Luka 4
4
Setaana pɛ maŋe Yezu
Matiyu 4:1-17; Maake 1:12-15
1Yezu déem ma zege Jɔdan buga kam ni ne o yage da o maa kɛa. Wɛ Sin-laao kom maa tɔge‑o de dam. Ko ma ja‑o ko vo kagoa yuu ne. 2O maa wora taa, da finna. O na wora to mo setaana pɛ tui o tei o soge‑o se o ya ke o chɔge. Maŋa kam konto ne maama, o daa ba di kolokolo. Da finna yam na kɛ to, kana maa jege‑o lanyerane. 3Setaana pɛ laam ma ba o ta ded‑o o we, “Nmo ná seene n ye Wɛ Bu, se n ta de kandwɛ dento se de ji wodiu se n di.”
4Yezu ma leiri o we, “Ko nam popone Wɛ tɔnɔ kom ne we: ‘Ko dae wodiu yerane mo pae se nabiina ŋwe.’ ”#Nia Gulim 8:3
5Setaana pɛ daa ma ja‑o o ja vo o di peo kolo na dɔra to yuu. O laam ma bere‑o logo kom teene dem maama bedwe baŋa ne. 6O daa ma ta o we, “Wo-laaro tento maama ye amo nyem mo. A nam wó wane a kwei-te a pa wolo maama a na lage to. Amo wó pa se n di dam te maama baŋa ne, se n ta‑n jege zula nɔɔna maama tei ne. 7Nmo ná sɛ n kuni dwoona n zuli-ne, wonnu tento maama wó taa ye nmo nyem.”
8Yezu ma leiri o we, “Ko popone Wɛ tɔnɔ kom ne we:
‘Ko ye n Teiru Baŋa Wɛ yerane mo
n jege se n kuni dwoona n zuli‑o,
ye n toŋe n ke o boboŋa.’ ”#Nia Gulim 6:13
9Setaana pɛ daa ma kwei‑o o ja vo Jerusalem. O ma ja‑o o vo o di Wɛ diga kam yuu mɛ na dɔra to o zege‑o da, ye o we, “Nmo ná ye Wɛ Bu, se n faŋe n chu tega ne se dé nii. 10Kokuri ko popone Wɛ tɔnɔ kom ne we:
‘Wɛ wó toŋe o malese sem nmo tei ne,
se ba taa cho‑m cham maama wone.
11O maa wó pa se ba ba ba ma ba jea ba lwori‑m,
se n yé mage n naga de kandwɛ n to tega ne.’ ”#Lei 91:11-12
12Yezu laam ma leiri o we, “Ko ta popone Wɛ tɔnɔ kom ne we: ‘N yé faŋe n Teiru Baŋa Wɛ n nii.’ ”#Nia Gulim 6:16
13Setaana pɛ laam na maŋe Yezu wonnu maama wone o ga to, o ma yage‑o se ko ke fenfee.
14Yezu daa ta maa via, ye Wɛ Sin-laao kom dam wo o tei ne. O ma jwoori o vo Galili. Nɔɔna balo maama na zoore jei sem konto ne to ma ni o ŋwa. 15O ma yeini o zo Juu tiina jeerim di sem o bere-ba Wɛ chega kam. Nɔɔna maama maa zuli‑o lanyerane.
Yezu tete teo kom tiina ve‑o
Matiyu 13:53-58; Maake 6:1-6
16Yezu déem ma vo o yi teo kolo yere na ye Nazarete to. Ko ye teo kolo o na ke nɔɔno da to. Juu tiina siu dɛ maama o déem ma yeini o zo ba jeerim diga kam. Ba siu dɛ dedoa na yi to, o ma vo da. O na zo o wora to, o ma zaŋe wɛɛne se o ga Wɛ tɔnɔ o bere-ba. 17Wɛ sampwora Izaya na popone tɔnɔ kolo faŋa faŋa to ya kuni ko tigi da, pa ba kwei-ko ba pa‑o. O de ma bwoli-ko ye o nii o na mɛ seeni ko na popone to. O na nɛ to, o ma bobo ko garem o we:
18“Baŋa Wɛ Sin-laao kom mo wo amo baŋa ne.
Kokuri to, o tiŋi-ne mo se a tɔɔle o kwor-ywoŋa kam a bere yiniga tiina.
O ta ma toŋe-ne balo yiga na chege to tei ne,
se a tɔɔle o kwora kam a bere-ba we
ba laam wó taa tei ba tete,
se a daare a bere lilwoa we
ba yia wó ba ya puri.
O daa ta toŋe-ne se a pa balo
nɔɔna na bɛɛse-ba to jwoŋi siu,
19se a daare a tɔɔle we,
bene delo Baŋa Wɛ na wó ba
o fɔge o nɔɔna bam to laam yia.”#Izaya 61:1-2
20Yezu na gage o ti to, o laam ma pu tɔnɔ kom ye o kwei o pa ba diga kam tontoŋeno. O ma jeini tega ne se o bere-ba. Nɔɔna bam maama maa nii o yia ne se ba cheigi. 21O ma ta o we, “Zem dɛ dem ne, abam na nigi Wɛ tɔnɔ kom na bere kolo to jigi chega á tei ne.”
22Ba maama maa zuli‑o ye ba we, “O taane dem lamma.” O kwora kam na ywomma to, ko ke-ba yaau. Ba daa ta maa we, “Ko dae Josɛf bu mo tento na?”
23O ma ta de-ba o we, “Amo nam yei we abam wó ta sinseira de amo nenɛɛne, ‘Nmo wolo na yɔɔre nɔɔna to, se n yɔɔre n tete!’ Abam daa ta wó ta we, ‘Dé lɔre wonnu telo nmo na ke Kaparenia ne to. Konto ŋwaane daa‑n ke konto dwoŋi n tete teo wone ywoba seeni.’ ”
24O ta ma ta o we, “A tɛ abam chega ŋwaane to, nɔɔno ná ye Wɛ ni-jwoŋinu, o tete teo kom tiina yeini ba ba nege‑o. 25Ko seene ko ye chega mo. Maŋa kalo Wɛ sampwora Elija déem na wora to, doa déem tu ka ba ka wo nege taa, bena yatɔ de chane seredo mo. Konto ŋwaane da-kore déem zege ka maŋa ne pa kana wora logo kom maama wone. Kadeina maa daga dedɛ Isarele tiina bam wone, 26ye Wɛ nam wo toŋe Elija se o vo ba wolowolo tei. Wɛ déem nam toŋe‑o kadeim wodwoŋi tei ne, o na zoore Zarepata teo wone to. Sidon logo ne mo konto.#1 Pwa 17:7-16 27Ko ta woli da, maŋa kalo Wɛ sampwora Elisa déem na wora to, naywanno dedɛ déem wo Isarele teo kom ne. Ba wolowolo de déem wo nɛ yazura ba wone. Elisa déem pɛ se Naaman yerane mo na yazura, ye wonto nwoŋi Siria logo ne.”#2 Pwa 5:1-14
28Nɔɔna balo maama na wo jeerim diga kam ne to na nigi Yezu na tage kolo to, ba bane ma zaŋe lanyerane. 29Ba ma zaŋe ba zeili‑o ba pa o nwoŋi teo kom wone. Teo kom déem wo peo yuu ne mo. Ba ma ja‑o ba vo jeiga kalo na luuna de tega to se ba yigi‑o ba de tega ne ba go. 30Ba ma ware. Yezu ma pipiri o vo o tɔge ba tetare o nwoŋi o maa kɛa.
Yezu yɔɔre nɔɔna dedɛ
Matiyu 8:14-17; Maake 1:21-39
31Yezu déem ma vo Galili teo kodwoŋi, ko yere mo Kaparenia. Juu tiina siu dɛ ma yi. O ma vo o zo ba jeerim diga kam se o bere nɔɔna bam da. 32Ba maa tiini ba ye yaau de o berem dem, o ni taane na jege dam to ŋwaane.
33Nɔɔno wodwoŋi déem maa wo ba jeerim diga kam wone ye chichira daane‑o. 34O ma chwoosi de kwor-dɛa ye o we, “Woo! Yezu, Nazarete tu, bɛ mo n lage debam tei ne? Nmo tu se n chɔge debam dwi mo na? A nam yei nmo na ye wolo. Nmo ye Wo-pwoŋo Tu wolo Wɛ na toŋe to mo.”
35Yezu ma bwɛ chichira kam o we, “Cheigi sɔɔ, se n yage o yera se n viiri.” Setaane dem na nigi konto to, de ma yigi nɔɔno wom de de tega ne. De laam ma yage‑o ye de wo ke‑o kolokolo. Konto ma ke nɔɔna bam maama yia ne mo. 36Ko ma so-ba lanyerane. Ba maama maa ŋɔɔne daane ba we, “Bɛ mo ye o wane o ta tento? Nii o na mae o dam o tɛ de chichiri sem pa se se sɛ o ni ye se viiri.”
37Nɔɔna balo maama na zoore jei sem konto ne to laam ma ni Yezu ŋwa.
38Yezu déem ma nwoŋi jeerim diga kam wone. O ma vo Simon ba sɔŋɔ. O na yi da to, de paa mage Simon tenkaane lanyerane. Ba ma lwoori Yezu se o zeini kaane wom o jaweo kom baŋa ne. 39O ma vo o zege kaane wom tei ne. O ma ta o bere paa kam se ka yage kaane wom. Ka ma seene ka yage‑o. O laam ma zaŋe lela ye o ke wodiu o pa-ba.
40Ko na tu ko yi wɛ-zoore maŋa ne to, ba ma ja nɔɔna balo maama na ba jege yazura to ba ba Yezu tei se o yɔɔre-ba. Ba déem jege jaweero dwi dwi mo. O ma zi o jea ba dedoa dedoa baŋa ne pa se ba maama na yazura. 41Ko ta woli da, setaana de ma yage nɔɔna dedɛ ya na jege ya daane to yera. Ba maa yeini ba chwoosa mo ba we, “Nmo ye Wɛ Bu wom!” Ba nam na yei we o seene o ye Wɛ Dam Tu Krista wom to, o ma bwɛ-ba se ba daa yé taa ŋɔɔne o taane.
42Tega na poore tetete to Yezu daa ma nwoŋi o vo jei selo nɔɔn-nɔɔno na tera to. Teo kom nɔɔna bam ma zaŋe ba nwoŋi se ba beeri o jei. Ba laam ma na‑o ye ba vo o tei. Ba ma kwaane se ba che o chwoŋa se o yé viiri o yage-ba. 43O ma ta de-ba o we, “Amo nam jege se a vo a tole teene dedem mo a tɔɔle Wɛ paare dem kwor-ywoŋa kam. Ko ye konto ŋwaane mo Wɛ toŋe-ne nabiina tei ne.”
44O laam maa tole Judea teene dem. O déem yeini o zo ba jeerim di sem mo se o taa bere-ba Wɛ chega kam.
© 2020, Ghana Institute of Linguistics, Literacy and Bible Translation (GILLBT)