Mongondow - Today's Mongondow Version, 2006 (Drama NT)

Alkitab Singog In Mongondow Masa In Tanaa © Indonesian Bible Society, 2016.

Nopaḷut mako kon tua ki Yesus minayá in ḷoḷan Danow Galilea inta sinangoian Danow Tiberias. Noiyaputmai in tua, mobayong in intau in dinumudui kon i-Nia sin nokoontongdon in mosia kon inta mokoherang inta pinomia i Yesus kon intau mita nongotakit inta sinokoundamanan-Nea. Ki Yesus in notakod kon buḷud, bo iḻimitú kon tua takin murí-Nea mita. Wakutu intua diádon moonggot in Singgai Moḷoben Paska intau in Yahudi. Dodai in ki Yesus nobobui magí-mako, inontong-Nea in intau moyo-moyodudui in mamangoi kon i-Nia. Dá Sia noḻibó kon i Pilipus, “Kon onda i motaau naton potaḷuian kon kaanon, sinbá bayongan in intau tanion in mongaan?” (Kinotaauan bidon i Yesus onu in musti aidan-Nea, táe Sia in noguman natua sin monungkuḷ kon i Pilipus.)
Ki Pilipus in notubag, “Aka roti bo tongá boḻi in doyowa nogatut doit saḷaka yo diábí tugat pokaan kon intau mita tanion, umpakabí tongá poyopiḻikon mako.”
Murí i Yesus tobatú inta ki Andreas ki utat i Simon Petrus noguman kon i Yesus, “Kon naa oyúon in adí ḷoḷaki inta nodia kon roti ḻima nobatú bo toyá doyowa nobungá. Táe diábí pongonu aka kon intau moantó tanion?”
Ki Yesus in noguman, “Pokiḻitúaidon in intau mita tanion.” Kon tampat tatua nobayong in bonok, dá intau mita tatua iḻimitú kon bonok. Mosia komintan tua oyúonbí in ḻima noribu in ḷoḷaki. Onda intua ki Yesus nogamá kon roti bo nopoyaput in sukur kon i Allah. Nopaḷut mako kon tua sinila-silai-Nea mako in roti tatua kon intau moantó tatua. Noiduduimai kon tua sinila-silai-Nea domandon in toyá tatua, bo mosia in komintan nongaan kinooibogbí monia. Naonda in komintandon nongaan nobotug, ki Yesus noguman kon murí-Nea mita, “Sipundon in ki agat mita in roti inta diá kinaan monia sinbá diá mogoguyaat.” Bo sinipun monia. Nosipun magí mopuḷú bo doyowa nokompé ki agat in kaanon inta tongá nongkon roti ḻima nobatú bo pinokaan kon intau mobayong tatua.
Naonda intau moantó tatua nokoontong kon inta mokoherang pinomia i Yesus, mosia in noguman, “Totuu, naabí in nabi inta i harap mako mamangoi in dunia!” Kinotaauan i Yesus kon mosia in mamangoi sin momakisa kon i-Nia mobaḻí Datu monia. Tuamai in Sia minayádon kon daerah inta notombuḷud.


Naonda mulaidon moungkoḷom, murí mita i Yesus nosiḻigdon bo minayá in danow. Bo mosia in sinumakoi kon uangga bo minayá in Kapernaum. Nodoḷomdon, táe ki Yesus in diápa doman namangoi kon i monia. Dodai intua momangkoidon mobokoḷ in danow tatua sin tompot mogirup moropot. Naonda in noyayúdon pinobotoian monia, degá ḻima ande onomdon nokilo in binayáan monia, mosia in nokoontong kon i Yesus nopoangoi in uangga takin minaya-mayá kon tudu in tubig. Mosia in totokdon noondok. Táe ki Yesus in noguman, “Dika moondok sin Akuoibí in naa!” Bo takin pia in gina mosia nonongganutdon kon i-Nia sinumakoi kon uangga, bo dodaipa doman tua uangga monia noitubudon kon tampat bayáan monia.

Nopoikoḷomai kon singgai, intau moantó inta umuranpa kon ḷoḷan danow, in nonotaaudon kon tongábí tobatú in uangga kon tua. Kinotaauandon doman monia kon murí-Nea mita in sinumakoidon kon uangga bo inumuna minayá. Ki Yesus in diápabí sinumakin. Noiduduimai kon tua tongonumai uangga nongkon kotá in Tiberias namangoi bo sinumubu kon diug in tampat pinokaanan kon intau moantó kon roti naonda in ki Tuhan nopoyaput in sukur. Naonda in intau moantó tatua diádon nokoontong kon i Yesus bo murí-Nea mita kon tampat tatua, mosia in sinumakoi kon uangga tatua bo minayá in Kapernaum motayak kon i Yesus.

Naonda in intau mita tatua noyodungkuḷdon i Yesus kon ḷoḷan danow, mosia in noḻibó kon i-Nia, “Pak Guru, dodai onda ki Pak Guru noidapot in naa?”
Tubag i Yesus, “Totuubí kon moiko in notayak kon i-Nakó deemanbí popisí in kinomangaḻeandon monimu in makusud in inta mokoherang mita pinomia-Ku, táe popisíbí in moiko nongaandon nodapot in nobotug. Donaaibí mogaid sinbá mokouḻí kon kaanon inta modai-daitpa bo inta mobongkog. Táe pogaidbí sinbá mokouḻí kon kaanon inta diá mobongkog bo inta mobogoi in kobiagan mononoi. Kaanon tatua in ogoibí i Adí Intau kon i monimu, sin Sia ain ilantik i Allah inta ki Amá.”
Dá mosia in noḻibó kon i-Nia, “Onu in musti pomiaan nami, sinbá kami in mogaid kon oaidan inta kinoibog i Allah?”
Ki Yesus in notubag, “Tanaabí in kinoibog i Allah nongkon i monimu: Popirisayadon kon i-Nia inta pinotabá mangoi i Allah.”
Dá kai monia doman, “Aka natua, onu in tanda poontong i Pak Guru kon inami, sinbá kami in mokoontong bo mopirisaya kon i Pak Guru? Onu in aidan i Pak Guru? Mogoguyang nami nokaan kon manna kon padang gurun, ná inta pinais kon bonu in Buk Motusi, ‘Sia in nobogoi in roti nongkon soroga.’ ”
Bo Ki Yesus in noguman kon i monia, “Pirisayabí: Deemanbí ki Musa, táe ki Amá-Kubí in nobogoi kon inimu in roti inta totuu nongkon soroga. Sin roti inta inogoi i Allah in Siabí inta noponag nongkon soroga bo nobogoi in kobiagan kon intau kon dunia.”
Dá mosia in noguman, “Pak Guru, umurandon ogoiai in roti tatua in kami.”
Dá kai Yesus doman, “Akuoibí naa in roti inta mobogoi in kobiagan, intau mita inta mamangoi kon i-Nakó in diá bidon angoian bui in gogoy. Bo intau inta mopirisaya kon i-Nakó in diá bidon moyoga-yogang bui.
Táe ná kain singog-Ku kon i monimu, umpakabí ain inontong monimu in Akuoi, táe diábí mopirisaya in moiko. Bayongan in intau inta inogoi i Amá-Ku kon i-Nakó in mamangoibí kon i-Nakó. Ki inekabí in mamangoi kon i-Nakó diábí in diá tarimaan-Ku. Sin Akuoi in namangoi nongkon soroga deemanbí mamangoi mogaid kon onu inta kinoibog-Ku tontaní, táe mogaidbí kon inta kinoibog-Nea inta nopotabá kon i-Nakó. Bo naabí in kinoibog i-Nia inta nopotabá kon i-Nakó: Sinbá bayongan intau inta inogoi kon i-Nakó, diá tobatúmai in mobuḻi; táe bá biagon-Ku in mosia kon singgai ponantúan. Totuu, naabí in kinoibog i Amá-Ku: Bá bayongan intau inta nokoontong kon Adí bo nopirisaya kon i-Nia mokouḻí kon kobiagan mopia bo mononoi, bo mobiag bui kon singgai ponantúan.”
Intau mita Yahudi mulaidon mongunsingog kon i Yesus, sin ki Yesus in noguman: “Akuoi in roti inta noponag nongkon soroga.” Mosia in noguman, “Sia naa in ki Yesus, ki adí i Yusup toh? Kinotaauanbí nami in ki iná bo ki amá-Nea! Yo nongonu sin Sia in mogumanbí, kon Sia in noponag nongkon soroga?”
Dá ki Yesus in noguman kon i monia, “Donaai mongunsingog. Diábí in tobatúmai intau motaau mamangoi kon i-Nakó, aka diá diaan mangoi i Amá inta nopotabá mangoi kon i-Nakó. Ki ine in mamangoi kon i-Nakó, yo biagon-Kubí in sia kon singgai ponantúan. Kon bonu in Buk in nabi mita pinais nanaa: ‘Komintan intau tundúonbí i Allah.’ Dá bayongan intau inta ain nokodongog kon totundú bo nobalajar nongkon i Amá, mamangoibí kon i-Nakó. Tongá tua in deemanbí mangaḻenea kon oyúondon intau inta ain nokoontong kon i Amá. Tongábí Sia inta namangoi nongkon i Allah in nokoontongdon kon i Amá.
Pokotaaudon: Intau inta mopirisaya, oyúonbí in kobiagan mopia bo mononoi. Akuoibí naa in roti inta mobogoi in kobiagan. Mogoguyang monimu in nokaandon kon manna kon padang gurun bo mosia ain minatoi. Táe diábí natua in roti inta noponag nongkon soroga; intau inta mokaan kon roti tatua in diábí matoi. Akuoibí in roti inta noponag nongkon soroga, roti inta mobogoi in kobiagan. Intau inta mokaan kon roti tanaa in umuranbí mobiag. Roti inta ogoi-Ku kon kobiagan intau kon dunia naa in awak-Kubí.”
Nokodongogmai kon tua, intau mita in Yahudi nobobayowan. Mosia in nosingog: “Umpaka intau tanion mokobaḻí mobogoi in awak-Nea sin kaanon naton?”
Bo ki Yesus in noguman kon i monia, “Poguman-Kudon kon i monimu, Aka moiko bo diá mokaan kon awak i Adí Intau bo monginum kon dugú-Nea, yo diábí in moiko mobiag. Intau inta mokaan kon awak-Ku bo monginum kon dugú-Ku sia in mokouḻí kon kobiagan mopia bo mononoi bo biagon-Kubí in sia kon Singgai Ponantúan. Sin awak-Ku in totu-totuubí kaanon bo dugú-Ku in totuubí kon inumon. Intau inta mokaan kon awak-Ku bo monginum kon dugú-Ku, umuranbí in Sia motobatú takin-Ku, bo Akuoi i motobatúnea doman. Ki Amá inta nobiag tua, in nopotabá kon i-Nakó, bo Akuoi doman in nobiagbí nongkon i Amá. Natua doman in intau inta mokaan kon awak-Ku, sia in mobiagbí doman nongkon i-Nakó. Naabí in roti inta noponag nongkon soroga: deemanbí ná roti inta kinaan in mogoguyang monimu. Sin naonda in nokaan mako kon roti tatua, mosia in minatoi doman. Táe intau inta mokaan kon roti tanaa in umuranbí mobiag.”
Tua komintan in pinoguman i Yesus dodai in Sia nobogoi in totundú kon baḷoi pososambayangan kon Kapernaum.

Naonda in nokodongog kon singog mita i Yesus tatua, nobayong kon sigad in murí-Nea mita in noguman, “Totundú tanaa totuu mobogat. Ki inebí in mokomampu in motarima kon tua!”
Kinotaauanbí i Yesus kon murí-Nea mita in mongunsingogbí doman kon soaḷ tatua. Dá tuamai Sia in noguman, “Degá mokotersinggung kon i monimu in singog-Ku mita tatua? Yo onu degá in mobaḻí aka moiko in mokoontongdon kon i Adí Intau mamonik bui kon tampat-Nea inta muna? Rohobí i Allah in nobogoi in kobiagan kon intau. Ropot in intau naa diá baragunanea. Singog mita inta pinosingog-Ku kon i monimu naa in singogbí mita in Roho i Allah bo singogbí inta mobogoi in kobiagan. Tongá oyúon doman kon sigad monimu in diá mopirisaya.” (Kinotaauan bidon muna i Yesus in intau mita inta doí mopirisaya, bo ki ine mobaḷui in pirisaya kon i-Nia.) Bo ki Yesus in bui noguman, “Tuamai Akuoi in mopotaaudon kon inimu, diábí tobatúmai in intau in motaau mamangoi kon i-Nakó, aka diá kinoibog i Amá.”
Nongkon dodaidon in tuata bo nobayong in dumodudui-Nea in nonaḷámaidon kon i-Nia, bo doídon dinumudui kon i-Nia bui. Bo ki Yesus noḻibó kon murí-Nea inta mopuḷú bodoyowá tatua, “Yo degá moiko in monaḷá domanmai kon i-Nakó?”
Dá ki Simon in noḻibó, “Tuhan, kon i inepa in bayáan nami? Tosingogon i Tuhan mobogoi in kobiagan mopia bo mononoi. Kami naa in nopirisaya bo noyakin bidon kon ki Tuhanbí in totabá inta motusi nongkon i Allah.”
Ki Yesus in notubag: “Kinotaauan bidon monimu kon Akuoibí in nomiḻí kon i monimu mopuḷú bodoyowá naa? Tongá tobatú kon sigad monimu nion in kinawasa in Ibilis!” Ki Yudas ki adí i Simon Iskariot i makusud i Yesus tatua. Sin ki Yudasbí tuata in moposarakan kon i Yesus, umpaka sia in murí doman i Yesus inta kon sigad in murí-Nea mopuḷú bodoyowá.

Yoka YOHANES 6