मती 2
2
जोतिसीय ने उगमणी हाड़े हू आवणू
1हेरोदेस राजा ने दाड़ा मा जेरे यहुदिया परदेस ने बेतलेहम नगर मा ईसु ने जनम थाजू। ते जुओ, उगमणी हाड़े हू थुड़ाक जोतिसी यरूसलेम मा आवीनी पुसवा लागा के, 2“यहुदिय ने राजो जिने जनम थाजू हे, किय हे? केमके अमय उगमणी हाड़े विने तारो डिटो हे नी वणाय दणवत करवा आजा ह।”
3यू हबलीनी राजा हेरोदेस नी वणा हाते यरूसलेम ने कईक मनका गबराई गिय। 4तणी वणाय हेता मुटायाजक नी मुसा ने नियम हिकाड़वा वाले वगळा करीनी वणअ हू पुसयू के, “मसी ने जनम किय थावू जुजे?”
5वणय हेते वणाहू केजू, “यहुदिया परदेस ने बेतलेहम नगर मा, केमके परमेसवर ने हाड़े हू बुलवा वाले एवू लकजू हे के,
6“ ‘हे यहुदिया ने बेतलेहम ने मनको,
तमारे नगर यहुदिया ने कणा नगर हू कम नीं हे,
केमके तय मा हू एक राजो निकलहीं,
जी मारे इज़रायेल ने मनका ने रकवाली करहीं।’ ”
7तेरे हेरोदेसे जोतिसीयोय सुपके हू हादिनी वणहू पुसयू के, वी तारो कणी वला दिकाणो तो। 8नी यू केईनी वणाय वा बेतलेहम मुकलजा के, “जाईनी वणा सुरा ने बारामा सई सई पतो करो नी जेरे वी मली जाए, ते मय बी हमिसार आलवान ताकि मुँ बी आवीनी वणाय दणवत करू।”
9पसे वा राजा ने वात हबलीनी जाता रेजा, नी जुओ, जी तारो वणय उगमणी हाड़े डिटो तो वी वणअ मोरी मोरी हिड़जो नी जिय सुरो तो वणी जगा माते पोसीनी रूकाई गियो। 10जेरे वणय वी तारो डिटो, ते वा कईक राजी थाजा। 11नी वा घेर मा गिया ते वणय वी सुरो विने आई मरियम ने हाते डिटो, नी वणय गुड़अ माते आवीनी वणा सुराय दणवत किदू नी आपड़े जुली खुलीनी हुनू, लोबान नी अनतर ने भेट सडावजी।
12नी परमेसवर हपना मा वा सकोर किदा के, तमो पासा हेरोदेस कनी नकी जाता वो, तणी वा बिजी वाटे थाईनी आपड़े देस आवी गिया।
ईसुई मिसर देस मा लई जावू
13जेरे वा जोतिसी जाता रेजा ते, यूसुफे हपना मा परबू ने एक हरगदुते परगट थाईनी केजू, “उट, सुराय नी विने आजी लईनी मिसर देस मा जातो रे नी जेरे लगण मुँ तय हू नीं कऊँ, तेरे लगण वियस रेवान। केमके हेरोदेस अणा सुराय हुजी रेजो हे ताकि वणाय मरावी दड़े।”
14तणी वी रातेस उटीनी सुराय नी विने आजी लईनी मिसर देस मा जातो रेजो। 15हेरोदेस ने मरवा लगण वी वियस रेजो। यू तणी थाजू के, परबू ने वु वसन जी परमेसवर ने हाड़े हू बुलवा वालअ हू केजू तु वु पुरू थाई हके, “मय मारे सुराय मिसर हू बान्णे हादजो।”
हेरोदेसे बेतलेहम ने हेता नाना सुरअ मरावणअ
16हेरोदेसे जेरे यू जुजू के, जोतिसीय मारे हाते दोको किदो हे, ते वी री हू पराई गियो नी वणाय हुकम काड़जो के, जोतिसी केजू तुहू वणा समय, वणा ने आहे पाहे जनमजअ बेतलेहम नी विने आहे पाहे ने बे वरह या वणाहू बी नाना नाना सुरअ मरावी दड़जअ।
17तेरे परमेसवर ने हाड़े हू बुलवा वाला यिरमीयाय जी वसन केजू तु वु पुरू थाजू के,
18“रामाह नगर मा एक दुक हू पराईली थकण आवाज़ हबलाणी,
आवाज़ रूवा ने नी मुटा दुक ने ती।
राहेल आपड़े सुरअ ने हारू रूई रेजी ती,
नी सानू रेवा नीं साहती ती।
केमके व नीं रेजअ।”
ईसु ने परिवार नी मिसर देस हू पासू आवणू
19पसे हेरोदेस ने मरवा बाद मिसर मा यूसुफे हपना मा परबू ने एक हरगदुत परगट थाजो, 20नी वणाहू केजू, “उट सुराय नी विने आजी लईनी इज़रायेल देस मा जा, केमके जी सुराय मारवा वालो तो, वी मरी सुको हे।”
21पसे यूसुफ उटजो, नी सुराय नी विने आजी लईनी इज़रायेल देस मा आजो। 22पण जेरे यूसुफे यू हबलजू के, यहुदिया माते आपड़े बाप हेरोदेस ने जगा माते अरखिलाउस राज करी रेजो हे ते, वी विय जावा हू बयी गियो, नी पासू हपना मा परमेसवर ने हुकम पाईनी गलील परदेस मा जातो रेजो। 23#मर 1:24; लूका 2:39; यूह 1:45नी नासरत नामक नगर मा घेर माड़ीनी रेवा लागो ताकि परमेसवर ने हाड़े हू बुलवा वालअ हू केजू गियू वसन पुरू थाए के, “वी नासरी केवाहीं।”
© 2023 NLCI
CC BY-NC-ND 4.0
