یوحنا ۱۷
۱۷
عیسی دوعا خودشٚ‌ره
۱ بعد از اَ حرفأن عیسی آسمانَ نیگاه بوکوده و بوگفته: «پئر، وختش فأرسه. تی پسرَ جلال بدن تا تی پسرم ترَ جلال بده. ۲ چونکی تو اونَ قدرت فدَیی بر تومامی‌یٚ بشر تا همه‌یٚ کسأنی‌یَ کی تو به اون عطا بوکودی، زندگی‌یٚ اَبدی ببخشه. ۳ و اَنه زندگی‌یٚ اَبدی، کی ترَ، تنها خودایٚ حقیقی و عیسی مسیحَ کی اوسه کودی، بشنأسید. ۴ من او کاری‌یَ کی مرَ بیسپرده بی، به کمال فأرسأنم، و اَجور ترَ زیمینٚ رو جلال بدَم. ۵ پس الأن اَی پئر، تونم مرَ در حضورٚ خودت جلال بدن، همان جلالی کی قبل از دونیا، تی ورجه دأشتیم.
عیسی دوعا شاگردأنٚ‌ره
۶ «من تی نامَ به اوشأنی کی از دونیا مرَ ببخشه‌یی، آشکارَ کودم. تی‌شین بید و تو اوشأنَ مرَ ببخشه‌یی و تی کلامَ بدأشتیدی. ۷ الأن بفهمستیدی کی هر چی کی مرَ ببخشه‌یی حقیقتاً از طرفٚ تویه. ۸ چونکی او کلامی‌یَ کی مرَ بیسپردی، اوشأنَ بیسپردم و اوشأن اونَ قوبیل بوکودیدی و یقین دأنستیدی کی از طرفٚ تو بمو و ایمأن بأوردیدی کی تو مرَ اوسه کودی. ۹ می درخوأست اوشأنٚ وستی‌یه؛ من نه دونیا وستی، بلکی اوشأنی وستی تقاضا کونم کی تو مرَ ببخشه‌یی. چونکی تی‌شینیدی. ۱۰ هر اونچی کی به من تعلّق دأره، تی‌شینه و هر اونچی کی به تو تعلّق دأره، می‌شینه و در اوشأن جلال پیدا بوکودم. ۱۱ ویشتر از اَن، دونیا میأن نِیسم، امّا اوشأن هنوز در دونیا ایسَه‌ییدی. من تی ورجه اَیم. اَی پئرٚ قدّوس، تی نامَ مرَ ببخشه‌یی، اوشأنَ به قدرتٚ تی نام حفظ بوکون، تا ایتأ بیبید، هَطو کی اَمأن ایسیم. ۱۲ من اوشأنَ تا زمانی کی می اَمرأ ایسَه‌بید، حفظ بوکودم، و از اوشأن به قدرتٚ تی نام کی مرَ ببخشه‌یی، موحافظت بوکودم. هیچ‌کدام از اوشأن هلاکَ نوبوستیدی، جز اونی کی بأید به هلاکت برسه، تا پیشگویی‌یٚ کیتابٚ موقدّس ثابت ببه. ۱۳ امّا الأن تی ورجه اَیم و اَ حرفأنَ زمانی گم کی دونیا میأن ایسم تا می شادی‌یَ خوشأنٚ میأن به کمال برسأنید. ۱۴ من تی کلامَ اوشأنَ فدم، امّا دونیا از اوشأن نیفرت دأشتی، چونکی متعلقٚ به دونیا نی‌ییدی. هَطو کی من تعلّق نأرم. ۱۵ می درخوأست اَن نی‌یه کی اوشأنَ از اَ دونیا ببری، بلکی خوأیم از شَرور موحافظت بوکونی. ۱۶ اوشأن به اَ دونیا تعلّق نأریدی هَطو کی من تعلّق نأرم. ۱۷ اوشأنَ به وسیله‌یٚ تی حقیقت تقدیس بوکون؛ تی کلام، حقیقته! ۱۸ هَطو کی تو مرَ به اَ دونیا اوسه کودی، منم اوشأنَ اَ دونیا میأن اوسه کودم. ۱۹ من خودمَ اوشأنٚ وستی تقدیس کونم، تا اوشأنم حقیقتٚ اَمرأ تقدیس بیبید.
عیسی دوعا خو همه‌تأ پیروأنٚ‌ره
۲۰ «می درخوأست فقط اوشأنٚ‌ره نی‌یه، بلکی برای کسأنی‌یه کی توسطٚ اوشأنٚ پیغام به من ایمأن اَوریدی. ۲۱ تا همه ایتأ بیبید، هَطو کی تو اَی پئر در منی و من در تو، طوری بوکون کی اوشأنم در اَمأن بیبید، تا دونیا ایمأن بأوره کی تو مرَ اوسه کودی. ۲۲ و من جلالی‌یَ کی مرَ ببخشه‌یی، اوشأنَ ببخشم، تا ایتأ بیبید، هَطویی کی اَمأن ایتأییم. ۲۳ من در اوشأن و تو در من، طوری بوکون کی اوشأنم کاملاً ایتأ بیبید، تا دونیا بدأنه کی تو مرَ اوسه کودی و اوشأنَ هوطویی دوست دأشتی کی مرَ دوست دأشتی. ۲۴ اَی پئر خوأیم اوشأنی کی مرَ ببخشه‌یی، می اَمرأ بیبید، هو جایی کی من ایسم، تا می جلالَ بیدینید، جلالی کی تو مرَ ببخشه‌یی؛ چون قبل از اَنکی دونیا به وجود بأیه، مرَ دوست دأشتی.
۲۵ «اَی پئرٚ عادل، دونیا ترَ نشنأسه، امّا من ترَ شنأسم، و اوشأن دأنیدی کی تو مرَ اوسه کودی. ۲۶ من تی نامَ به اوشأن بشنأسأنم و بازم شنأسأنم، تا او محبتی کی تو مِره دأشتی، در اوشأنم بمأنه و منم در اوشأن بمأنم.»
Currently Selected:
یوحنا ۱۷: گیلکی (رشتی)
Tya elembo
Share
Copy
Olingi kobomba makomi na yo wapi otye elembo na baapareyi na yo nyonso? Kota to mpe Komisa nkombo
© 2010-2019 Gilak Media