɔ́n bí Élōg-Yúda bí ŋgí somo ɓé lí ɓɛ́la lí jam tɔ já lí ŋga āt ɓɔ́ la ɓɔɔ́n bí Samália. 10Yésus ɔ pélē hɔ́ nyɛ nɛ́: «Ki ɓɔŋ nɛ́ ɔg yí likaale lí Ɔlolómɛ̄, la nzáá a ŋga lága wa nɛ́ tí ma mindím mí lí nyú, kí wa nɛ́ ɔ ŋgɔ yága nyɛ́ mɔ́, la nyɛ́ a tí wa míndīm mí éniŋ.» 11Mindígá aá la nyɛ́ nɛ́: «Ɛtáŋɛ, ɔh byɛ́ɛ́ ɓé tɔ eáálé-míndīm, eɓél ki yá nɛŋɛ́ á sí; míŋ mindím mí éniŋ, ɔg áá mɔ́ la yéé é? 12Ɓaá ɔg ɔ́ŋɔ nɛ́ ɔg loo etāa wahá Yákob, nyɔ́ a tí ɓɛ́hɛ yé eɓél míndīm é? Nyɛ́-mɛ̄n a ŋgí nyú mɔ́ la ɓɔɔ́n ɓɛ́ɛ́, nlemlem la bilém byɛ́ɛ́.» 13Yésus ɔ pélē nyɛ nɛ́: «Nyɔ́ la nyɔ́ a ŋga nyú mí mindím, ag kɛ sīg-pɛ li ɓɛ́la lí évēhé; 14ndí tɔ nzáá a ŋga kɛ́ li nyú lí míndīm mi ŋga kɛ́ nyɛ́ lí tíi, m̀ɓá-mɓá evéhé ɛ́ ŋga kɛ ɓé pɛ nyɛ́ lí byee; á mveŋghanɛ́ mindím mi ŋga kɛ́ nyɛ́ lí tíi, á até wɛ́ɛ̄ míg kɛ li yaan lí líŋgɛ̄n ápah eniŋ éɓem ɛ́ ŋga pámle.» 15Mindígá aá la nyɛ́ nɛ́: «Ɛtáŋɛ, tí hɔ́ ma míŋ mindím, á lí ɓɔŋ nɛ́ evéhé ɛ́h byelég ɓé pɛ ma, la nɛ́ mih sɔ́ɔ́g ɓé pɛ ma lí áá lí míndīm vá.» 16Yésus ɔ yó nyɛ nɛ́: «Kɛɛ́n yáŋá nlóm wɔ́ɔ, ɔ tímān vá.» 17Mindígá ɔ pélē nyɛ nɛ́: «Mih byɛ́ɛ́ ɓé ma nlóm.» Yésus aá la nyɛ́ nɛ́: «Wa yí lí laga nɛ́: ‹Mih byɛ́ɛ́ ɓé ma nlóm›, 18átɔm nɛ́ wa kūh ɓalóm bítáan, tɔ nyí páam ki ɔ byɛ́ɛ̄ vɔ́ŋɔ́ɔ ɛ sē ɓé nlóm wɔ́ɔ. La náŋ, wa pɔ́t mbálɛ.» 19Mindígá ɔ lága nyɛ nɛ́: «Ɛtáŋɛ, mag ɛ́n nɛ́ ɔ lɛ m̀pɔ́tle-a-Ɔlolómɛ̄. 20Ɓatāa ɓáhá bí Samália ɓá ɓégɛ Ɔ́lolómɛ̄ á lóō lí ví ɔkolá vícɛ̄ŋ, ndí ɓɛ́nɛ ɓɔɔ́n bí Élōg-Yúda miníg laga nɛ́, voóm ɓá nyɛɛ́ lí ɓégɛ lí Ɔ́lolómɛ̄ a lɛ̄ jā á Yélūsalɛm.» 21Yésus ɔ lága nyɛ nɛ́: «Á míndīgá, yéɓé yé mi ŋga lága wa, eceg ɛ́g kɛ li sɔ́ yé ɛ́ lɛ nɛ́, ah vá á lóō lí ví ɔkolá vícɛ̄ŋ, tɔ á Yélūsalɛm ɓé nɛ́ miní ɓɛ́ miní ɓégɛ Etāa. 22Ɓɛ́nɛ, miníg ɓégɛ yé miní ŋgá yí ɓé, ɓɛ́hɛ biíg ɓégɛ yé bi ŋga yí, átɔm nɛ́ lisuŋga líg sɔ́le ja á Élōg-Yúda. 23Ndí eceg ɛ́g kɛ li sɔ́, yɔ́ yágá ki yé, ápah tihtih ɛ́ ɓáɓégɛ Etāa bí ɓɛ́ bíg ɓɛ́gɛ nyɛ́ á m̀búl la átē á mbálɛ. Kɔɔ la mbálɛ, yíŋ nyaa ɓáɓégɛ nɛ́ Etāa a ŋga sómo. 24Ɔlolómɛ̄ a lɛ M̀búl, ányúū náŋ nɛ́ ɓáɓégɛ nyɛ́ ɓá nyɛɛ́ nyɛ li ɓégɛ á m̀búl la á até á mbálɛ.» 25Mindígá aá la Yésus nɛ́: «Mag yí nɛ́ Mésia bí ŋga yáŋa nɛ́ Nyɔ́-a-Pɔ́hlɛ ag nyɛɛ li sɔ́. Eceg a ŋga kɛ́ li sɔ́, ag kɛ ɓɛ́hɛ li lɛgɛ lí mam mísɛ.» 26Yésus ɔ lága nyɛ nɛ́: «Mā mut mi lɛ̄ wā lí pɔ́tɛ nɛ́ mi lɛ Nyɔ́-a-Pɔ́hlɛ.»
27Á nlemlem á eceg, ɓáyēge ɓɛ́ɛ́ bú sɔ́. Bú nyág nɛ Yésus ag kwɛl la mindígá, ndí tɔ wa āh ɓat ɓé nyɛ nɛ́: «Yéé ɔ ŋgɔ sómo é?» Tɔ nɛ́: «Ányúū yéé ɔ ŋgɔ kwɛ̄l la nyɛ́ é?» 28Váŋ nɛ́ mindígá a yíg tɛ́ɛ́yɛ elógá yɛ́ɛ́, ɔ kɛ á tísɔn á lí lága lí ɓot nɛ́: 29«Sɔ́án miní ɛ́n mut nyɔ́, a lága ma mam mísɛ ma ɓɔ̄ŋ! Nɛ́ nyɛ́ ɓé nɛ a lɛ Nyɔ́-a-Pɔ́hlɛ é?» 30Ɓot bú ɓógó hɔ́ á tísɔn li kɛ ápah Yésus a ɓɛ́ɛ́. 31Á póla yéŋ eceg nɛ́ ɓáyēge bí Yésus ɓá váŋgɛ́ nyɛ li laga nɛ́: «Lábi, ŋ̀gɛ̄n dí puh jam.» 32Ndí nyɛ́ ɔ pélē ɓɔ nɛ́: «Mi byɛ́ɛ lidí mi ŋga nyɛɛ li dí, jé miní ŋgá yí ɓé.» 33Ɓayége bú ɓōtlé lí ɓatan nɛ́: «Ɓaá, mut a tí nyɛ yoóm lí dí é?» 34Yésus ɔ lága ɓɔ nɛ́: «Lidí jama li lɛ́ ja li yáhɛ lí nsom á Ɔlolómɛ̄ nyɔ́ a óm ma la li ɓɔŋ li nsɔ́n wɛ́ɛ́. 35Ɓaá, ɓɛ́nɛ-mɛ̄n miní ŋgá yó ɓé nɛ: ‹Ɛ́ ŋgí tɔ́ɔ̄ ja sóŋ ɛ́náa nɛ́ mpumu á ɓōtlé é?› Ndí ma, mag laga ɓɛ́nɛ nɛ́: ‹Ɓéthánɛ miíh miní légɓé, mindíí má ólo, eceg mpumu yé!› 36Nyí vɔ́ŋɔ́ɔ, mut a ŋga púmu ag kuh hɔ́ nsála wɛ́ɛ́, ag naŋɛ mpumu wɛ́ɛ́ ányúū eniŋ éɓem. La náŋ, nyɔ́ a ŋga sál la nyɔ́ a ŋga púmu bíg kɔn mivag elɔŋ. 37Jɔ́ nɛ́, nyí ŋgan ɛ ŋga laga nɛ́: ‹Wa ag sál, nyɔ́ŋɔ́ ag pumu› ɛ lɛ mbálɛ. 38Ma óm ɓɛ́nɛ á mpumu ápah manáh kuh ɓé ndutu tɔ ya. Ɓatám ɓá kūh ndutu, ndí ɓɛ́nɛ maná tombánɛ́ ápah ɓá kūh ŋgándag ndutu.»
39Ŋgandag ɓɔ́ɔ̄n bí Samália bí nyíŋ tísɔn bú yéɓé la Yésus, ányúū nɛ nyɔ́ mindígá a lága ɓɔ nɛ́: «A lága ma mam mísɛ ma ɓɔ̄ŋ.» 40Náŋ ɔ ɓɔ̄ŋ nɛ, ɛnɛ́ ɓɔ́ɔ̄n bí Samália bí pámáá ɔ́sū ví Yésus, bú sɔ́hyé nyɛ ŋgandag nɛ́ a tɔ́ɔ̄ elɔŋ la ɓɔ́. La nyɛ́ ɔ tɔ́ɔ̄ álɔ̄ áɓáa la ɓɔ́. 41Ɓɔɔ́n bí Samália bí yéɓyéé la nyɛ́, bú kondye li bul ányúū biɓaŋgá a ŋgí laga ɓɔ́ nyɛ́-mɛ̄n. 42La ɓɔ́ bú lāgá nyɔ́ mindígá nɛ: «Ah ányúū li laglag jɔ́ɔ jɔ́-ntámɛ́ ɓé pɛ nɛ́ bi ŋga yéɓé, ndí ányúū nɛ ɓɛ́hɛ-mɛ̄n ɓaá ámblé nyɛ, biíg yí kɔɔ la mbálɛ nɛ́ nyɛ́ nɛ́ a lɛ Ǹsuŋ ɓot bí ŋkɔŋ-á-sí.»
Yésus ag timan á tísɔn nyí Kána á Galiléa
(Mat 8.5-13; Lúk 7.1-10)
43Ámbúh alɔ́ áɓáa, Yésus ɔ ɓógo ápah a ɓɛ́ɛ́, la nyɛ́ ɔ tímān á Galiléa. 44Ákaa ɛ́sɛ, nyɛ́-mɛ̄n a lága nɛ m̀pɔ́tle-a-Ɔlolómɛ̄ ah byɛ́ɛ́ ɓé ádit á ŋkɔŋ wɛ́ɛ́. 45Ndí ɛnɛ́ a pámáá á Galiléa, ɓáŋ ɓot wóŋ bú lɛ́glé nyɛ nyaa m̀ɓɛɛŋ, átɔm nɛ́ ɓɔ́g bí ɓɛ́ɛ́ á Yélūsalɛm á ŋgand Páska, bú ɛ́n yé ɛ́sɛ a ɓɔŋɔ́ɔ́.
46Yésus ɔ tímān hɔ́ á tísɔn nyí Kána á Galiléa, ápah a yaanɛ́ɛ mindím mílɔg. Ŋ̀kanʼyɛ nlɔŋ á sónja wa nyɔ́ a káísa a ɓɛ́ɛ́la mɔɔ́n-á-páam nyɔ́ a ŋgí kɔn á Kafalnáum. 47Ɛnɛ́ a ámbléé nɛ́ Yésus a sɔ́ ápah a ɓɛ́ɛ́ á Yúdēa, a lɛ lí timan á Galiléa, ɔ sɔ́ nyɛ li ɛ́n la li sɔ́hye lí nyɛ nɛ́ a kɛ́ á Kafalnáum, a tɔ́ɔ́yɛ́ mɔɔ́n wɛ́ɛ̄ mbólí nyɔ́ a lɛ lí wú. 48Yésus ɔ lága nyɛ nɛ́: «Miní lɛ́ nɛ́, kí miníh ɛ́nɛ́g ɓé ndembye-ɛ́-mam la binanaŋga bí mam, m̀ɓá-mɓá miní ŋgá yéɓe ɓé pɔ́n!» 49Ŋ̀kanʼyɛ a nlɔŋ á sónja nyɔ́ a káísa ɔ lága nyɛ nɛ́: «Ɛtáŋɛ, sóon kɛɛ́n wóŋ sɔ́kágánɛ́ mɔɔ́n wama ag wú!» 50Váŋ nɛ́ Yésus a lága nyɛ nɛ́: «Kɛnɛ́g, mɔɔ́n wɔ́ɔ a lɛ́ á éniŋ.» Nyɔ́ŋ mut ɔ yéɓé bíɓaŋgá Yésus a sɔ́le nyɛ́ lí laga, la nyɛ́ ɔ nyɔ̄ŋ nzen mitiman. 51Kasig a ɓɛ́ɛ́ a ŋgí sɔ́ɔ́g á nzen, ɓaɓɔŋle ɓɛ́ɛ́ bú kɛ lí ɓoman la nyɛ, la ɓɔ́ bú yó nyɛ nɛ́: «Mɔɔ́n wɔ́ɔ a lɛ á éniŋ!» 52La nyɛ́ ɔ ɓāt ɓɔ á yɔɔ́yɔ́ɔ ŋgɛ́ŋ mɔɔ́n wɛ́ɛ̄ a tɔ́ɔ̄ mbólí. Bú pélē nyɛ nɛ́: «Laŋkoo, á ŋgɛ́ŋ ya nyí nzámuh nɛ́ livɛ́ɛ́ jɛ́ɛ́ lá man.» 53Ɛsáŋɛ́ a mɔɔ́n ɔ sɔ́ŋtánɛ́ nɛ á nyúŋ nlemlem á ŋgɛ́ŋ nɛ Yésus a lagá nyɛ nɛ́: «Mɔɔ́n wɔ́ɔ a lɛ á éniŋ.» Li ɓotle váŋ nɛ́ nyɛ́ la ndog yɛ́ɛ̄ yɔ ɛsɛ̄ ɓá yéɓe. 54Enanaŋga ɛ́ jam yá yáhɛ́ bíɓáa Yésus a ɓɔŋɔ́ɔ́ eceg a sɔ́léé á Yúdēa li kɛ á Galiléa yéŋ.
© 2023, CABTAL