Mwanzo 46
46
Yankubu asamira Miswiri
1Yankubu kasafiri pamoja na vinu vyake piya vyaapatire, akuka mpaka kaya ya Beresheba, usiku akinsinja nyama akitenda kafara ya Mwenyezimungu, Mwenyezimungu wákinfulatanga wawaye Izaki. 2Noure usiku ure, Yankubu ukimwisukira nloto kulawa ka Mola wetu, akilota akitiwa: “Yankubu, Yankubu!” Iye akitika: “Labeka, omi!” 3Akimwambira javi: “Omi ndi Mwenyezimungu mwanyewe, Mwenyezimungu wa wawayo. Basi usope kuka Miswiri, ukifika eko núkutenda ukuwa na ariya wengi. 4Omi na uwe tífika pamoja Miswiri. Nakisa, uwe na wajukuluwo ka ukweli Omi-pa nukuludisani mukuja tena noyi inti-yi. Na wakati wausaka kufwa, Yusufu ákupulula kumaso!”
5Sambi Yankubu akilawa Beresheba. Iye na jamaa zake piya wakingira mmaringisho aperekériwe na nfalume wa Miswiri are. Wana wa Yankubu wantwala wawa yawo pamoja na waka wawo na wana wawo watoto-watoto, 6wakisukula ng'ombe zawo na piya vinu vyawapatire Kanaa, wakisamira Miswiri. 7Yankubu akiwasukula wanawe waka na walume pamoja na wajukuluwe, akiwajumulanisa jamaa zake piya, akuka nawo Miswiri.
8Eya ndi mazina a wajukuluwe Yankubu wokire Miswiri, yani, Yankubu na ujukulu wake:
Rubeni, mwana wakwanza wa Yankubu, 9na wana wa Rubeni wakwitiwa Hanoki, Palu, Hesironi, na Karmi. 10Wana wa Ansumani wakwitiwa Yemuweli, Yamini, Ohadi, Juankim, Sohari, na Shauri, mwana wa muka mmoja wa Kanaa. 11Wana wa Lawi, wakwitiwa Gerishoni, Kohathi, na Merari. 12Wana wa Yuda, wakwitiwa Eri, Onani, Shela, Peresi, na Zera. Pamoja na wana wawiri wa Peresi wakwitiwa Hesironi na Amuri. Falakini Eri na Onani wafwa#46:12 Ona Taureti Mwanzo sura ya 38. inti ya Kanaa. 13Wana wa Isakari, wakwitiwa Tola, Puva, Yashubu, na Shimroni. 14Wana wa Zabuloni, wakwitiwa Seredi, Eloni, na Yaleeli. 15Ewa ndi wana wa Leya, wapongore nawo Yankubu inti ya Mezopotamiya, kunsanganya pamoja na Dina mwanawe muka. Wakitimu piya wanu talatini na watatu.
16Wana wa Gadi, wakwitiwa Sefoni, Hagi, Shuni, Eshboni, Eri, Arodi, na Areli. 17Wana wa Asheri, wa kwitiwa Imna, Ishva, Ishvi, Beria, na nlumbwawo wakwitiwa Sera. Wana wa Beria, wa kwitiwa Heberi na Malkieli. 18Ewa ndi wana wa Zilpa, wapongore nawo Yankubu. Kamana Zilpa kâpewa Leya na wawaye kuntumikira. Wakitimu piya wanu kumi na sita.
19Wana wa Raheli muka wa Yankubu, wakwitiwa Yusufu na Benjami. 20Yusufu ákiwa nawo wana wawiri, wa kwitiwa Manase na Efraimu, wana wapongoriwe inti ya Miswiri. Ewa wana-wa kâpongola naye Asenati mwana wa Potifera nkulungwa wa dini inti ya kwitiwa Oni. 21Wana wa Benjami wa kwitiwa Bela, Bakari, Ashbeli, Gera, Naamani, Ehi, Roshi, Mupimu, Hupimu, na Ardhi. 22Ewa ndi wana na ujukulu wa Yankubu na Raheli. Kuwasanganya piya wákiwa wanu kumi na wane.
23Mwana wa Dani, wakwitiwa Hushimu. 24Wana wa Naftali, wakwitiwa Yaseeli, Guni, Yaseri, na Shilemu. 25Ewa ndi wana na ujukulu wa Yankubu na Bila njakazi wa Rakeli, kamana Bila kâpewa Rakeli na wawaye kuntumikira. Wakitimu piya wanu saba.
26Kuwasanganya wanu wôkire nawo Yankubu Miswiri wanawe pamoja na wajukuluwe, kuwasa wakweze, piya wákiwa wanu sitini na sita. 27Wana wa Yusufu wapongoriwe Miswiri wákiwa wawiri. Basi sambi, kuwasanganya piya jamaa za Yankubu, wakati wawajire Miswiri piya wákiwa wanu sabini.
Yankubu afika Miswiri
28Sawanamba kufika, Yankubu kantuma mwanawe Yuda oke upesi ka Yusufu akamwambire aje wasimanane na wawaye Gosheni. Newo wakifika kaya ya Gosheni. 29Yusufu ire akaamuru, ukitengeziwa nkukuta wake sana-sana, akilawa akuka Gosheni. Pafikire Gosheni, akiwonana na wawaye wakipatikana. Yusufu akisikitika akanza kurira kuno wakapatane novire sana-sana. 30Akilawa Iziraeli akimwambira Yusufu akamba: “Epa sambi anta nifwe sikinu, konta nukushuhudiya mwanangu, nukuwona, kweli kuwa hai.” 31Nakisa, Yusufu akiwambira wanduze pamoja na jamaa za wawaye, akamba javi: “Omi nikifika, nukuka nikamwambire Firyauna nfalume wa Miswiri, nimpe habari kuwa wanduzangu na jamaa za wawa wákiwa Kanaa, waja tikare onse nokuno. 32Nukuka kumwambira nfalume kuwa kazi yenu ndi kufuwa na kusunga manyama. Na epa muja nawo ng'ombe, makondoo pamoja na vinu vyenu piya. 33Nfalume akukudairini kazi yenu ya mwijiwa kukola, 34mújuzi munjibu mwambe mukwijiwa kufuwa na kusunga manyama basi, muwalanda wakulungwa wenu wafwire mida. Mukamba javyo, podi muka kwikala Gosheni, konta wanu wa Miswiri awapatana na wanu wa kusunga mifuwo.”
Currently Selected:
Mwanzo 46: wmwBI
Tya elembo
Share
Copy
Olingi kobomba makomi na yo wapi otye elembo na baapareyi na yo nyonso? Kota to mpe Komisa nkombo
© 2013, Wycliffe Bible Translators, Inc. All rights reserved.