Nshuwau 1
1
Lilove lindyuka ndava mili
1Kunantandi avele Lilove, jo Lilove andípagwa namu Nnungu na Lilove aju kuva Nnungu.#1:1 Ku Maagano Akala, kwalilove lyake, Nnungu andikandyanga shilambo (lola Kutunduvanga 1:3, 6, 9; Dimu 33:6) kulyumilidya kwavanu (lola Yelemiya 1:4; Eshekieli 33:7), kuvaambola na kuukumu shilambo (lola Dimu 107:20; Ishaiya 55:11). Mulibuku ali lyandike Nshuwau, nae ankulodya vitendo na malove ake Yesu kuva vitendo na malove ake Nnungu. Mushu mo, Yesu ankwaneka kuva namumba (lola 2:1-12), ankunnodya Nnungu kwavanu (lola 14:6-7), ankwambola na ankuukumu shilambo (lola 3:36). 2Nae kunantandi apagwite namu Nnungu. 3Vinu uti vikandyangiké kwaindila yake, hashipali shikandyangíke ata shinu shimo bila nae. 4Nae ni avele ntipu washingumi na sho shingumi ashi ni lilangadyo kwavanu. 5Lilangadyo linkumulikila mushii na shii hashuulwile kutema lilangadyo.
6Napanelo andípagwa munu jumo wantumidídye Nnungu walina Nshuwau. 7Nae aidilé ndava nshuda wakuumidya ushuda lilangadyo pakulota kwaindila yake nae vanu uti vakulupile. 8Nae po havéle lilangadyo ila aidilé ndaumidya ushuda lilangadyo.
9Lilangadyo liu limmulikíla kula munu lindída mushilambo. 10Nae andípagwa mushilambo na kwaindila yake nae shilambo shindikandyangigwa kanji sho shilambo sho, shiníntikinanga. 11Andída kwave kanji vakwave havampwashaladile. 12Napane uti avalá vampwashaladíle, vo vakulupidíle lina lyake, nae andivapa aki yakutandegwa kuva vana va Nnungu. 13Vanavo, vana va Nnungu i kwaindila yaudukulu ata i kwashimunu kwali kwamalotelo antwamunu ila kwamalotelo ake jo mwene Nnungu.
14Jo Lilove jo andyúka ndava mili kutwala kunama namu wetu. Wetu tundyona lishangelo lyake, lishangelo lyakuva Mwana jumo jojo wakwalakela kwa Tatamunu, lyolyo lyumbéle umonyo na umwiu. 15Kwake nae, Nshuwau andyumya ushuda na anditangola pashanya po aashidoni, “Aju ni jojo aijá wanishimmalanganga nangu nguushidoni, ‘Ling'oto lyangu nangu ankwida munu wakungupunda nangu mwaa ata nangu nikanava kupagwa, nae andípagwa.’ ” 16Doni, mukuumbaligwa kwake, wetu uti tundipata umonyo kuleka umonyo#1:16 Kwali: umonyo pashanya umonyo. 17mwaa Lilamulo lindipatikananga kwaindila imwe Musha; umonyo na umwiu kwida kwaindila imwe Yesu Klistu. 18Nnungu, hapali munu ata jumo ángwene ila jumo wagweka, àvele Nnungu, jo áijeme pashuva sha Tatamunu ni átutadidye tummanye.
Ushuda umwe Nshuwau Wakubatisha
Mateu 3:1-12; Malukushi 1:1-8; Lukashi 3:1-18
19Napanelo au ni ushuda waumidye Nshuwau vayuda pavavatumile pa Yelusalemu vakulangalalela-shadaka pamo na valawi ndamudya doni, “Da wako unyani?” 20Nae pakalipiyapiyanga andílivalanganga ngala, “Nangu hangunava shinu Klistu.”#1:20 Lina lya Klistu mana ake Masiya yani aijá walivikile Nnungu kuntumidya kwida. Vayuda uti vashinannindila Masiya ave wakuvaambola venentete uti va ku Ishilaeli. 21Vanavo kumudya, “Pane, wako po unyani? Wako po, Liyashi?”#1:21 Nnungu andílivikila kuntumidya nkúlava Liyashi likanava kuwika Liduva limwe Umu. Lola Malakiya 4:5. Ata ikava kenga Nshuwau andíkana yakuva Liyashi kanji Yesu anímmalanganga yakuva Liyashi. Lola Mateu 11:14; 17:11-12. Nshuwau andítangola davo kwambangidya venentete havanankulupile nae kenga Mwamboli. Nae do, “Mene, nangu hangunava shinu nae.” Vanavo, “Da wako po, unkúlava watushikulindila wide mushilambo?”#1:21 Vayuda vashinannindila nkúlava wakuva kenga Musha. Lola Kumbukumbu 18:15-18. Nae kushidoni, “Mene.”
22Vanavo kutwala kumudya kavili, “Kanji napanelo wako po unyani? Livalangange ako, tuukenavo majibu kwa avalá vatutumíle.” 23Nshuwau kushidoni, “Nangu ni lidi likúgwa kushimbweshe, ‘Alowa indila yake Umu,’#1:23 Lola Ishaiya 40:3. ni sho shitangodi ashilá shimwe nkúlava Ishaiya.”
24Napanelo pakati pavanu ve vatumigwídye vandípagwa mapalishayo. 25Vanavo vakaudya kushidoni, “Ikava kenga wako haunava shinu Klistu, haunava Liyashi na ata haunava shinu aijá nkúlava, mwaa shani vanu unkuvapa ubatisho?” 26Nshuwau kushidoni, “Nangu ninkuvapa vanu ubatisho mmedi; pakati penu po napanelo apali wamukammanyite. 27Nae ni aijá áaloka panyuma pangu ákavaikidile nangu kumuulanga vilatu vyake.”#1:27 Nshuwau patangwele doni, “ákavaikidile nangu kumuulanga vilatu vyake,” ashilodya kenga Yesu ni munu wakwishimika kupunda apo kumpunda nae. 28Vinu avi vitandeke ku Betaniya mwangu unji walundi lwa Yudani palyutu lyashivapela Nshuwau vanu ubatisho.
Yesu ni Ngandolo wa Nnungu
29Palyamba lyake Nshuwau andímwona Yesu amwidila kutwala kushidoni, “Mwenu! Ngandolo wa Nnungu aijá áusha lidambi lyashilambo. 30Aju ni jojo wanishimmalanganga nguushidoni, ‘Ling'oto lyangu nangu ankwida munu wakungupunda nangu mwaa ata nangu nikanava kupagwa, nae andípagwa.’ 31Munu ajo ata nene hanishimmanya kanji shingutadídye nangu ngwide nivape vanu ubatisho mmedi ni pakulota nae amanyike kwavanaishilaeli.” 32Nshuwau akaumya ushuda aashidoni, “Nangu ndimwona Imumu ashuluka kenga ng'unda kwalakela kuwa kwida ndaikala namu nae. 33Nangu munu ajo haninammanye leka aijá ángutumile nivape vanu ubatisho mmedi akangwaulidile doni, ‘Munu waulota kumwona Imumu ashuluka kwida ndaikala namu nae, ajo ni jojo álota kuvapa vanu ubatisho mu Imumu Wanashwe.’ 34Nangu ndimwona na ninkumya ushuda, aju ni Mwana#1:34 Mumaandiko anji akala vaandiké doni, nkútandalegwa. Apa Nshuwau ankukumbuwanga malove atangwele nkúlava Ishaiya doni Nammiminila Imumu wangu nkútandalegwa wangu. Lola Ishaiya 42:1. wa Nnungu.”
Vakwoda vatandi vankummanya Yesu
35Palyamba lyake Nshuwau andípagwa kavili pamo na vakwoda vake vavili. 36Pamwonite Yesu apita andítangola doni, “Mwenu! Ngandolo wa Nnungu aju.” 37Vakwoda vavili avalá pavaigwite malove alo vandímwoda Yesu. 38Yesu akavona vakwoda vake Nshuwau avalá vamwoda nae kuvaudya, “Mulambela nyamani?” Vanavo, “Labi,” (Labi, kwakuvalangangila, Mwalimu), “da uwikidilé kwashi?” 39Nae do, “Ida mulole!” Bai vanavo vandyúka na vandyóna lyutu lyawikidíle kutwala kwikanavo mpaka kudimba liduva. Wakati wene wo uvele wakati wasakumi yalyulo. 40Pakati pavanu avo vavili vamwigwíte Nshuwau atangola na vamwodíle Yesu, jumo avele Andaleya nung'une Simoni Patulu. 41Jojo jo shitandi ankuka ndakadyania na nkulumunu Simoni, ankumwaulila doni, “Tunimpata Masiya” (Masiya, kwakuvalangangila, Klistu#1:41 Klistu ni aijá mwamboli walivikile Nnungu kuntumidya kwida.). 42Bai Andaleya akantwala Simoni kumuukanavo kumwe Yesu. Yesu akannola Simoni ndoo, akamwaulila kushidoni, “Wako lina lyako Simoni mwanagwe Nshuwau.#1:42 Nshuwau aju tatake Simoni hanava shinu Nshuwau aijá áshivapa vanu ubatisho na ata hanava shinu aijá áandike libuku ali mwaa mulibuku ali vankupagwa vanshuwau vatatu. Napane kutunduvangila ambi apa vandakushema Kepashi” (Kepashi kwakuvalangangila kunji, Patulu#1:42 Lina lya Patulu mana ake lijanga lyakulitandika. ).
43Palyamba lyake Yesu andyámuwa kuujila ku Galileya. Napanelo ankumwona Pilipo ankumwaulila doni, “Ngwoda!” 44Pilipo avele mwenentete wa pa Beteshaida likaja limwe Andaleya namu Patulu. 45Jo Pilipo jo ankunkodya Nataniyele ankumwaulila doni, “Tunimpata munu wamwandike Musha mu Lilamulo na yadavo Vakulava, Yesu wa ku Nashaleti, mwanagwe Yoshe.” 46Kutwala Nataniyele kumudya Pilipo doni, “Ku Nashaleti kunkuululika kwaloka shinu shambone?” Pilipo kushidoni, “Ida ulole.”
47Yesu kumwona Nataniyele amwidila kutwala kushidoni, “Mwenu! Aju ni mwishilaeli mmwiu ákave malambi.” 48Nataniyele kumudya, “Ungumanyidilé kwashi?” Yesu kushidoni, “Ata Pilipo akanava kukushema, wako ùvele mwina nkungu, nangu ndíkwona.” 49Nataniyele kunjang'ula, “Labi, wako Mwana wa Nnungu, kwavanaishilaeli wako ni umu.”#1:49 Nnungu andítangola kaladavo, umu walota kuvapa vanaishilaeli alota kuva mwanagwe. Lola II Samuwele 7:12-14; Dimu 2:6-7. 50Yesu akanjang'ula kushidoni, “Da kwamwaa wakukwaulila ndikugwene ùvele mwina nkungu, ni paukulupila? Bai undona vinu vikumene kupunda avi.” 51Nae kuka mushu aashidoni, “Ninkumwaulila mwiu uti doni, mundona kuwa kùshimwike na vanjelo va Nnungu vakwela na vashuluka mu Mwana Wamunu.”#1:51 Lola Kutunduvanga 28:12. Vanjelo vashindakwela na vanshulukila Yakobo. Shitendo ashi shishililodya kwigwania kupagwíte pakati pake nae namu Nnungu. Namomo patangola Nshuwau doni, “vanjelo va Nnungu vakwela na vashuluka mu Mwana Wamunu,” kunkulilodya kwigwania kupagwíte pakati pamwe Yesu namu Nnungu.
Currently Selected:
Nshuwau 1: kde
Tya elembo
Share
Copy
Olingi kobomba makomi na yo wapi otye elembo na baapareyi na yo nyonso? Kota to mpe Komisa nkombo
© 2013, Wycliffe Bible Translators, Inc. All rights reserved.