Ejagham - 1996 Edition (NT)

Ejagham New Testament © Bible Society of Nigeria and Bible Society of Cameroon, 1996.

Nji Jisos a maghê ókʉ́rí achot Obhasi a kí jen a jak, ágbán abhê á bhak sê á bhá tóŋé yê énoê egbeém nji á gbée ókʉ́rí mbí. Nji á tóŋe yê, Jisos se, “Ó yen ên iyîm mbí chénchén a? Deê ń sə́ré ên bəre kpe ntáé yə́t á bhó kət mfá ngyím. Á kí rome chénchén á tûp ka nsi.”


Nji Jisos a kun ka Egui Orif, atóbhá abhê á bhâk kəma-kəma mbâ eye. A bhə̂p yê sê, “Sə́re êt, achot mmá á kí fap bhaghé ebhú? Bhaghé eriŋ é kí toŋe ebháám ejâ na ntə̂m i ngun?”
Jisos a táme ábho se, “Kô ên ebhú, nne a kâ ríri ên. Ka nan? Ane etî-etî tîk á bhak ka mbiŋ amé sê ábho a ri Krayis, nne nnyo Obhasi a túmi se a bhá yim ngun á sém. Tîk á ríri ane etî-etî. Tîk o yûk ên agûn enok noŋ á kí gbo, o yûk ên esə́re enok nji é kə́ bha mbá-ochî. Ó yuk ên iyîm mbí, deê efup é kâ yîm ên. Iyîm mbí í fóne ka efábhám, kən é ká fap sê nâ ntə̂m a sî. Nték tîk á nôk na atem, atúi á nôk na atem atúi. Njaé tîk a bhə̂t ka ngun. Ngun tîk a kə̂t a nyiŋá onyiŋí ka ngûm ka ngûm. Iyîm mbí chénchén í rî noŋ eróghá-ndə́p ojî mbi ó kí nok nne-nkáé.
“Tîk á fî ên á káre sê á kpə́re, na sê á yúi ên. Nték i ngun chénchén tîk á bhân ên ka obhô obhámé. Etʉ̂ ên etî-etî tîk ó ro kí ḿbə́ŋé na Obhasi. Tîk o gyê ên atem eríghím, o bhaná ên atem. Ane etî-etî tîk á fâp sê ábho a ri akará-otîp Obhasi kən cháŋ. Tîk á yôp ane etî-etî. Obhí tîk ó jábhe ngûm a mân. Ka obhô mbí, ane etî-etî, okot ábho tîk ó kpô ayép. Kən kpe énê nnyo á kəp ḿbə́ŋé ta ntə̂m a sî, tîk a sêm. Tîk á sə́re otîp ogyebhá-ḿbə́ŋé otúi Obhasi ka ngun ndə́m. Ńji é kí gyimi noŋ ntî-isê ka nték i ngun chénchén. Ebhú á jeghé otîp mbí esə́rə́m, tîk ngun a mân, mân.”


Jisos se, “Ebhú ó yen ên Ekpatə́m Nchot i Mbí a bhâ gyími ka eji nji á kára agore mbâ Obhasi ka ekpak nji nkara-otîp Obhasi nnyo á kama se Daniyel a chorê, deê mbiŋá-bhíŋá a məŋé echî nchot nnyí. Ka ebhú áji, deê ane mba á rî ka ebhat í Judiya á bé á jî ebhat agúí. Ájoé o kun ka ósô njû eya, ka bhíbhi ebhú se ó bhə̂t ó jí kə́n iyîm ka etím í njû. Ájoé o ri ka ebhin, ka chə́bhe njəm ka njû se ó jí kə́n ḿfô eya. Tîk é bhîp é chîŋ na ane-akáé oya na mba á yábha abhon. Gorê ên Obhasi sê nchot nnyí a kâ fâp ebhú enae na kpe ebhú tat sê ofú oyoá-biji. Echî aŋ? Achot mma á kí fap ebhú áji á kí bhip á chîŋ. Á ká nok oyén ta ka eróghá-ndə́p í ngun ta é si égyé. Tîk achot mma á kí kpo si áma á ro fáp ka ngun. Kən Obhasi ta a yîm mfín a kpə̂k. Áno asík, kə́n kpe nne nnyo a kí sem cháŋ. Kən ka obhô ane abhê mba a sáŋe, a yîm mfín a kpək.
“Ebhú áji é si, nne a sə́re ên se, ‘Ńgyê Krayis, nne nnyo Obhasi a túmi se a bhá yim ngun á sém. Ée, yên yê ńgô.’ Ka kâm ên nchot eye. Echî aŋ? Tîk ane áfúbhí á bhak mba á kí səre sê Obhasi nâ a túmi ábho se a bhá yim ngun á sém. Tîk mba tat á bhak mba á kí səre sê ábho a ri akará-otîp Obhasi. Ntʉ́ghi ane mbá tîk á tóŋe biriŋ, á yîm ntûm okpógha-biji sê á nôk á ríri ane mba Obhasi a sáŋe, kən chichi. Kô ên mân ebhú, ka ń səre ên ekpak nji é kí joé kən ebhú áji é sí.
“Ane á səre ên sê nne nnyo Obhasi a túmi a bhá yim ngun á sém a ri ebhat etə́m njí, ka jî ên sê á jí kpúghí yê. Na kpe á səre ên sê nne nchane a jî bhə̂t ka ikóé mfí, ka kâm ên. Echî aŋ? Mmon-i-ntem-nne a kə́ bha ntə̂m yə́t noŋ nyaŋanya ka ngurobhú nnyi a kí yaŋé obhô-okáé, a gbô obhô-orûm. Ékpoê nnyam kpe é rî fan, áfo nâ nnón mmi ń dîk ákpoê onyam ń kí chəmé.”


Jisos se, “Oseŋe mbí fép ó kpo man, ka ngyím ányi, ejírim tîk é gbô ka njúí. Nnyam-ósô a rô kpó ya. Ńdʉnândʉ-ósô ń kí gbo, chénchén nkom ka ósô ń kí yoŋe bibhə̂k ábho. Eriŋ í Mmon-i-ntem-nne é kí fap mân ka ósô. Nték i ngun chénchén tîk á gbô ka ekʉ̂, tîk á yen Mmon-i-ntem-nne, noŋ a bhák ka átʉ́k í ngurobhú na ikom na ekpatə́m ejík. Ndûm eyum abhukpoŋ tîk a gbô, Mmon-i-ntem-nne tîk a tûm mân baénjel á jên á fáre chénchén nkóé ńnî mmi ngun, á chəme ane abhê mba a sáŋe, ó róghé ka ebhat echî ósô jə́t, ó sí nji tat.”


“Deê étí fîk é kpí ên aron. Ó yen ên arâp amê á wûk ájé, mma fê á róghe edʉʉ́m, məŋê ên sê enae é kpiri. Ka ekpak njí eróŋ, ó yen ên iyîm mbí fép, məŋê ên sê ebhú é kpiri ta é si njû. Deê ń sə́ré ên bəre kən ane mba á rî nná ka ekpin mfá-mfá á kpó, iyîm mbí fép í fap. Ósô na nsi tîk í chîŋ, kən ejámé nji ń chot ka nnyo, é bhó chiŋ bhúghí-bhúghí.”


“Kən kpe nne yót á ka məŋé ofú nchane na áwa mma achot mmá á kí fap. Kpe baénjel ka ósô, á ká məŋé. Kpe Mmon owe á ka məŋé, é ká chiŋi Obhasi Ńsé átíŋ. Ebháám Mmon-i-ntem-nne é kí joé noŋ achot mma á fábhe ka ebhú Nowa. Tîk é jóe noŋ ebhú ayép á móbhe ngun. Ane á rî á dik á wok, mba bibháé, á kok, ta Nowa a gbê njû ka okpi obhê a gyê ka etím. Kpe nne nnyo a kíi echî a məŋé nji é fábha cháŋ, ta ayép á móbhe ngûm, á kə̂n ábho á sê. Nâ noŋ é kí joé fə́ne ka ebhú Mmon-i-ntem-nne a kə́ bha.
“Ka ebhú áji, tîk ane ábháe á yimá etûm ka ebhin, á bhâ kô yót á jak, á mághe yót. Ane-akáé ábháe tîk á kúmi á goghá nkʉi, tîk á kô yót á jak, á mághe yót. Joê ên mân ka ibhábhé, ka ó ka məŋé ên ofú mbi Ntûfâm owəné a kə́ bha. Məŋê ên sê mfone njû á məŋé ebhú nnyágha-ejʉ̂ a kə́ bha, kə́n eyô á bhó yae, nnyágha-ejʉ̂ a kâ bhâ ogyé a jʉ́ yê iyîm ka njû. Deê fə́ne ó gyími ên ibhábhé, ka Mmon-i-ntem-nne tîk a bhák ka ebhú nji kpe echî ó ka kí ên sê tîk a bhák.”


Jisos se, “Énê mân nâ a ri nnyen i ḿgbán nnyo a fonê aron? A ri yê nnyo ńsé ábho a kî se a kép atem, a karé atem édî nji ebhú é si. Ntʉ́ghi ḿgbán nnyó a kí fon ekpatə́m ogyebhá-ḿbə́ŋé ájoé ńsé á fap kən a chə́bhe njəm a bhâ kpúghi yê a yimá etûm ejê. Deê ń sə́ré ên bəre tîk ńsé nnyó a kâk iyîm ibhê chénchén ka obhô ḿgbán nnyó. Kən ájoé sê a ri ḿgbán i mbí, a kére se ńsé owe á bhó waghe obhá. A róghe atem mbá ngá etəmə́m, a chəmá ekam na agboghá-aməm, a dík a wók na ábho. Ńsé owe a kə́ bha ka ofú mbi yê á ka kí echî, kpe ebhú a kə́ bha fə́ne, á bhó məŋé. Á bha, a kí chaghe yê ochághé á tûm yê a yên oseŋe na ane áfúbhí. Ḿgbán nnyó tîk a kə̂t ka oseŋe mbí, a rʉ́rá ekpatə́m ekʉ̂, a dík akek.”

Yoka Matiyu, echî 24