Ejagham - 1996 Edition (NT)

Ejagham New Testament © Bible Society of Nigeria and Bible Society of Cameroon, 1996.

Jisos a kpô túp egan etat se, “Otúi Obhasi ó rî noŋ ntûfâm yót nnyo a yaghê ane se á bhá erom ebháé mmon owe. Ntûfâm nnyó a bhâ yíghi ágbán abhê a tûm se á jî bhîŋ ane mba yê a yaghê erom se á bhá, ebhú é si. Kən nji á jíi á jî bhîŋ ábho, nne nnyo a wóme ebháám cháŋ. A kpô túm ágbán mba tat se á jí sə́ré ane mbá se, ebhú é si, á yui ofoŋ, á yam chénchén iyîm á ki, erom é si. Kən ane mbá kpe nne ábho nnyo a kpô fon ebhú na erom njí cháŋ. Kpe énê a chə́bhe a kérá a ri amê afoghe. Yót a yə̂p a jak yê ebhin, nnyo tat a jak ka njû ogəm eye. Etʉ̂ mba tat á yóŋe á yama a ri ḿbə́ŋé na ágbán mbá. Á fî ábho, á tə̂m etʉ̂, á yúi etʉ̂. Kən ḿbə́ŋé a bhâ yâm ntûfâm nnyó kpe-eji, a tûm ane-enok abhê á jî yúi ane mba á yúi nná ágbán abhê, á ríghi nték ábho.
“A bhâ bhîŋ ágbán abhê a tûm se, ‘Ebhú erom ejámé é si, kən ane mba n yaghê á ká bhik ebháám erom njí. Nâ choŋ obhiŋ ên mân ane, kpe á rî ka akpe obhâ, bhiŋ ên kpe énê nnyo o yéne ên se a bhá erom.’ Ágbán mbá á jak á jî kpáe ane ka mkpak ka mkpak, ane ano oo, mba bhí oo, á kô á bhak, njû ebháé a súi kpe esogha-mmî.
“Nji ane á gyée njû á sui, ntûfâm nnyó a gyê se yê a yén chénchén ane mba á bháe. A jî yên nne nnyo á ka kak éfô ebháé.
“A bhə̂p nne nnyó se, ‘Ntem, é yími nan kən we o gyê mfá, nkʉ̂ ebháé ó ka fon?’
“Nne nnyó á ka támé kpe nchot. Ntûfâm nnyó a káre ikom se ágbán abhê á fî nne nnyó á bhóp akát na abhô, á túp ka éré, a kə́t ágo ka ejírim. Tîk a kə̂t a rʉ́rá ekpatə́m ekʉ̂, a dík akek.”
Jisos a jéghe mân nchot eye na mmon egan se, “Tîk á bhîŋ ane etî-etî, kən mba á kí saŋ á bhó ti.”


Ane echəme Farasi á jak á jî kúbhi sê á bhá gáe Jisos na bibhə̂p, a gbo. Á tûm etʉ̂ ane mba á tóbha ábho na mba á tóbha Erot á jî bhə̂p Jisos sê, “Ńsé, é məŋe sê, we áfúbhí ó bhó chot, ó chorá ka echî ekpak ejûm nji Obhasi á woma mbâ ane ngun, ó bhó kep nne ka ochî. Ńgyímí nne, ó bhó koŋ. Kən sə́re êt mân ejûm nji o kére. Nâ-ngá é rî nono sê é káre ntí-echî mbâ Ntûfâm i Rom, kən é ká nop?”
Kən Jisos a mə́ŋe ńtimî mbí ábho. A sə́re ábho se, “Ane áfúbhí! Ó gaá ên kpá énê? Bhá tóŋé ên ə̂m ntí mmi ó kok ên áno o kará ka ntí-echî.” Ane mbá á jî kô fə́ne á bhak.
Nji á tóŋe yê á bhə̂p ábho se, “Efóŋé énê na mbiŋ énê a ri áno ka ntí mmí?”
Á táme sê, “Ntûfâm i Rom.”
A sə́re mân ábho se, “Karê ên mbâ Ntûfâm i Rom iyîm í Ntûfâm i Rom, o káre ên mbâ Obhasi iyîm Obhasi.”
É mân ane mbá biji kpe-eji ka ekpak nji Jisos a táme ábho ebhə̂p njí. Á mághe á jak.


Ka ofú ábhi bhə́t, etʉ̂ ane echəme Sadusi, á bhak á bhá bhə́p Jisos ebhə̂p. Ane mbá nâ á ká kam sê nne á kpo, tîk a nyə́me ka ekʉ̂. Á bhâ bhə̂p Jisos sê, “Ńsé, Mosis a chorê se nne á ko nkáé kən a kpô, abhon á ka maghé, deê mmon-i-nnyen i ndûm a kó nkáé nnyó á jí abhon mba mmon-i-nnyen owe. Kən ka ebhú éməné, abhon-í-nnyen á rî anígisá ka eték njí. Nnyo ndaŋa-mbá a bhâ kô nkáé, kən a bhâ kpô, mmon á ka jí. Enyeré ejê é bhâ kô nkáé nnyó. Yê fə́ne a bhâ kpô, mmon á ka maghé. Osúí ásá a bhâ kpô fə́ne, mmon á ká fon na nnyo nne-nkáé nnyó. Áno-áno, ta abhon-í-nnyen mbá anígisá á kpô, nne nnyo a maghê mmon cháŋ. Nne-nkáé nnyó a bhâ jéghe fə́ne okpó. Ka ofú mân mbi á sə́ra nná sê ane tîk á nyə́me ka ekʉ̂, nne-nkáé nnyó a kí joé nkáé énê, ka chénchén abhon-í-nnyen mbá á joe arûm abhê?”
Kən Jisos a táme ábho se, “Íkíkéré ifə́né cháŋ ka mbá. Nan? Nne owəné kpe yót nnyo a məŋê achot mma á séŋe ka nwet Obhasi cháŋ. Ó ka məŋé ên fə́ne ikom mfi Obhasi a fonê. Echî aŋ? Ebhú ane á nyə́me ka ekʉ̂, á kí joé noŋ baénjel ka ósô, nchot ebháé á ro kpó chot. Ka nchot nnyi nne a kpó a chəbhé njəm ka ekpin, ó ka yúk ên tîk nchot nnyi Obhasi a chorê se yê a ri Obhasi Abraham, Obhasi Isak na Obhasi Jakop. Nâ é toŋe sê Obhasi á ka joé Obhasi ekʉ̂, kən a ri Obhasi ekpin.”
Ntʉ́ghi okpígha-ejûm mbí ó kpô ane biji kpe-eji.


Ebhú ane echəme Farasi á yúghi sê Jisos a chíŋi ane echəme Sadusi mba á bháe yê ogaé, á chə̂m ekam á bhak mbâ eye. Nne yót ka ekam njí, ntóŋa-ebhín, ka mbá ogaa-ane, a bhə̂p Jisos se, “Ńsé, bhaghé ebhín nâ é fáŋe é chíŋi atem bibhín?”
Jisos a táme se, “Kot Ńtâ Obhasi owa na ḿbə́ŋé eya chénchén, na ńtʉgântʉ eya chénchén, na íkíkéré ifâ chénchén. Nâ ndaŋa-mbá ebhín nji é fáŋe é chîŋ ochíŋ. Enyeré ebhín nji é rî fə́ne noŋ nji ndaŋa-mbá é rî sê, deê ó kôt ntem-nne ka ekpak nji o korê biji ibhâ. Chénchén ebhín í Mosis, na okpígha-ejûm akará-otîp Obhasi í dʉ̂ ka bibhín mbí íbháe.”


Ane echəme Farasi á kpó chəmé, Jisos a bhə̂p ábho se, “Krayis, nne nnyo Obhasi a túmi nná se a bhá yim ngun á sém, ó kere ên sê a ri eyábhé-mmon énê?”
Á táme yê sê, “A ri eyábhé-mmon í Debhit.”
A kpô bhə́p mân ábho se, “Ájoé nne nnyó a ri mmon i Debhit, jen mân Obhasi Ebhare Ntʉgantʉ a karê Debhit íkíkéré se a bhiŋ nne nnyó se ntûfâm? Debhit a chorê ebhú áji se,
‘Ńtâ Obhasi a sə́re Ntûfâm omé se,
kumî ə̂m mfá mkpe obhô-orûm
ta n yîm ane-ebhan abhâ á jóe ka óséré obhê.’
Debhit a kí bhiŋ Krayis se Ntûfâm. Krayis a kí kpo yim nan yê a joê mmon i Debhit?”
Kpe nne ka ekam áji nnyo a fonê kpe ejûm a kí tame Jisos cháŋ. Éróghé ta ka ofú ábhi, nne nnyo a kpô gaé a bhə̂p yê ebhə̂p cháŋ.

Yoka Matiyu, echî 22