یوحنا ۱۹
۱۹
۱ او وخت پیلاطس دستور بدَه عیسایَ شلاق بزنید ۲ و سربازأن، تاجی از خار ببافتیدی و اونٚ سر بنَه‌ییدی و لیباسی ارغوانی رنگ اونَ دوکودیدی ۳ و اونٚ ورجه اَموییدی و گفتیدی: «سلام بر تو، اَی پادشایٚ یهود» و اونَ سیلی زه‌ییدی.
۴ بعد از اون، پیلاطس ایبارٚ دیگر بیرون بمو و یهودیأنَ بوگفته: «من اونَ شیمی ورجه بیرون اَورم تا بدأنید کی هیچ دلیلی اونٚ محکوم کودنٚ‌ره پیدا نوکودم.» ۵ پس عیسی، تاجٚ خار و لیباسٚ ارغوانی اَمرأ، بیرون بمو. پیلاطس اوشأنَ بوگفته: «اَنه، او شخص!»
۶ وختی پیله کاهنأن و قراولأنٚ معبد اونَ بیده‌ییدی فریاد بزه‌ییدی و بوگفتیدی: «مصلوبَ کون! مصلوبَ کون!»
پیلاطس اوشأنَ بوگفته: «شومأن خودتأن اونَ ببرید و مصلوبَ کونید، چون من هیچ دلیلی اونٚ محکوم کودنٚ‌ره پیدا نوکودم.»
۷ یهودیأن در جوابٚ اون بوگفتیدی: «اَمأن شریعتی دأریم کی طبقٚ اون، اَ شخص بأید بیمیره، چونکی ادعا کونه خودا پسره!»
۸ وختی پیلاطس اَنَ بیشنَوسته، ویشتر بترسه. ۹ بازم به کاخ وأگردسته و از عیسی وَورسه: «تو از کویه بمویی؟» امّا عیسی اونَ جوابی ندَه. ۱۰ پس پیلاطس اونَ بوگفته: «مرَ هیچی نیگی؟ آیا نأنی کی قدرت دأرم ترَ آزادَ کونم و قدرت دأرم کی ترَ مصلوبَ کونم؟»
۱۱ عیسی بوگفته: «هیچ قدرتی بر من نأشتی، مگر اینکه از بوجور، فیگیفته‌بی ولی گنایٚ اونی کی مرَ به تو تسلیم بوکوده از تو بیشتره.»
۱۲ بعد از اون، پیلاطس سعی بوکوده کی اونَ آزادَ کونه، امّا یهودیأن فریاد زه‌ییدی و گفتیدی: «اگه اَ مردَ آزادَ کونی، قیصرٚ دوست نی‌یی! هر کی ادعایٚ پادشایی کونه، به ضدٚ قیصر حرف زنه.»
۱۳ وختی پیلاطس اَ حرفأنَ بیشنَوسته، عیسایَ بیرون بأورده و خودش بر مسندٚ داوری بینیشته، در محلی کی به «سنگٚ فرش» معروف بو و به زبانٚ عبرانیأن «جَبّاتا» گفتیدی. ۱۴ او روز، روزٚ «تهیه» عیدٚ پِسَخ بو و ظهر نزدیک بو. پیلاطس یهودیأنَ بوگفته: «اَنه شیمی پادشاه!»
۱۵ اوشأن فریاد بزه‌ییدی: «اونَ از میأن اوسَن! اونَ از میأن اوسَن. اونَ مصلوبَ کون!»
پیلاطس بوگفته: «آیا شیمی پادشایَ مصلوبَ کونم؟»
پیله کاهنأن جواب بدَه‌ییدی: «اَمأن پادشایی جز قیصر نأریم.»
۱۶ سرٚ آخر پیلاطس عیسایَ به اوشأن بیسپرده تا اونَ مصلوبَ کونید.
عیسی به صلیب کشئن
او وخت عیسایَ بیگیفتیدی و ببردیدی. ۱۷ عیسی صلیب به دوش بیرون بوشو، به سمتٚ محلی به نامٚ جمجمه کی به زبانٚ عبرانیأن جُلجُتا خوأنده به. ۱۸ اویه اونَ به صلیب بکشه‌ییدی. اونٚ اَمرأ دو نفرٚ دیگرم، اونٚ دو طرف مصلوبَ کودیدی و عیسی اوشأنٚ میأن قرار دأشتی. ۱۹ به دستورٚ پیلاطس ایتأ نیویشته اونٚ صلیبٚ جور نصب بوکودیدی، کی اونٚ رو بینیویشته بوبوسته‌بو: «عیسایٚ ناصری، پادشایٚ یهود.» ۲۰ خیلی از یهودیأن او نیویشته‌یَ بخوأندیدی، چون جایی کی عیسایَ به صلیب بکشه‌ییدی، نزدیک به شهر بو و او نیویشته به زبانٚ عبرانیأن و لاتینی و یونانی بو.
۲۱ پس پیله کاهنأنٚ یهود پیلاتُسَ بوگفتیدی: «نینیویس، ‹پادشایٚ یهود›، بلکی بینیویس اَ مرد بوگفته کی من پادشایٚ یهودم.»
۲۲ پیلاطس جواب بدَه: «اونچی بینیویشتم، بینیویشتم.»
۲۳ وختی سربازأن عیسایَ به صلیب بکشه‌ییدی، اونٚ لیباسأنَ اوسَدیدی و به چارتأ قسمت تقسیم بوکودیدی. هر کدام ایتأ تیکه اوسَدیدی. اونٚ لیباسٚ زیرَ هم فیگیفتید. امّا او لیباس درز نأشتی، بلکی یکسره از بوجور به بیجیر ببافته بوبوسته‌بو. ۲۴ پس همدیگرَ بوگفتیدی: «اَنَ تیکه تیکه نوکونیم، بلکی قرعه تأودیم و بیدینیم کی‌شین به.» اَطویی پیشگویی‌یٚ کیتابٚ موقدّس ثابتَ به کی:
«می لیباسأنَ خوشأنٚ میأن تقسیم کونیدی
و می لیباسأنٚ‌ره قرعه تأودیدی.» #۱۹:۲۴ تورات، کیتابٚ مزمور، بابٚ ۲۲ آیه ۱۸.
پس سربازأن هوطو بوکودیدی.
۲۵ عیسی صلیبٚ نزدیکی اونٚ مار و اونٚ خألأ و مریم کْلوپاسٚ زن و مریمٚ مَجْدَلیّه ایسَه‌بید. ۲۶ وختی عیسی خو مار و او شاگردی‌یَ کی دوست دأشتی و اونٚ کنار ایسَه‌بو، بیده، خو مارَ بوگفته: «بانو، اَنه، تی پسر!» ۲۷ بعد از اَن او شاگردَ بوگفته: «اَنه، تی مار!» از او ساعت، او شاگرد، عیسی مارَ خودشٚ خانه ببرده.
عیسی مردن
۲۸ او وخت عیسی دأنستی کی همه چیز به انجام برسه؛ بوگفته: «تشنه‌یم!» به اَ خاطر بوگفته تا پیشگویی‌یٚ کیتابٚ موقدّس ثابت ببه. ۲۹ در اویه ظرفی نهَه‌بو پور از شرابٚ ترشیده. پس اسفنجی‌یَ به او شراب بزه‌ییدی و بنَه‌ییدی ایتأ شاخه سر و اونٚ دهأنٚ ورجه ببردیدی. ۳۰ وختی عیسی شرابَ بیچیشته، بوگفته: «به انجام برسه.» بعد از اون، خو سرَ خمَ کوده و خو روحَ تسلیم بوکوده.
۳۱ او روز، روزٚ «تهیه» بو، و روزٚ بعد، شَبّاتٚ بزرگ. از اویه کی حاکمأنٚ یهود نخوأستیدی کی جسدأن، تا روزٚ بعد صلیبٚ رو بمأنه، از پیلاطس بخوأستیدی کی او سه نفرٚ ساقٚ پایَ بشکنید و اوشأنٚ جسدأنَ از صلیب بیجیر بأورید. ۳۲ پس سربازأن بموییدی و اوّلی نفرٚ ساقٚ پا و اویتأ ساقٚ پایَ کی عیسی اَمرأ به صلیب بکشه بید، بشکنه‌ییدی. ۳۳ امّا وختی به عیسی فأرسه‌ییدی، بیده‌ییدی کی بمرده، اونٚ ساقأنَ نشکنه‌ییدی. ۳۴ امّا ایتأ از سربازأن نیزه‌یَ اونٚ پهلویَ بزه و هو لحظه از اونٚ بدن خون و آب جاری بوبوسته. ۳۵ اونی کی اَنَ بیده شهادت دهه، تا شومأنم ایمأن بأورید. اونٚ شهادت راسته و اون دأنه کی حقیقتَ گفتن دره. ۳۶ اَشأن رخ بدَه تا پیشگویی‌یٚ کیتابٚ موقدّس ثابت ببه کی: «هیچ‌کدام از اونٚ استخوأنأن نشکفه.» #۱۹:۳۶ تورات، کیتابٚ خروج، بابٚ ۱۲، آیه ۴۶؛ کیتابٚ اعداد، بابٚ ۹، آیه ۱۲؛ کیتابٚ مزمور، بابٚ ۳۴، آیه ۲۰. ۳۷ و قسمتی دیگرم از کیتابٚ موقدّس کی گه: «اونی‌یَ کی به اون نیزه بزه‌ییدی، تماشا کونیدی.» #۱۹:۳۷ تورات، کیتابٚ زکریا، بابٚ ۱۲، آیه ۱۰.
عیسی دفنَ کودن
۳۸ او وخت یوسف، اهلٚ رامه، از پیلاطس ایجازه بخوأسته کی عیسی جسدَ فیگیره. یوسف از پیروأنٚ عیسی بو، امّا مخفیأنه. چونکی از حاکمأنٚ یهود ترسه‌یی. پیلاطس اونَ ایجازه بدَه. پس بمو و عیسی جسدَ فیگیفته. ۳۹ نیقودیموسم کی قبلاً شبأنه عیسی ورجه بوشو بو، بمو و خو اَمرأ عطری از مُر و عود کی حدودٚ سی و پنج کیلو بو، بأورده. ۴۰ پس اوشأن عیسی جسدَ فیگیفتیدی و اونَ به رسمٚ دفنٚ یهودیأن عطریاتٚ اَمرأ کفنٚ میأن بپیچَنه‌ییدی. ۴۱ نزدیکٚ او جایی کی عیسی مصلوبَ بوسته، باغی بو کی او باغٚ میأن مقبره‌یی تازه وجود دأشتی کی هنوز مُرده‌یی در اون ننَه بید. ۴۲ پس چونکی روزٚ «تهیه» یهودیأن بو و او مقبره‌یم نزدیک بو، عیسی جسدَ در اویه بنَه‌ییدی.
Currently Selected:
یوحنا ۱۹: گیلکی (رشتی)
Tya elembo
Share
Copy
Olingi kobomba makomi na yo wapi otye elembo na baapareyi na yo nyonso? Kota to mpe Komisa nkombo
© 2010-2019 Gilak Media