เจอ​อัน​ก็​ปัน​อังกิ​ออยะ ‍ ทัง​มะลัง ‍ ทัง​กะแตะ ‍ กับ​ญิ​กู​เนว​นาก็​เบิน​อัอด​นึง​โลก​อะไน ‍ พูซาง​ก็​ซาง​มม​ญิ​เจอ ‍  ตัอะ​มือ​ที​เจ็ด ‍ พูซาง​เลิด​ละลู ‍ อัน​ก็​ซาง​มม​ญิ​เจอ ‍ เวียะ​นาก็​อัน​ตาะ​ก็​มม​ญิ​กู​อัน​กู​เนว​เจอ ‍  เจอ​พูซาง​ก็​อวยพอน​มือ​ที​เจ็ด​อะไน ‍ ต็าง​อะดอะ​ออ์น​ปัน​มือ​พิเซด ‍ ปัน​มือ​นาก็​พูซาง​ละลู ‍ เวียะ​งาน​นาก็​อัน​ตาะ​ก็​มม​ญิ​เจอ ‍ 

ตี​ตีแม็ด​อะเลอ ‍ บัด​เยโฮวา​พูซาง​ซาง​โลก​ซาง​มะลัง​อะไน ‍ เรือง​คอง​อัน​ก็​ปัน​อังกิ ‍  แก็ล​อะลูอง​นึง​กะแตะ​ก็​นัง​ตัอ​กัอด​นัง​ตัอ​เบิน​อัมปิน ‍ เจอ​บ็าดบาย​นาก็​อัอด​นึง​ตงนีา​นึง​ซวน​ก็​นัง​ตัอ​ดาฮ​อัมปิน ‍ พอะ​ปาย​กวย​ที​ซี​ตาะ​ซวน​ตาะ​นีา​ก็​นัง​ตัอ​เบิน ‍ เจอ​เยโฮวา​พูซาง​นัง​ตุน​ตาะ​ออ์น​มีา​อัมปิน ‍ ฮัก​เบิน​ดัอะ​นำบอ​จะล็าก​อะซอฮ​ตี​กะแตะ ‍ ตาะ​ออ์น​กะแตะ​จุม ‍  เจอ​ฮาไน​เยโฮวา​พูซาง​ก็​เอด​กะแตะ​มอ์ด​ตาะ​ปัน​ตอ์​กวย ‍ ตาะ​ออ์น​ปัน​กวยกอ์น ‍ เจอ​พูซาง​ก็​ปลง​ละงึฮ​นาก็​ออ์น​กวย​เบิน​ซีวิด ‍ จอ์ะ​ฮอง​มุฮ​คอง​กวย​อะกี ‍ กวยกอ์น​อะกี​เลิด​เบิน​ละงึฮ​เบิน​มิด​เบิน​ซีวิด​ตับ
เจอ​เยโฮวา​พูซาง​ก็​ตาะ​ซวน​อะดอะ​มู​บอน ‍ ตาะ​นึง​กะแตะ​เอเดน ‍ อัอด​ยาฮ​มะนาง​ลอฮ ‍ เยโฮวา​ออ์น​กวย​นาก็​อัน​ซาง​อะดอะ​อะกี​ออยะ ‍ อัอด​นึง​ซวน​อะไน ‍  เจอ​เยโฮวา​พูซาง​ก็​ตาะ​ออ์น​เบิน​แก็ล​อะลูอง​ซะเอย​เนว​ดาฮ​อัอด​นึง​ซวน​อะกี ‍ แก็ล​นาก็​ปัน​ตา​เฮะ​ปัน​ตา​จีา​เบิน​กบ​ญิ ‍ เจอ​นึง​ทะเน​ซวน ‍ เบิน​มู​แก็ล​นาก็​ค็าน​กวย​จีา​ไปล​อัน​เจอ ‍ ซี​เบิน​ซีวิด​ตะลอด ‍ เจอ​เบิน​แอน​มู​แก็ล​นาก็​อัอด​แจะ​ตี​กี ‍ ค็าน​จีา​ไปล​ตู​ไน​เจอ ‍ ซี​ด็าง​โลยฮ​ด็าง​มีน ‍ 
เจอ​นึง​กะแตะ​เอเดน​อะไน​เบิน​โตม​ดัอะ ‍ พา​ทะเน​ซวน ‍ ตาะ​ออ์น​ซวน​อะกี​จุม ‍ บัด​แว็ด​ซวน​อะกี​เจอ ‍ อัน​ก็​แยก​อะลอฮ​ปัน​โปน​โตม ‍  โตม​ที​นึง​ละมึฮ​ปาย ‍ ปิโซน ‍ โตม​ปิโซน​อะไน​ก็​กะตี​ปัอะ​รูอบ​ปะเทด​ฮาวิลา ‍ นึง​ปะเทด​ฮาวิลา​อะกี​ก็​เบิน​ทองคำ ‍  ทองคำ​นาก็​อัอด​ตี​กี​ปัน​ทองคำ​นาก็​ก็าก​อะเลอ ‍ เจอ​ก็​เบิน​เซียด​อะลูอง​นาก็​พวม​นืยะ ‍ เจอ​ก็​เบิน​ทัง​เพ็ดพลอย​นาก็​ปัน​ละกีา​อะเลอ ‍  โตม​ที​ซอง​ละมึฮ​ปาย ‍ กิโฮน ‍ โตม​กิโฮน​อะไน​กะตี​ปัอะ​รูอบ​ปะเทด​คูด ‍  โตม​ที​ซาม​ละมึฮ​ปาย ‍ ไทกริด ‍ โตม​ไทกริด​อะไน​กะตี​ปัอะ​ยาฮ​มะนาง​ลอฮ​คอง​ปะเทด​อัซซีเรีย ‍ เจอ​โตม​ที​ซี​ละมึฮ​ปาย ‍ ยูเพรติด ‍ 
เจอ​ฮาไน​เยโฮวา​พูซาง​เลิด​เอด​กวยกอ์น​นาก็​อัน​ซาง​อะกี ‍ อะดอะ​นึง​ซวน​เอเดน ‍ ออ์น​ปัน​พู​กรัว​พู​อะเฮะ​ซวน​อะกี ‍  อะดอะ​เจอ​เยโฮวา​พูซาง​ก็​อะตัอง​ปาย ‍ "ไปล​อะลูอง​นึง​ซวน​อะไน​ไม​จีา​ดาย​ญิ ‍  ฮัก​ไปล​อะลูอง​ตู​มู​แก็ล​อะกี ‍ ไม​ซู​จีา​เดอ! ‍ แก็ล​นาก็​ด็าง​โลยฮ​ด็าง​มีน​อะกี ‍ ค็าน​ไม​จีา​มือ​ลาะ ‍ ไม​ก็​ซี​กะเจด​มือ​กี" 
เจอ​เยโฮวา​พูซาง​เวา​ปาย ‍ "นาก็​กวยกอ์น​อะไน​ซี​อัอด​มะนาะ​ก็​ตัอ​ก็าก​มะลาะ ‍ กึ​เลิด​ซี​ออ์น​เบิน​มู​เบิน​กู​นาก็​ซี​มอะ​ซี​ละกลับ​กับ​อัน" ‍ 
เจอ​เยโฮวา​พูซาง​ก็​เอด​ซัด​เอด​จม​กู​เนว ‍ นาก็​นาว​ซาง​อะตัอะ​ตี​กะแตะ​อะกี ‍ เอด​อะปัอะ​ออ์น​กวยกอ์น​ต็าง​ละมึฮ​ออ์น ‍ กวยกอ์น​อะกี​ละมึฮ​ปาย ‍ อาดัม ‍ เจอ​อาดัม​ต็าง​ละมึฮ​ออ์น​จุม​ซัด​อะดอะ​แบบ​ลาะ ‍ อัน​ก็​เบิน​ละมึฮ​แบบ​กี​จน​เตา​จะนูอ ‍  เจอ​อาดัม​ก็​ต็าง​ละมึฮ​ออ์น​ซัด​นาก็​ไฮ​ตัก ‍ กับ​จม​นาก็​อัอด​ปัอะ​ปัอง ‍ เจอ​ทัง​ซัด​นาก็​อัอด​นึง​จะรึง​เต ‍ อาดัม​ต็าง​ละมึฮ​ออ์น​ซัด​กู​เนว ‍ ฮัก​พู​นาก็​ซี​ปัน​มู​ปัน​กู​มอะ​กับ​อาดัม​พัด ‍ นัง​ตัอ​เบิน​อัมปิน ‍ 
เจอ​ฮาไน​เยโฮวา​พูซาง​เลิด​ออ์น​อาดัม​บายะ​ละแงด ‍ บัด​อัน​บายะ​ละแงด​ก็าก​เจอ ‍ พูซาง​ก็​เอด​อะฮาง​บลาน​คอง​อัน​อะลอฮ​มะลำ ‍ เจอ​ก็​ออ์น​ซายะ​มูด​ละแต็ด​อัอด​กือ​เตียะ​แอน ‍  อะฮาง​บลาน​นาก็​เยโฮวา​พูซาง​เอด​อะลอฮ​ตี​อาดัม​อะกี ‍ นาว​ตาะ​ออ์น​ปัน​กวยกัน ‍ เจอ​ก็​มูอบ​ออ์น​อาดัม  อาดัม​เลิด​เวา​ปาย ‍ "อะไน​ออยะ ‍ นาก็​ซี​ปัน​มู​ปัน​กู​คอง​อังกอะ ‍ พอะ​อัน​ก็​ตัอะ​ตี​ซายะ​ตี​อะฮาง​คอง​อังกอะ ‍ อังกอะ​ซี​อะโร​อัน​ปาย ‍ กวยกัน ‍ พอะ​ปาย​กวยกัน​อะไน​ก็​ตัอะ​ตี​กวยกอ์น" ‍  เจอ​กะยาก​กับ​ละกวย​อะไน ‍ อะไล​อัอด​มัว​อะลืย ‍ ฮัก​ตุน​กะมาล​นังนึ
ไน​เมือ​พูซาง​ซาง​กวยกัน​อะตัอะ​ตี​กวยกอ์น​แบบ​ไน​เจอ ‍ ฮาไน​กวยกอ์น​ก็​ซี​ดิ​ตาฮ​อัมเปะ​ตาฮ​อัมปูอ ‍ ปัอะ​อัอด​มะนืย​กับ​ละกวย​แอน ‍ เจอ​บาล​นาะ​อะกี​ก็​ซี​ปัน​ซำ​กวย​มะนาะ ‍

Yoka ปะทมมะกาน 2