Luka 8
8
1Konto kwaga ne, Yezu déem beeri o tole te-kamunnu de te-balwa maama mo ye o tɔɔle Wɛ paare dem kwor-ywoŋa kam. O nɔɔna fuga-balei bam de déem maa tɔge‑o ba beera. 2Kaana badwonna de tɔge ba wo o tei ne. Banto ye balo chichiri de jaweero dwi dwi ya na daane-ba ye Yezu yɔɔre-ba to. Ba dedoa yere mo Mary, wolo ba na bwoi we Magadala to. Wonto mo Yezu ya zeili chichiri serepɛ o tei ne.#Matiyu 27:55-56; Jɔn 19:25 3Kaane wodwoŋi yere mo Joanna. Wonto mo ye Chuza wolo na ye Herodi sɔŋɔ tu to kaane. Wodwoŋi de yere mo Suzanna. Kaana dedɛ de tɔge ba wora. Kaana banto maama déem yeini ba maŋe kolo ba na jege to ba maa woli Yezu de o tɔgena bam.
Dé jege se dé jwoŋi Wɛ taane
Matiyu 13:1-23; Maake 4:1-20
4Nɔn-kɔgɔ dedɛ déem nwoŋi teene dwi dwi ba vo Yezu tei, pa se kɔgɔ kamunu gilimi‑o. O laam ma maŋe memaŋe o bere-ba o we:
5“Valo déem mo wora. O ma zaŋe o vo o kara se o du. O ma kare o dole o men-dwa yam. Yadwonna ma to chwoŋa ni ne. Nɔɔna maa nɔna ya baŋa ne ba kɛa. Zuna ma na-ya ba twɛ ba di. 6Yadaara ma to kandwa jeiga ne. Tega kam na ba zura to, ya ma nwoŋi ye ya kwaare ya te lela. 7Men-dwa yadaara ma to sabare wone. Ya na puli to, sabare sem ma tɔge se zaŋe se jujugi-ya se go. 8Ko daare yadaara ma to te-ŋoŋa baŋa ne. Ya ma nwoŋi ya ke bia lanyerane nenɛɛne bia bi bi.”
Yezu na tage konto o ti to, o laam ma ta o we, “Á nam fɔge á cheigi a taane dem lanyerane.”
9Yezu kwaga tɔgena bam laam ma bwei‑o ba we, “Memaŋe dento kuri mo bɛ?” 10O ma leiri-ba o we, “Ko ná ye abam, Wɛ maŋe o pa se á lɔre o paare dem kuri na ye tei to, ye chega kam konto ya maŋe ka seigi mo. Ko daare nɔɔna badaara, amo yeini a maŋe memaŋa mo a bere-ba, se ba yia taa nae amo na ke kolo to, ye ko ba pae ba maana, se amo berem dem to ba zwa ne, ye ba ba ni de kuri.#Izaya 6:9
11Memaŋe dem kuri mo tento: Men-dwa yam bere Wɛ taane dem na ye tei to mo. 12Yalo na to chwoŋa kam ni ne to nye de nɔɔna balo na ni Wɛ taane dem, ye setaana pɛ laam ba o chaale-de pa de wo zo ba boboŋa. O ke konto se ba yé sɛ Wɛ ni se o jwoŋi-ba. 13Yalo na to kandwa yuu ne to maa nye de nɔɔna balo na ni Wɛ taane dem, ye ba jwoŋi-de de wopwolo. Taane dem maa wo tiini de zo ba boboŋa, ye ko ná ke fenfee, ba daa ba sɛa. Cham maŋa ná yia, ba laam wó kwei ba yage mo. 14Men-dwa yalo na to sabare sem wone to maa bere nɔɔna balo na ni Wɛ taane dem, ye ba zaŋe ba to chwoŋa ne ba maa kɛa. Ba maa jege lwia de ba ŋwea wonnu, ye sabu-laga de logo baŋa ywoni chɔge ba boboŋa, ne sabare sem na jujugi mena yam tei to. Banto boboŋa daa bá kweere de Wɛ chega kam tɔgem. 15Men-dwa yalo nam na to te-ŋoŋa jei sem ne to bere balo na ni Wɛ taane dem, ye ba jwoŋi-de lanyerane ba ke ba bochara ne to. Banto mo jege boboŋ-laaro ye ba vɔ ba wo de Wɛ chega kam tɔgem. Wɛ taane dem ma ja kuri de pa-ba, ne mena yalo na ke bia dedɛ to.”
Kanea memaŋe
Maake 4:21-25
16Yezu daa ma ta o we, “Nɔɔno ná jege kanea, o bá sɛ se o tɔre-ka o pu zoŋa wone, naa o zege-ka gadwogo kuri ne. O nam wó kwei-ka o pale wɛɛne mo, se ka taa jege pwooni ka pae balo na lage ba zo diga kam wo to. 17Wɛ chega kalo maama zem na seigi nɔɔna tei ne to wó ba ka lɔre ja mo. Kolo maama zem na pugi to wó puri mo, se nɔɔna lɔre ko kuri na ye tei.
18Kwaane-na á pa se á na ni kolo to zo á boboŋa. Nɔɔno ná maŋe o jege woŋo, o ta wó jwoŋi kodwoŋi o woli da. Nɔɔno wolo nam na maŋe o ba jege kolokolo to wó ba o ga kolo fenfee o ya na boŋe we o jege to mo.”
Yezu nu de o nyaana na ye balo to
Matiyu 12:46-50; Maake 3:31-35
19Yezu nu de o nyaana ma ba o tei se ba na‑o. Ba ma ware ba yi o tei, kɔgɔ kom na daga to ŋwaane. 20Nɔɔno wodwoŋi ma ta de Yezu o we, “N nu de n nyaana mo tu ba zege pwooni ne, ye ba lage se ba na‑m.” 21O ma leiri-ba o we, “Balo maama na ni Wɛ taane dem ye ba tɔge o boboŋa to mo ye amo nu de a nyaana.”
Yezu jege dam vo-fɔrɔ baŋa ne
Matiyu 8:23-27; Maake 4:35-41
22Dɛ dedwe Yezu de o kwaga tɔgena bam ma zo nabworo. O ma ta de-ba o we, “Pa se dé bɛ buga kam ni dedwoŋi dem.” Ba ma bobo se ba yɛ ba kɛ. 23Ba na maa kɛ to, Yezu ma to dɔɔm ne. Vo-fɔrɔ ma pɔpɔ ko zaŋe ko ba buga kam baŋa ko mage bworo kom pa se ko wora ko liri na se ko tu na bam kuri. Ba déem maa wo cham wone. 24Ba ma vo ba dwei Yezu pa o zaŋe, ye ba we, “Dé Tu, nii, dé lage de nyɔ na dé te.”
O laam ma zaŋe wɛɛne ye o daare o bage vio kom de na bam we, te yage! Vio kom laam ma yage, ye na bam de maŋe da chemm. 25O ma bwei o kwaga tɔgena bam o we, “Bɛ mo ye á ba jege wo-dedoa de amo?” Foone ma ja-ba, ye ko ke-ba yaau. Ba ma bwei daane ba we, “Wonto nam ye wɔ mo? O bage vio kom de na bam ye te sɛ o ni.”
Yezu zeili setaana nɔɔno tei ne
Matiyu 8:28-34; Maake 5:1-20
26Ba ma yɛ ba vo ba bɛ buga kam. Ba ma yi Gerasa tiina na zoore mɛ to. Buga kam tigi jei sem konto de Galili tetare laŋa ne mo. 27Yezu ma nwoŋi nabworo kom wone. Teo kom nɔɔno dedoa ma ba o jeeri‑o. Setaana mo jege nɔɔno wom konto ya daana ko zege faŋa faŋa. O maa wo zo kolokolo, ye o ba zoore sɔŋɔ ne. O yeini o tigi yibeela jei ne mo. 28O na nɛ Yezu to, o ma bobo se o chwoosi wɛ-wɛ. O ma vo o to Yezu yiga ne, ye o kaase de kwor-dɛa o we, “Yezu, Yuu-tu Baŋa Wɛ Bu, nmo tu amo tei se n ke bɛ mo? Popo, yé waare-ne.”#Maake 3:11 29O tage konto kolo ŋwaane Yezu maŋe o pa chichira kam ni se ka yage nɔɔno wom yera. Kuni dedɛ chichira kam déem yeini ka ja‑o. Konto mo pɛ se ba yeini ba kwei chaponno ba ma vɔ o jea de o nɛ, se ba taa yere‑o. Ba ná yeini ba ke‑o konto, o yeini o kɔ-te mo. Setaane dem laam wó zeili‑o pa se o duri o vo kagoa wo.
30Yezu laam ma bwei‑o o we, “N yere mo bɛ?” O ma leiri o we, “A yere mo Akɔgɔ”, kolo ŋwaane setaana dedɛ mo tɔge‑o. 31Setaana yam ma tiini ya lwoori Yezu se o yé zeili-ya pa ya zo tega kuri gwoŋ-chanluŋu kom wone.
32Teira kɔgɔ dedɛ déem maa wora jei sem ne ya beeri ya wodiu peo teiŋa ne ya di. Setaana yam ma lwoori Yezu se o pa-ya chwoŋa se ya zo teira yam wone ya taa tɔge-ya. O ma sɛ. 33Setaana yam laam ma yage nɔɔno wom yera ye ya vo ya tɔge teira yam. Teira yam maama ma duri ya siseiri ya tu buga kam wo ya nyɔ na ya te.
34Nɔɔna balo ya na yere tera yam to ma na ko na ke tei to. Ba ma duri ba vo ba ta kolo na ke to ba bere teo kom nɔɔna bam de balo na toŋe ba kare ne to. 35Nɔɔna bam ma nwoŋi ba vo se ba nii ko na ke tei. Ba ma vo ba yi Yezu tei. Ba ma na nɔɔno wolo setaana yam na yage‑o to. O maa jei Yezu tei ne dedaane o boboŋa jwoori ya ba, ye o zo gwaaro. Ba na nɛ‑o konto to, foone ma zo-ba. 36Balo yi na nɛ ko maama to ma ta ba bere nɔɔna bam ko na ke tei ye setaana yam yage nɔɔno wom yera to.
37Gerasa tiina teo kom de ko nawuura yam maama nɔn-bia bam ma lwoori Yezu se o viiri, kolo ŋwaane foone tiini de jege-ba. Yezu laam ma jwoori o vo o zo nabworo kom se o kɛ. 38O na maa viiri to, nɔɔno wolo setaana yam na yage‑o to ma lwoori‑o se o pa o da o vo. Yezu maa wo sɛ. 39O ma ta de nɔɔno wom o we, “Jwoori n vo sɔŋɔ se n ta kolo Wɛ na ke o pa nmo to n bere-ba.” Nɔɔno wom ma kɛ o vo o tole teo kom maama o ta kolo Yezu na ke o pa‑o to.
Yezu yɔɔre nɔɔna badwonna
Matiyu 9:18-26; Maake 5:21-43
40Yezu déem ma jwoori o bɛ buga kam ni dedwoŋi dem. O na nwoŋi nabworo kom wone to, dedaane kɔgɔ dedɛ mo maŋe ko gilimi daane ko pɔ‑o. Ba na nɛ‑o to mo ba jeeri‑o lanyerane. 41Nɔɔno wodwoŋi maa tɔge o wora, o yere mo Jarusi. O maa ye Juu tiina jeerim diga kam yiga tu. O ma vo Yezu tei o tiiri tega ne o yiga ne o lwoori‑o o we, “Popo, ba debam sɔŋɔ.” 42O tage konto kolo ŋwaane o jege bu dedoa yerane mo ye o lage o te. Bu wom ye busankana mo, nenɛɛne bena fuga-yalei tei. Yezu ma sɛ se o vo.
O na maa kɛ to, kɔgɔ kom tiini ko peene‑o. 43Kaane wodwoŋi maa tɔge o wora, o na tiini o wɔe wo mo taa, bena fuga-yalei. Nɔɔn-nɔɔno maa ware o yɔɔre‑o. 44O ma kɛ Yezu kwaga o vo o laare o dwei o gɔrɔ kom ni. O na dwei‑o konto to, jana bam ma kɔ bedwe baŋa ne.
45Yezu ma bwei o we, “Wɔ mo konto ye o dwei amo?” Ba maama ma fo. Piita de balo na wo o tei ne to ma ta ba we, “Dé Tu, nmo wo nɛ nɔɔna bam na tiini ba daga ye ba yigi ba peene nmo tei to na?” 46Yezu ma leiri o we, “Ko ye nɔɔno mo dwei-ne. Amo yei we a dam nwoŋi a yera ne.”
47Kaane wom ma lɔre we o bá lu. Foone maa jege‑o ye o yera sae. O ma vo Yezu tei o tiiri tega ne o yiga ne. O ma ta ded‑o kolo maama na pɛ se o dwei‑o konto to, de o na nɛ yazura bedwe baŋa ne tei to. Kɔgɔ kom maama ma ni o na tage kolo to. 48Yezu laam ma ta ded‑o o we, “A bukɔ, nmo na ke n wo-dedoa de amo tei to mo pɛ se n na yazura. Véi, se Wɛ wó pa‑m yazura.”
49Yezu ta na wora o ŋɔɔne konto to, nɔɔno wodwoŋi ma ba o yi o tei, o na nwoŋi yiga tu Jarusi sɔŋɔ to. O ma ba o ta ded‑o o we, “N bukɔ wom tega. Daa‑n yé ta‑n daane berem tu wom.” 50Yezu na nigi konto to, o ma ta de Jarusi o we, “Yé ta‑n fona. Ke n wo-dedoa de amo, se ko wó gare bu wom yera ne.”
51Ba ma vo ba yi sɔŋɔ kom. Yezu ma zo. O maa wo sɛ se nɔɔna da‑o ba zo, ko ná dae Piita, de Jɔn, de Jemsi, de bu wom kwo, de o nu yerane. 52Balo maama na maŋe ba wo sɔŋɔ kom wone to maa chwoosa, ye ba keera busankana kam ŋwaane. Yezu ma ta de-ba o we, “Á yé ta‑á keera. O wo tege, o dɔ mo.” 53O na tage konto to, ba maama ma mɔne‑o, kolo ŋwaane ba yei we bu wom seene o te.
54Yezu laam ma vo o ja busankana kam jeŋa, ye o ta de-ka o we, “A bu, zaŋe wɛɛne.” 55O na tage konto to, o ŋwea ma jwoori. O ma zaŋe wɛɛne bedwe baŋa ne. Yezu ma ta-ba se ba ke wodiu ba pa bu wom se o di. 56Ko ma so bu wom kwo de o nu lanyerane. Yezu ma kaane-ba o we, ba yé zaŋe ba ta ba bere nɔɔn-nɔɔno woŋo kolo na ke to.
© 2020, Ghana Institute of Linguistics, Literacy and Bible Translation (GILLBT)
Luka 8
8
1Konto kwaga ne, Yezu déem beeri o tole te-kamunnu de te-balwa maama mo ye o tɔɔle Wɛ paare dem kwor-ywoŋa kam. O nɔɔna fuga-balei bam de déem maa tɔge‑o ba beera. 2Kaana badwonna de tɔge ba wo o tei ne. Banto ye balo chichiri de jaweero dwi dwi ya na daane-ba ye Yezu yɔɔre-ba to. Ba dedoa yere mo Mary, wolo ba na bwoi we Magadala to. Wonto mo Yezu ya zeili chichiri serepɛ o tei ne.#Matiyu 27:55-56; Jɔn 19:25 3Kaane wodwoŋi yere mo Joanna. Wonto mo ye Chuza wolo na ye Herodi sɔŋɔ tu to kaane. Wodwoŋi de yere mo Suzanna. Kaana dedɛ de tɔge ba wora. Kaana banto maama déem yeini ba maŋe kolo ba na jege to ba maa woli Yezu de o tɔgena bam.
Dé jege se dé jwoŋi Wɛ taane
Matiyu 13:1-23; Maake 4:1-20
4Nɔn-kɔgɔ dedɛ déem nwoŋi teene dwi dwi ba vo Yezu tei, pa se kɔgɔ kamunu gilimi‑o. O laam ma maŋe memaŋe o bere-ba o we:
5“Valo déem mo wora. O ma zaŋe o vo o kara se o du. O ma kare o dole o men-dwa yam. Yadwonna ma to chwoŋa ni ne. Nɔɔna maa nɔna ya baŋa ne ba kɛa. Zuna ma na-ya ba twɛ ba di. 6Yadaara ma to kandwa jeiga ne. Tega kam na ba zura to, ya ma nwoŋi ye ya kwaare ya te lela. 7Men-dwa yadaara ma to sabare wone. Ya na puli to, sabare sem ma tɔge se zaŋe se jujugi-ya se go. 8Ko daare yadaara ma to te-ŋoŋa baŋa ne. Ya ma nwoŋi ya ke bia lanyerane nenɛɛne bia bi bi.”
Yezu na tage konto o ti to, o laam ma ta o we, “Á nam fɔge á cheigi a taane dem lanyerane.”
9Yezu kwaga tɔgena bam laam ma bwei‑o ba we, “Memaŋe dento kuri mo bɛ?” 10O ma leiri-ba o we, “Ko ná ye abam, Wɛ maŋe o pa se á lɔre o paare dem kuri na ye tei to, ye chega kam konto ya maŋe ka seigi mo. Ko daare nɔɔna badaara, amo yeini a maŋe memaŋa mo a bere-ba, se ba yia taa nae amo na ke kolo to, ye ko ba pae ba maana, se amo berem dem to ba zwa ne, ye ba ba ni de kuri.#Izaya 6:9
11Memaŋe dem kuri mo tento: Men-dwa yam bere Wɛ taane dem na ye tei to mo. 12Yalo na to chwoŋa kam ni ne to nye de nɔɔna balo na ni Wɛ taane dem, ye setaana pɛ laam ba o chaale-de pa de wo zo ba boboŋa. O ke konto se ba yé sɛ Wɛ ni se o jwoŋi-ba. 13Yalo na to kandwa yuu ne to maa nye de nɔɔna balo na ni Wɛ taane dem, ye ba jwoŋi-de de wopwolo. Taane dem maa wo tiini de zo ba boboŋa, ye ko ná ke fenfee, ba daa ba sɛa. Cham maŋa ná yia, ba laam wó kwei ba yage mo. 14Men-dwa yalo na to sabare sem wone to maa bere nɔɔna balo na ni Wɛ taane dem, ye ba zaŋe ba to chwoŋa ne ba maa kɛa. Ba maa jege lwia de ba ŋwea wonnu, ye sabu-laga de logo baŋa ywoni chɔge ba boboŋa, ne sabare sem na jujugi mena yam tei to. Banto boboŋa daa bá kweere de Wɛ chega kam tɔgem. 15Men-dwa yalo nam na to te-ŋoŋa jei sem ne to bere balo na ni Wɛ taane dem, ye ba jwoŋi-de lanyerane ba ke ba bochara ne to. Banto mo jege boboŋ-laaro ye ba vɔ ba wo de Wɛ chega kam tɔgem. Wɛ taane dem ma ja kuri de pa-ba, ne mena yalo na ke bia dedɛ to.”
Kanea memaŋe
Maake 4:21-25
16Yezu daa ma ta o we, “Nɔɔno ná jege kanea, o bá sɛ se o tɔre-ka o pu zoŋa wone, naa o zege-ka gadwogo kuri ne. O nam wó kwei-ka o pale wɛɛne mo, se ka taa jege pwooni ka pae balo na lage ba zo diga kam wo to. 17Wɛ chega kalo maama zem na seigi nɔɔna tei ne to wó ba ka lɔre ja mo. Kolo maama zem na pugi to wó puri mo, se nɔɔna lɔre ko kuri na ye tei.
18Kwaane-na á pa se á na ni kolo to zo á boboŋa. Nɔɔno ná maŋe o jege woŋo, o ta wó jwoŋi kodwoŋi o woli da. Nɔɔno wolo nam na maŋe o ba jege kolokolo to wó ba o ga kolo fenfee o ya na boŋe we o jege to mo.”
Yezu nu de o nyaana na ye balo to
Matiyu 12:46-50; Maake 3:31-35
19Yezu nu de o nyaana ma ba o tei se ba na‑o. Ba ma ware ba yi o tei, kɔgɔ kom na daga to ŋwaane. 20Nɔɔno wodwoŋi ma ta de Yezu o we, “N nu de n nyaana mo tu ba zege pwooni ne, ye ba lage se ba na‑m.” 21O ma leiri-ba o we, “Balo maama na ni Wɛ taane dem ye ba tɔge o boboŋa to mo ye amo nu de a nyaana.”
Yezu jege dam vo-fɔrɔ baŋa ne
Matiyu 8:23-27; Maake 4:35-41
22Dɛ dedwe Yezu de o kwaga tɔgena bam ma zo nabworo. O ma ta de-ba o we, “Pa se dé bɛ buga kam ni dedwoŋi dem.” Ba ma bobo se ba yɛ ba kɛ. 23Ba na maa kɛ to, Yezu ma to dɔɔm ne. Vo-fɔrɔ ma pɔpɔ ko zaŋe ko ba buga kam baŋa ko mage bworo kom pa se ko wora ko liri na se ko tu na bam kuri. Ba déem maa wo cham wone. 24Ba ma vo ba dwei Yezu pa o zaŋe, ye ba we, “Dé Tu, nii, dé lage de nyɔ na dé te.”
O laam ma zaŋe wɛɛne ye o daare o bage vio kom de na bam we, te yage! Vio kom laam ma yage, ye na bam de maŋe da chemm. 25O ma bwei o kwaga tɔgena bam o we, “Bɛ mo ye á ba jege wo-dedoa de amo?” Foone ma ja-ba, ye ko ke-ba yaau. Ba ma bwei daane ba we, “Wonto nam ye wɔ mo? O bage vio kom de na bam ye te sɛ o ni.”
Yezu zeili setaana nɔɔno tei ne
Matiyu 8:28-34; Maake 5:1-20
26Ba ma yɛ ba vo ba bɛ buga kam. Ba ma yi Gerasa tiina na zoore mɛ to. Buga kam tigi jei sem konto de Galili tetare laŋa ne mo. 27Yezu ma nwoŋi nabworo kom wone. Teo kom nɔɔno dedoa ma ba o jeeri‑o. Setaana mo jege nɔɔno wom konto ya daana ko zege faŋa faŋa. O maa wo zo kolokolo, ye o ba zoore sɔŋɔ ne. O yeini o tigi yibeela jei ne mo. 28O na nɛ Yezu to, o ma bobo se o chwoosi wɛ-wɛ. O ma vo o to Yezu yiga ne, ye o kaase de kwor-dɛa o we, “Yezu, Yuu-tu Baŋa Wɛ Bu, nmo tu amo tei se n ke bɛ mo? Popo, yé waare-ne.”#Maake 3:11 29O tage konto kolo ŋwaane Yezu maŋe o pa chichira kam ni se ka yage nɔɔno wom yera. Kuni dedɛ chichira kam déem yeini ka ja‑o. Konto mo pɛ se ba yeini ba kwei chaponno ba ma vɔ o jea de o nɛ, se ba taa yere‑o. Ba ná yeini ba ke‑o konto, o yeini o kɔ-te mo. Setaane dem laam wó zeili‑o pa se o duri o vo kagoa wo.
30Yezu laam ma bwei‑o o we, “N yere mo bɛ?” O ma leiri o we, “A yere mo Akɔgɔ”, kolo ŋwaane setaana dedɛ mo tɔge‑o. 31Setaana yam ma tiini ya lwoori Yezu se o yé zeili-ya pa ya zo tega kuri gwoŋ-chanluŋu kom wone.
32Teira kɔgɔ dedɛ déem maa wora jei sem ne ya beeri ya wodiu peo teiŋa ne ya di. Setaana yam ma lwoori Yezu se o pa-ya chwoŋa se ya zo teira yam wone ya taa tɔge-ya. O ma sɛ. 33Setaana yam laam ma yage nɔɔno wom yera ye ya vo ya tɔge teira yam. Teira yam maama ma duri ya siseiri ya tu buga kam wo ya nyɔ na ya te.
34Nɔɔna balo ya na yere tera yam to ma na ko na ke tei to. Ba ma duri ba vo ba ta kolo na ke to ba bere teo kom nɔɔna bam de balo na toŋe ba kare ne to. 35Nɔɔna bam ma nwoŋi ba vo se ba nii ko na ke tei. Ba ma vo ba yi Yezu tei. Ba ma na nɔɔno wolo setaana yam na yage‑o to. O maa jei Yezu tei ne dedaane o boboŋa jwoori ya ba, ye o zo gwaaro. Ba na nɛ‑o konto to, foone ma zo-ba. 36Balo yi na nɛ ko maama to ma ta ba bere nɔɔna bam ko na ke tei ye setaana yam yage nɔɔno wom yera to.
37Gerasa tiina teo kom de ko nawuura yam maama nɔn-bia bam ma lwoori Yezu se o viiri, kolo ŋwaane foone tiini de jege-ba. Yezu laam ma jwoori o vo o zo nabworo kom se o kɛ. 38O na maa viiri to, nɔɔno wolo setaana yam na yage‑o to ma lwoori‑o se o pa o da o vo. Yezu maa wo sɛ. 39O ma ta de nɔɔno wom o we, “Jwoori n vo sɔŋɔ se n ta kolo Wɛ na ke o pa nmo to n bere-ba.” Nɔɔno wom ma kɛ o vo o tole teo kom maama o ta kolo Yezu na ke o pa‑o to.
Yezu yɔɔre nɔɔna badwonna
Matiyu 9:18-26; Maake 5:21-43
40Yezu déem ma jwoori o bɛ buga kam ni dedwoŋi dem. O na nwoŋi nabworo kom wone to, dedaane kɔgɔ dedɛ mo maŋe ko gilimi daane ko pɔ‑o. Ba na nɛ‑o to mo ba jeeri‑o lanyerane. 41Nɔɔno wodwoŋi maa tɔge o wora, o yere mo Jarusi. O maa ye Juu tiina jeerim diga kam yiga tu. O ma vo Yezu tei o tiiri tega ne o yiga ne o lwoori‑o o we, “Popo, ba debam sɔŋɔ.” 42O tage konto kolo ŋwaane o jege bu dedoa yerane mo ye o lage o te. Bu wom ye busankana mo, nenɛɛne bena fuga-yalei tei. Yezu ma sɛ se o vo.
O na maa kɛ to, kɔgɔ kom tiini ko peene‑o. 43Kaane wodwoŋi maa tɔge o wora, o na tiini o wɔe wo mo taa, bena fuga-yalei. Nɔɔn-nɔɔno maa ware o yɔɔre‑o. 44O ma kɛ Yezu kwaga o vo o laare o dwei o gɔrɔ kom ni. O na dwei‑o konto to, jana bam ma kɔ bedwe baŋa ne.
45Yezu ma bwei o we, “Wɔ mo konto ye o dwei amo?” Ba maama ma fo. Piita de balo na wo o tei ne to ma ta ba we, “Dé Tu, nmo wo nɛ nɔɔna bam na tiini ba daga ye ba yigi ba peene nmo tei to na?” 46Yezu ma leiri o we, “Ko ye nɔɔno mo dwei-ne. Amo yei we a dam nwoŋi a yera ne.”
47Kaane wom ma lɔre we o bá lu. Foone maa jege‑o ye o yera sae. O ma vo Yezu tei o tiiri tega ne o yiga ne. O ma ta ded‑o kolo maama na pɛ se o dwei‑o konto to, de o na nɛ yazura bedwe baŋa ne tei to. Kɔgɔ kom maama ma ni o na tage kolo to. 48Yezu laam ma ta ded‑o o we, “A bukɔ, nmo na ke n wo-dedoa de amo tei to mo pɛ se n na yazura. Véi, se Wɛ wó pa‑m yazura.”
49Yezu ta na wora o ŋɔɔne konto to, nɔɔno wodwoŋi ma ba o yi o tei, o na nwoŋi yiga tu Jarusi sɔŋɔ to. O ma ba o ta ded‑o o we, “N bukɔ wom tega. Daa‑n yé ta‑n daane berem tu wom.” 50Yezu na nigi konto to, o ma ta de Jarusi o we, “Yé ta‑n fona. Ke n wo-dedoa de amo, se ko wó gare bu wom yera ne.”
51Ba ma vo ba yi sɔŋɔ kom. Yezu ma zo. O maa wo sɛ se nɔɔna da‑o ba zo, ko ná dae Piita, de Jɔn, de Jemsi, de bu wom kwo, de o nu yerane. 52Balo maama na maŋe ba wo sɔŋɔ kom wone to maa chwoosa, ye ba keera busankana kam ŋwaane. Yezu ma ta de-ba o we, “Á yé ta‑á keera. O wo tege, o dɔ mo.” 53O na tage konto to, ba maama ma mɔne‑o, kolo ŋwaane ba yei we bu wom seene o te.
54Yezu laam ma vo o ja busankana kam jeŋa, ye o ta de-ka o we, “A bu, zaŋe wɛɛne.” 55O na tage konto to, o ŋwea ma jwoori. O ma zaŋe wɛɛne bedwe baŋa ne. Yezu ma ta-ba se ba ke wodiu ba pa bu wom se o di. 56Ko ma so bu wom kwo de o nu lanyerane. Yezu ma kaane-ba o we, ba yé zaŋe ba ta ba bere nɔɔn-nɔɔno woŋo kolo na ke to.
© 2020, Ghana Institute of Linguistics, Literacy and Bible Translation (GILLBT)