Luka 9
9
Yezu toŋe o nɔɔna fuga-balei bam
Matiyu 10:5-15; 14:1-12; Maake 6:7-29
1Yezu déem ma bwoŋi o nɔɔna fuga-balei bam se ba jeeri daane jeiga dedoa. O ma pa-ba dam se ba wane setaana maama ba zeili nɔɔna tei ne, se ba daare ba pa nɔɔna na yazura ba jaweero wone. 2O ma toŋe-ba se ba vo ba tɔɔle Wɛ kwora kam we, o lage o di paare o nɔɔna baŋa ne, se ba daare ba yɔɔre jaweena de. 3O ma ta-ba o we, “Á ná maa via, á yé zaŋe á kwei kolokolo á woli da á ja á vo. Á yé kwei nacheiga, naa tampɔgɔ, naa wodiu, naa sabu. Á yé kwei gwaaro telei telei de á woli da. 4Á ná vei á zo sɔŋɔ kolo maama á peini da, se á ta‑á zoore dáane se ko ba ko yi á viirim maŋa. 5Ba nam daa ná wo sɛ se ba jeeri abam lanyerane, se á nwoŋi teo kom konto ne. Á ná maa viira, se á kokɔge á nɛ fwogo kom á yage da, se ko pa nɔɔna bam lɔre we ba wo ke lanyerane.”#Luka 10:4-11
6Yezu na tage konto de ba o ti to, ba laam ma nwoŋi ba tole te-balwa bam maama. Jei selo maama ba na vei to, ba tɔɔle Wɛ kwor-ywoŋa kam ye ba yɔɔre jaweena.
7Galili kateiri dem pɛ Herodi déem nigi kolo maama Yezu de o nɔɔna bam na wora ba ke to. Ko ma pa se o boboŋa vugimi, kolo ŋwaane nɔɔna badaara tɛ ba we Jɔn mo jwoori o bi toone wone. 8Badaara maa tɛ ba we Elija mo jwoori o ba logo baŋa. Badaara de ta maa we, ko ye faŋa faŋa Wɛ sampwori sem dedoa mo jwoori o bi. 9Herodi maa boŋe o we, “Ko nam ná ye Jɔn, amo maŋe a pa ba gwoni o yuu.#Matiyu 14:1-12; Luka 23:8 Nɔɔno wonto nam ye wɔ mo ye o ke wo-kenkagela yanto maama a na ni ya ŋwa to?” O maa kwaana se o na wolo na ke tento maama to.
Yezu pɛ nɔɔna 5,000 wodiu se ba di
Matiyu 14:13-21; Maake 6:30-44; Jɔn 6:1-14
10Yezu totoŋa nakwa bam déem ma jwoori ba vo o tei. Ba ma ta ba bere‑o ba na ke kolo maama to. O ma pa ba tɔge ded‑o ba vo jeiga kadwoŋi ba yerane, ye ba daare nɔn-kɔgɔ kom. Jeiga kam bwola de teo kodwoŋi, ko yere mo Bɛtasida. 11Nɔn-kɔgɔ kom ma lɔre Yezu de o tontoŋena bam na vei mɛ. Ba laam ma tɔge ba kwaga. Ba ma vo ba yi Yezu tei. O ma zaane-ba de wopwolo. O ma ŋɔɔne o bere-ba Wɛ paare dem chega kam, ye o daare o yɔɔre balo maama na lage yazura to.
12Maŋa kalo wɛ na wora de zoore to, Yezu nɔɔna fuga-balei bam ma ba o tei ba we, “Wodiu tera ywo-seeni se nɔɔna bam yeigi ba di. Konto ŋwaane nam pa se ba vo sam wone ba lage wodiu ba di, de peiga jei ba peini.”
13O ma ta de-ba o we, “Abam tete mo wó pa-ba wodiu se ba di.” Ba ma leiri ba we, “Dé nam jege bworobwooru tenu de ywona yalei yerane mo. Dé vei dé yeigi wodiu dé woli da dé pa nɔɔna banto maama mo na? Ko nam bá wane.” 14Kɔgɔ kom déem ye nenɛɛne baara morro tenu (5,000) mo, ko woli de kaana de bia de.
Yezu ma ta de o kwaga tɔgena bam o we, ba pa nɔɔna bam pɔɔre finnu finnu ba jeini tega ne. 15Ba ma ke konto. Nɔɔna bam maama ma jeini tega ne. 16Yezu laam ma kwei bworobwooru tenu tem de ywona yalei yam, ye o kwoni o yuu wɛɛne o ke Wɛ lei te ŋwaane. O ma fɔ fɔ wodiiru tem, ye o daare o maŋe o pa o kwaga tɔgena bam, se ba kwei-te ba vo ba pa nɔɔna bam. 17Nɔɔna bam maama ma di ba su ba daare. Ba na di ba daare konto to, ba ma pɛ chichwooru telo na daare to ba su kayɛ fuga-selei.
Piita na tage Yezu chega kam tei to
Matiyu 16:13-28; Maake 8:27–9:1
18Dɛ dedwe mo Yezu déem wora o ware Wɛ o yerane. O kwaga tɔgena bam de maa wora jeiga kam konto ne. O ma bwei-ba o we, “Nɔɔna bam maama yeini ba tɛ ba we amo ye wɔ mo?” 19Ba ma leiri ba we, “Badaara tɛ ba we, nmo ye Jɔn wolo déem na pɛ nɔɔna sɛɛm to mo. Badaara de maa tɛ ba we, nmo ye Elija mo. Badaara de maa tɛ ba we, nmo ye faŋa faŋa Wɛ sampwori sem dedoa mo ye n jwoori n bi toone wone.”
20O laam ma bwei-ba o we, “Ko nam ná ye abam, á boŋe se amo ye wɔ mo?” Piita ma leiri‑o o we, “Nmo ye Wɛ Dam Tu Krista wom mo.”#Jɔn 6:68-69
21Yezu laam ma tiini o kaane-ba se ba yé ta konto ba bere nɔɔn-nɔɔno. 22O daa ma ta o we, “Ko fe mo se amo Nabiin-bu wom na yaara dedɛ. Juu tiina nakwa bam, de ba kaanem yiga tiina bam, de ba zamesem tiina bam mo wó chuli amo. Ba jege se ba go-ne mo, se a laam jwoori a bi da yatɔ dɛ ne.”
23Yezu laam ma ta de nɔɔna bam maama o we, “Nɔɔno wolo maama ná lage se o taa tɔge amo kwaga, konto tu jege se o ve o tete boboŋa, se dɛ maama o sɛ yaara ne wolo na zeŋe dagara o maa vei o toone jei tei to. 24Wolo maama nam ná lage se o jwoŋi o tete ŋwea, konto tu wó ga-ka mo. Ko daare, wolo maama ná sɛ se o ga o ŋwea amo ŋwaane, konto tu wó jwoŋi ŋwea Wɛ tei ne. 25Nɔɔno nam ná kwaane o jwoŋi logo baŋa jejegero tem maama, ye o laam ná gɛ ŋwea Wɛ tei ne, ko jege bɛ nyɔɔre mo ko pa‑o? 26Wolo maama ná kɔre chaveera amo ŋwaane, de a taane dem ŋwaane, chaveera wó taa jege amo Nabiin-bu wom konto tu de ŋwaane dɛ dem a na wó jwoori a ba logo baŋa de nenɔŋ-fɔrɔ, ne a Kwo Wɛ de o malese sem na jege tei to. 27A tɛ abam chega ŋwaane to, nɔɔna balo zem na wo ywo-seeni to badaara bá te ye ba ta wo nɛ Wɛ paare dem na tu nɔɔna baŋa tei to.”
Yezu yibia na leiri tei to
Matiyu 17:1-8; Maake 9:2-8
28Yezu na tage konto to, ko maŋe de da nana na kɛ to, o laam ma ja Piita, de Jɔn, de Jemsi o vo o di peo yuu se o ware Wɛ. 29Maŋa kam o na wora o ware Wɛ to, ba ma na we o yibia leiri. O gwaaro tem de maa peere cha, ye te nyeena. 30-31Nɔɔna balei ma pɔpɔ ba nwoŋi ba yiga ne, ba na tiini ba jege nenɔŋa lanyerane. Banto maa ye Moses de Elija. Ba maa zege ba ŋɔɔne de Yezu. Ba maa tɛ kolo na lage ko ke‑o Jerusalem ne, de o na wó te tei to. 32Piita de o dwonna bam ma chɛ de dɔɔm. Ba laam na dɔ ba zaŋe to mo ba nɛ Yezu na jege nenɔŋa ko gaale tei. Ba ma daare ba na nɔɔna balei bam na zege o tei ne. 33Maŋa kam nɔɔna balei bam na lage ba viiri to, Piita ma ta de Yezu o we, “Dé Tu, dé na wo ywo-seeni to, ko tiini ko lana ko pa debam. Nam pa se dé pu vwoa yatɔ se nmo, de Moses, de Elija taa zoore da.” O déem gare o ŋɔɔne mo se o yeiri kolo o na jege o tɛ to.
34O na wora o ŋɔɔne konto to mo kunkwoŋo tu ko ba ko li ba maama. Ko na kwoli-ba to, foone ma ja Piita ba lanyerane. 35Ba ma ni kwora na ŋɔɔne kunkwoŋo kom wone ka we, “Mo amo Bu wom a na kuri to. Á nam ta‑á cheigi o taane lanyerane.”#Luka 3:22 36Kwora kam na ŋɔɔne ka ti to, ba ma daa wo nɛ nɔɔn-nɔɔno ba woli Yezu ne.
Da yam konto ni ne, ba ŋɔɔne kolo na ke to ba yerane mo. Ba maa wo tage kolo ba na nɛ to ba bere nɔɔn-nɔɔno.
Yezu yɔɔre bu wodwoŋi
Matiyu 17:14-23; Maake 9:14-32
37Tega na poore to, Yezu ma tu peo kom yuu ne de o nɔɔna bam. Nɔn-kɔgɔ dedɛ ma jeeri‑o. 38Nɔɔno wodwoŋi maa tɔge o wo kɔgɔ kom wone. O ma ta baŋa baŋa o we, “Berem tu, popo, ba n nii amo bu wom baŋa ne. Mo amo bu dedoa ye chichira laam tɔge‑o. 39Maŋa maama chichira kam yeini ka zi‑o, ye o pɔpɔ o ke sɔɔ mo. Ka maa pae se bu wom yera sae pɔm-pɔm, ye lilei-puŋa nwoŋi o ni ne. Ka maa tiini ka yaare‑o maŋa maama, ye ka ba sɛ se ka yage‑o de fenfee de. 40Konto ŋwaane mo a lwoori nmo kwaga tɔgena bam se ba zeili-ka o tei ne, ye ba ware.”
41Yezu ma leiri o we, “Abam zem nɔɔna bam bere á ba jege wo-dedoa de amo, ye á ba sɛ se á tɔge chwoŋa. Ko fe mo se a tiini a dáane abam tei ne, ye a zuri a bochare de abam na?”#Jɔn 14:9 O daa ma ta de nɔɔno wom o we, “Ja n bu wom n ba.”
42Bu wom na maa vei o tei konto to, setaane dem daa ta ma zi‑o de de tega ne, ye de pa se o yera sae pɔm-pɔm. Yezu ma bage chichira kam pa se ka yage‑o. O ma yɔɔre bu wom pa o na yazura. O laam ma jwoori o ke‑o o kwo jeŋa ne. 43Nɔɔna bam maama ma na Wɛ dam dem na gaale tei, ye ko so-ba dedɛ.
Nɔɔna maama déem ye yaau de kolo maama Yezu na ke to. O laam ma ta de o kwaga tɔgena bam o we, 44“Cheigi-na taane delo a na tɛ de abam to, se de ye abam nyem mo. Leile konto ba lage ba ja Nabiin-bu wom ba ke‑o nɔɔna jeŋa ne.” 45Ba maa wo nigi o taane dem kuri. De ma seigi ba tei ne, pa se ba ware ba jwoŋi-de. Ba ma kɔre se ba bwei‑o ba nii.
Wɔ mo ye nɔn-kamunu Wɛ tei ne?
Matiyu 18:1-5; Maake 9:33-40
46Ni-kantɔgɔ déem ma ba Yezu kwaga tɔgena bam wo. Ba déem lage ba nii banto wɔ mo wó taa ye nɔn-kamunu o dwoi maama.#Luka 22:26 47Yezu ma lɔre ba na jege kolo ba boboŋa ne to. O ma ja bu-balaŋa o pa o zege o takeiri ne. 48O laam ma ta de-ba o we, “Wolo maama ná zuli bu wonto dwoŋi lanyerane amo yere ŋwaane, konto tu zuli amo mo. Wolo maama nam ná zuli amo, kotu zuli Baŋa Wɛ wolo na toŋe-ne to de mo. Wolo nam na muri abam maama wone to mo ye nɔn-kamunu chekke o dwoi maama.”
49Jɔn ma ta o we, “Dé Tu, dé ya nɛ nɔɔno na tɔge nmo yere ŋwaane mo o zeili setaana nɔɔna tei ne. O nam na dae debam kɔgɔ kom nyem to, dé ma kwaane se de che‑o se o daa yé taa ke konto.” 50Yezu ma leiri o we, “Á ya ba jege se á che‑o. Wolo maama na ba chuli abam to ye abam nɔɔno mo.”
Yezu kwei chwoŋa o maa vei Jerusalem
51Maŋa kam déem ma ba ka twɛ se Wɛ kwei Yezu o ja di telaao. Yezu boboŋa ma ja se o yɔɔre o kwei chwoŋa o vo Jerusalem. 52O ma toŋe nɔɔna se ba da o yiga ba vo. Ba ma vo ba yi Samaria tiina teo kodwoŋi, se ba ti woŋo maama yiga se o laam ba. 53Teo kom nɔɔna bam maa wo sɛ se ba jeeri‑o, ba na lɔre we o to chwoŋa ne o maa vei Jerusalem to ŋwaane. 54O kwaga tɔgena bam balei Jemsi de Jɔn na nɛ konto to, ba ma ta ba we, “Dé Teiru, nmo ná sɛ, dé wó pa mini nwoŋi wɛyuu ne de ba de chɔge-ba.” 55Yezu ma pipiri o nii ba seeni, ye o bwɛ-ba lanyerane. 56Ba maama daa ma yɔɔre ba vo teo kodwoŋi.
Balo na lage se ba tɔge Yezu kwaga na ke tei to
Matiyu 8:19-22
57Dɛ dedwe ba na wo chwoŋa ne ba maa kɛ to, nɔɔno wodwoŋi ma ta de Yezu o we, “Nmo na lage n vo jei selo maama to, amo de wó tɔge a vo.” 58Yezu ma leiri‑o o we, “Ko ná ye yira, banto jege peiga jei. Zuna de jege pworu ba tigi da. Ko daare Nabiin-bu wom ba jege jei se o peini da o sii.”
59Yezu daa ma ta de nɔɔno wodwoŋi o we, “Zaŋe n ta n tɔge-ne.” Nɔɔno wom ma ta o we, “Amo Teiru, yage se a ná ke a kwo lua, se a laam ba a tɔge nmo kwaga.” 60Yezu ma leiri o we, “Nam yage se balo na ba jege ŋwea Wɛ tei ne to taa ke ba tete lwi, se nmo daare n beeri n tɔɔle Wɛ kwora kam we, o lage o di paare o nɔɔna baŋa ne.”
61Nɔɔno wodwoŋi de ma ta ded‑o o we, “Amo Teiru, amo wó ba a taa tɔge nmo kwaga. Nam pa-ne chwoŋa se a vo a bane a sɔŋɔ tiina, se a laam jwoori a ba.” 62Yezu ma ta ded‑o o we, “Nɔɔno wolo ná jege naan-vɔrɔ o ma vara, ye o ná guni o nii o kwaga ne, ko bere we konto tu boboŋa pɔɔre belei. Nɔɔno konto dwoŋi bá wane Wɛ paare dem totoŋa o ke.”
© 2020, Ghana Institute of Linguistics, Literacy and Bible Translation (GILLBT)
Luka 9
9
Yezu toŋe o nɔɔna fuga-balei bam
Matiyu 10:5-15; 14:1-12; Maake 6:7-29
1Yezu déem ma bwoŋi o nɔɔna fuga-balei bam se ba jeeri daane jeiga dedoa. O ma pa-ba dam se ba wane setaana maama ba zeili nɔɔna tei ne, se ba daare ba pa nɔɔna na yazura ba jaweero wone. 2O ma toŋe-ba se ba vo ba tɔɔle Wɛ kwora kam we, o lage o di paare o nɔɔna baŋa ne, se ba daare ba yɔɔre jaweena de. 3O ma ta-ba o we, “Á ná maa via, á yé zaŋe á kwei kolokolo á woli da á ja á vo. Á yé kwei nacheiga, naa tampɔgɔ, naa wodiu, naa sabu. Á yé kwei gwaaro telei telei de á woli da. 4Á ná vei á zo sɔŋɔ kolo maama á peini da, se á ta‑á zoore dáane se ko ba ko yi á viirim maŋa. 5Ba nam daa ná wo sɛ se ba jeeri abam lanyerane, se á nwoŋi teo kom konto ne. Á ná maa viira, se á kokɔge á nɛ fwogo kom á yage da, se ko pa nɔɔna bam lɔre we ba wo ke lanyerane.”#Luka 10:4-11
6Yezu na tage konto de ba o ti to, ba laam ma nwoŋi ba tole te-balwa bam maama. Jei selo maama ba na vei to, ba tɔɔle Wɛ kwor-ywoŋa kam ye ba yɔɔre jaweena.
7Galili kateiri dem pɛ Herodi déem nigi kolo maama Yezu de o nɔɔna bam na wora ba ke to. Ko ma pa se o boboŋa vugimi, kolo ŋwaane nɔɔna badaara tɛ ba we Jɔn mo jwoori o bi toone wone. 8Badaara maa tɛ ba we Elija mo jwoori o ba logo baŋa. Badaara de ta maa we, ko ye faŋa faŋa Wɛ sampwori sem dedoa mo jwoori o bi. 9Herodi maa boŋe o we, “Ko nam ná ye Jɔn, amo maŋe a pa ba gwoni o yuu.#Matiyu 14:1-12; Luka 23:8 Nɔɔno wonto nam ye wɔ mo ye o ke wo-kenkagela yanto maama a na ni ya ŋwa to?” O maa kwaana se o na wolo na ke tento maama to.
Yezu pɛ nɔɔna 5,000 wodiu se ba di
Matiyu 14:13-21; Maake 6:30-44; Jɔn 6:1-14
10Yezu totoŋa nakwa bam déem ma jwoori ba vo o tei. Ba ma ta ba bere‑o ba na ke kolo maama to. O ma pa ba tɔge ded‑o ba vo jeiga kadwoŋi ba yerane, ye ba daare nɔn-kɔgɔ kom. Jeiga kam bwola de teo kodwoŋi, ko yere mo Bɛtasida. 11Nɔn-kɔgɔ kom ma lɔre Yezu de o tontoŋena bam na vei mɛ. Ba laam ma tɔge ba kwaga. Ba ma vo ba yi Yezu tei. O ma zaane-ba de wopwolo. O ma ŋɔɔne o bere-ba Wɛ paare dem chega kam, ye o daare o yɔɔre balo maama na lage yazura to.
12Maŋa kalo wɛ na wora de zoore to, Yezu nɔɔna fuga-balei bam ma ba o tei ba we, “Wodiu tera ywo-seeni se nɔɔna bam yeigi ba di. Konto ŋwaane nam pa se ba vo sam wone ba lage wodiu ba di, de peiga jei ba peini.”
13O ma ta de-ba o we, “Abam tete mo wó pa-ba wodiu se ba di.” Ba ma leiri ba we, “Dé nam jege bworobwooru tenu de ywona yalei yerane mo. Dé vei dé yeigi wodiu dé woli da dé pa nɔɔna banto maama mo na? Ko nam bá wane.” 14Kɔgɔ kom déem ye nenɛɛne baara morro tenu (5,000) mo, ko woli de kaana de bia de.
Yezu ma ta de o kwaga tɔgena bam o we, ba pa nɔɔna bam pɔɔre finnu finnu ba jeini tega ne. 15Ba ma ke konto. Nɔɔna bam maama ma jeini tega ne. 16Yezu laam ma kwei bworobwooru tenu tem de ywona yalei yam, ye o kwoni o yuu wɛɛne o ke Wɛ lei te ŋwaane. O ma fɔ fɔ wodiiru tem, ye o daare o maŋe o pa o kwaga tɔgena bam, se ba kwei-te ba vo ba pa nɔɔna bam. 17Nɔɔna bam maama ma di ba su ba daare. Ba na di ba daare konto to, ba ma pɛ chichwooru telo na daare to ba su kayɛ fuga-selei.
Piita na tage Yezu chega kam tei to
Matiyu 16:13-28; Maake 8:27–9:1
18Dɛ dedwe mo Yezu déem wora o ware Wɛ o yerane. O kwaga tɔgena bam de maa wora jeiga kam konto ne. O ma bwei-ba o we, “Nɔɔna bam maama yeini ba tɛ ba we amo ye wɔ mo?” 19Ba ma leiri ba we, “Badaara tɛ ba we, nmo ye Jɔn wolo déem na pɛ nɔɔna sɛɛm to mo. Badaara de maa tɛ ba we, nmo ye Elija mo. Badaara de maa tɛ ba we, nmo ye faŋa faŋa Wɛ sampwori sem dedoa mo ye n jwoori n bi toone wone.”
20O laam ma bwei-ba o we, “Ko nam ná ye abam, á boŋe se amo ye wɔ mo?” Piita ma leiri‑o o we, “Nmo ye Wɛ Dam Tu Krista wom mo.”#Jɔn 6:68-69
21Yezu laam ma tiini o kaane-ba se ba yé ta konto ba bere nɔɔn-nɔɔno. 22O daa ma ta o we, “Ko fe mo se amo Nabiin-bu wom na yaara dedɛ. Juu tiina nakwa bam, de ba kaanem yiga tiina bam, de ba zamesem tiina bam mo wó chuli amo. Ba jege se ba go-ne mo, se a laam jwoori a bi da yatɔ dɛ ne.”
23Yezu laam ma ta de nɔɔna bam maama o we, “Nɔɔno wolo maama ná lage se o taa tɔge amo kwaga, konto tu jege se o ve o tete boboŋa, se dɛ maama o sɛ yaara ne wolo na zeŋe dagara o maa vei o toone jei tei to. 24Wolo maama nam ná lage se o jwoŋi o tete ŋwea, konto tu wó ga-ka mo. Ko daare, wolo maama ná sɛ se o ga o ŋwea amo ŋwaane, konto tu wó jwoŋi ŋwea Wɛ tei ne. 25Nɔɔno nam ná kwaane o jwoŋi logo baŋa jejegero tem maama, ye o laam ná gɛ ŋwea Wɛ tei ne, ko jege bɛ nyɔɔre mo ko pa‑o? 26Wolo maama ná kɔre chaveera amo ŋwaane, de a taane dem ŋwaane, chaveera wó taa jege amo Nabiin-bu wom konto tu de ŋwaane dɛ dem a na wó jwoori a ba logo baŋa de nenɔŋ-fɔrɔ, ne a Kwo Wɛ de o malese sem na jege tei to. 27A tɛ abam chega ŋwaane to, nɔɔna balo zem na wo ywo-seeni to badaara bá te ye ba ta wo nɛ Wɛ paare dem na tu nɔɔna baŋa tei to.”
Yezu yibia na leiri tei to
Matiyu 17:1-8; Maake 9:2-8
28Yezu na tage konto to, ko maŋe de da nana na kɛ to, o laam ma ja Piita, de Jɔn, de Jemsi o vo o di peo yuu se o ware Wɛ. 29Maŋa kam o na wora o ware Wɛ to, ba ma na we o yibia leiri. O gwaaro tem de maa peere cha, ye te nyeena. 30-31Nɔɔna balei ma pɔpɔ ba nwoŋi ba yiga ne, ba na tiini ba jege nenɔŋa lanyerane. Banto maa ye Moses de Elija. Ba maa zege ba ŋɔɔne de Yezu. Ba maa tɛ kolo na lage ko ke‑o Jerusalem ne, de o na wó te tei to. 32Piita de o dwonna bam ma chɛ de dɔɔm. Ba laam na dɔ ba zaŋe to mo ba nɛ Yezu na jege nenɔŋa ko gaale tei. Ba ma daare ba na nɔɔna balei bam na zege o tei ne. 33Maŋa kam nɔɔna balei bam na lage ba viiri to, Piita ma ta de Yezu o we, “Dé Tu, dé na wo ywo-seeni to, ko tiini ko lana ko pa debam. Nam pa se dé pu vwoa yatɔ se nmo, de Moses, de Elija taa zoore da.” O déem gare o ŋɔɔne mo se o yeiri kolo o na jege o tɛ to.
34O na wora o ŋɔɔne konto to mo kunkwoŋo tu ko ba ko li ba maama. Ko na kwoli-ba to, foone ma ja Piita ba lanyerane. 35Ba ma ni kwora na ŋɔɔne kunkwoŋo kom wone ka we, “Mo amo Bu wom a na kuri to. Á nam ta‑á cheigi o taane lanyerane.”#Luka 3:22 36Kwora kam na ŋɔɔne ka ti to, ba ma daa wo nɛ nɔɔn-nɔɔno ba woli Yezu ne.
Da yam konto ni ne, ba ŋɔɔne kolo na ke to ba yerane mo. Ba maa wo tage kolo ba na nɛ to ba bere nɔɔn-nɔɔno.
Yezu yɔɔre bu wodwoŋi
Matiyu 17:14-23; Maake 9:14-32
37Tega na poore to, Yezu ma tu peo kom yuu ne de o nɔɔna bam. Nɔn-kɔgɔ dedɛ ma jeeri‑o. 38Nɔɔno wodwoŋi maa tɔge o wo kɔgɔ kom wone. O ma ta baŋa baŋa o we, “Berem tu, popo, ba n nii amo bu wom baŋa ne. Mo amo bu dedoa ye chichira laam tɔge‑o. 39Maŋa maama chichira kam yeini ka zi‑o, ye o pɔpɔ o ke sɔɔ mo. Ka maa pae se bu wom yera sae pɔm-pɔm, ye lilei-puŋa nwoŋi o ni ne. Ka maa tiini ka yaare‑o maŋa maama, ye ka ba sɛ se ka yage‑o de fenfee de. 40Konto ŋwaane mo a lwoori nmo kwaga tɔgena bam se ba zeili-ka o tei ne, ye ba ware.”
41Yezu ma leiri o we, “Abam zem nɔɔna bam bere á ba jege wo-dedoa de amo, ye á ba sɛ se á tɔge chwoŋa. Ko fe mo se a tiini a dáane abam tei ne, ye a zuri a bochare de abam na?”#Jɔn 14:9 O daa ma ta de nɔɔno wom o we, “Ja n bu wom n ba.”
42Bu wom na maa vei o tei konto to, setaane dem daa ta ma zi‑o de de tega ne, ye de pa se o yera sae pɔm-pɔm. Yezu ma bage chichira kam pa se ka yage‑o. O ma yɔɔre bu wom pa o na yazura. O laam ma jwoori o ke‑o o kwo jeŋa ne. 43Nɔɔna bam maama ma na Wɛ dam dem na gaale tei, ye ko so-ba dedɛ.
Nɔɔna maama déem ye yaau de kolo maama Yezu na ke to. O laam ma ta de o kwaga tɔgena bam o we, 44“Cheigi-na taane delo a na tɛ de abam to, se de ye abam nyem mo. Leile konto ba lage ba ja Nabiin-bu wom ba ke‑o nɔɔna jeŋa ne.” 45Ba maa wo nigi o taane dem kuri. De ma seigi ba tei ne, pa se ba ware ba jwoŋi-de. Ba ma kɔre se ba bwei‑o ba nii.
Wɔ mo ye nɔn-kamunu Wɛ tei ne?
Matiyu 18:1-5; Maake 9:33-40
46Ni-kantɔgɔ déem ma ba Yezu kwaga tɔgena bam wo. Ba déem lage ba nii banto wɔ mo wó taa ye nɔn-kamunu o dwoi maama.#Luka 22:26 47Yezu ma lɔre ba na jege kolo ba boboŋa ne to. O ma ja bu-balaŋa o pa o zege o takeiri ne. 48O laam ma ta de-ba o we, “Wolo maama ná zuli bu wonto dwoŋi lanyerane amo yere ŋwaane, konto tu zuli amo mo. Wolo maama nam ná zuli amo, kotu zuli Baŋa Wɛ wolo na toŋe-ne to de mo. Wolo nam na muri abam maama wone to mo ye nɔn-kamunu chekke o dwoi maama.”
49Jɔn ma ta o we, “Dé Tu, dé ya nɛ nɔɔno na tɔge nmo yere ŋwaane mo o zeili setaana nɔɔna tei ne. O nam na dae debam kɔgɔ kom nyem to, dé ma kwaane se de che‑o se o daa yé taa ke konto.” 50Yezu ma leiri o we, “Á ya ba jege se á che‑o. Wolo maama na ba chuli abam to ye abam nɔɔno mo.”
Yezu kwei chwoŋa o maa vei Jerusalem
51Maŋa kam déem ma ba ka twɛ se Wɛ kwei Yezu o ja di telaao. Yezu boboŋa ma ja se o yɔɔre o kwei chwoŋa o vo Jerusalem. 52O ma toŋe nɔɔna se ba da o yiga ba vo. Ba ma vo ba yi Samaria tiina teo kodwoŋi, se ba ti woŋo maama yiga se o laam ba. 53Teo kom nɔɔna bam maa wo sɛ se ba jeeri‑o, ba na lɔre we o to chwoŋa ne o maa vei Jerusalem to ŋwaane. 54O kwaga tɔgena bam balei Jemsi de Jɔn na nɛ konto to, ba ma ta ba we, “Dé Teiru, nmo ná sɛ, dé wó pa mini nwoŋi wɛyuu ne de ba de chɔge-ba.” 55Yezu ma pipiri o nii ba seeni, ye o bwɛ-ba lanyerane. 56Ba maama daa ma yɔɔre ba vo teo kodwoŋi.
Balo na lage se ba tɔge Yezu kwaga na ke tei to
Matiyu 8:19-22
57Dɛ dedwe ba na wo chwoŋa ne ba maa kɛ to, nɔɔno wodwoŋi ma ta de Yezu o we, “Nmo na lage n vo jei selo maama to, amo de wó tɔge a vo.” 58Yezu ma leiri‑o o we, “Ko ná ye yira, banto jege peiga jei. Zuna de jege pworu ba tigi da. Ko daare Nabiin-bu wom ba jege jei se o peini da o sii.”
59Yezu daa ma ta de nɔɔno wodwoŋi o we, “Zaŋe n ta n tɔge-ne.” Nɔɔno wom ma ta o we, “Amo Teiru, yage se a ná ke a kwo lua, se a laam ba a tɔge nmo kwaga.” 60Yezu ma leiri o we, “Nam yage se balo na ba jege ŋwea Wɛ tei ne to taa ke ba tete lwi, se nmo daare n beeri n tɔɔle Wɛ kwora kam we, o lage o di paare o nɔɔna baŋa ne.”
61Nɔɔno wodwoŋi de ma ta ded‑o o we, “Amo Teiru, amo wó ba a taa tɔge nmo kwaga. Nam pa-ne chwoŋa se a vo a bane a sɔŋɔ tiina, se a laam jwoori a ba.” 62Yezu ma ta ded‑o o we, “Nɔɔno wolo ná jege naan-vɔrɔ o ma vara, ye o ná guni o nii o kwaga ne, ko bere we konto tu boboŋa pɔɔre belei. Nɔɔno konto dwoŋi bá wane Wɛ paare dem totoŋa o ke.”
© 2020, Ghana Institute of Linguistics, Literacy and Bible Translation (GILLBT)