เห่ขุทวาลู่ 2
2
1เตแบ๊แลเตแล ม๊อขุ เน๊อ เห่ขุ เน๊อ เต โอ่ เด๊อ ลูกู ปว๊า เต๊อเจ่อ โทลอ เฮ๊อ. 2จอแปแหร่ดุ เมโทลอ เฮ๊อ อาเตแบ๊แลเตแล เต๊เห่ เฮ๊อ เร๊อ เบ๊อะ ม๊อเนอ โซซว๊าเตอ เนอ เนอเตอเนอเนอ, อา โอ่โก๊ เร๊อ อา เม ปา เตเม เตอเจ๋อ โต่.#เถ่จว๊าแลเปล๊ ๒๐:๘-๑๑, ๓๑:๑๗, ฮีบรู ๔:๔, ๑๐ 3จอแปแหร่ดุ แบ๊ตา เต ล๋อ ปลี อา โทลอเฮ๊อ เร๊อ อา โอ่โก๊เฮ๊อ เบ๊อะเนอ เตอเนอ. อาขว่าอาคยา, อา เด๊อะบุ๊ยเด๊อะเตอเรอ เร๊อ เด๊อะ ม๊อเนอโซซว๊าเตอเนอ เนอเตอเนอ โทเร๊อ อา แด่บูโพ๊ เกอเร๊อ ลู.
เตแบ๊แล เพรเหมาะ เน๊อ เพรคู
4เตหรี่เตแก เออเต๊เห่ เนอหม่า หม่าเฮ๊อ เบ๊อะ จอแปแหร่ดุ แบ๊แลเตแล ม๊อขุ เน๊อ เห่ขุ เบ๊อะเนอ เต๊เห่ อาหรี่อาแก เฮ๊อ.
เบ๊อะ แบ่เจ่ จอแปแหร่ ตูจูเพร แบ๊ตา เห่ขุ เน๊อ ม๊อขุ เต๊เห่ เบ๊อะเนอ, 5แบ่เจ่ จอแปแหร่ ตูจูเพร นอจือ ตา ล๋าย เก่ เด๊อ เห่ขุเออ โต่, เร๊อ เพร เมเพร๊เมแหล่ หม๋า อา โอ่ แต่ล๋าย เตเพร๊โต่ อาขว่าอาคยา, เตกลุยเตลุ๊ย เน๊อ ส่อตอส่อเหล่ ซีเต๊เห่ แด๊แถ่เพ๊แถ่ ล๋าย ตอม๋อ โต่โต่. ส่อเหมาะเหว่โบ ซีเต๊เห่ อา แด๊แถ่เพ๊แถ่ ล๋ายโต่โต่. 6หม่าแน๊เรอ เทอ โอ่ เด๊อ เห่เล เต๊เห่เนอ อาโจ่จีอีแถ่ เร๊อเป่ เห่ขุ. 7โทเร๊อ แบ่เจ่ จอแปแหร่ ตูจูเพร พย๊า เห่ เร๊อ อา แบ๊ เน๊อ เพรคู เตเพร. เร๊อ อา โอ๊โน เก่แลเซ๊ เด๊อ อา เด๊อะ เตเซอเพร เด๊อ เพรคู กู่โพกู เร๊อ เพรคู เออ อา เซอเพรแถ่.#โครินธ์ อาเหร่อเล๊อ ต๊าบ่า ๑๕:๔๕
8แบ่เจ่ จอแปแหร่ดุ ตี๊หรี่แตแร ช๊อหนื่ออื่อ เป่ เพรคู อาเง เตเร๊วี ตีวี เด๊อ อู เอ๊ เน๊อ เอเดน เตเร๊วี เด๊อ เก่ซิเถ่ ตากยาเนอ, เร๊อ อา จว๊าแด่โอ่ เพรคู เด๊อ อา แบ๊ เนอเตเพร เบ๊อะ เตเร๊กูเนอ. 9โทเร๊อ แบ่เจ่ จอแปแหร่ ตูจูเพร นอ แด๊แถ่หนิ ส่อเหมาะเหว่โบ ปว๊า เต๊อเจ่อ เร๊อ อาตว่าอาแซแร แหน่เจ๊อ เร๊อ อา เส่เถ่ หนิ ส่อเส่ เด๊อ อาหวิอาชื แหน่เจ๊อ เต๊เห่. เด๊อ เตเร๊ กล่าเมกู เนอ ส่อเหมาะ เด๊อ อา เด๊อะ อู เตเซอเพร เนอ อา โอ่ ต๊อส่อ, เน๊อ ส่อเหมาะ เด๊อ อา เด๊อะ อู เน๊อ อู เก่ ซิเง เตแร๊ เน๊อ เตมู๊แหม่ ต๊อส่อเนอ อา โอ่ เกอ เบ๊อะเนอเนอ.#เตเด๊อะโลแถ่ ๒:๗, ๒๒:๒, ๑๔ 10เทอแลโหมะ เออแตแล เนอเป๊อแถ่ ทุ๊ยแฮ เด๊อ เอเดน เตเร๊กู เร๊อ อา เด๊อะโอ่ ทุ๊ยแฮ เตอเจ๊อ เป่ลอ ส่อเหมาะ เบ๊อะ เอเดน เตเร๊วีกู เนอเต๊เห่, เร๊อ เทอแลโหมะเออ แตแลเนอ อา ทุ๊ยแฮ พู๊แพเถ่ คยาแซ๊ เทอแล ลุยแล. 11เทอแล อาเหร่อเล๊อ แตแลเนอ อู เอ๊ ลูมุย เน๊อ ปิโชน, เร๊อ อา ทุ๊ยแฮ ตีวี๊ตาวา รว๋า ลอเฮ๊อ ฮาวิลาห์เก่ เด๊อ เท เหล่เถ่ เนอเต๊เก่ เฮ๊อ. 12เท เบ๊อะเนอ โต๊โผะหม่า เทโชแร๋ แหน่เจ๊อ, เตโนมื๊อ เด๊อ อู เอ๊ เน๊อ บ่าโด่หล่า เน๊อ หล่อเก่อแล เด๊อ อู เอ๊ เน๊อ โซฮาหม่า เต๊เห่เนอ อู แม๊เถอะ, อา เถ่ เบ๊อะเนอ. 13เทอแล เนอแล แตแล หม่า อู เอ๊ ลูมุย เน๊อ กิโฮน, อา ทุ๊ยแฮ ตีวี๊ตาวา รว๋า ลอเฮ๊อ เบ๊อะ คูช เก่กู. 14เทอแล โซแล แตแลเนอ อู เอ๊ ลูมุย เน๊อ ไทกริส, อา ทุ๊ยแฮโน รว๋า เด๊อ อัสซีเรียเก่กู เร๊อ อา ทุ๊ยเถ่โต่ เด๊อ เก่ซิเถ่ ตากยา. โทเร๊อ เทอแล ลุยแล แตแล เร๊อ อู เอ๊ เน๊อ ยูเฟรติส เทอแลโหมะดุ. 15แบ่เจ่ จอแปแหร่ ตูจูเพร โนเด๊อะโอ่ เพรคู เบ๊อะ เอเดน เตเร๊กูเนอ, เร๊อ อา นอเอ่แร นอแม๊ตู่ เร๊อ ลู. 16เร๊อ แบ่เจ่ จอแปแหร่ ตูจูเพร เมแก โหง่ เน๊อ, “ส่อ อิเตเต๋ อาเส่ เบ่เบ่, เด๊อ อา โอ่ เด๊อ เอเดนเตเร๊วีกู เต๊เห่เนอ เน เอ่ หม่า อาหนิ ลอปลี แพ๊. 17หม่าแน๊เรอ ส่อเหมาะ เด๊อ อามุย เน๊อ ซิเง เตแร๊ เน๊อ เตมู๊แหม่ เออต๊อเหมาะ อาเส่เนอ เน เบ่เอ่ หนิ ตีกี๋ โต่ เน เก่ เอ่ อา เฮ๊เนอหม่า เน เก่ เซอ หม่าแหน่ เจ๊อ เบ๊อะ เน เอ่ อา เนอเตอเนอ ปาเจ๊อ.” #โรม ๖:๒๓, ยากอบ ๑:๑๕ 18โทเร๊อ แบ่เจ่ จอแปแหร่ ตูจูเพร เฮ๊ คยาแซ๊ โหง่ เน๊อ, “เพรคู โอ่ตื๋อ ดื่อ เตเพร เร๊อ อาแร๊ เด๊อ อาเง โต่. แว เก่ แบ๊แล หนิเป่ อา เพรเมจว่า ลู อาโคแบ๊ซว๊า เด๊อ อาตาโตตาเบ่ เด๊อ ลูเง เตเพร.”#โครินธ์ อาเหร่อเล๊อ ต๊าบ่า ๑๑:๙
19โทเร๊อ แบ่เจ่ จอแปแหร่ ตูจูเพร พย๊า เห่ เร๊อ อา แบ๊ตา เน๊อ ล๋อ เตมีเตดอ โอ่ เด๊อ เห่ขุ เออเนอเต๊เห่ เน๊อ ถู่พู๊โหย่พู๊ โย เด๊อ ม๊อเล เนอเต๊เห่. เร๊อ แซ่ฮู๊ จอแปแหร่ เก่ แม๊เถอะ ซิเง เพรคู เออเตเพร เก่ เอ๊ ล๋อ เตมีเตดอ เออเต๊เห่ อามุย แคร๋ ฮู๊เตเนอ, จอแปแหร่ ซูแฮ ลอ เตมีเตดอ เออเต๊เห่ เด๊อ ลูโอ่ เร๊อ เพรคู เออ เอ๊เร๊อ เป่ เหย่ซีมุย ฮู๊เต๋ เนอ อา ทวาลอเฮ๊อ เหย่ซีมุย ฮู๊เนอ เฮ๊อ.#เห่ขุทวาลู่ ๑:๒๔, ๒๖ 20ฮู๊เนอเร๊อ เพรคู เอ๊เร๊อ เตมีเตดอ เด๊อ อู โบ่ อา เด๊อะหี่เด๊อะแพ เนอเต๊เห่ เน๊อ ถู่พู๊โหย่พู๊ โย เด๊อ ม๊อเล เนอเต๊เห่. เน๊อ เตมีเตแหม่ โอ่ เด๊อ มีเกล เนอเต๊เห่ อามุย. หม่าแน๊เรอ เพรเมจว่า เป่ คูอาดาม หม่าดื่อ อาโคแบ๊ซว๊า เด๊อ อาตาโตตาเบ่ เด๊อ ลูเง เนอ, อา โอ่ โต่.
21โทเร๊อ แบ่เจ่ จอแปแหร่ ตูจูเพร นอ โอ่เมอหนิ ตาปา เพรคู เร๊อ เบ๊อะ อา โอ่เมอหนิ ตาปาเฮ๊อ เบ๊อะเนอ, อา บ๊าเถ่ ลูรอครุ๊ย เต๊เบ่ เร๊อ เบ๊อะ อา บ๊าเถ่ อาเหล่โกล อา เมบี๊ กาคยา เป่ ลู เน๊อ หย่า. 22เร๊อ แบ่เจ่ จอแปแหร่ ตูจูเพร แบ๊ เพรเหมาะ เตเพร เน๊อ รอครุ๊ย เด๊อ อา บ๊าเถ่ เด๊อ เพรคูเหน่ เออ เร๊อ อา ซูแฮ เพรเหมาะเออ เด๊อ เพรคู อาโอ่.
23เร๊อ เพรคู เฮ๊ฉื่อ เน๊อ,
“เก๋อ กู๊แหน่เร๊อ เออหม่า ครุ๊ย เด๊อ อา บ๊าเถ่ เด๊อ แวครุ๊ยกู,
หย่า เด๊อ อา พย๊าเถ่ เด๊อ แวหย่ากู เฮ๊อ.
อู พย๊าเถ่ อา เด๊อ เพรคูกู อาขว่าอาคยา,
อู โตเบ่ เอ๊ ลูมุย เน๊อ ‘เพรเหมาะ.’”#เอเฟซัส ๕:๒๘,๒๙
24เด๊อ เตหรี่เตแกเออ อาขว่าอาคยา, เพรคู แด่แก อาโหมะอาเพ เร๊อ อา จว๊าโอ่เต่อ เกอ เน๊อ อาเม, เร๊อ แกแย เออซิเนอ เนอ อา เก่ ทวาแถ่ เตเพร่ว แพ๊.#มัทธิว ๑๙:๕, มาระโก ๑๐:๗-๘, โครินธ์ อาเหร่อเล๊อ ต๊าบ่า ๖:๑๖, เอเฟซัส ๕:๓๑
25เร๊อ เพรคู เน๊อ อาเม เออซิเนอลอ, อา โอ่กะโกล แพ๊ หม่าแน๊เรอ อา ซิเตเร แลแคโต่.#เห่ขุทวาลู่ ๓:๗-๑๑
Wycliffe USA