Zapoteco de San Vicente Coatlan - 2015 Edition (NT) Non-Drama

Zapoteco de San Vicente Coatlan - 2015 Edition (NT)

Zapoteco de San Vicente Coatlan - 2015 WBT (NT) Drama

Leꞌa zha ndon leꞌa ned, leꞌa xa nak Diꞌizh nchola.
No nsoꞌla xa nak Diꞌizh wa wats Dios,
leꞌa xa wa nak Dios.
Leꞌa zha ndon leꞌa ned wa, leꞌa xa wa nsoꞌla wats Dios.
Leꞌa iteanak be ta ncho leꞌa ta wa ngokndeꞌe juers ten Diꞌizh wa.
Ni dub taꞌa naꞌanpa yoꞌo tal leꞌa xa wa lá ngundeꞌe‑yá.
Leꞌa xa wa leꞌa nsaꞌa gealnaban ten be men,
leꞌa gealnaban wa leꞌa nak xeꞌa ten bexa.
Leꞌa xeꞌa wa nsu sa ukaw,
leꞌa sa ukaw wa lá gun gan yuꞌu xeꞌa wa.

Uyoꞌo dub xabgiꞌi leꞌa Dios mtuꞌub, leꞌa ta wa Juan xa ulaleaꞌ be men. Leꞌa xa wa mbidyadiꞌizh cuent ten xa nak xeꞌa wa, ndontsa itea be men gungea ladna xa wa. Leꞌa Juan naꞌanpa leꞌa nak xeꞌa wa, leꞌa xa ndi mbidyadiꞌizhtsa cuent ten xa nak xeꞌa.
Leꞌa xa na ta ugeaka nak xeꞌa, xa nsu xeꞌa ten Dios ndoꞌ be men, leꞌa xa wa mbiꞌid ndoꞌ gizhliyo ndee. No ukesea xa ndoꞌ gizhliyo ndee. Leꞌa juers ten xa ngokndeꞌe gizhliyo, parea leꞌa be men ncho ndoꞌ gizhliyo lá igondoꞌ xa. Mbiꞌid xa ndoꞌ bexa Israel, parea leꞌa be ltsaꞌa xa wa lá isakyoꞌón ta ndab xa. Ná leꞌa itea be men na msakyoꞌón ta ndab xa no mbingea ladna bexa xa, ndoꞌ bexa wa msaꞌa xa juers myak bexa xin Dios. Leꞌa ta na nak bexa xin Dios wa leꞌa ta wa naꞌanpa dub ta ndun be men, leꞌa ta wa ndi dub ta nsaꞌa Dios.
Leꞌa xa nak Diꞌizh wa myak men, cha uyoꞌo xa lat besa. Sbeꞌen nkweaꞌ ladna xa be men no sbeꞌen gealngea ndadiꞌizh xa. No uniꞌí besa xteꞌe juert nak xa ta na leꞌa xa ga dubkama nak Xin Dios. Leꞌa Juan wa mluu be men xteꞌe nak xa nak Diꞌizh wa, ugeꞌ ndab Juan ndoꞌ bexa:
—Leꞌa cuent ten xa ndee mbidiꞌizh naꞌ, gor na ndáp naꞌ leꞌa xa na ilen tsoꞌo naꞌ wa mas nsak ndoꞌ naꞌ, geal leꞌa xa wa nedka nchola ndoꞌ naꞌ.
Leꞌa xa uzhebpa utsin nak ndoꞌ beuna, no uzhebpa ndakno xa beuna itea be wizh. Leꞌa juers ten Moisés leꞌa Dios msaꞌa ley ten na. Parea leꞌa juers ten Jesucristo leꞌa Dios mluu xteꞌe nkweaꞌ ladna xa beuna no xteꞌe nak gealngea ten xa. Ni dub men gol niꞌí Dios. Ná leꞌa xa na ga dubkama nak Xin Dios, xa na nsob wats Tad Dios, leꞌa xa wa mluu ndoꞌ beuna xteꞌe nak Dios.


Leꞌa dub wizh leꞌa bexa nibeꞌe ten bexa judio mtuꞌub pla be uleꞌay no pla bexa levita, utoꞌo bexa gezh Jerusalén ngwaꞌinabdiꞌizh bexa ndoꞌ Juan xa ngoleaꞌ be men ná ton nak Juan. Leꞌa Juan naꞌanpa ukwiꞌin, ndi gaꞌalka ndab xa ndoꞌ bexa wa:
—Leꞌa naꞌ naꞌanpa leꞌa nak Cristo.
Leꞌa bexa wa cha unabdiꞌizhgal ndab bexa:
—¿Tonxá lu zhaga? ¿Nak lu profet Elí zha?
Leꞌa Juan cha ndab leꞌa xa naꞌanpa leꞌa ta wa. Weꞌe unabdiꞌizhgal bexa, ndab bexa:
—¿Nati lu profet ndiꞌizh ga ilenka wa?
Leꞌa Juan cha ndabgal leꞌa xa naꞌanpa leꞌa ta wa.
Leꞌa bexa wa cha ndabgal:
—¿Ton nak lu zha? Leꞌa besa juerska gab‑a ndoꞌ bexa na mtuꞌub besa. Nat gud ton nak lu.
Leꞌa Juan cha ukaꞌab ndab:
—Leꞌa naꞌ ndee leꞌa nak xa na nkeseyadiꞌizh geꞌe sa bid, ugeꞌ ndáp naꞌ: “Bkeasoꞌ bega nes ilen Xa Nibeꞌe.”
Leꞌa ta wa ta ndab Isaías tiemp polta.
Leꞌa bexa mtuꞌub bexa fariseo wa cha unabdiꞌizhgal ndab bexa:
—¿Xtaꞌan ngoleaꞌ lu be men, tal lu lid leꞌa nak Cristo, ni Elí, ni profet ndiꞌizh ga ilenka wa?
Leꞌa Juan cha ukaꞌab ndab:
—Leꞌa naꞌ nits‑tsa ngoleaꞌ be men, ná leꞌa lat bego ncho dub xa leꞌa bego bi lá nchandoꞌ. Leꞌa xa wa nedla ncho ndoꞌ naꞌ ndee, parea leꞌa xa ilen ndi tsoꞌo naꞌ. Leꞌa naꞌ ni lá isaya kote ndab xa wa, leꞌa xa wa mas nsak ndoꞌ naꞌ.
Leꞌa be ta ndee uyoꞌo gezh Betábara, stub toꞌo yowbeꞌe Jordán, sa na ulaleaꞌ Juan be men.

Ngol stubtsa wizh leꞌa Juan uniꞌí leꞌa Jesús nsalayaꞌ gax wats Juan. Cha ndab Juan ndoꞌ be men:
—Bwiꞌi bego, leꞌa xa baꞌ leꞌa xa nak cuent Borreg Ben ten Dios, xa ntsuꞌu be ke ten be men. Leꞌa cuent ten xa baꞌ li mbidiꞌizh naꞌ gor na ndáp naꞌ leꞌa tsoꞌo naꞌ ilen dub xa mas nsak ndoꞌ naꞌ, geal leꞌa xa nedla ncho ndoꞌ naꞌ. Leꞌa zha weꞌe leꞌa naꞌ ndee bi lá nchandoꞌ xa, ná leꞌa naꞌ ngwal ulaleaꞌ be men nsea nits, ndontsa li igondoꞌ bexa Israel wa xa.
No ndab Juan:
—Leꞌa naꞌ uní leꞌa Espíritu ten Dios utoꞌo gibeꞌa cuent dub palom nchaꞌlaꞌ sa nsoꞌ Jesús. Leꞌa zha wa leꞌa naꞌ bi lá nchandoꞌ xa baꞌ, parea leꞌa Dios xa mtuꞌub naꞌ koleaꞌ naꞌ be men nsea nits, leꞌa xa wa ndablaka ndoꞌ naꞌ leꞌa gek xa na iní naꞌ ilaꞌ Espíritu ten Dios, leꞌa xa wa koleaꞌ men nsea Espíritu ten Dios. Leꞌa naꞌ uní ta wa ta weꞌe ndáp naꞌ ndoꞌ bego leꞌa xa baꞌ nakka Xin Dios.

Ngol stubtsa wizh leꞌa Juan nsoꞌgal sa wa nsea stop xmen xa. Leꞌa gor uniꞌí Juan nsatid Jesús sa wa, cha ndab Juan ndoꞌ bexa:
—Bwiꞌi bego, leꞌa xa baꞌ xa nak cuent Borreg Ben ten Dios.
Leꞌa gor na mbiꞌín itop be xmen Juan ta wa, cha usankea bexa tsoꞌo Jesús. Leꞌa Jesús cha mgeaksoꞌ mwiꞌi xteꞌe nchankea bexa tsoꞌo na, cha ndab xa:
—¿Xtaꞌan nkwaꞌan bega zha?
Leꞌa bexa wa cha ukaꞌab ndab bexa:
—Rabí, ¿pa ncho go zha? —leꞌa rabí wa dub diꞌizh gab mech.
Leꞌa Jesús cha ndab:
—Waꞌa beuna, iniꞌí bega pa‑yá.
Leꞌa bexa wa cha nchaꞌbe, uniꞌí bexa pa ncho Jesús. Leꞌa ta wa pa gor nkea udap gor uzhe. Cha uyoꞌono bexa Jesús sa wa idub uzhe wa.
Leꞌa itop bexa na li mbiꞌín ta ndab Juan wa cha usankea tsoꞌo Jesús, leꞌa dub xa wa nsaleaꞌ Ndres, wit Simón Pedr. Weꞌe leꞌa Ndres wa ned ngwaꞌkwaꞌan wit na Simón, cha ndab xa:
—Leꞌa besa mzheꞌal xa nak Mesías —leꞌa Mesías wa dub diꞌizh hebreo, gab‑a Cristo, xa mti Dios.
Leꞌa Ndres cha mbiꞌi Simón wats Jesús. Leꞌa Jesús cha mwiꞌi ndoꞌ Simón, cha ndab Jesús:
—Leꞌa lu Simón, xin Jonás. Leꞌa nat leꞌa lu isaleaꞌ Cefas —leꞌa diꞌizh griego leꞌa ta wa Pedr, dub diꞌizh gab geꞌdaꞌa.

Ngol stubtsa wizh leꞌa Jesús nlad yaꞌ distrit Galilea. Cha mzheꞌal xa dub xabgiꞌi nsaleaꞌ Julip, cha ndab xa:
—Usankea tsoꞌo naꞌ.
Leꞌa lazh Julip wa gezh Betsaida, lazh Ndres no Pedr. Leꞌa Julip cha ngwaꞌkwaꞌan dub xabgiꞌi nsaleaꞌ Natanael, ndab xa:
—Leꞌa besa mzheꞌal xa na mkeꞌa Moisés no be profet cuent ten na. Leꞌa xa wa Jesús xa gezh Nazaret, xin Kosé.
Leꞌa Natanael wa cha ndab:
—¿Cha syoꞌo gan itoꞌo dub xa wen Nazaret zha?
Leꞌa Julip cha ukaꞌab ndab:
—Nchaꞌa wa igondoꞌ lu xa.
Leꞌa gor na uniꞌí Jesús nchaꞌlayaꞌ gax Natanael wats Jesús, cha ndab Jesús cuent ten Natanael:
—Leꞌa xa baꞌ ta ugeakapa nak dub xa Israel, dub xa naꞌanpa nkwiꞌinno be men.
Leꞌa Natanael cha ndab:
—¿Xteꞌe nchandoꞌ ga naꞌ?
Leꞌa Jesús cha ndab:
—Naꞌ uníla lu gor na nsob lu xan ya laꞌaw, gor biseata kwezh Julip lu.
Weꞌe leꞌa Natanael cha ndab:
—Mech, nat uní naꞌ leꞌa go nak Xin Dios, no nak ga Xa Nibeꞌe ten Israel.
Leꞌa Jesús cha ndab:
—Ta na ndáp naꞌ leꞌa naꞌ uní lu xan ya laꞌaw wa, ¿ta weꞌe ndangea ladna lu leꞌa naꞌ nak Xin Dios zha? Leꞌa lu iniꞌí be ta mas siꞌil ndoꞌ ta uniꞌí lu nat wa.
No ndab Jesús ndoꞌ bexa nde sa wa:
—Leꞌa naꞌ gáp ndoꞌ bego leꞌa bego iniꞌí leꞌa gibeꞌa yaꞌal, leꞌa be angel ten Dios ikea no ilaꞌ wats naꞌ, Xa Myak Men Ndoꞌ Gizhliyo.

Yoka San Juan 1