If you have would like a copy of this version please contact info@davaraudiobibles.org

Text: Halbi New Testament, CC-BY-SA-4.0, The Love Fellowship. Audio: Halbi New Testament Audio Biible, CC-BY-SA-4.0, Davar Partners International, The Love Fellowship, 2023

Halbi New Testament

Halbi Bible by The Love Fellowship is licensed under Creative Commons Attribution-ShareAlike 4.0 License.

मान्तर सपता चो पयले दिने बड़े बिहाने हुनमन हुन बास देतो बिती तीजमन के जोन हुनमन तिआर करू रवत, धरून भाती कबर ने ईला। हुनमन पकना के कबर थानले उलटालोर दकला, मान्तर भीतरे जाऊन भाती परबु ईशु चो लाश के नी पावला। जिदलदाय हुनमन ऐ गोठ ले भक्याते रवत तो दका, दुय झान माने बरतो फटीई पिन्दुन भाती हुनमन लगे ऐऊन उबा होला। जिदलदाय हुनमन डरला आउर धरतनी चो बाटे मुंह लुआऊन रवत तेबे हुनमन-हुनमन ले बल्ला, “तुमी जीवता के मरलो बितामन थाने केंव डगरायसास? हुन ऐथा निआय, मान्तर जीव उठलो से। सुरता करा कि हुन गलील ने रतो दाय तुमचो ले बोलुन रये, ‘जरूरी आय कि माने चो बेटा पापीमन चो हाथ ने धराया जाओ, आउर कुरूस उपरे चेगाया जाओ, आउर तीसर दिने जीव उठो।’” तेबे हुनचो गोठमन हुनमन के सुरता ईली, आउर कबर ले फिरून भाती हुनमन हुन गियारा झान के, आउर बाकी सपाय के, ऐ सपाय गोठमन बोलुन सांगला। जोन मन पठालोबितामन ले ऐ गोठमन बल्ला हुनमन मरियम मगदलीनी आउर योअना आउर याकूब चो आया मरियम आउर हुनमन चो संगे चो दुसर बायले लेकीमन बले रवत। मान्तर हुनमन चो गोठमन हुनमन के कहनी असन जान पड़ली, आउर हुनमन-हुनमन चो बिश्वास नी करला। तेबे पतरस उठून भाती कबर थाने पराते गेलो, आउर लोऊन भाती मात्र फटीई पड़लोर दकलो, आउर जोन होली हुनचो ले भक्याऊन भाती आपलो घरे गेलो।

हुनी दिने हुनमन थानले दुय झान इम्माऊस नाव चो गोटक गाँव ने जाते रवत, जोन यरूशलेम ले कोनी सात मील चो दूर थाने रये। हुनमन ऐ सपाय गोठमन थाने जोन होऊ रली, आपस ने गोठ बात करते जाते रवत, आउर जिदलदाय हुनमन आपस ने गोठ बात आउर पुच-पचार करते रवत, तेबे ईशु लगे-लगे ऐऊन भाती हुनमन संगे होऊन गेलो। मान्तर हुनमन चो आँईकमन असन ढ़ाकलोर रली कि हुनके चिताऊक नी सकोत। हुन हुनमन ले पूछलो, “ऐ काय गोठमन आय, जेके तुमी हिन्ड़ते-हिन्ड़ते आपस ने करेसास?” हुनमन मुरमुरा होऊन उबा रऊन गेला। ऐ सुनुन भाती हुनमन थानले क्लियोपास नाव चो गोटक माने बल्लो, “काय तुय यरूशलेम ने ऐकला परदेशीया आस, जोन नी जाने कि ऐ दिनमन ने हुन थाने काय-काय होली से?” हुन हुनमन ले पूछलो, “कोन बिती गोठमन?” हुनमन हुनचो ले बल्ला, “ईशु नासरी चो बारे ने जोन माहापुरू आउर सपाय लोगमन चो लगे काम आउर बचन ने सामरती अगम गिआनी रलो, आउर परधान याजकमन आउर आमचो सरदारमन हुनके धराऊन दिला कि हुनचो उपरे मरना चो हुकुम दिया जाओ; आउर हुनके कुरूस उपरे चेगाला। मान्तर आमके आशा रली कि ऐई इस्राएल के छुटकारा देयेदे। ऐ सपाय गोठमन चो अलावा ऐ घटना चो होलोर तीसर दिन आय, आउर आमचो थानले कितलो बायले लेकीमन बले आमके भकवा बनान दिला से जोन बिहाने कबर थाने जाऊ रवत; आउर जिदलदाय हुनचो मोड़ी नी भेटला तेबे ऐ बोलते ईला कि आमी सरग दूतमन चो दरशन पावलु, जोनमन बल्ला कि हुन जीव आसे। तेबे आमचो संगवारीमन थानले कोनी गोटक कबर थाने गेला, आउर जसन बायले लेकीमन बोलुन रवत असने ची भेटला; मान्तर हुनके नी दकला?” तेबे हुन हुनमन ले बल्लो, “हे निरबुद्धिमन, आउर अगम गिआनीमन चो सपाय गोठमन थाने बिश्वास करतो ने मंदमतिमन! काय जरूरी नी रली कि मसीह ऐ दुख उठाऊन भाती आपलो महिमा ने परवेश करो?” तेबे हुन मूसा ले आउर सपाय अगम गिआनीमन ले आरम करून सपाय पवितर शास्त्रमन थानले आपलो बारे ने लिकलोर गोठमन चो अरत, हुनमन के समजाऊन दिलो।
इतलो ने हुनमन हुन गाँव चो लगे अमरला जोन थाने हुनमन जाते रवत, आउर हुनचो ढंग ले असन जान पड़ली कि हुन पुरे बडूक लाय चाहाय से। मान्तर हुनमन ऐ बोलुन भाती हुनके ठेबाला, “आमचो संगे रा, कसनबल्लोने सांज होये से आउर दिन अदायं खुबे ढ़लुन गेली से।” तेबे हुन हुनमन चो संगे रतो काजे भीतरे गेलो। जिदलदाय हुन हुनमन चो संगे खाऊक लाय बसलो, तेबे हुन रोटी धरून भाती धन्यबाद करलो आउर हुनके टुटाऊन भाती हुनमन के देऊक मुरयालो। तेबे हुनमन चो आँईकमन खुलुन गेली; आउर हुनमन हुनके चिताला, आउर हुन हुनमन चो आँईकमन ले लुकुन गेलो। हुनमन आपस ने बल्ला, “जिदलदाय हुन बाट ने आमचो ले गोठयाते रलो आउर पवितर शास्त्र चो अरत आमके समजाते रलो, तेबे काय आमचो मन ने जोस नी उपजास होली?” हुन हुनी समया ने उठून भाती यरूशलेम बाटे फिरून गेला, आउर हुन गिआरा झान आउर हुनमन चो संगवारीमन के रूंड़ा पावलो। हुनमन बोलते रवत, “परबु सत-सत जीव उठलो से, आउर शिमोन के दका दिलो से।” तेबे हुनमन बाट चो गोठमन हुनमन के सांगुन दिला आउर ऐ बले कि हुनमन हुनके रोटी टुटातो समया कसन चिताला।

हुनमन ऐ गोठमन बलते ची रवत कि हुन खुद हुनमन चो मंजी ने ऐऊन उबा होलो, आउर हुनमन ले बल्लो, “तुमके शान्ति मिरो।” मान्तर हुनमन घबराऊन गेला आउर डरून गेला, आउर समजला कि आमी कोनी भूत के दकु से। हुन हुनमन ले बल्लो, “केंव घबरायसास? आउर तुमचो मन ने केंव संका उठे से? मोचो हाथ आउर मोचो पाँय के दका कि मय हुनी आंय। मोके छिंऊन भाती दका, कसनबल्लोने आत्मा चो हाड़ा मास नी होये, जसन मोचो थाने दकेसास।”
ऐ बोलुन भाती हुन हुनमन के आपलो हाथ पाँय दकालो। जिदलदाय हरिक चो मारे हुनमन के बिश्वास नी होली, आउर हुनमन अकचकित होते रवत, तेबे हुन हुनमन ले पूछलो, “काय ऐथा तुमचो लगे काई भात आसे?” हुनमन हुनके भुन्जलो बिती मछरी चो टुकड़ा दिला। हुन धरून भाती हुनमन चो पुरे खादलो। फेर हुन हुनमन ले बल्लो, “ऐ मोचो हुन गोठमन आय, जोन मय तुमचो संगे रतो दाय तुमचो ले बोलुन रले कि जरूरी आय कि जितरो गोठमन मूसा चो नियम आउर अगम गिआनीमन आउर भजनमन चो किताबमन ने मोचो बारे ने लिकलोर आसे, सपाय पुरा होओ।” तेबे हुन पवितर शास्त्र बुजतो काजे हुनमन चो समज के खोलुन दिलो, आउर हुनमन ले बल्लो, “असन लिकलोर आसे कि मसीह दुक उठाये दे, आउर तीसर दिने मरलो थानले जीव उठेदे, आउर यरूशलेम ले धरून सपाय जातिमन ने मन फिराव चो आउर पापमन चो छमा चो परचार, हुनचेई नाव ले करा जायेदे। तुमी ऐ सपाय गोठमन चो गोहई आहास। आउर दका, जेचो बायदा मोचो बुआ करलो से, मय हुनके तुमचो उपरे उतरायें दें आउर जिदलदाय ले सरग ले सामरत नी पाहास, हुदलदाय ले तुमी ऐई नंगर ने ठेबुन राहा।”

तेबे हुन हुनमन के बैतनिय्याह तक बाहरे नीलो, आउर आपलो हाथ उठाऊन भाती हुनमन के आशीष दिलो; आउर हुनमन के आशीष देते-देते हुन हुनमन ले अलगे होलो आउर सरग उपरे उठाऊन निया गेलो। तेबे हुनमन हुनके पाँय पडुन बड़े हरिक ले यरूशलेम ने फिरून गेला; आउर हुनमन सरलगा मंदिर ने हाजिर होऊन भाती माहापुरू चो स्तुति करा करते रवत।

Yoka लूका 24