 If you would like a copy of this version please contact info@davaraudiobibles.org

Adamawa Fulfulde Bible

Fulfulde Bible Ajamiya © Bible Society of Cameroon, 2016.

إِبْرَاهِيمَ عُمِّ دِغَ تٛنْ، دِلِّ غَلْ تَيْرٜ لٜسْدِ ڢٛمْبِنَ؞ عٛجٛوطِ حَکُّندٜ کَادٜسْ بٜى سُرَ؞ عٛڢَࢡِّ حَا غٜرَرْ؞ إِبْرَاهِيمَ وِعِ يِمْࢡٜ، سَارَةُ دٜبّٛ مَاکٛ طُمْ دٜىٰرْطِيکٛ؞ عَبِمٜلٜکْ، لَامِيطٛ غٜرَرْ نٜلِ، حٛوعِ سَارَةُ؞ اَللَّه وَرِ حَا عَبِمٜلٜکْ جٜمَّ ندٜرْ کٛيْطٛلْ، وِعِمٛ‏: «عَمَايَنْ نغَمْ دَلِيلَ دٜبّٛ مٛ کٛوعُطَ، نغَمْ عٛ تٜعَاطٛ؞» عَمَّا عَبِمٜلٜکْ ࢡَدِتَاکِنٛ مٛ؞ عٛوِعِ‏: «يَا جَوْمِرَاوٛ، عَحَلْکَنْ عُمَّاتٛورٜ کٛو تٛ ندٜ عَدِلِيندٜ نَ؟ نَا کَنغْکٛ وِعِ يَمْ‏: عٛ دٜىٰرْطَمْ نَ؟ دٜبّٛ بٛو وِعِ‏: عٛ دٜىٰرْطَمْ؞ مِوَطِ طُمْ بٜى ࢡٜرْندٜ لَاࢡْندٜ عٜ جُوطٜ لَاࢡْطٜ؞» اَللَّه جَابِمٛ ندٜرْ کٛيْطٛلْ‏: «مِنْ بٛو مِعَنْدِ عَوَطِ طُمْ بٜى ࢡٜرْندٜ لَاࢡْندٜ؞ نغَمْ مَاجُمْ مِحَطِ مَ وَطُغٛ حَکّٜ دٛوْ عَمْ؞ مِعَشَّايْ مَ عَمٜىٰمَ مٛ؞ جٛنْتَ لٛرْنَنْ غٛرْکٛ عٛو دٜبّٛ مُمْ، نغَمْ عٛ اَلنَّبِيجٛ؞ عٛدٛعَنْتٛ مَ، عَيٜىٰطَنْ؞ عَمَّا تٛ عَلٛرْنَتَا دٜبّٛ عٛو، عَنْدُ عَمَايَنْ ڢَکَتْ، کٛ مَرْطَ ڢُو نَتَّنْ؞»
عَبِمٜلٜکْ دَوِ شُبْ، عٜوْنِ سُکَعٜنْ مُمْ ڢُو؞ عٛيٜشِّ ࢡٜ بٛلّٜ طٜعٜ ڢُو؞ ࢡٜکُلْتٛرِ مَسِنْ؞ عَبِمٜلٜکْ عٜوْنٛيِ إِبْرَاهِيمَ، عٛوِعِمٛ‏: «طُمٜ مبَطَّا مِنْ؟ عَيْبٜوٛلْ نغٛلٜ نغَطَنْمَامِ حَا نغَدَّ حَکّٜوٛلْ مَنغٛلْ بَنَ نغٛعٛلْ دٛوْ عَمْ عٜ دٛوْ لَامُ عَمْ؟ عَحُووِ يَمْ کُوطٜ طٜ غٛطّٛ حُووَتَا‏!» ندٜنْ عَبِمٜلٜکْ تٛکِّ وٛلْوَنْغٛ إِبْرَاهِيمَ‏: «طُمٜ نُڢِيطَا حَا نغَطَا حُوندٜ ندٜعٜ؟» إِبْرَاهِيمَ جَابِ‏: «مِتَمِّ، کُلٛلْ اَللَّه وٛودَا حَا نٛکُّورٜ ندٜعٜ، ࢡٜمبَرَتَمْ نغَمْ دَلِيلَ دٜبّٛ عَمْ؞ دٛوْ مَاجُمْ بٛو، عٛ دٜىٰرْطَمْ ڢَکَتْ؞ بَابَ عَمِنْ غٛوتٛ، عَمَّا دَادَ مَاکٛ ڢٜىٰرٜ؞ بَنَ نِي عٛلَاتٛرِ دٜبّٛ عَمْ؞ ندٜ اَللَّه يِيلْنِ يَمْ دَايِيطُمْ بٜى سَارٜ بَابَ عَمْ، مِوِعِ دٜبّٛ‏: وَطَنَمْ مبٛوطٜىٰنغَ بٜى وِعْغٛ مِ دٜىٰرْطَ کٛو تٛيْ نجَحْتٜنْ ڢُو؞» عَبِمٜلٜکْ حٛوعِ دَمّٛوجِ عٜ نَعِ عٜ مَشُّࢡٜ عٜ حٛرْࢡٜ، حٛکِّ إِبْرَاهِيمَ؞ عٛلٛرْنَنِمٛ بٛو سَارَةُ، دٜبّٛ مَاکٛ؞ عَبِمٜلٜکْ وِعِ‏: «ندَا، لٜسْدِ عَمْ طٛنْ يٜىٰسٛ مَ؞ جٛوطَ حَا ڢٛتَّنِ غِتٜ مَ؞» عٛوِعِ سَارَةُ بٛو‏: «ندَا، مِحٛکِّ دٜىٰرْطَ شٜىٰدٜ شَرْدِ عُجِنٜىٰرٜ؞ طُمْ عَلَامَ کَ سٜىٰدَنْتَ مَ عَ لَاࢡْطٛ يٜىٰسٛ وٛنْدُࢡٜ بٜى مَ ڢُو؞» ندٜنْ إِبْرَاهِيمَ تٛرِ اَللَّه، اَللَّه بٛو يَمْطِتِنِ عَبِمٜلٜکْ بٜى دٜبّٛ مُمْ عٜ حٛرْࢡٜ مُوطُمْ، ࢡٜندَࢩِ ڢَحِنْ؞ نغَمْ جَوْمِرَاوٛ وَرْتِرْنٛ رٜوْࢡٜ ندٜرْ سَارٜ عَبِمٜلٜکْ ڢُو رِمَرْࢡٜ دَلِيلَ سَارَةُ، دٜبّٛ إِبْرَاهِيمَ؞

Yoka لَاتَانٛوجِ 20