Baverset oyo Eyebani Mpenza ewuti na ᤕᤢᤜᤢᤴᤏᤠ 6

Share

ᤕᤧᤛᤢᤖᤧ ᤂᤧᤱᤜᤠ᤹ ᤔᤧᤳᤋᤢᤛᤡ. “ᤀᤡᤱᤃᤠ᤹ ᤛᤧᤰᤂᤠᤒᤠ ᤜᤡᤱᤔᤴ ᤁᤧᤒᤡᤒᤠ ᤂᤖᤧ᤺ᤱᤀᤠᤖᤥ. ᤀᤡᤱᤃᤠ᤹ᤀᤥ ᤁᤧᤍᤠᤒᤠᤴ ᤕᤠᤶᤔᤥ ᤀᤠᤵᤑᤠᤸᤗᤧᤀᤠᤱ ᤁᤢᤛᤧᤳᤔᤧᤗᤠ᤺ᤰᤏᤧᤴ. ᤜᤧᤰᤁᤩᤠᤱ ᤀᤡᤱᤃᤠ᤹ ᤕᤠᤵᤔᤡ ᤏᤛᤠᤴ ᤁᤧᤈᤥᤰᤐᤧᤴ ᤕᤠᤶᤔᤥ ᤀᤠᤵᤑᤠᤸᤗᤧᤀᤠᤱ ᤁᤢᤘᤠᤔᤧᤔᤡ᤺ᤰᤏᤧᤴᤗᤥ॥

ᤛᤣᤛᤣᤔᤠᤱᤅᤡᤸᤗᤧ ᤔᤧᤴᤏᤢᤵᤔᤏᤠᤒᤠ ᤜᤡᤱᤔᤴᤏᤡᤴ ᤀᤠᤒᤡ᤹ᤖᤥ. ᤁᤖ ᤔᤧᤴᤇᤠᤶ ᤌᤢᤶᤔᤡᤸᤗᤧ ᤌᤣᤀᤠᤱ ᤆᤥ᤺ᤰᤔᤠ ᤔᤧᤛᤢᤰᤋᤢᤴᤗᤥ॥ ᤀᤡᤱᤃᤠ᤹ ᤔᤧᤳᤏᤡᤱᤒᤠ ᤐᤠ᤺ᤴᤈᤠᤰᤜᤠ᤹ ᤕᤠᤶᤛᤠᤶ ᤏᤢ ᤜᤡᤱᤔᤴᤗᤥ॥

ᤂᤡᤏᤡ᤹ ᤆᤠᤃᤧᤛᤥ᤺ᤰᤐᤠᤀᤠᤱ ᤁᤧᤒᤣ᤺ᤰᤐᤠ ᤁᤢᤈᤠᤖᤧ ᤗᤠᤃᤡ ᤕᤠ᤺ᤶᤒᤰ ᤔᤧᤈᤥᤃᤧᤶᤔᤡᤴᤏᤧ᤹. ᤁᤖ ᤀᤡᤱᤃᤠ᤹ ᤔᤧᤴᤇᤠᤶᤛᤠ᤺ᤸᤗᤧ ᤐᤡᤏᤡᤱᤒᤠ ᤔᤧᤴᤏᤢᤵᤔᤏᤠᤒᤠ ᤜᤡᤱᤔᤴ ᤌᤠᤖᤡᤰ ᤁᤧᤎ᤺ᤵᤐᤠ ᤁᤢᤈᤠᤀᤥ ᤏᤡᤱᤘᤠ᤹ ᤐᤡᤖᤧᤶᤔᤧ᤹. ᤌᤣᤀᤠᤱᤓᤧᤸᤗᤧ ᤐᤠᤏᤢᤍᤡᤱ ᤐᤠ᤺ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤒᤠᤜᤧᤰᤁᤣ ᤆᤥ᤺ᤰᤛᤧᤀᤣ ᤀᤡᤱᤃᤠ᤹ ᤕᤢᤰ ᤐᤡᤖᤠᤱᤅᤠᤱ ᤘᤠ᤹ᤖᤥ॥

ᤌᤣᤀᤠᤱᤓᤧᤸᤗᤧ ᤁᤢᤛ᤻ᤛᤠᤴ ᤁᤧᤏᤡᤒᤠᤀᤠᤱ ᤏᤛᤠᤴ ᤁᤧᤈᤥ᤺ᤰᤐᤠ ᤁᤧᤖᤧᤰᤗᤧ ᤔᤧᤴᤏᤢᤵᤔᤏᤠᤒᤠ ᤜᤡᤱᤔᤴ ᤔᤧᤄᤥᤛᤢᤖ ᤁᤧᤗ᤹ᤒᤠ ᤐᤠᤏᤢᤍᤡᤱ ᤀᤠᤶᤒᤠᤖᤧ ᤁᤢᤏᤡᤱᤘᤠ᤹ ᤘᤠ᤹ᤖᤥ॥ ᤜᤧᤰᤁᤩᤠᤱ ᤁᤢᤏᤢᤵᤔᤠ ᤕᤧᤴᤏᤥ ᤂᤧᤱᤜᤠ᤹ ᤁᤢᤜᤡᤱᤘᤧᤳ ᤆᤥᤃᤢᤱᤛᤡᤱᤗᤥ॥”

ᤕᤧᤛᤢᤖᤧ ᤂᤧᤱᤜᤠ᤹ ᤏᤥᤃᤵ ᤐᤡᤖᤢᤛᤡ. “ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤕᤠ᤺ᤶᤒᤰᤁᤡᤱᤃ ᤂᤢᤏᤧ᤹ ᤐᤠᤱᤄᤢᤒᤠ ᤔᤏᤠᤴ ᤏᤛᤠᤴ ᤁᤧᤈᤥᤃᤢᤶᤗ ᤑᤠ᤹ᤀᤠᤱ ᤏᤡᤱᤘᤠ᤹ ᤆᤥᤃᤢ᤹ᤖᤥ॥”

ᤐᤠᤏᤢᤍᤡᤱ ᤐᤠ᤺ᤸᤗᤧ ᤐᤡᤀᤠᤒᤠᤜᤠ᤹ ᤁᤧᤖᤧᤰ ᤀᤡᤱᤃᤠ᤹ᤀᤥ ᤔᤧᤍᤠ᤹᤺. ᤜᤧᤰᤁᤩᤠᤱ ᤀᤠᤳᤋᤡᤴ ᤀᤡᤱᤃᤠ᤹ᤀᤥ ᤋᤠ ᤂᤧᤴ ᤀᤠᤵᤑᤠᤸᤗᤧᤀᤠᤱ ᤔᤧᤗᤧᤖᤢᤱᤅᤡᤴᤗᤥ॥

ᤛᤡᤔᤥᤏ ᤐᤋᤪᤢᤛᤖᤧ ᤏᤥᤃᤵ ᤐᤡᤖᤢ. “ᤀᤠᤍᤠᤱᤒᤣ. ᤜᤠ᤺ᤳᤗᤥ ᤐᤣᤃᤡᤃᤧᤒᤠᤒᤣ᥅ ᤂᤧᤏᤧ᤹ᤖᤰ ᤔᤧᤴᤏᤢᤵᤔᤏᤠᤒᤠ ᤜᤡᤱᤔᤴ ᤁᤧᤒᤡᤒᤠ ᤐᤠ᤺ᤴᤈᤠᤰᤁᤡᤴ ᤁᤧᤃᤳᤋᤢ᤹ᤖᤥ॥

ᤀᤡᤱᤃᤠ᤹ᤀᤣ ᤂᤧᤴ ᤛᤠᤱᤃᤪᤠᤶᤐᤣᤍᤠᤱᤗᤠᤶ ᤁᤧᤕᤢ᤺ᤒᤠ ᤔᤧᤴᤏᤢᤵᤔᤏᤠᤒᤠ ᤜᤡᤱᤔᤴ ᤁᤧᤒᤡᤒᤠ ᤂᤖᤧ᤺ᤱᤀᤠᤖᤥ॥ ᤜᤠ᤺ᤳᤗᤧ ᤁᤴ ᤂᤖᤧ᤺ᤱᤅᤡᤴ ᤆ᤹᤺ ᤂᤧᤱᤃ ᤛᤍᤠᤍᤡᤱ ᤜᤡᤱᤗᤥ॥ ᤁᤴ ᤂᤖᤧ᤺ᤱᤅᤡᤱᤃ ᤏᤠᤛᤡᤱᤃᤧᤴ ᤀᤠᤎᤰᤁᤡᤴᤏᤣᤖᤥ॥ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤒᤠ ᤔᤧᤴᤇᤠᤶ ᤕᤠᤵᤔᤡᤜᤠ᤹ ᤔᤧᤜᤡᤱᤗ ᤑᤠ᤹ᤀᤠᤱ ᤁᤴᤏᤡᤴ ᤐᤡᤖᤢᤱᤛᤡᤱᤗᤥ॥”

ᤌᤣᤀᤠᤱᤓᤧᤸᤗᤧ ᤀᤡᤱᤃᤠ᤹ ᤕᤠᤵᤔᤡ ᤁᤧᤒᤠᤱᤒᤠ ᤐᤠᤏᤢᤍᤡᤱ ᤐᤠ᤺ᤸᤗᤧ ᤔᤏᤠᤜᤠ᤹ ᤀᤡᤱᤃᤠ᤹ᤀᤥ ᤋᤠᤔᤠ ᤏᤡᤱᤘᤠ᤹ ᤔᤧᤒᤡᤖᤢᤴᤛᤡᤴᤗ ᤌᤠᤖᤡᤰ ᤀᤠᤳᤋᤡᤴᤏᤠᤱ ᤀᤡᤱᤃᤠ᤹ᤀᤥ ᤋᤠᤔᤠ ᤔᤧᤴᤇᤢᤰᤏᤧᤴᤗᤥ॥ ᤂᤧᤱᤜᤠ᤹ ᤔᤧᤍᤠᤏᤧ ᤑᤠ᤹ᤃᤪ ᤀᤡᤱᤃᤠ᤹ ᤁᤢᤏᤢᤵᤔᤠ ᤕᤧᤴᤏᤥ ᤁᤢᤜᤡᤱᤘᤧᤳ ᤆᤥᤃᤢᤱᤛᤡᤱᤗᤥ॥

ᤌᤣᤀᤠᤱᤓᤧᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤛᤧᤰᤂᤠᤒᤠ ᤁᤢᤄᤖᤧ᤺ᤱᤅᤡᤱᤃ ᤛᤠᤱᤃᤪᤠᤶᤐᤣᤍᤠᤱᤗᤠᤶ ᤁᤧᤕᤢᤒᤠᤀᤠᤱ ᤔᤧᤴᤇᤠᤶ ᤕᤠᤵᤔᤡᤜᤠ᤹ ᤏᤧᤳᤋᤡᤃᤧᤴ ᤜᤡᤱᤔᤴ ᤁᤧᤒᤡᤒᤠᤴᤏᤣᤖᤥ॥”

ᤀᤡᤱᤃᤠ᤹ᤀᤣ ᤛᤧᤰᤂᤠᤒᤠ ᤜᤡᤱᤔᤴ ᤁᤧᤒᤡᤒᤠ ᤂᤖᤧ᤺ᤱᤀᤠᤖᤥ॥

ᤕᤧᤛᤢᤖᤧ ᤂᤧᤴ ᤂᤖᤧ᤺ᤱᤅᤡᤴ ᤂᤵᤛᤢᤀᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤏᤥᤃᤧᤴ ᤐᤡᤖᤢ ᤜᤧᤰᤁᤩᤠᤱ ᤂᤧᤴ ᤔᤏᤠᤜᤠ᤹ ᤜᤠ᤺ᤳᤋᤢᤛᤡ॥ ᤜᤧᤰᤁᤩᤠᤱ ᤅᤠᤛᤠ᤺ᤴᤏᤠᤱ ᤒᤠ ᤜᤧᤰᤁᤣᤗ᤹ᤖᤡᤰᤁᤣ ᤂᤢᤏᤡ᤹ ᤕᤥᤕᤥ ᤜᤠ᤺ᤳᤋᤢᤛᤡᤖᤥ॥ ᤂᤧᤴ ᤁᤠᤰ ᤔᤏᤠᤜᤠ᤹ᤖᤧ ᤂᤠᤄᤠ ᤔᤧᤈᤀᤠᤱ ᤕᤧᤛᤢᤖᤧ ᤁᤢᤜᤢ᤹ᤛᤠᤶᤒᤠᤜᤠ᤹ ᤔᤧᤳᤋᤢᤛᤡ. “ᤁᤠᤰ ᤁᤢᤈᤡ ᤁᤧᤏᤶᤒᤠᤜᤠ᤹ ᤛᤢᤵᤛᤧᤶᤔᤧ᤹ᤀᤥ. ᤁᤢᤈᤡᤌᤡᤰᤁᤠᤱ ᤆᤠᤔᤧᤛᤥ᤺ᤰᤏᤧᤴᤗᤖᤥ॥”

ᤂᤧᤱᤜᤠ᤹ ᤅᤠᤛᤡ-ᤋᤢᤰᤛᤡ (᥋-᥌) ᤁᤡᤗᤥᤔᤡᤋᤖ ᤔᤧᤒᤣᤀᤠᤱ ᤔᤧᤘᤕᤧᤸᤗᤧ ᤂᤧᤱᤜᤠ᤹ᤖᤧ ᤜᤰᤆᤄᤳ ᤕᤧᤛᤢᤴ ᤆᤫᤠ᤺ᤳᤋᤥ ᤗᤠᤱᤄᤣᤃᤧᤖ ᤂᤢᤏᤡ᤹ ᤐᤣᤛᤠᤱ ᤑᤧᤖᤧᤖ ᤐᤳᤇᤧᤒᤠ ᤔᤧᤏᤡᤛᤢᤀᤠᤱ ᤂᤧᤱᤜᤠ᤹ ᤛᤠ᤹ᤖᤡᤰ ᤔᤧᤃᤡᤛᤧᤖᤥ॥ ᤁᤖ ᤕᤧᤛᤢᤖᤧ ᤂᤧᤱᤜᤠ᤹ ᤔᤧᤳᤋᤢᤛᤡ. “ᤀᤡᤱᤃᤠ᤹ ᤕᤣᤛᤢᤀᤠ. ᤔᤧᤃᤡᤛᤧᤶᤔᤡᤴᤏᤧ᤹॥”