Luka 7
7
Yezu yɔɔre soja tu tontoŋeno
Matiyu 8:5-13
1Yezu déem na bere nɔn-kɔgɔ kom o memaŋa yam o ti to, o daa ma vo Kaparenia. 2Rom tiina soja yiga tu wodwoŋi déem mo wora, o na jege sɔŋɔ tontoŋeno. O maa swoi‑o dedɛ. O tontoŋeno wom déem maa weela lanyerane ye o lage o te. 3Soja tu wom ma ba o ni Yezu ŋwa. O ma toŋe Juu tiina nakwa o tei ne se ba pa o ba o jwoŋi o tontoŋeno wom ŋwea. 4Juu tiina nakwa bam ma vo Yezu tei ba tiini ba lwoori‑o se o ba o jwoŋi ba dedɛɛro wom tontoŋeno wom ŋwea. Ba ma ta ded‑o ba we, “O ye nɔn-ŋom. 5O swoi debam Juu tiina dwi dem, ye o daare o lɔ jeerim diga o pa debam. Konto ŋwaane, kwaane se n duri o yiniga.”
6Yezu ma sɛ. O ma tɔge dedaane-ba o maa vei soja tu wom sɔŋɔ. O ma twɛ sɔŋɔ kom, dedaane soja tu wom daa toŋe ni o tei ne o we, “Amo tu, yé yaare n tete n ba. A muri se n ba n zo amo sɔŋɔ. 7Konto ŋwaane mo pɛ se amo tete wo tu nmo tei. Nam ta n ni we, a tontoŋeno wom zaŋe, se o laam wó na yazura. 8Amo de ye nɔɔno wolo nɔɔna badwonna na jege dam amo baŋa ne to, ye amo de daa ta jege dam badaara baŋa ne. A ná tage we nɔɔno wolo véi, o jege se o vo mo. A nam daa ná we nɔɔno wolo ba, o de wó ba mo. Ko ta ná ye a tontoŋeno, a ná we o ke woŋo, o jege se o ke mo.”
9Yezu na nigi konto to, ko ma so‑o. O ma pipiri o nii kɔgɔ kolo na tɔge‑o to, ye o ta o we, “A tɛ abam, amo wo nɛ nɔɔn-nɔɔno o na jege wo-dedoa de amo se ko yi wonto na jege wo-dedoa tei to, ko ná maŋe ko ye Isarele dwi tiina bam wone de.”
10Soja tu wom nɔɔna bam laam ma jwoori sɔŋɔ. Ba na yi da to, ba nɛ de tontoŋeno wom jege yazura.
Yezu bi kadeim wodwoŋi bu
11Konto na kɛ to, Yezu daa ma zaŋe o vo teo kodwoŋi, ko yere mo Nayin. O na maa vei to, o kwaga tɔgena bam dedaane nɔn-kɔgɔ kamunu mo tɔge‑o ba maa via. 12O na yi teo kom ni to, o ma jeeri nɔɔna na zeŋe too de gandwa ba maa nwoŋa. Too wom nu ye kadeim mo. Mo o bu-doa. Teo kom kɔgɔ kamunu de maa tɔge too wom kwaga. 13Dé Teiru Yezu na nɛ kadeim dem to, o ma duri o ŋwaŋa. O ma ta ded‑o o we, “Yé ta‑n keera.” 14O ma vo o dwei gandwa yam. O na ke konto to, balo na zeŋe too wom to ma zege. Yezu ma ta de too wom o we, “Amo badwoŋi, a tɛ nmo se n zaŋe wɛɛne!” 15O na tage konto to, too wom ma seene o zaŋe ye o bobo ŋɔŋa. Yezu ma jwoŋi‑o o pa o nu wom.
16Nɔɔna bam maama na nɛ konto to, ba ma kɔre Wɛ lanyerane, ye ba tei‑o ba we, “Dé ke Wɛ lei! Wɛ ni-jwoŋinu kamunu nam chuga dé tei ne. Wɛ tu se o jwoŋi o nɔɔna bam mo.”
17Judea teene dem, de de nawuura yam maama laam ma ni Yezu ŋwa.
Jɔn wolo na pae nɔɔna sɛɛm to taane
Matiyu 11:2-19
18Jɔn de déem ma ni Yezu ŋwa. O kwaga tɔgena bam ma ta ba bere‑o Yezu na ke kolo maama to. O laam ma le o kwaga tɔgena bam balei, 19ye o toŋe-ba dé Teiru Yezu tei ne, se ba bwei‑o ba nii, wonto mo ye wolo Wɛ na bere-ba we o wó ba to, naa ba ta teene nɔɔno wodwoŋi.
20Nɔɔna bam ma vo Yezu tei ba ta ded‑o ba we, “Debam tu Jɔn wolo na pae nɔɔna sɛɛm to mo toŋe debam nmo tei ne, se dé ba dé bwei dé nii, nmo mo ye wolo Wɛ na bere debam we n wó ba to, naa de ta teene nɔɔno wodwoŋi?”
21Kanto maŋa kam ne nɔɔ mo Yezu déem yɔɔre nɔɔna dedɛ de ba jaweero dwi dwi. O ma yɔɔre chichiri na daane nɔɔna balo to, ye o daare o pa lilwoa dedɛ yia puri. 22O laam ma leiri Jɔn tontoŋena bam o we, “Véi-na á ta de Jɔn kolo maama á na nɛ to, ye á kwori á ni to. Á ta á bere‑o we, lilwoa mo jwoori ba nae, gwaaro de wae te via, naywanno yera de kwɛ lanyerane, zɔ-kɔro de zwa ni, twa de jwoori ba bi. Ko woli da, yiniga tiina de maa ni Wɛ kwor-ywoŋa kam.#Izaya 35:5-6 23Wolo maama na ba jwoori Wɛ kwaga ne amo ŋwaane to mo ye yu-ywoŋo tu.”
24Jɔn tontoŋena bam ma jwoori ba viiri. Yezu laam ma ta Jɔn taane o bere nɔn-kɔgɔ kom. O ma ta de-ba o we, “Abam déem na vei Jɔn tei kagoa yuu ne to, á boŋe we á wó na bɛ mo? Á vei se á nii gaaro telo vio na jege ko dole to mo na? 25Aawo. Se bɛ mo? Á vei se á nii nɔn-yero na zo gare-nyenno to mo na? Aawo. Nɔn-yero nam wó taa zoore sɔ-fɔrɔ wone mo ye o di o ni, se ko dae kagoa yuu ne. 26Bɛ nam mo ye á vo? Á vei se á na Wɛ sampwora mo na? Ɛɛ, ko ye konto mo. Á nam na nɛ wolo to tiini o dwoi faŋa faŋa Wɛ sampwori sem na ye tei to. 27Wɛ tɔnɔ kom nam maŋe ko ta wonto taane ko we:
‘Nii, amo Wɛ lage a toŋe a tontoŋeno mo,
se o da nmo yiga o vo o kwɛ chwoŋa kalo nmo na wó tɔge da to.’#Malaki 3:1
28A tɛ abam we, nabiina balo maama ba na maŋe ba lo to wone nɔɔn-nɔɔno tera o na yi Jɔn na ye tei to. Ko daare leile konto, nɔn-yɔɔ kolo maama na zo Wɛ paare woro kom wone to laam tu o dwoi Jɔn.”
29Nɔɔna bam maama dedaane lampwoo lara bam de na nigi konto to, ba ma sɛ we Wɛ jege chega, ba na maŋe ba jwoŋi sɛɛm Jɔn tei ne to ŋwaane. 30Ko daare Farisi tiina bam dedaane Wɛ nia zamesem tiina bam déem wo sɛ se ba jwoŋi sɛɛm Jɔn tei ne, ye ba yɔɔre ba ve se ba jwoŋi Wɛ na boŋe se o ke kolo o pa-ba to.
31Yezu daa ma ta o we, “Amo nam wó ke tɛ mo a maŋe zem nɔɔna bam kikia na ye tei to? Ba maa nye de bɛ mo? 32Zem nɔɔna bam nye nenɛɛne bia na jei yaga kaporo ne ba kwɛɛra to mo. Ba maa tɛ ba pa daane ba we:
‘Dé mage gullu mo se á sa,
ye á wo sage.
Dé ma daare dé leeni luseim dé pa abam,
ye á wo sɛ se á pa á yiga nyɔne.’
33Zem nɔɔna bam de ye konto mo. Wɛ sɛɛm tu Jɔn na tu to, o déem peene o kana mo, ye o kwori o ba nyɔ sana. Abam na nɛ‑o to, á maa jege‑o á yaala we, ko ye setaane mo tɔge‑o. 34Ko daare amo Nabiin-bu wom nam na tu to, amo wo vɔge ni. Abam daa ta maa yaale amo de, ye á we a ye nɔn-kwolo mo, ye a ye sa-nyɔro de. Á daa ta maa we, a me de lampwoo lara de nɔn-chechɔgero mo. 35Balo maama nam na jege yi-poro chekke to mo sɛ we Wɛ jege chega.”
Yezu vei Farisi tu wodwoŋi sɔŋɔ
36Farisi tu dedoa déem mo wora, o yere mo Simon. O ma bwoŋi Yezu se o da o vo o sɔŋɔ o di wodiu. Yezu ma vo o zo o sɔŋɔ kom o jeini se o di. 37Ka-chechɔgɔ maa wora teo kom konto ne. O ma lɔre we Yezu wo Farisi tu wom sɔŋɔ ne o di wodiu. O ma kwei kaboa na su de terale nuga to o ja vo Yezu tei. 38O ma vo o zege o kwaga ne, ye o keera. O yi-na maa lura pae Yezu nɛ wora se buga. O ma tiiri o ma o yu-ywei o guguni o yi-na bam, ye o ma o ni o duuri Yezu nɛ sem. O ma daare o pore terale nuga kam o lwo o ke da.
39Farisi tu wolo na bwoŋi Yezu o sɔŋɔ ne to ma na kolo na ke to. O laam ma boŋe o tete ne o we, “Nɔɔno wonto ya ná ye Wɛ ni-jwoŋinu chekke mo, o ya wó lɔre kaane wonto kikia na ye tei, ye o lɔre we kaane wolo na jege‑o o dwei to ye ka-chechɔgɔ mo.”
40Yezu ma ta ded‑o o we, “Simon, a lage a ta woŋo de nmo.” O maa we, “Berem tu, nam ta.”
41Yezu laam ma maŋe memaŋe o we: “Ko nye de nɔɔna balei na jege sabu jenno jene tei to mo. Ba dedoa jege jene nenɛɛne sabu ywollu bia yanu (500) mo, wodwoŋi wom maa jege ywollu finnu (50). 42Ba ma ware ba ŋwe jene dem, pa se o yage o ma chɛ ba maama. Tɔ. Ta n bere-ne, banto wone wɔ mo wó taa swoi‑o ko dwoi?” 43Simon ma leiri‑o o we, “Amo boŋe we o na mɛ o chɛ wolo wom dedɛ to mo.” Yezu ma ta o we, “N pɔɔre chega mo.”
44O laam ma pipiri kaane wom seeni, ye o ta de Simon o we, “Nmo nɛ kaane wonto na? Amo na tu a zo n sɔŋɔ kom to, nmo wo pɛ-ne na se a ma se a nɛ. Ko daare kaane wonto bugi a nɛ sem dedaane o yi-na, ye o daare o guguni-se dedaane o yu-ywei. 45Amo na tu to, nmo wo kukwori-ne se ko bere we n jeeri-ne lanyerane. Ko daare kaane wom duuri a nɛ mo taa, ko zege maŋa kam a na tu to. 46A na tu nmo tei to, n wo sɛ se n kwei nuga n ke a yuu ne se ko pa-ne zula. Ko daare kaane wom mo kwei terale nuga o lwo o ke a nɛ yera ne. 47O kikia yam bere we o wo-balwaaro dedɛ tem mo saare. O swono kom dedɛ mo bere konto. Ko daare wolo Wɛ na saare o wɛleera fenfee yerane to mo jege swono fenfee yerane.”
48Yezu laam ma daare o ta de kaane wom o we, “Nmo wɛleera yam saare.” 49O na tage konto to, nɔɔna balo de na tɔge ba wora to ma ŋɔɔne daane ba we, “Wonto nam bere o tete we o ye wɔ mo ye o yage nɔɔno wɛleera o ma chɛ‑o?”
50O laam ma ta de kaane wom o we, “Nmo na ke n wo-dedoa de amo to mo pɛ se Wɛ jwoŋi n ŋwea. Véi, se Wɛ wó pa‑m yazura.”
© 2020, Ghana Institute of Linguistics, Literacy and Bible Translation (GILLBT)
Luka 7
7
Yezu yɔɔre soja tu tontoŋeno
Matiyu 8:5-13
1Yezu déem na bere nɔn-kɔgɔ kom o memaŋa yam o ti to, o daa ma vo Kaparenia. 2Rom tiina soja yiga tu wodwoŋi déem mo wora, o na jege sɔŋɔ tontoŋeno. O maa swoi‑o dedɛ. O tontoŋeno wom déem maa weela lanyerane ye o lage o te. 3Soja tu wom ma ba o ni Yezu ŋwa. O ma toŋe Juu tiina nakwa o tei ne se ba pa o ba o jwoŋi o tontoŋeno wom ŋwea. 4Juu tiina nakwa bam ma vo Yezu tei ba tiini ba lwoori‑o se o ba o jwoŋi ba dedɛɛro wom tontoŋeno wom ŋwea. Ba ma ta ded‑o ba we, “O ye nɔn-ŋom. 5O swoi debam Juu tiina dwi dem, ye o daare o lɔ jeerim diga o pa debam. Konto ŋwaane, kwaane se n duri o yiniga.”
6Yezu ma sɛ. O ma tɔge dedaane-ba o maa vei soja tu wom sɔŋɔ. O ma twɛ sɔŋɔ kom, dedaane soja tu wom daa toŋe ni o tei ne o we, “Amo tu, yé yaare n tete n ba. A muri se n ba n zo amo sɔŋɔ. 7Konto ŋwaane mo pɛ se amo tete wo tu nmo tei. Nam ta n ni we, a tontoŋeno wom zaŋe, se o laam wó na yazura. 8Amo de ye nɔɔno wolo nɔɔna badwonna na jege dam amo baŋa ne to, ye amo de daa ta jege dam badaara baŋa ne. A ná tage we nɔɔno wolo véi, o jege se o vo mo. A nam daa ná we nɔɔno wolo ba, o de wó ba mo. Ko ta ná ye a tontoŋeno, a ná we o ke woŋo, o jege se o ke mo.”
9Yezu na nigi konto to, ko ma so‑o. O ma pipiri o nii kɔgɔ kolo na tɔge‑o to, ye o ta o we, “A tɛ abam, amo wo nɛ nɔɔn-nɔɔno o na jege wo-dedoa de amo se ko yi wonto na jege wo-dedoa tei to, ko ná maŋe ko ye Isarele dwi tiina bam wone de.”
10Soja tu wom nɔɔna bam laam ma jwoori sɔŋɔ. Ba na yi da to, ba nɛ de tontoŋeno wom jege yazura.
Yezu bi kadeim wodwoŋi bu
11Konto na kɛ to, Yezu daa ma zaŋe o vo teo kodwoŋi, ko yere mo Nayin. O na maa vei to, o kwaga tɔgena bam dedaane nɔn-kɔgɔ kamunu mo tɔge‑o ba maa via. 12O na yi teo kom ni to, o ma jeeri nɔɔna na zeŋe too de gandwa ba maa nwoŋa. Too wom nu ye kadeim mo. Mo o bu-doa. Teo kom kɔgɔ kamunu de maa tɔge too wom kwaga. 13Dé Teiru Yezu na nɛ kadeim dem to, o ma duri o ŋwaŋa. O ma ta ded‑o o we, “Yé ta‑n keera.” 14O ma vo o dwei gandwa yam. O na ke konto to, balo na zeŋe too wom to ma zege. Yezu ma ta de too wom o we, “Amo badwoŋi, a tɛ nmo se n zaŋe wɛɛne!” 15O na tage konto to, too wom ma seene o zaŋe ye o bobo ŋɔŋa. Yezu ma jwoŋi‑o o pa o nu wom.
16Nɔɔna bam maama na nɛ konto to, ba ma kɔre Wɛ lanyerane, ye ba tei‑o ba we, “Dé ke Wɛ lei! Wɛ ni-jwoŋinu kamunu nam chuga dé tei ne. Wɛ tu se o jwoŋi o nɔɔna bam mo.”
17Judea teene dem, de de nawuura yam maama laam ma ni Yezu ŋwa.
Jɔn wolo na pae nɔɔna sɛɛm to taane
Matiyu 11:2-19
18Jɔn de déem ma ni Yezu ŋwa. O kwaga tɔgena bam ma ta ba bere‑o Yezu na ke kolo maama to. O laam ma le o kwaga tɔgena bam balei, 19ye o toŋe-ba dé Teiru Yezu tei ne, se ba bwei‑o ba nii, wonto mo ye wolo Wɛ na bere-ba we o wó ba to, naa ba ta teene nɔɔno wodwoŋi.
20Nɔɔna bam ma vo Yezu tei ba ta ded‑o ba we, “Debam tu Jɔn wolo na pae nɔɔna sɛɛm to mo toŋe debam nmo tei ne, se dé ba dé bwei dé nii, nmo mo ye wolo Wɛ na bere debam we n wó ba to, naa de ta teene nɔɔno wodwoŋi?”
21Kanto maŋa kam ne nɔɔ mo Yezu déem yɔɔre nɔɔna dedɛ de ba jaweero dwi dwi. O ma yɔɔre chichiri na daane nɔɔna balo to, ye o daare o pa lilwoa dedɛ yia puri. 22O laam ma leiri Jɔn tontoŋena bam o we, “Véi-na á ta de Jɔn kolo maama á na nɛ to, ye á kwori á ni to. Á ta á bere‑o we, lilwoa mo jwoori ba nae, gwaaro de wae te via, naywanno yera de kwɛ lanyerane, zɔ-kɔro de zwa ni, twa de jwoori ba bi. Ko woli da, yiniga tiina de maa ni Wɛ kwor-ywoŋa kam.#Izaya 35:5-6 23Wolo maama na ba jwoori Wɛ kwaga ne amo ŋwaane to mo ye yu-ywoŋo tu.”
24Jɔn tontoŋena bam ma jwoori ba viiri. Yezu laam ma ta Jɔn taane o bere nɔn-kɔgɔ kom. O ma ta de-ba o we, “Abam déem na vei Jɔn tei kagoa yuu ne to, á boŋe we á wó na bɛ mo? Á vei se á nii gaaro telo vio na jege ko dole to mo na? 25Aawo. Se bɛ mo? Á vei se á nii nɔn-yero na zo gare-nyenno to mo na? Aawo. Nɔn-yero nam wó taa zoore sɔ-fɔrɔ wone mo ye o di o ni, se ko dae kagoa yuu ne. 26Bɛ nam mo ye á vo? Á vei se á na Wɛ sampwora mo na? Ɛɛ, ko ye konto mo. Á nam na nɛ wolo to tiini o dwoi faŋa faŋa Wɛ sampwori sem na ye tei to. 27Wɛ tɔnɔ kom nam maŋe ko ta wonto taane ko we:
‘Nii, amo Wɛ lage a toŋe a tontoŋeno mo,
se o da nmo yiga o vo o kwɛ chwoŋa kalo nmo na wó tɔge da to.’#Malaki 3:1
28A tɛ abam we, nabiina balo maama ba na maŋe ba lo to wone nɔɔn-nɔɔno tera o na yi Jɔn na ye tei to. Ko daare leile konto, nɔn-yɔɔ kolo maama na zo Wɛ paare woro kom wone to laam tu o dwoi Jɔn.”
29Nɔɔna bam maama dedaane lampwoo lara bam de na nigi konto to, ba ma sɛ we Wɛ jege chega, ba na maŋe ba jwoŋi sɛɛm Jɔn tei ne to ŋwaane. 30Ko daare Farisi tiina bam dedaane Wɛ nia zamesem tiina bam déem wo sɛ se ba jwoŋi sɛɛm Jɔn tei ne, ye ba yɔɔre ba ve se ba jwoŋi Wɛ na boŋe se o ke kolo o pa-ba to.
31Yezu daa ma ta o we, “Amo nam wó ke tɛ mo a maŋe zem nɔɔna bam kikia na ye tei to? Ba maa nye de bɛ mo? 32Zem nɔɔna bam nye nenɛɛne bia na jei yaga kaporo ne ba kwɛɛra to mo. Ba maa tɛ ba pa daane ba we:
‘Dé mage gullu mo se á sa,
ye á wo sage.
Dé ma daare dé leeni luseim dé pa abam,
ye á wo sɛ se á pa á yiga nyɔne.’
33Zem nɔɔna bam de ye konto mo. Wɛ sɛɛm tu Jɔn na tu to, o déem peene o kana mo, ye o kwori o ba nyɔ sana. Abam na nɛ‑o to, á maa jege‑o á yaala we, ko ye setaane mo tɔge‑o. 34Ko daare amo Nabiin-bu wom nam na tu to, amo wo vɔge ni. Abam daa ta maa yaale amo de, ye á we a ye nɔn-kwolo mo, ye a ye sa-nyɔro de. Á daa ta maa we, a me de lampwoo lara de nɔn-chechɔgero mo. 35Balo maama nam na jege yi-poro chekke to mo sɛ we Wɛ jege chega.”
Yezu vei Farisi tu wodwoŋi sɔŋɔ
36Farisi tu dedoa déem mo wora, o yere mo Simon. O ma bwoŋi Yezu se o da o vo o sɔŋɔ o di wodiu. Yezu ma vo o zo o sɔŋɔ kom o jeini se o di. 37Ka-chechɔgɔ maa wora teo kom konto ne. O ma lɔre we Yezu wo Farisi tu wom sɔŋɔ ne o di wodiu. O ma kwei kaboa na su de terale nuga to o ja vo Yezu tei. 38O ma vo o zege o kwaga ne, ye o keera. O yi-na maa lura pae Yezu nɛ wora se buga. O ma tiiri o ma o yu-ywei o guguni o yi-na bam, ye o ma o ni o duuri Yezu nɛ sem. O ma daare o pore terale nuga kam o lwo o ke da.
39Farisi tu wolo na bwoŋi Yezu o sɔŋɔ ne to ma na kolo na ke to. O laam ma boŋe o tete ne o we, “Nɔɔno wonto ya ná ye Wɛ ni-jwoŋinu chekke mo, o ya wó lɔre kaane wonto kikia na ye tei, ye o lɔre we kaane wolo na jege‑o o dwei to ye ka-chechɔgɔ mo.”
40Yezu ma ta ded‑o o we, “Simon, a lage a ta woŋo de nmo.” O maa we, “Berem tu, nam ta.”
41Yezu laam ma maŋe memaŋe o we: “Ko nye de nɔɔna balei na jege sabu jenno jene tei to mo. Ba dedoa jege jene nenɛɛne sabu ywollu bia yanu (500) mo, wodwoŋi wom maa jege ywollu finnu (50). 42Ba ma ware ba ŋwe jene dem, pa se o yage o ma chɛ ba maama. Tɔ. Ta n bere-ne, banto wone wɔ mo wó taa swoi‑o ko dwoi?” 43Simon ma leiri‑o o we, “Amo boŋe we o na mɛ o chɛ wolo wom dedɛ to mo.” Yezu ma ta o we, “N pɔɔre chega mo.”
44O laam ma pipiri kaane wom seeni, ye o ta de Simon o we, “Nmo nɛ kaane wonto na? Amo na tu a zo n sɔŋɔ kom to, nmo wo pɛ-ne na se a ma se a nɛ. Ko daare kaane wonto bugi a nɛ sem dedaane o yi-na, ye o daare o guguni-se dedaane o yu-ywei. 45Amo na tu to, nmo wo kukwori-ne se ko bere we n jeeri-ne lanyerane. Ko daare kaane wom duuri a nɛ mo taa, ko zege maŋa kam a na tu to. 46A na tu nmo tei to, n wo sɛ se n kwei nuga n ke a yuu ne se ko pa-ne zula. Ko daare kaane wom mo kwei terale nuga o lwo o ke a nɛ yera ne. 47O kikia yam bere we o wo-balwaaro dedɛ tem mo saare. O swono kom dedɛ mo bere konto. Ko daare wolo Wɛ na saare o wɛleera fenfee yerane to mo jege swono fenfee yerane.”
48Yezu laam ma daare o ta de kaane wom o we, “Nmo wɛleera yam saare.” 49O na tage konto to, nɔɔna balo de na tɔge ba wora to ma ŋɔɔne daane ba we, “Wonto nam bere o tete we o ye wɔ mo ye o yage nɔɔno wɛleera o ma chɛ‑o?”
50O laam ma ta de kaane wom o we, “Nmo na ke n wo-dedoa de amo to mo pɛ se Wɛ jwoŋi n ŋwea. Véi, se Wɛ wó pa‑m yazura.”
© 2020, Ghana Institute of Linguistics, Literacy and Bible Translation (GILLBT)