Madiu 10
10
Yesu ana tomuliya tuwelo adi egana.
Maki 3:13-19; Luke 6:12-16
1 #
Mk 6:7; Lu 9:1 Tu Yesu ana tomuliya tuwelo gikovavaga'auhidi ada abavehimeya giveledi be adifaiweya yafune hinawavidi, kadu aulolo tulina tulina hinahawatana ada to'aulolo moya'aidi hinayamumu.
2Ada afositolo tuwelo higa bonana ana towahidadana, adi egana hidede amine. Nagona Saimoni tu ana egana velugana Fita kadu taina Anidulu, Yemesa kadu taina Yoni badi Sebedi natuneyao, 3Filifi kadu Batolomiu, Tomasi kadu Madiu, bana takesi ana toyaudi amanadi, Yemesa Alifiyo natuna kadu Tadiyasi, 4Saimoni bana yo'o miLoma hivenibainedi-ma kalivana, kadu Yudasi-Isikaliyota bana Yesu nibaineyao nimadiya gihawavemogatalena amanadi.
Yesu ana tomuliya tuwelo yadi faisewa giveledi.
Maki 6:7-13; Luke 9:1-6
5Hida kalivai-dina tuwelo Yesu gi'iveninisedi be bonana hinawahidadanena, ada hidedemi givenuwa'atadi gigayo, “Keke yo'o tulidiyao yadi melala agaidiya wanana, kadu keke miSameliya yadi melala agaidiya wanana. 6#Yel 50:6; Md 15:24Au Yaubada yana sifi tonaufani miIsileli agaidiya wanana. 7Wananauna tu wanalulumamala wanagayo, Yaubada yana aituha a gilakayemu. Tova kabisona kaliva yana itave'avina againe hinamiyami be ase'asediya ginavehivehimeya. 8Au hidedemi wanagahedi kadu to'aulolo wanasiveyawadi, to'alika wanasivemidididi tovedawodawowo wanakiveyamumudi kadu yafune kaliva hiluvaiyedi-ma wanawavidi. Hida faiwala gavele-kawowomi fa'ina, kadu yami veluga wanavele-kawowodi, keke laufata wanavaini. 9Keke tamo mani, fefe o ka'i kabala wananauweni. 10#1Ko 9:14; 1Ti 5:18Keke vainuwana yamina fa'ina wananauweni, kadu keke ami aikeva ana hilafa o ka'i ami ageyafayafa o ka'i aiwala wananauweni. Ka'i tofaisewa ginafaisewa hagihagina amine o badi givelugadi-ma hida'itave'avina, anaga o ka'i yana gava'adi hidavelena.
11Tu ka'i melala lakahina o ka'i kabi'ona againe wanaluku amine, kaliva nuwana yamumuna wanalelena ada bana againe wanamiyami tu wanalowoga-havagi ana toveya. 12Ada manuweya wanaluku againe, tonimanuwa wanamadulusiuleyena. 13Ka'i tonimanuwa nuwana yamumuna be ginavetobohiyanemi digo, yami lusiule bana'e kadu yana manuwa hinagena agaidiya ginaduva-vagata. Tu ka'i keke hinavetobohiyanemi digo, yami lusiule au kadu wanavaiyewena be yadi vemwamwala keke. 14#Af 13:51, 18:6Ada ka'i tamo hakwadi keke ginavetobohiyanemi o ka'i bonami keke hinavenogaleni digo, bana kalivai-nadi o ka'i melalai-nadi wanahegedi againe fwayafwaya agemiya wanavagahegehegena, higa Yaubada yana ila'a badi agaidiya ginayemu-ma ana iya'iyaya. 15#Aba 19:24-28; Yu 1:7Boi tuwai-mo'ena miSodoma kadu miGomola dewa koyo-mo'ena hififaisewana. Tu gagahemi velemo'ena badi kalivai-dina omi yaku kaliva hinakilowemi fa'ina, adi matahiwadi miSodoma kadu miGomola adi matahiwadi ginatubuhegena aimo vedewayauga ana toveya.
Kaliva koyodiyao Yesu yana tofaisewa hinakivekoyodi.
Maki 13:9-13; Luke 21:12-17
16 #
Yo 10:12; Af 20:29 Wanogali! Galu'eta manimaninidiyao adi egana wolivi sifi hikudayauyauledi. Au vaita sifi wolivi hinafadiya amine omi kaliva koyodiyao hinafadiya ga'iveninisemi. Oloto yadi ota amine, omi kadu wananuwanuwa-hagihagi be vita keke wananuhagani. Kadu bunebune amine wanahuluhuluva-hagihagi be keke tamo hakwadi wanakivekoyoni.
17Kadu wana'itave'avimi, fa'ina aimo kaliva hinakive'avimi be kotu againe hinahegenauwemi, kadu yadi manuwa-abavehawala ana egana sinagogi agaidiya hinavekotumi be bulava againe hinalaulaumi. 18#Af 25:23Ada kabemani kadu kini agaidiya hinahegenauwemi, ada omi aku tomuliya fa'ina hinavedewayaugimi. Tu omi badi kini agaidiya kadu yo'o tulidiyao yadi tovehimeya agaidiya Iya fa'ikuya wana'awatalatalaina. 19Tu hinavekotumi ana toveya, keke wanavenuwanauna vaita ka'i gavaimi wanagahe o ka'i gava bonalaufata wanagaheyeni. Au medema tovai-nadi Yaubada gina'alavelevelemi be wanagaheyena. 20#Yo 14:26Ada hifufu wanagaheyena-ma keke taumiyao yami nuwanuwa againe ginalakayemu, au Tamami Alu'aluwana awamiya ginalukahihi.
21Au kaliva sa'eyana tauna tobohiyana kaliva nimadiya ginahawavemogatalena be hinaluve'alikana fa'ina, kadu anafaiweya kwamana tamana natuna ginahawavemogatalena be hinaluve'alikana. Ada we'owe'o badi tamadiyao hinadiyao agaidiya hinavenibaina be alika tamadiyao hinadiyao hinanuhagana fa'ina. 22#Md 24:9,13; Yo 15:18-21Ada omi aku tomuliya fa'ina kaliva moya'aidi omi agaimiya hinanuwanuwakoyo, tu gaveyao wana'atuvefa'ila-vagata, au Yaubada ginakibababalemi. 23Ka'i melala sa'eyana againe hinakivekoyomi amine, au wana'otayabuyabudi be melala velugana againe wanana. Ada gagahemi velemo'ena miIsileli melalidi moya'aina agaidiya aimo keke wananuwaliliugi-'owoni tu Iya Tohobu'ela ganayemu.
24 #
Yo 13:16
Bana tosikulu keke yana tovehawala yana nuwahuya gidatubuhegeni, kadu tofaisewa keke yana tovehimeya gidakaiwabuhegeni. 25#Md 12:24Ka'i tosikulu yana tovehawala amine ginamiyami, au medema gilubodana, kadu ka'i tofaisewa yana tovehimeya amine ginamiyami, au medema gilubodana. E, ka'i Iya yami yo'o ana tonagona hi'ihawadamaneku hivewagaku Biyelisibuli, higa yafune adi tokaiwabu, au omi yaku yo'o hina'ihawadamane-mo'emi.
Keke kaliva wanamatausedi, au Yaubada.
Luke 12:1-9
26 #
Mk 4:22
Tu keke hida kalivai-dina wanamatausedi. Gavadi gavadi adamoya sevasevauyana au medema aimo kabu'avane ginayemu, kadu kaliva yadi nuwahinage aimo kaliva moya'aidi hinahalamanena. 27Hida bonaku ami loi agaimiya vaita uyuyuya amine gadalukahihiyeni-ma aimo uyadeyadeya yo'oya wanahawavemogatalena, ada gavadi omi yaku yo'ogaga gavehawalemi-ma aimo didigeya wanalulumamalena. 28#Ye 4:12Badi wowomi hinakivekoyona be wana'alika amanadi keke wanamatausedi. Badi wowomi ka'i hinaluve'alikana tu keke adifaiweya alu'aluwami hinakivekoyoni. Bana Yaubada wowomi kadu alu'aluwami abaga koyona againe anafaiweya ginaluve'alikana fa'ina, Bana'e wanamatausena. 29Manuga mukumukudiyao luhei yabune amine fatadi wani toea, tu ka'i Tamami keke nuwanuwana hina'alika, au keke sa'eyana babiya ginabe'u-yo gina'alika. 30Tu omi'iyao ma utuutu u'umiya ana kilagalaga Tamami gihalamanena. Au keke wanamatauta fa'ina omi manuga wakaiwabuhegedi Yaubada matane. 31#Md 6:26Ka'i Yaubada manuga mukumukudiyao gi'ita'itave'avidi, au omi kaliva gina'ita'itave'avi-mo'emi, fa'ina keke wanamatauta.
32Ada hai kaliva keke ginamatauta tu yo'o matadiya ginagahe ginagayo, Iya Yesu Keliso yana kaliva, medema fa'ine Iya kadu Kamaku matane lobameya ganagahe ganagayo, Bana'e yaku kaliva. 33#Mk 8:38; 2Ti 2:12Tu hai kaliva ginamatauta be yo'o matadiya ginavekekeyeku ginagayo, Iya keke Yesu yana kaliva, medema fa'ine Iya kadu Kamaku matane lobameya ganagahe ganagayo, Bana'e keke yaku kaliva.
Yesu ana vetomuliya againe venibaina kananuhagana.
Luke 12:49-53, 14:25-27
34Keke wananuwanuwa vaita gadahobu'ela-yo niwalova babiya gadaseni. Keke niwalova ganaseni fa'ina gada'ela, keke. Au Iya gahobu'ela be venibaina ginalakayemu fa'ina. 35#Mai 7:6E, Iya fa'ikuya
kaliva tamana againe ginavenivenibaina, kadu kwamayoku hinadi agaidiya hinavenivenibaina, kadu kwamayoku lawadi buye hinave'avenivenibaina. 36Ada au kaliva nibaineyao tauna ana yo'o agaidiya hinatowamidi.
37Hai tomuliya tama o ka'i hina wai hinagona ya nuwenuweya, keke afaiweya unamuliyeku. Kadu hai kaliva natu kaliva o kwamayoku wai hinagona ya nuwenuweya, keke afaiweya unamuliyeku. 38#Md 16:24-25; Mk 8:34-35; Yo 12:25Kadu hai tomuliya keke nuwanuwa tavagikuya unanunaudadana kadu Iya fa'ikuya alika unanuhagani, keke afaiweya unamuliyeku. 39Ada hai kaliva nuwanuwa yawaini tauni unalugolegolena, au yawaini unanuhegena. Tu hai kaliva Iya fa'ikuya kaliva nimadiya yawaini unanuhegena, au yawai-vagahi unanuhagana.
Yesu laufata yamumuna fa'ina gilukahihi.
Maki 9:41; Yoni 13:20
40 #
Mk 9:37; Ga 4:14 Kadu'e, gaveyao omi yaku kaliva hinavetobohiyanemi, medema vaita Iya hinavetobohiyaneku, ada gaveyao Iya hinavetobohiyaneku, medema vaita Bana'e gi'iveniniseku-ma hinavetobohiyaneni. 41Kadu gaveyao Yaubada bonana ana to'awatalatalaina hinavetobohiyanena bana Yaubada yana kaliva fa'ina, au to'awatalatalaina ana laufata amine kadu badi adi laufata hinavaina. Kadu gaveyao kaliva yegayegana hinavetobohiyanena bana yana huluva yegayegana fa'ina, au kaliva yegayegana ana laufata amine kadu badi adi laufata hinavaina. 42#Md 25:40Ada ka'i tamo hakwadi gufa abayuyu yaku kwamana kabisona sa'eyana unavelena bana yaku kaliva fa'ina, au wona velemona a laufata unavaina.” Au hidede amine Yesu ana tomuliya gikivetuvetunudi.
Currently Selected:
Madiu 10: viv
Tya elembo
Share
Copy
Olingi kobomba makomi na yo wapi otye elembo na baapareyi na yo nyonso? Kota to mpe Komisa nkombo
© 2003, Wycliffe Bible Translators, Inc. All rights reserved.