Zãa 3
3
Yesu ń Nikodɛũo
1Falisie ku, wì mɛ Nikodɛũ, Yuda gbãadeɔ doɛ. 2À mɔ̀ Yesu kĩi gwãasĩna a òɛ̀: Mɛtulu, wá dɔ̃ kɛ́ yãdanɛde pɔ bɔ̀ Lua kĩin n ũ, asa gbɛ̃e a fɔ̃ dabudabu pɔ ni kɛɔ kɛo, sema Lua kuaanɔ baasio. 3Ɔ̃ Yesu òɛ̀: Sĩana malɛ onɛ, mɛ́ i kɛ wà gbɛ̃́ ì lɔ baasio, a fɔ̃ kpala pɔ Lua kpà eo. 4Ɔ̃ Nikodɛũ Yesu là à mɛ̀: Kpelewa wa gbɛ̃́ gbãa ii? A ɛa gɛ̃ a da nɔ̀sɛ guu, aà a i lɔ yã? 5Ɔ̃ Yesu wèwà à mɛ̀: Sĩana malɛ onɛ, mɛ́ i kɛ wà gbɛ̃́ ì ń ío ń Lua Nisĩnao baasio, a fɔ̃ gɛ̃ kpala pɔ Lua kpà guuo. 6Gbɛ̃nazĩna nɛ'iaá mɛ yãɛ, Lua Nisĩna nɛ'iaá nisĩna yãɛ. 7Nsu to yã pɔ má ònɛ bɔ n saɛo, sema wà á i lɔ. 8Gu pɔ ĩana yei, we ɔ̃ ì kakau. Ni a kɔ̃fĩ ma, nili dɔ̃ gu pɔ àlɛ bɔu ge gu pɔ àlɛ gɛ́uo. Màa ìɔ dɛ ń gbɛ̃́ pɔ Lua Nisĩna aà ìo.
9Ɔ̃ Nikodɛũ aà là à mɛ̀: Kpelewa yãpi a kɛi? 10Yesu wèwà à mɛ̀: N Isailiɔ yãdanɛde ia ɔ̃ ń bee dɔ̃oa? 11Sĩana malɛ onɛ, yã pɔ wá dɔ̃ ɔ̃ wi o. Yã pɔ wá è seeladeɔn wá ũ, ɔ̃ ili wá yãsio. 12Tó malɛ dũniayãɔ òɛ́, ili sío, tó ma luabɛ yãɔ òɛ́, á síe?
13Gbɛ̃e i gɛ́ luabɛ yãao, sema Gbɛ̃nazĩn Nɛ pɔ bɔ̀ we baasio. 14Lá Mɔizi mlɛ sɛ̀ a dɔ̀ musu gbáau,#Nao 21.9 màa wa Gbɛ̃nazĩn Nɛ sɛ́ wà dɔ musu, 15kɛ́ gbɛ̃́ pɔ lɛ́ aà naaikɛ àɔ wɛ̃ni laasai vĩ. 16Asa Lua ye dũniazi à kɛ̀ zai, ɔ̃ à a Nɛ mɛndona kpà, kɛ́ gbɛ̃́ pɔ lɛ́ aà naaikɛ a gao, wɛ̃ni laasai ɔ̃ aɔ vĩ. 17Lua i a Nɛ zĩ dũniau yãdai dũniapila no, kɛ́ à dũnia suaba aà sabai yãiɛ.
18Yã a zɔ̃lɛ aà naaikɛnawao. Yã zɔ̃̀lɛ aà naaikɛnsaiwa kɔ̀, kɛ́ i Lua Nɛ mɛndonapi naaikɛo yãi. 19Pɔ pɔ tò yã zɔ̃̀lɛ gbɛ̃́ɔwan kɛ: Gupua mɔ̀ dũniau, ɔ̃ aa ye gusiai dɛ gupuapila, kɛ́ an yãkɛaɔ vãi yãi. 20Asa vãikɛna pii za gupuauɛ, ìli mɔ́ gupua kĩio, kɛ́ aà yãkɛaɔ su bɔo yãi. 21Gbɛ̃́ pɔ ì zĩkɛ sĩanawa sɔ̃, ade mɛ́ ì mɔ gupua kĩi, kɛ́ wà e dɔ̃ kua Lua guu ɔ̃ à yãpiɔ kɛ̀.
Zãa Da'ilɛna Yesu yã'oa
22Bee gbɛa Yesu gɛ̀ Yude busuu ń a iwaɔ. À gɔɔplakɛ̀ńnɔ we, aalɛ gbɛ̃́ɔ da'ilɛkɛ. 23Zãa lɛ́ gbɛ̃́ɔ da'ilɛkɛ sɔ̃ Ainɔ, Saliũ saɛ, asa í di weɛ. Wìɔ mɔ aà kĩi, ɔ̃ ì ń da'ilɛkɛ. 24Asa wi Zãa da kpɛ́u yãao. 25Gɔɔ bee Zãa iwaeɔ nà lɛkpaakɛawa ń Yuda gbãadeeo gbãbɔa yãmusu. 26Ɔ̃ aa sɔ̃̀ Zãazi aa mɛ̀: Mɛtulu, gbɛ̃́ pɔ kunnɔ yãa Yuudɛ̃ baale, n aà yã'òwɛ̃ɛ, ɔ̃mɛ lɛ́ gbɛ̃́ɔ da'ilɛkɛ tia, gbɛ̃pii lɛ́ gɛ́ aà kĩi. 27Zãa ònɛ́: Gbɛ̃e lí fɔ̃ yãe kɛ̀o, sema Lua aà gbà zɛ́ baasio. 28Ámɛ á ma seeladeɔ ũ, kɛ́ má ò mamɛ má Mɛsi ũo. Ma mɛ̀ Lua ma zĩ mà dɔaaɛ̀ɛ.#Zãa 1.20 29Nɔsɛna mɛ́ nɔ vĩ. Nɔsɛna gbɛ̃na ìɔ zɛ aà saɛ, ì swãkpa aà yãi, nɔsɛna yã'oa ì aà pɔ kɛ na. Beewa sɔ̃ ma pɔ na kɛ̀ zai. 30Sema aapi aàɔ kãfĩ, mapi míɔ lao.
31Gbɛ̃́ pɔ bɔ̀ musu dɛ gbɛ̃piia. Gbɛ̃́ pɔ a kɛa bɔ̀ dũniauá dũnia gbɛ̃́ɛ, dũnia yã ì o. Gbɛ̃́ pɔ bɔ̀ luabɛ dɛ gbɛ̃piia, 32ìɔ dɛ pɔ pɔ a è ń yã pɔ a mào seelade ũɛ, ɔ̃ gbɛ̃e lí aà yãsio. 33Gbɛ̃́ pɔ à aà yãsì, ade Lua sĩanadekɛ sìɛ. 34Gbɛ̃́ pɔ Lua aà zĩ̀pi ì Lua yã'o, asa Lua i a Nisĩna kpawà kasoo. 35Mae Lua ye a Nɛzi, ɔ̃ à pɔpii nàɛ̀ a ɔzĩ. 36Gbɛ̃́ pɔ lɛ́ Nɛpi naaikɛ wɛ̃ni laasai vĩ. Gbɛ̃́ pɔ lɛ́ gí aà yãmai a wɛ̃nipi eo, Lua pɔ paaaaziɛ.
Currently Selected:
Zãa 3: Boo2024
Tya elembo
Kabola
Copy
Olingi kobomba makomi na yo wapi otye elembo na baapareyi na yo nyonso? Kota to mpe Komisa nkombo
Boko Bible © SIM International, 2024.