Bible text: Luvale © Bible Society of Zambia, 2017 www.biblesociety-zambia.org/ Recording of the New Testament ℗ Hosanna, 2022

Luvale - 2017 BSZ (NT) Drama

Kukuputuka Lizu apwilengako, kaha Ou Lizu apwilenga naKalunga hamwe, kaha Ou Lizu apwilenga Kalunga.
Ikiye apwilenga naKalunga kukuputuka.
Vyosena vavitengelele muli Ikiye, kaha kakweshi nachimwe vatengele chakuzeneka Ikiyeko.
Muli Ikiye mwapwile Mwono, kaha Mwono kana wapwile Musana wavatu.
Musana kana wamunyika mumilima, oloze milima kayauhonesako.
Kwapwile mutu vatumine kufuma kuli Kalunga, lijina lyenyi Yowano.
Ikiye ejile apwenga chinjiho wakulumbununa Musana naunjiho wenyi, mangana hakwambulula chenyi vosena vafwelele.
Ikiye kapwile Uze Musanako, oloze ejile nakuhana unjiho wakuvuluka Uze Musana.
Musana wamuchano apwile nakwiza hakaye, Ou eji kumunyikilanga mutu himutu.
Apwile hakaye, kaha kaye vakatengelele muli Ikiye, oloze vaka-kaye kavamutachikijileko.
Ejile kuvyenyi, kaha vaze venyi kavamutambwileko.
Oloze veshovo vamutambwile, vaze váfwelelele lijina lyenyi, achihashishile kuli vakiko kupwa vana vaKalunga —
vaze vene vásemuwile, keshi kumanyingako, chipwe kukufwila chachisemwa chamujimba, chipwe kukufwila chalunga, shina kuli Kalunga kaha.
Jino Lizu alilingishile Ivene kupwa wamujimba wanyama, nakuzuzumana mukachi ketu, kaha twashishikile upahu wenyi — upahu waMwana umwe-lyamunwe kuli Ise, wakuzala nalikoji namuchano.
Yowano ahanyinenga unjiho hali Ikiye, avilikilenga ngwenyi, Ou Ikiye ngwavulukanga ngwami, Ou mweza munyima yami anguhambakana ulemu mwomwo apwako lyehi shimbu kanda ami ngupweko.
Mwomwo kukuzalilila chenyi kukiko tunatambwila tuvosena likoji lyakulunjika halikoji.
Mwomwo Jishimbi vajihanyinyine muli Mose; oloze likoji namuchano vyejilile muli Yesu Kulishitu.
Naumwe amona lyehi Kalunga wauchi; Ou, Umwe-lyamunwe Ikiye Kalunga, Ou atwama kutulo yaIse, Ikiye natujimbwilayo.


Jino ou ukiko unjiho waYowano, omu vaYuleya vakuYelusalema vatumine vapilishitu navaLevi nakumuhulisa ngwavo, Ove yoveya?
Avalwezele, kavaswekeleleko. Avalwezele hatoma ngwenyi, Keshi yami Kulishituko.
Kaha vamuhulishile ngwavo, Nyi yoveya? Yove Elija tahi? Avakumbulwile ngwenyi, Keshi yamiko. Ngwavo, Yove uze Kapolofweto tahi? Avakumbulwile ngwenyi, Nduma.
Shikaho vamuhulishile ngwavo, Nyi yoveya? Mangana tukavalweze vaze vanatutumu, tulweze. Naulivuluka muka?
Ambile ngwenyi, Yami
Lizu lyayOu áli nakuvilika mupambo ngwenyi,
Ololenu jila yaMWATA,
ngana muze ambile kapolofweto Isaya.
(Jino ava vapwile vakutuma kufuma kuli vaFwaliseu.)
Kaha vamuhulishile ngwavo, Mwomwo ika uli nakujimikila vatu nge ove kaweshi uKulishituko, chipwe Elija, chipwe uze Kapolofweto?
Yowano avakumbulwile ngwenyi, Ami ngweji kujimikanga vatu mumeya. Oloze mukachi kenu munemana Ou munazeneka kutachikiza.
Ikiye vene Ou áli nakwiza munyima yami, ukwechi kachikapa kamendelo enyi kangwatamo kukakasununako.
Vyosena evi vyasolokelele ku Mbetane , musali ya Yotau , muze apwilenga Yowano nakujimika.

Omu kwachele, Yowano amwene Yesu ali nakwiza kuli ikiye, kaha himwamba ngwenyi, Talenu! Ou Mwanamukoko waKalunga, Muka-kufumisa shili yavaka-kaye!
Ou Ikiye ngwavulukanga ngwami, Munyima yami namwiza lunga anguhambakana ulemu, mwomwo apwako lyehi shimbu kanda ami ngupweko.
Kaha ami, kangwamutachikijileko, oloze ngwejile nakujimika mumeya mangana asoloke kuli vaIsalele.
Yowano ahanyine unjiho ngwenyi, Ngwamwene Shipilitu ali nakushikumuka kufuma mwilu nakumuwila nge katela, himwatwama hali Ikiye.
Kaha ami, kangwamutachikijileko, oloze Ou ángutumine mangana ngujimike mumeya, angulwezele ngwenyi, Owo naukamona Shipilitu mwafuma mwilu nakutwama hali Ikiye, Ikiye vene Ou Muka-kujimika vatu muli Shipilitu Wajila.
Jino ami ngunamono nakuhana unjiho ngwami, Ikiye vene MwanaKalunga.

Cheka nawa omu kwachele, Yowano emanyine natumbaji twenyi vavali.
Hakushishika Yesu omu apwile nakutambuka, ambile ngwenyi, Talenu! Ou Mwanamukoko waKalunga!
Kaha vaze tumbaji twenyi vavali vévwile omu ahanjikile, vakavile Yesu.
Yesu hakwalumuka amwene vali nakumukavangiza, himwavahulisa ngwenyi, Munasake ika? Vakiko vamukumbulwile ngwavo, Ove Lapi (lizu eli lyalumbunuka ngwavo, Muka-kunangula), uli nakutwama kulihi?
Avambile ngwenyi, Twayenu mumone. Ngocho vayile, vamwene kuze atwaminenga, kaha hinavatwama nenyi likumbi lize. Hapwile kafwe halwola lwamulikumi.
Umwe wavaze vavali vévwile omu ahanjikile Yowano numba vakavangize Yesu, apwile Andelei, ndumbwaShimona Petulu.
Ikiye avangilile kuwana ndumbwenyi Shimona, himwamulweza ngwenyi, Tunamuwane Meshiya (lizu eli lyalumbunuka ngwavo, Kulishitu).
Amunehele kuli Yesu. Yesu amushishikile, himwamba ngwenyi, Yove Shimona mwanaYowano — navakuvulukanga ngwavo, Kefwase (lizu eli lyalumbunuka ngwavo, Petulu).

Omu kwachele, Yesu ajinyine kuya kuNgalileya, kaha awanyine Fwilipu himwamwamba ngwenyi, Ngukavangize.
Jino Fwilipu apwile waku Mbetesaita , kwimbo lyaAndelei naPetulu lyakembwe.
Fwilipu awanyine Natanyele, himwamulweza ngwenyi, Tunamuwane Uze vavulukile kuli Mose mumikanda yaJishimbi, nakuli vapolofweto, Ikiye Yesu wakuNazaleta, MwanaYosefwe.
Natanyele amwambile ngwenyi, KuNazaleta kuhase kufuma chuma chamwaza numba? Fwilipu amukumbulwile ngwenyi, Twaya utale.
Yesu amwene Natanyele ali nakwiza kuli Ikiye, himwamba ngwenyi, Talenu, ou kaIsalele vene, muli ikiye kamweshi makuliko!
Natanyele amuhulishile ngwenyi, Unangwijiva ngachilihi? Yesu amukumbulwile ngwenyi, Shimbu kanda Fwilipu akusanyike, ngwakumonanga omu wapwanga mwishi yamukuyu.
Natanyele amukumbulwile ngwenyi, Ove Lapi , Ove uMwanaKalunga! UMwangana wavaIsalele!
Yesu amukumbulwile ngwenyi, Unafwelela hakukwamba ngwami, Ngwakumonanga mwishi yamukuyu tahi? Naukamona vyakuhambakana evi.
Kaha amulwezele ngwenyi, Mwamuchano vene nangumilweza ngwami, Namukamona mwilu munasokoloka, vangelo jaKalunga vali nakukanduka nakushikumuka hali Mwanamutu.

Yoka Yowano 1