If you have would like a copy of this version please contact info@davaraudiobibles.org

The Gofa Bible, CC-BY-SA-4.0, The Word for the World International and The Word for the World Ethiopia. (Text). Gofa Audio Bible, CC-BY-SA-4.0, Davar Partners International, 2018. (Audio).

ጌሻ ማፃፋ

The Word for the World International and The Word for the World Ethiopia

የሱሲ ባ ታማረታ አዛሎና ኡባ ዎደ ዎሳና መላ ታማርሳናዉ ኮይድ ያግድ ሌምሶ ኦድስ፦ “እስ ካታማን ፆሳስ ያሸቶና፥ አሳስ ዬላቶና እስ ዳይን ደኤስ ሄ ካታማን እስ አምእያ ደአዉሱ። እያካ፥ ‘ታ ግዶንነ ታ ሞርክያ ግዶን ደእያ ሞቱዋ ፕርዳ’ ያጋዳ ኡባ ዎደ ሄ ዳይናኮ ስመረታዉሱ። ዳይናይ ጉ ዎደስ እ ኦዳ ስኦና እፅስ፥ ሽን ጉየፐ ባ ዎዛናን፥ ‘ታኒ ፆሳስ ያዮና፥ አሳስ ዬላቶና እፅኮካ፥ ሀ አምእያ ታና ዋይስያ ግሾ እዉ ፕርዳና፤ ያቶና እፅኮ ኡባ ዎደ ያዳ ታና ሳለና’ ” ያግድ ቆፕስ።
ጎዳይካ፥ “ጌላ ዳይናይ ግዳይሳ ስእደታ፤ ፆሳይ ቃማነ ጋላስ እያኮ ዋስያ ባ ዶርዳይሳታስ ፕርደነዬ? ኤንታና ማዳናዉ ጋምእዬ? ታ ህንተዉ ኦደይሳ ስእተ፥ ኤለስድ ፕርዳና። ግዶሽን፥ አሳ ናእ ያ ዎደ ሳአ ቦላ አማኖ ደማንደሻ?” ያግስ።

ቃስ ዛሪድ፥ የሱሲ፥ ባንታና ፅሎ አሳዳ ኦድ ጬቀተይሳታስነ ሀራታ ካይሳታስ ሀይሳዳ ያግድ ሌምሶ ኦድስ፦ “ናምኡ አሳት ዎሳናዉ ፆሳ ኬ ብዶሶና። እሶይ ፋርሳወ ሀንኮይ ቃስ ቃራፃ ቃንፅስያ አስ። ፋርሳወይ ኤቅድ ባዉ ዎስሸ፥ ‘ፆሳዉ ታኒ ሀራታ መላ ቦንቃንቾ፥ ጌላነ ላይማትያ አስ፥ አዳ ቃስ ሀ ቃራፃ ቃንፅስያ ኡራ መላ ግዶና ግሾ ነና ጋላታይስ። ሳምንታፈ ናምኡ ቶሆ ፆማይስ፥ ታ ደምያባ ኡባፈ አስራታ ከሳይስ’ ያግስ።
“ሽን ቃራፃ ቃንፅሰይስ ሃሆን ኤቅድ ሀር አቶሽን ሳሎ ቁ ግድ ፄላናዉካ ያይድ ባ ትራ እጭሸ ‘ፆሳዉ፥ ታና ናጋራንቹዋ ማራርክ’ ግድ ዎስስ። ታ ህንተዉ ኦደይሳ ስእተ፤ ፋርሳውያፐ ሀይስ ቃራፃ ቃንፅሰይስ ፆሳ ስንን ፅሎ ግድድ ባ ሶ ስምስ። አይስ ጊኮ፥ ባና ቁ ቁ ኦያ አስ ካዉያና፥ ባና ካዉሽያ አስ ቁ ቁ ጋና” ያግስ።


የሱሲ ዮጋ ናይታ ቦላ ባ ኩሽያ ዎድ አንጃና መላ አሳይ እያኮ ኤሆሶና። የሱሳ ታማረት ሄሳ በእድ “አይስ የሱሳኮ ኤሄቲ?” ያግድ ካጭዶሶና። ሽን የሱሲ ናይታ ባኮ ፄግድ፥ “ዮጋ ናይት ታኮ ያናይሳ ድጎፍተ፤ ዮ ጊተ። አይስ ጊኮ፥ ፆሳ ካዎተይ ኤንታዳ ሀንዳይሳታሳ። ታኒ ህንተዉ ቱማ ኦዳይስ፤ ፆሳ ካዎተ ዮጋ ናይታ ኤኮናይ ኦንካ ያ ገለና” ያግስ።


አይሁደ ሀላቃታፐ እሶይ፥ “ኬሀ አስታማርያዉ፥ መርና ደኦ ደማናዉ አይ ኦ?” ያግድ ኦይችስ።
የሱሲ እያኮ፥ “አይስ ታና ኬሀዉ ያጋዳ ፄጋይ? እስ ፆሳፈ አትሽን፥ ሀር ኬህ ባዋ። ላሞፋ፥ ዎፓ፥ ካይሶቶፓ፥ ዎርዶ ማርካቶፋ፥ ነ አዋነ ነ አይዉ ቦንቻ” ግያ ኪታ ኤራይ ግድ ኦይችስ።
ኡራይካ፥ “ሄሳታ ኡባ ታኒ ናአተፈ ዶማዳ ናጋሸ ጋምአስ” ያግስ።
የሱሲ ሄሳ ስእዳ ዎደ፥ “ህዛ፥ ነዉ እስባይ ፓጬስ፤ ነዉ ደእያባ ኡባ ባይዛዳ ማንቆታስ እማ፤ ሳሎን ነና ሻሎይ ናጌስ። ያታ ስማዳ፥ ታና ካላ” ያግስ። ሽን ኡራይ ሄሳ ስእዳ ዎደ እያዉ ዳሮ ሻሎይ ደእያ ግሾ ዳሮ ቂሮትስ።
የሱሲ ኡራ በእድ፥ “ዱረ አሳስ ፆሳ ካዎተ ገሎይ ዋንድ ኡንአንደሻ? ዱረይ ፆሳ ካዎተ ገላናይሳፈ ግማለይ ናርፐ ሉሆራ ካንይስ ካዉዬስ” ያግስ።
ሄሳ ስእዳ አሳይ፥ “ሄሳ ግድኮ ኦን አታኔ?” ያግዶሶና።
የሱሲ፥ “አሳስ ዳንዳኤቶናባይ ፆሳስ ዳንዳኤቴስ” ያግስ።
ጰፅሮስ፥ “ሄኮ ኑኒ ኑባ ኡባ አግድ ነና ካልዳ” ያግስ።
“የሱሲ ቱማ ታ ህንተዉ ኦዳይስ፤ ፆሳ ካዎተስ ግድ ባ ኬ ዎይኮ ባ ማችዉ ዎይኮ ባ እሻታ ዎይኮ ባ አዋነ ባ አይዉ ዎይኮ ባ ናይታ አግዳይ፤ ሀ ዎድያን ዳኮ ዳሮ፥ ያና አላመን መርና ደኦ ኤኮናይ ኦንካ ባዋ” ያግስ።


የሱሲ ታማነ ናምአታ ባኮ ፄግድ፥ “አነ የሩሳላመ ቦስ፥ ናበት አሳ ናአባ ፃፍዳባ ኡባይ ያን ፖለታና። እ አይሁደ ግዶና አሳስ አድ እመታና። ኤንቲ እያ ቶቻና፥ ጫያናነ እያ ቦላ ጩታና። እያ ጋራፍዳፐ ጉየ፥ ዎና፥ ሽን ሄን ጋላሳን እ ሀይቆፐ ደንዳና” ያግስ።
ሽን እያ ታማረት ሄ ኡባፈ እስባካ አኬክቦኮና። እያ ፁራይ ኤንታዉ ቆሰትዳ ግሾ እ ዎይግዳኮ ኤርቦኮና።


የሱሲ እያርኮ ማትያ ዎደ እስ ቆቀ ኡራይ ኦገ ጋፃን ኡትድ ዎሴስ። ቆቀ ኡራይ አሳይ ሄ በሳራ አሽን ስእድ፥ “እ አይቤ?” ግድ ኦይችስ። ኤንቲ፥ “ናዝረተ የሱሲ ሀይሳራ አስ” ያግዶሶና።
እ፥ “ዳዊታ ናአዉ፥ የሱሳ፥ ታና ማራርክ” ያግድ ዋስስ።
ስን ስን ብያ አሳት፥ “ስእ ጋ” ግድ ሀንቀትዶሶና። ሽን እ፥ “ዳዊታ ናአዉ፥ ታና ማራ” ያግድ ዳርስድ ዋስስ።
የሱሲ ኤቅድ ኡራ ባኮ ኤሀና መላ ኪትስ። ኡራይካ፥ እያኮ ሺቅን፥ “ታ ነዉ አይ ኦና መላ ኮያይ?” ያግድ ኦይችስ።
ቆቀይ፥ “ጎዳዉ ታ ፄላናዉ ኮያይስ” ያግስ።
የሱሲ፥ “ፄላ፥ ነ አማኖይ ነና ፓስ” ያግስ። ኡራይ ኤለስድ ፄል አግስ። ፆሳ ቦንችሸ የሱሳ ካልስ። አሳ ኡባይ ሄሳ በእድ ፆሰ ጋላትዶሶና።

Yoka ሉቃሳ 18