Genesis 4
4
Keni no Ebolo
1Boysi sa vakapoyto Ivi ona quole, no oye sa iro so no sa vapuodo Keni. Qoule sa voy goyti, <<Sinani te ona arasasaoto Iaova aro ko tungene keike leike.#4.1 Te ngelu ni Iburu taritongo Keni sa vatanga qiqila seva ngeoro tungene.>> 2Te rokusua oye sa vapuodo keike likae oye, taritongoa oye Ebolo. Ebolo sa boysi miatoyke oyra sipi, no Keni sa boysi zetuni lua.
3Sa doka sada Keni sa iro me kavia veverea lua me ona keke te kue Iaova. 4No Ebolo sa iro vele me oyra sipi ka kusuru ka puodo kinaka te ona vaua sipi. Iaova sa mia vaboyte Ebolo no ona keke, 5ba oye kama mia vaboyte vo Keni no ona keke. Sa voy ta oye, Keni sa moma varoka, no sa matakulakusu.
6No Iaova sa voy goyti te kue Keni, <<Be sa voy re ko moma? No ko matakulakusu ne? 7Ba re bo joyjuni pita sa noyi, re ini mo matakola. Ba re kama joyjuni mo pita sa noyi, zaqala sa perini amo te mataqamana; oye sa soyko amo re, ba re mo matani oye.>>
8Sinani Keni sa voy goyti te kue likae oye Ebolo, <<Aria itu matu zolelalu te sanoyqa.>>#4.8 Ngeoro te Keni sa voy, aria itu matu zolelalu te sanoyqa goyti kama kuo vo te buka Iburu. Goyti sa tae me te vavakadu, Qiriki, Latini, Siriaki no Samariteni penitatiuki. Sada oyru kuru la kuo te sanoyqa, Keni sa taleiqe la no sa voyevale Ebolo.
9Sinani Iaova sa voy goyti te kue Keni, <<Be sa kue likam re Ebolo ne?>> Sa voy.
Oye sa vatavele la <<Aro kama utini qo! Kama aro vo ko miatoyke likaqu!>> Sa voy.
10Iaova sa voy goyti, <<Ata pita re ko joyjuni? Vanata! Madakae likam re sa qila taru me te kue ro te lua. 11Sinani re ko pale dango te kue lua, lua sa anga taru moyna, sa nurepe madakae likam sa lei te koyrisim re. 12Sada re ko jaju te lua, lua sa taka me vamasoru me veverea koyna amo re. Re me kareo mo kumala vatasuku no mo zulezule te vodu ni te lua,>> sa voy.
13Keni sa vatavele la te kue Iaova, <<Taka ko pale ro sa poyu varoka sa koye qo karapota. 14Mia! Re ko sure sia aqo ro te vodu te tava ini, no aro me kupika te tarakenakam re; Aro me kareo qo kumala vatasuku no me zulezule te vodu ni te lua, no ka oye sa tepere aqo me voye aqo.>>
15Ba Iaova sa voy goyti te kue oye, <<Sada sa voy ta ne; ka oye sa voye Keni, mara soka te kue oye vetu sada.>> No Iaova sa toyro keike lala te kue Keni soy kareo ka oye me voye oye sada sa tepere oye. 16Si, Keni sa kesini tarakenakae Iaova no sa la kuo te vodu ni Nodi, ngoyni sa pukae me ngada nevae Idini#4.16 Te ngelu ni Iburu lolopua ngeoro Nodi ne zulezule..
17Sinani Keni sa vakapoyto ona quolekutae, no oye sa iro so no sava puodo Inoke. Te sada noyene Keni sa vadere keike kumala lata, no sa vataritenge vasevani toytuleike oye Inoke. 18Sa voy ta oye, Inoke sa puodoa me Iradi, no Iradi sa vapoudo Meujaele, no Meujaele sa vapoudo Matusela, no Metusela sa vapoudo Lemiki.
19Lemiki sa pale keri quole keike toritongoa Ada no keike Zila. 20Ada sa vapuodo Jebolo; oye tamaea doyra oyra ka kuo te toypaka pua no ka pure oyra pita pupura. 21No taritongoa likae oye ne Jubolo; tamaea doyra oyra ka vanoype oyra pita qiqila tatara no kiu. 22No Zila sa vapoudo vele toytuleike, sa vataritingini Tubolo- Keni, oye sa joyjuni taba adoa doyra oyra pita jaju barasi no aeana. Vavinia Tubolo-Keni ne ka vataritingini Naema.
23Lemiki sa voy goyti te kue keri ona quolekutae,
<<Ada no Zila, vanata me aqo ro;
Keri ona quolekutae Lemiki ase me qo ngeoro.
Aro ko voye keike boysi sa vamaora aqo,
Keike boysi varoqa sa vamaora aqo.
24Ka oye sa voye Keni, moyra voye sokani vetu sada,
No Lemiki moyra voye sokani vetungulu vetu sada.>>
25Adama sa vakapoyto noypo ona quolekutae, oye sa vapuodo vele keike toytuleike sa vataritingini Seti, sa voy goyti oye, <<Bangara sa koyna aqo keike so me sokani Ebolo bati Keni sa voyevale moyna oye.>>#4.25 Te ngelu ni Iburu lolopoa taritongo Seti ne koyna. 26Seti sa vapoudo vele keike toytuleike, no oye sa vataritingini oye Inosi.
Te oyra sada noyene oyra boysi ka toto keleke taritongoa Iaova.
© 2024, Islands Bible Ministries. All rights reserved.