Š. Matéu 8
8
Krie VIII.
1E si kalarej ka malji, u‐nísetin pas atîje gjinde šûm:
2E njô nje lebruse, tše víneje te aδoraren, tue θẽn: Zot, nde do, mund me kjeróš.
3E ndéitur doren Džesúi, e ngau, tue θên: Dua, kjeróu. E mbiátu ju‐kjerúa lebra tîje.
4E i θot atîje Džesúi: Šiχ, te mos ja θúaš njeríu: po ets, buθtoju priftit, e jipi rrigalin, tše kumandói Moiséu, per martrî atire.
5E si χíneje Džesúi Kapernaúm, ju‐kjas atîje nje Tšenturiún, tue parkaljesur,
6E tue θẽn: Zot, dialji im rrî štẽn prapt te špia paralíteke, kekje i dorrokopsur.
7E i θot Džesúi: Arδur ú, e šeronje.
8E pergjegjur Tšenturiúni, θa: Zot, u nẽng meritonje te me χîš nde špît time: po θúaj nje fiâlje vet, e šeronet dialji im.
9Pse eδé ú rrî mbe te tiêr, e kam perpóš meje suljdét, e i θom ktîje: Ets, e vete: e jetrit, Eja, e vién: e šerbetúarit tim, Bẽn kte, e e bẽn.
10Gjegjur prana Džesúi kto šurbise kjintrói, e θa atire tše vejen pas atîje: Per vertét ju θom, nẽng gjeta te Israéli kakje bes.
11Eδé ju θom, se šûm kân te vĩnjen ka delj díeli, e ka perendón, e kân te rrîn me Abramin, e Isakun, e Džakobin te rregjería e kjíelvet:
12Po te bíljete e rregjerîs kan jên štẽn nd’ érretit te jašem: atié kâ te jêt te kjâr, e ngersima δẽmbeš.
13E θa Džesúi Tšenturiúnit: Ets, e si pate bes, te kjofte. E u‐šerúa dialji tîje mb’ at χêr.
14E arδur Džesúi te špia e Piétrit, pâ te viéχerren e tîje štẽn prapt, e diégur ka éθia:
15E ngau doren e sâje, e éθia e lja, e u‐ngre, e i šurbéneje.
16E arδur mbrémanet, i súaltin perpara šûm me špirtrat e χúaje: e ndzúar špirtrat me fiâlje: e gjiθ atá tše rrijen ljik i šerói:
17Se te beχej e θẽna Isaîse profetit, tše θot: Aí múar te viljakósurat tona: e semundat ngrakói.
18Pâr prana Džesúi šûm gjinde rreθ atîje, kumandói te škojen mbatân.
19E kjasur nje Skrib, i θa: Δaskalj, ú vĩnje pas tîj, ku do te veš.
20E Džesúi i θot: Δeljprat kân lošet, e zókjete e kjíeles foljêt: po Biri njeríut se kâ ku te prênje kríet.
21E njeter nde δišípuljit e tîje i θa: Zot, ljem perpara te vete te vê nde varret taten tim.
22E Džesúi i θa: Eja pas meje, e lje te vdékurit te vẽ̂n nde varret te vdékurit e tire.
23E si ngjitej te varka, i vân pas atîje δišípuljit e tîje:
24E njô nje monostróf e maδe u‐bê te dêti, akje sa varka iš e mbuljúar ka suvaljat; e ai fiêje.
25E kjasur δišípuljit e tîje, e sgjúan, tue θẽn: Zot, salvona, jemi te biêrr.
26E aí i θot: Pse trémbeni, njerez pak béssie? Ngréitur aí aχíera, nemeréi érevet e dêtit, e u‐bê nje e papsur e maδe.
27E njérezit kjintrúan te marmaróst, tue θẽn: Tše ešt kî, se érat e dêti i marren veš?
28E si vate ai mbatân te χora e Džerdžesenvet, i dúaltin perpara di te zên ka špirtrat e χúaje, tše díljien ka varret, te kekje šûm, sa mosnjerî mund škóneje per at ûδ.
29E njô θerrítetin, tue θẽn: Tše kemi na me tîj, Džesú bîr i Tinzoti? Erδe ktu perpara motit te na lastimisnješ?
30E iš pak largu ka atá nje mûrr šûm dírkješe, tše kulótneje.
31E špirtrat e χúaje e parkaljésejen, tue θẽn: Nde na ndzíer, dergona te murra e dírkjevet.
32E θa atíreve: Étseni. E dâlje atá vân te murra e dírkjevet, e njô gjiθ murra e dírkjevet u‐štû sperδikste ka nje gramîn te dêti: e spavistin nder újerat.
33E atá tše i kulótejen iktin: e vatur te χora, rrefíetin gjiθséi, eδé ató te atire, tše kišen špirtrat e χúaje.
34E njô gjiθ χora i dúal perpara Džesúit: e pâr até e parkaljésetin te škóneje ka anat e tire.
Përktheu nga greqishtja 1869.