 If you would like a copy of this version please contact info@davaraudiobibles.org

Adamawa Fulfulde Bible

Fulfulde Bible Ajamiya © Bible Society of Cameroon, 2016.

ڢَرِسَعٜنْ نَنِ عِيسَى طٛنْ وَطَنَ يِمْࢡٜ بَݠْتِسْمَ، طٛنْ حٜࢡَ ݠُکَرَعٜنْ کٛ ࢡُرِ يُحَنَّ؞ غٛونغَ مَنْ کَمْ، عِيسَى بٜى حٛورٜ مُوطُمْ وَطَنَايْ کٛو غٛوتٛ بَݠْتِسْمَ، عَمَّا طُمْ ݠُکَرَعٜنْ مَاکٛ مبَطَتَ طُمْ؞ ندٜ عِيسَى نَنِ حَالَ کَعَ، عٛعَشِّ لٜسْدِ يَحُدِيَ، عٛلٛرِ حَا لٜسْدِ غَلِيلِ؞ نغَمْ يَحُغٛ تٛنْ سٜيْ عٛسَالٛ ندٜرْ لٜسْدِ سَمَرِيَ؞
عٛيٛتِّ بٜرْنِوٛلْ بِعٜتٜىٰنغٛلْ سِکَرْ ندٜرْ لٜسْدِ سَمَرِيَ، ࢡَدِينغٛلْ بٜى نغٜسَ کَ يَعْقُوبُ حٛکُّنٛ ࢡِيُمْ يُوسُڢُ؞ ࢡُلْندُ يَعْقُوبُ طٛنْ تٛنْ؞ عِيسَى سٛمِ بٜى جَحَانغَلْ، عٛجٛوطِ دٛوْ ࢡُلْندُ؞ طُمْ شَکَ ࢩَلَوْمَ؞
دٜبّٛ سَمَرِيَاجٛ وَرِ ࢩٜطُغٛ ندِيَمْ؞ عِيسَى وِعِمٛ‏: «حٛکَّمْ ندِيَمْ مِيَرَ؞» يَاکٜ مَنْ ݠُکَرَعٜنْ مَاکٛ نجٜحِنٛ حَا بٜرْنِوٛلْ نغَمْ سٛودٛيْغٛ ࢩَامْدُ؞ دٜبّٛ سَمَرِيَاجٛ غٛ وِعِ عِيسَى‏: «عَنْ عَ يَحُودُوجٛ، مِنْ بٛو مِ سَمَرِيَاجٛ، نٛيْ عَࢨَمْرَتَمِّ ندِيَمْ يَرُغٛ؟» نغَمْ وَلَا کٛ يَالِ يَحُودُعٜنْ بٜى سَمَرِيَعٜنْ؞ عِيسَى جَابِمٛ‏: «تٛ عَعَنْدِنٛ دٛکَّلْ اَللَّه، تٛ عَعَنْدِنٛ بٛو مٛيْ ࢨَمِ مَ ندِيَمْ يَرُغٛ، عَࢨَمَنّٛ مٛ، عٛحٛکّٜ ندِيَمْ ندٛکَّنْطَمْ نغٜىٰندَمْ؞» دٜبّٛ وِعِمٛ‏: «مٛودِبّٛ، عَوَلَا شَڢْغَلْ، ࢡُلْندُ بٛو لُغِّ؞ نٛيْ عَحٜࢡْرَتَ ندِيَمْ نغٜىٰتَمْ مَنْ؟ کَدِ عَࢡُرِ کَاکَ عَمِنْ يَعْقُوبُ دٛکُّطٛ مِنْ ࢡُلْندُ ندُعُ، کَنغْکٛ بٜى حٛورٜ مَاکٛ عٜ ࢡِکّٛيْ مَاکٛ ࢡٜنجَرِ حَا مَارُ، نٛنْ بٛو دَبَّاجِ مَاکٛ نَ؟» عِيسَى جَابِمٛ‏: «کٛو مٛيْ يَرِ ندِيَمْ طَعَمْ، طٛمْطَنْ ڢَحِنْ؞ عَمَّا جَرَنْطٛ ندِيَمْ طَمْ مِحٛکَّتَ مٛ، مٜىٰتَتَا طٛمْطُغٛ سَمْ؞ ندِيَمْ طَمْ مِحٛکَّتَ مٛ، لَاتٛتٛ سٜىٰࢡٛورٜ ندٜرْ مَاکٛ، سٜىٰࢡٛورٜ ندِيَمْ ندٛکَّنْطَمْ مٛ نغٜىٰندَمْ ندُومِيطَمْ؞» دٜبّٛ غٛ وِعِمٛ‏: «مٛودِبّٛ، حٛکَّمْ ندِيَمْ مَنْ، نغَمْ تَا مِمٜىٰتَ طٛمْطُغٛ ڢَحِنْ، مِحِسَ لٛرَاغٛ ࢩٜطُغٛ ندِيَمْ حَا طٛ؞»
عِيسَى وِعِمٛ‏: «يَحْ عٜوْنٛيَ غٛرْکٛ مَ، عٛنْ نغَرَ حَا طٛ؞» دٜبّٛ جَابِمٛ‏: «مِوَلَا غٛرْکٛ؞» عِيسَى وِعِمٛ‏: «عَوٛلْوِ غٛونغَ ندٜ عَوِعِ عَوَلَا غٛرْکٛ؞ نغَمْ عَوٛودِنٛ وٛرْࢡٜ نجٛوٛ، مٛ عَوٛنْدِ جٛنْتَ، نَا عٛ غٛرْکٛ مَ؞ کٛ عَوِعِ، طُمْ غٛونغَ؞» ندٜنْ دٜبّٛ غٛ وِعِمٛ‏: «مٛودِبّٛ، مِڢَامِ عَ اَلنَّبِيجٛ؞ کَاکِرَاࢡٜ عَمِنْ شُجِدَنِ اَللَّه دٛوْ حٛوسٜىٰرٜ ندٜعٜ، عَمَّا عٛنٛنْ، عٛنْ طٛنْ مبِعَ عُرُسَلِيمَ تَنْ وٛنِ نٛکُّورٜ سُجِدَنْغٛ اَللَّه؞» عِيسَى وِعِمٛ‏: «دٜبّٛ، جَࢡْ کٛ مِوِعٜتٜ‏: سَاعِ وَرَنْ، ندٜ عٛنْ شُجِدَنْتَ اَللَّه بَابِرَاوٛ، نَا دٛوْ حٛوسٜىٰرٜ ندٜعٜ، نَا حَا عُرُسَلِيمَ؞ عٛنٛنْ سَمَرِيَعٜنْ عٛنْ عَنْدَا مٛ عٛنْ شُجِدَنْتَ، عَمَّا مِنِنْ يَحُودُعٜنْ مِنْ عَنْدِمٛ مِنْ شُجِدَنْتَ، نغَمْ کِسْندَمْ عِوِ حَا يَحُودُعٜنْ؞ عَمَّا سَاعِ وَرَنْ، طُمْ وَطِ جٛنْتَ مَا، سُجِدٛوࢡٜ بٜى غٛونغَ شُجِدَنَنْ بَابِرَاوٛ ندٜرْ رُوحُ عٜ غٛونغَ؞ نغَمْ طُمْ عِرِنْ سُجِدٛوࢡٜ ࢡٜعٜ بَابِرَاوٛ طَࢡَّتَ؞ اَللَّه عٛ رُوحُ، سٜيْ سُجِدَنٛوࢡٜ مٛ، شُجِدَنَ مٛ ندٜرْ رُوحُ عٜ غٛونغَ؞»
دٜبّٛ وِعِمٛ‏: «مِعَنْدِ اَلْمَسِيحُ، وَاتٛ مٛيْتَاطٛ وَرَنْ؞ تٛ عٛوَرِ، عٛعَنْدِنَنْ مِنْ کُوجٜ ڢُو؞» عِيسَى وِعِمٛ‏: «مِنْ بٛلْوَنَنْطٛ مَ وٛنِ کَنغْکٛ؞»
سَاعِ مَنْ ݠُکَرَعٜنْ مَاکٛ لٛرْتٛيِ؞ ࢡٜکَيْطِنِ ندٜ ࢡٜنغِعِ عٛطٛنْ وٛلِدَ بٜى دٜبّٛ؞ عَمَّا وَلَا کٛو غٛوتٛ مَࢡّٜ وِعِ‏: «کٛ طَࢡَّتَ؟» مَلَّ‏: «نغَمْ طُمٜ مبٛلِدِدْتَ بٜى دٜبّٛ عٛو؟»
دٜبّٛ عَشِّ مبُلْکُ مُوطُمْ، لٛرِ ندٜرْ بٜرْنِوٛلْ، وٛلْوَنِ يِمْࢡٜ، عٛوِعِ‏: «نغَرٜ، ندَارٜ غٛطّٛ مٛ يٜشِّ يَمْ کٛ مِوَطِ ڢُو؞ تٜىٰمَ کَنغْکٛ وٛنِ اَلْمَسِيحُ؟» يِمْࢡٜ نغُرْتِ بٜرْنِوٛلْ، نجٜحِ حَا عِيسَى؞
سَاعِ مَنْ ݠُکَرَعٜنْ طٛنّٛ تٛرٛ عِيسَى نغَمْ عٛࢩَامَ، ࢡٜطٛنّٛ مبِعَ مٛ‏: «مٛودِبّٛ، ࢩَامْ؞» عَمَّا عٛوِعِ ࢡٜ‏: «مِوٛودِ ࢩَامْدُ ندُ عٛنْ عَنْدَا؞» ݠُکَرَعٜنْ ࢨَمْࢨَمْتِرِ‏: «وٛودِ مٛ وَدَّنِمٛ ࢩَامْدُ نَ؟» عِيسَى وِعِ ࢡٜ‏: «ࢩَامْدُ عَمْ وٛنِ وَطُغٛ مُويٛ نٜلْطٛ يَمْ عٜ حِࢡِّنغٛ کُوغَلْ نغَلْ عٛعُمْرِ يَمْ؞ نَا عٛنْ طٛنْ مبِعَ لُتِّ لٜبِّ نَيِ حَا وَکَّتِ شٛدٛلْ وَطَ؟ عَمَّا مِطٛنْ وِعَ عٛنْ، ࢡَنغْتٜ غِتٜ مٛنْ، ندَارٜ غٜسٜ، ࢨَامْندٜ ࢡٜنْدِ، دٜيْدٜيْ سٛدُغٛ؞ دِغَ جٛنْتَ وَکَّتِ وَطِ، شٛدٛووٛ طٛنْ جَࢡَ نغٜىٰنَارِ مُوطُمْ، عٛطٛنْ مٛوࢡْتَ شَمّٜىٰجٜ نغَمْ نغٜىٰندَمْ ندُومِيطَمْ، نغَمْ حَا مٛ سَاکِ عَاوْدِ عٜ مٛ سٛدِ ࢩَامْلٜ ڢُو شٜيٛدٛ؞ عٛو سَاکَنْ، عٛيَ بٛو سٛدَنْ، بَلْندٛلْ نغٛعٛلْ وِعِ غٛونغَ؞ مِنٜلِ عٛنْ سٛدُغٛ حَا عٛنْ کُووَايْ سَمْ، وٛطْࢡٜ کُووِ، عٛنٛنْ بٛو عٛنْ طٛنْ نَڢْتٛرٛ کُوطٜ مَࢡّٜ؞»
سَمَرِيَعٜنْ طُوطْࢡٜ ندٜرْ بٜرْنِوٛلْ مَنْ نُطِّنِ عِيسَى نغَمْ سٜىٰدَمْکُ نغُ دٜبّٛ سٜىٰدُنٛ‏: «عٛيٜشِّ يَمْ کٛ مِوَطِ ڢُو؞» نغَمْ مَاجُمْ، ندٜ سَمَرِيَعٜنْ نغَرِ حَا عِيسَى، ࢡٜتٛرِمٛ عٛجٛوطٛ حَا مَࢡّٜ؞ عِيسَى جٛوطِ تٛنْ ࢩَلْطٜ طِطِ؞ طُوطْࢡٜ نُطِّنِ عِيسَى نغَمْ دَلِيلَ بٛلّٜ مَاکٛ؞ ࢡٜطٛنّٛ مبِعَ دٜبّٛ‏: «نَا نغَمْ دَلِيلَ بٛلّٜ مَ ڢَحِنْ مِنْ نُطِّنِ جٛنْتَ، عَمَّا نغَمْ مِنِنْ بٜى کٛعٜ عَمِنْ مِنْ نَنِ کٛ عٛوِعِ، مِنْ عَنْدِ ڢَکَتْ کَنغْکٛ وٛنِ کِسْنٛووٛ دُنِيَارُ؞»

ࢡَاوٛ ݠَࢡُّکِ عِيسَى تٛنْ ࢩَلْطٜ طِطِ، عٛعَشِّ ࢡٜ، عٛدِلِّ حَا لٜسْدِ غَلِيلِ؞ نغَمْ عِيسَى بٜى حٛورٜ مُوطُمْ وِعْنٛ‏: «اَلنَّبِيجٛ حٜࢡَتَا تٜدُّنغَلْ ندٜرْ لٜسْدِ مُوطُمْ؞» عَمَّا ندٜ عٛيٛتِّ لٜسْدِ غَلِيلِ، يِمْࢡٜ تٛنْ نجَࢡِّمٛ بٛوطُّمْ، نغَمْ ࢡٜنغِعِ کٛ عٛوَطْنٛ ندٜرْ عُرُسَلِيمَ ندٜرْ جُولْدٜ ݠَسْکَ؞ نغَمْ کَمْࢡٜ بٛو ࢡٜ يَحْنٛوࢡٜ جُولْدٜ مَنْ؞
ندٜنْ عِيسَى لٛرِ حَا وُرٛ کَنَ ندٜرْ لٜسْدِ غَلِيلِ، حَا عٛوَيْلِتِنٛ ندِيَمْ، عٛلَاتِنّٛ طَمْ عِنَبٛوجَمْ غٛ؞ وٛودِنٛ وَکِيلِيجٛ لَامِيطٛ حَا کَڢَرْنَحُمْ تٛنْ، ࢡِيُمْ ࢩَوْطٛ؞ ندٜ عٛنَنِ عِيسَى وَرِ دِغَ لٜسْدِ يَحُدِيَ، عٛطٛنْ ندٜرْ لٜسْدِ غَلِيلِ، عٛيٜحِ حَا مَاکٛ، عٛتٛرِمٛ عٛيَحَ عٛيَمْطِتِنَ ࢡِنغٜلْ مَاکٛ غٛنّٛونغٜلْ دَاندٜ مَايْدٜ؞ عِيسَى وِعِمٛ‏: «تٛ عٛنْ نغِعَايْ عَلَامَاجِ عٜ کَايٜىٰڢِيجِ، عٛنْ نُطِّنْتَا‏!» وَکِيلِيجٛ غٛ وِعِمٛ‏: «مٛودِبّٛ، وَرْ سَارٜ عَمْ حِدّٜکٛ ࢡِنغٜلْ مَايَ‏!» عِيسَى وِعِمٛ‏: «حٛوتُ، ࢡِنغٜلْ مَ يٜىٰطِتِ؞» غٛطّٛ عٛو نُطِّنِ کٛ عِيسَى وِعِمٛ، عٛحٛوتِ؞ دِغَ عٛطٛنْ دٛوْ لَاوٛلْ تَوٛنْ، عٛڢٛتِّ بٜى حُووٛوࢡٜ مَاکٛ، ࢡٜمبِعِمٛ‏: «ࢡِنغٜلْ مَاطَ يَمْطِتِ؞» عٛࢨَمِ ࢡٜ‏: «وَکَّتِيرٜ ندٜيٜ نغٜلْ حٜࢡِ دَامَ؟» ࢡٜنجَابِمٛ‏: «کٜىٰࢩَ دٜيْدٜيْ زُورَ يٛنْتٜرٜ عَشِّ نغٜلْ؞» بَابَ مَاغٜلْ سِڢْتٛرِ طُمْ وَطِ دٜيْدٜيْ سَاعِيرٜ ندٜ عِيسَى وِعْنٛ مٛ‏: «ࢡِنغٜلْ مَاطَ يٜىٰطِتِ؞» ندٜنْ کَنغْکٛ عٜ يِمْࢡٜ سَارٜ مَاکٛ ڢُو ࢡٜنُطِّنِ عِيسَى؞
کَنْجُمْ وٛنِ کَايٜىٰڢِوٛلْ طِطَࢡٛلْ نغٛلْ عِيسَى وَطِ ࢡَاوٛ عٛوُرْتِ يَحُدِيَ، عٛوَرْتِ غَلِيلِ؞

Yoka يُحَنَّ 4