Athpariya 2023 WBT (NT) Non-Dramatized

Athpariya 2023 WBT (NT) Dramatized

एक् बेला आम्‍टेप्‍मा फारिसि याप्‌मिचि हिट्‌नुङ् सादुकि याप्‌मिचि येसु वारिक्‌ङि ठेम्‍मा ओआबे, हिट्‌नुङ् माङ्‌हाङ्‌लाम्‍मा आउङ्‌साना नुङ् टोनालोग्‌लाम्‍मा ठिक् चिन्‍ना याप्‌मि निमेट्‌टाउङ् पारमान् चोगु ओलोडुए॥ टरो येसुङा हिट्‌नागा लोडुचे, “नाम् ठाना बेला खानि आपिगिटि, ‘हान्‍डेङ्उम् नाम् ओना लियुग्‍ना रैछो, पोङ्‌भोने टाङ्‌साङ् फाबालेङ् लिसेसे॥’ फेरि एका भ्‍यानिक् ‘टाङ्‌साङ् फाबालेङ् हिट्‌नुङ् डुम्‍बारिक् डुम् लिसे भोने, हाटले व्‍हेट् टायुक्‍ना रैछो’ नुङ् खानि आपिगिटि॥ खानिङा टाङ्‌साङ्‌ङि आपुयुमुङ् लेम्‍बा पाक् लियुक्‍ना नुङ् आड्‌काल चोक्‍मा आहिडुम्‍गा, टरो हाटले पाक् लिएट्‌ना ना बेलाङाना मिक्‍सेन् बारेङिम्‍बाक् खानिङा माप्‍मा आहिनिम्‍ना॥ ना टालाङिगा ओभेन्‍गा हिट्‌नुङ् आबिस्‍वासि याप्‌मिचिङा डोङ् ठोङ्‌डिना चिन्‍ना पुमा ओकोन्‍गा, टरो नागाँ योनाङाना चिन्‍ना माले आरु खोना चिन्‍ना चा हिट्‌नागाँ निमा ओटोगुन्‍ना॥” हिट्‌नुङ् येसुङा हिट्‌नागा पोक्‍टुढोचिउङ् हिट्‌निलाम्‍मा खाडे॥


जब येसु हिट्‌नुङ् ओचेलाचि ताल याहाँपारा ओटासुए, हिट्‌नुङ् चेलाचिङा चालेपा खाप्‍मा उमुन्‍डुएना रैछो नुङ् ठाहा ओटोगुए॥ येसुङा हिट्‌नागा लोडुचे, “खानि फारिसि हिट्‌नुङ् सादुकि याप्‌मिचिगा खामिरलाम्‍मा ओछेक्‍छेक् युङानि॥”
हिट्‌नुङ् “उन्‌चिलोक् चालेपा वानेट्‌निनाउङ् येसुङा हिट्‌डे लोडुचिगा” नुङ् उन्‌चि उन्‌चिङि रिङ्‌पान् चोक्‍मा ठालाँ ओचोगे॥
हिट्‌नागा चेलाचिङा उन्‌चि उन्‌चि रिङ्‌पान् ओचोगागा येसुङा ठाहा टोगुङ् हिट्‌नागा लोडुचे, “हाउ खाट्‌टिप्‍मा एरोक् बिस्‍वास आलिसिगा, खानिलोक् चालेपा वाइना नुङ् पोङ् रिङ्‌पान् आचोगिटिगा? पाक् हाट्‌ले चा खानिङा बुजा ओचोक्‌निम्‍गै? लेम्‍बोक् हाजार याप्‌मिचि लाउङ्‌सा लेम्‍बोक् चालेपाङा ख्‍वाबा चोक्‍बाचिगा रिङ् खानिङा आमुन्‍डुम्‍मे नि, खानिङा आम्‍टेप्‍मा डालो टेप् आछुम्‍सुम्‍मेना? हिट्‌नुङ् सि गोटा चालेपाङा टेम्‍बोक् हाजार याप्‌मिचि चेट्‌बालाक् रिङ्, हिट्‌नुङ् आम्‍टेप्‍मा डालो टेप् आछुम्‍सुम्‍मेना? हिट्‌ना चा आमुन्‍डुम्‍मे नि? आङा खानि चालेपाङाना बारेङि लोनानिगा माखाक् नुङ् पोङ् खानिङा बुजा आचोक्‌निम्‍ना? टरो फारिसि हिट्‌नुङ् सादुकि याप्‌मिचिगा खामिरलाम्‍मा ओछेक्‍छेक् युङानि॥” टब उन्‍ङा चालेपाङि ठेम्‍माना खामिरलाम्‍मा माखाक्, टरो फारिसि हिट्‌नुङ् सादुकि याप्‌मिचिगा हिसिक्‍मालाम्‍मा ओछेक्‍छेक् युङानि नुङ् माट्‌टुना रैछो नुङ् हिट्‌नागाँ बुजा ओचोगुए॥


येसु कैसारिया फिलिप्‌पि छेट्‌राङि टासुए॥ हिट्‌नि उन्‍ङा ओचेलाचि सिलाप्‍टुचे, “याप्‌मिचिङा याप्‌मि छा साइना नुङ् ओलोडुटुना?”
हिट्‌नागाँ ओलोडुए, “कोइङा बाप्‌टिस्‍मा कापि युहान्‍ना मालोना, कोइङा एलिया मालोना, हिट्‌नुङ् कोइङा यारमिया आथाबा माङ्‌काटाचि माड्‌डे ठिबाङ् मालोना॥”
येसुङा हिट्‌नागा सिलाप्‍टुचे, “खानिङाम्‍बाक् आङा साइना नुङ् आलोडिटिङागा टे?”
सिमोन पाटरुसङा लोडुए, “खान् उहिङ्‌ग्‍वाट् माङ्‌हाङ् छा खिरिस्‍ट ए॥”
येसुङा हिट्‌ना लोडुए, “हाउ योनाङाना उइछा सिमोन, खान् आड्‌डिक् आसिक् आटोगुना याप्‌मि, पोङ्‌भोने ना रिङ् खान्‍ङा याप्‌मिलाम्‍मा आखेम्‍सुङ् आमाट्‌टुना माखाक्, टरो ना रिङ्उम्‍बाक् टोनालोग्‌ङि युङ्‌ना आङाना पाबाङा डोक् खान् ठाहा मापिडाना॥ हिट्‌नुङ् खान् पाटरुस, खान् लिङ्‌गेॽवा ए नुङ् आङा लोनाँ, हिट्‌नुङ् आङा आङाना माङ्‌पाङ् ना लुङ्‌गेॽवाङाना ओजाग्‌ङि चोगुङ्‌टुङ्, हिट्‌नुङ् सैतानङाना ओबोल्‍ङा ना मेट्‌मा हिडुन्‍ना॥ आङा खान् टोनालोग्‌ङिना मुलुक् ओङ्‌माना साँचोचि कामुक्‌ङि पिनाँ॥ जे रिङ् खान्‍ङा नाराङि आरेक्‍टुटु हिट्‌ना रिङ् डोक् टोनालोग्‌ङि चा रेक्‌युक्, हिट्‌नुङ् जे रिङ् खान्‍ङा नाराङि आफेन्‍डुटु हिट्‌ना रिङ् डोक् टोनालोग्‌ङि चा फेन्‌युक्॥”
हिट्‌नुङ्‌ना येसुङा ओचेलाचि उन् खिरिस्‍ट ए नुङ् साक्‍चा लोनेनुम्‌चिम् पिक्‍सा आग्‍याँ पिडुचे॥


हिट्‌ना बेलालाम्‍मा येसुङा उन् खोड्‌डे पारिक् यरुसलेम खाप्‍मा कोन्‌युक्, हिट्‌नुङ् ओठेडोङ्‌चिलाम्‍मा हिट्‌नुङ् गाडुवाडाङ्‌बाचिलाम्‍मा हिट्‌नुङ् धारमाबिधि काहिसिक्‍बाचिलाम्‍मा जोम् याङ्‌छामा आङ्‌मा कोन्‌युक्, उन् ओसेडुटु, टरो सुम्‍बोक् लेम्‍बा उहिङ्‌ग्‍वाट् लियुङ् कोब्‌युक् पिक्‍सा ओचेलाचि लोमा ठालाँ चोगुचे॥
ना रिङ् खेम्‍सुङ् पाटरुसङा उन् याम्‍बालेङ् खाट्‌टुङ् खेमालाप्‍मा ठालाँ चोगुए, “टाङ्‌बा, माङ्‌हाङ्‌ङा नाट्‌डे लिमा उपिडुन्‍चा! खान्‌ङि नाड्‌डेना रिङ् खोना बेला चा उलिनेयाक्॥”
टरो येसु पाटरुसलेङ् नोक्‍टाउङ् लोडुए, “हाउ सैतान, आङालाम्‍मा या खाडा, खान्‍ङा माङ्‌हाङ् उनिङ्‌ग्‍वा गाड्‌डे चोक्‍मा आछाक्‍ङेट्‌ङा, पोङ्‌भोने खान् माङ्‌हाङ् गाड्‌डे आमिट्‌निना, टरो याप्‌मिङाना निङ्‌ग्‍वा गाड्‌डे आमिट्‌ना॥”


हिट्‌नुङ् येसुङा ओचेलाचि लोडुचे, “कोइ आचेला लिमा कोन्‌युक् भोने, हिट्‌नाङा आप्‍पे लोङ्‌सा माया चोक्‍मा नामा कोन्‌युक्, हिट्‌नुङ् उखाप्‍चे आप्‍पे खुयुङ् आएङ्‌स्‍वा ओआप्‌याक्॥ पोङ्‌भोने जुन्‍ङा आप्‍पे ओचोला जोगाँ चोक्‍मा कोलुटु हिट्‌नाङा छेम्‍बाना चोला मासुटु, टरो जुन्‍ङा आङालोङ्‌सा ओचोला मासुटु, हिट्‌नाङा हिट्‌ना छेम्‍बाना चोला टुबुटु॥ याप्‌मिङा ना नाराङिगा ख्‍वाप्‍पा थोक्‌चि टोगु चा छेम्‍बाना चोलाम्‍बाक् जाखाम् चोगुए भोने उन् लोङ्‌सा पाक् ओचेट्‌नुना लियुक्‍ना टे? याप्‌मिङा छेम्‍बाना चोला टोग्‍मा लाउङ्‌सा पाक् पिमा हिडुटुना? पोङ्‌भोने याप्‌मि छा उन्‍ङाना माङ्‌हाङ् रिङ् काउग्‍बाचिलोक् ओमाङ्‌हाङ् पाबाङाना माहिमाङि उङ्‌युक्, हिट्‌नुङ् हिट्‌ना बेला सोब्‍बे याप्‌मिचि उन्‌चिङा ओचोगुना टोॽवाङाना पारतिफल उन्‍ङा पिडुचिचि॥ छेम्‍बा डोक् आङा खानि लोनाँनि, नेहि ओयेब्‍गा याप्‌मिचि माड्‌डे आम्‍टेप्‍माङा याप्‌मि छा हाङ्‌बा लियुङ् सासान् चोगुना मिने सोम्‍मा उसिनिगा॥”

Yoka मात्‌ति 16