Ubwandilo 6
6
Ububibi ubwa muntu
1 #
Yob. 1.6, 2.1 Bo abantu banda pakubala nkani muchisu ichapasi, bakapapa abana abalindu. 2Abana abalumendo aba Chala#6.2 abana…Chala: Pamo ivipeliwa ivya bumi ivya kumwanya. bakennya ukuti abana abalindu aba bantu bakabonekagha akiza, po bakanda pakubasenda babo bakabaghana. 3Po u Mwene akati, “Ntakwiza pakubitikizya abantu pakwikala nubumi bwila na bwila, pakuti abantu gho mubili ghugho ghukufwa. Ukwanda ilelo abantu bakwiza pakuba na maka 120.”
4 #
Ukb. 13.33
Mumasiku ghalaghala na pisinda bulo kukabako abantu abatalitali abamaka nkani pachisu ichapasi, babo bakapapiwa mubakolo babo bakasendwa na bana aba Chala bala. Banaba bakaba bantu abamaka abakali, sona bamanyikwe.
5 #
Mat. 24.37; Luk. 17.26; 1 Pit. 3.20 U Mwene akennya ukuti abantu aba muchisu ichapasi bananga nkani, sona nukuti inyinong'ono zyabo zyaba mbibi nkani. 6Akaba ni chitima pachifukwa ichakuti akabapela abantu nukubabika muchisu ichapasi. Po chikamubaba nkani mumoyo wache. 7Akati, “Nkwiza pakubazimizya zila abantu bosi babo nkabapela. Nkwiza pakuvizimizya sona ivinyamana ni viyuni sona ni vinyamana ivyakwavula pachifukwa ichakuti indi ni chitima ukuti nkavipela vyosi vinivi.” 8Loli u Mwene akahoboka nu Nowa.
U Nowa akupanga ubwato
9 #
2 Pit. 2.5
Ili lyo lipangwi ilya Nowa.
U Nowa akaba muntu mugholosu, yuyo atakaba na kalema nakamokamo pakabalilo kache, sona akabombagha zizyo zikamuhobosyanga u Chala. 10U Nowa akaba na bana batatu: U Shemu nu Hamu nu Yafeti. 11Loli abantu bosi abanji bakaba babibi pamaso pa Chala, sona ububibi bwabo bukasata posi na posi. 12U Chala akagha ukuti ichisu ichapasi chambibi, pakuti abantu bosi bakaba ni nkalo imbibi nkani.
13Po u Chala akamubuzya u Nowa akati, “Nadumula pakubazimizya zila abantu bosi. Nkwiza pakubanangannya abantu pachifukwa ichakuti bachizuzya ichisu ichapasi nu bubibi bwabo. 14Polelo wipangile wemwene ubwato pakubombezya amatabwa agha mulombwa. Ugabe ivipinda, sona ubupake ni mpula kuzi na mukasi bulo. 15Ubwato bunubu bubanje amamita 133 mubutali, amamita 22 mububaba, sona ukwandila pasi ukufika kumwanya bubanje amamita 13. 16Upange akasonje aka bwato nukubuleka ubuzilo ubwakukwana hafu mita pakasi pa kasonje#6.16 kasonje: Pamo pibwindo. kala ni vibumba. Ugabe ivipinda vitatu, choka pasi, ni chabubili pakasi, sona ni chabutatu pamwanya nukubika umulyango mulubazu. 17Nkwiza pakutuma amizi aghakwizula pachisu ichapasi, umwakuti ghanangannye ivintu vyosi ivya bumi. Ivintu vyosi pachisu ichapasi vikwiza pakuzimila zila. 18Loli ane nkwiza pakufinga nawe ulufingo. Injila mubwato nu muchi wako, na bana bako, poka na bachi babo. 19Injizya mubwato mulamula ivinyamana vyosi ivyakulekanalekana. Sendapo vibilibili, ichanavuli ni chikolo ukuti vibanje nubumi. 20Injizya mubwato mulamula ichinyamana chosi ichanavuli ni chikolo icha vinyamana vyosi ivyakulekanalekana ni viyuni vyosi vibanje vibilivibili, umwakuti vipone. 21Usende sona ivyakulya vyosi ivyakulekanalekana ivyako ni vya vinyamana bulo.”
22 #
Heb. 11.7
U Nowa akabomba vyosi vivyo u Chala akamulamula.
Lambya Bible © Bible Society of Malawi, 2024.