Amatie 4

Asũtãana makɛ Azezi

(Amarkɩ 1:12-13, Aluki 4:1-13)

1Nawẽnnɛ Sɩa la daan tarɩ Azezi sẽŋɛ la weem tɩ Asũtãana makɛ ẽ. 2Azezi daan lʋ la nõorɛ dabsa pinaasɩ, wʋntɛɛŋa la yʋ'ʋŋɔ. Tɩ a kɔm dõnna. 3Tɩ Asũtãana lɛm ẽ, yetɩ: «Fʋ sãn sɩrɩ dɛna la Nawẽnnɛ Dayʋa, fʋ botɩ kuga wã lebge dia.» 4Tɩ Azezi lerge yetɩ: «La gʋlsɛ Nawẽnnɛ gõŋɔ pʋam yetɩ:

‹Nẽrsaala kãn vɔa dia mã'a ĩyã,

la de la yetɔg-sɛba wuu n yesrɩ Nawẽnnɛ nõorʋm ĩyã.› »

5Tɩ Asũtãana tarɩ Azezi sẽŋɛ Zerizalɛm, ka zom Wẽnde-kãtɛ la zuo ze'ele, 6dee yele ẽ yetɩ: «Fʋ sãn dɛna Nawẽnnɛ Dayʋa, fʋ ẽkɛ bisge tẽŋa, se'ere n soe la, la gʋlsɛ Nawẽnnɛ gõŋɔ pʋam yetɩ:

‹Nawẽnnɛ wʋn botɩ a malɛkadõma kɔkɛ fʋ la ba nu'usi,

tɩ fʋ kãn wẽ fʋ nã'arɛ la kugre.› »

7Tɩ Azezi yele ẽ yetɩ: «La ken gʋlsɛ yetɩ:

‹Da makɛ fʋ Zuudãana Nawẽnnɛ bɩsɛ.› »

8Tɩ Asũtãana le tarɩ Azezi zom tãŋa n ba wɔgɛ zuo, ka pa'alɛ ẽ dũnia so'olʋm wuu la a na'am pãŋa, 9yele ẽ yetɩ: «Fʋ sãn ka dũma tẽŋa nã'asɛ mam, mam wʋn bɔ fʋ bãna wã wuu.» 10Tɩ Azezi yele ẽ yetɩ: «Sẽŋɛ fõrgɛ, Asũtãana! La gʋlsɛ Nawẽnnɛ gõŋɔ pʋam yetɩ:

‹Nã'asra Zuudãana Nawẽnnɛ,

dee sakra ẽŋa ayɩla mã'a.› »

11Tɩ Asũtãana basɛ Azezi dee fõrgɛ. Tɩ malɛkadõma wa'am wa sõŋra ẽ.

Azezi pɔsɛ a tõoma Galile so'olʋm

(Amarkɩ 1:14-15, Aluki 4:14-15)

12Tɩ Azezi wõm tɩ ba yõkɛ Azã yʋ yʋ'a deego pʋam, tɩ a lebe Galile so'olʋm. 13La a daan basɛ Nazarɛtɩ tẽŋa, dee sẽŋɛ ka kẽ'era la Kapɛrnaʋm n lɛm Galile mõgrɛ la nõorʋm, Zabulõ la Nɛftali so'olʋm pʋam, 14tɩ Nawẽnnɛ nõtɔ'ɔsa A'ezayi n yʋʋn yele se'em na ẽŋɛ. A yʋʋn yetɩ:

15«Zabulõ la Nɛftali tẽnsɩ n tɔglɛ ko-kãtɛ bɔba, Zʋrdẽ doone ke bɔba,

Galile tẽnsɩ tɩ bu-zãŋsɩ boe a pʋam na,

16nẽr-sɛba n boe lika pʋam na yẽ peelem zozo'e.

La nẽr-sɛba n zĩ kũm mã'asʋm pʋam na,

peelem nẽegɛ mɛ bɔ ba.»

17Bɛla wẽnnɛ tɩ Azezi daan pɔsɛ mõola yetɩ: «Teege-ya yɛm basɛ tõon-be'ero, tɩ Nawẽnnɛ so'olʋm lɛm mɛ.»

Azezi wi zũn-yõgrɩba tɩ ba dɔla ẽ

(Amarkɩ 1:16-20, Aluki 5:1-11)

18Azezi daan eerɩ la Galile mõgrɛ la nõorʋm, yẽ bʋraasɩ bayi, Asimõ tɩ ba wi'iri tɩ Apɩyɛɛrɩ, la a yɩbga A'ãndre, tɩ ba lobrɩ yʋka mõgrɛ la pʋam, ba daan de la zũn-yõgrɩba. 19Tɩ Azezi yele ba yetɩ: «Dɔla-ya mam, tɩ mam wʋn basɛ tɩ ya ɛɛra nẽrba tɩ ba dɔla mam wʋ yãma n yõgrɩ zũma se'em na.» 20Tɩ ba basɛ ba yʋgsɩ la bilam mẽŋa, dee dɔla ẽ.

21Tɩ a sẽŋɛ nẽŋa le yẽ bʋraasɩ bayi n de Azebede kɔma, Azakɩ la a yɩbga Azã. Tɩ bãma, la ba sɔ Azebede bɔna õorŋɔ pʋam malgra ba yʋgsɩ. Tɩ Azezi wi ba, 22tɩ ba basɛ õorŋɔ la, la ba sɔ la tɔtɔ, dee dɔla ẽ.

Azezi zãsnɩ nẽrba, dee bɔ'ɔra ba ĩmã'asʋm

(Aluki 6:17-19)

23Azezi daan kaarɩ la Galile so'olʋm wuu zãsna nẽrba Zifdõma wẽndeto pʋam, mõola Nawẽnnɛ so'olʋm kõ-yẽlga dee botɩ bã'adõma, la kobro wuu n boe nẽrba la pʋam yẽta ĩmã'asʋm. 24Tɩ a yʋ'ʋrɛ daan yese Siiri so'olʋm wuu, tɩ ba tara bã'adõma wuu tɩ bã'asɩ buuri to'oto'ore tarɩ ba, nẽrba ĩisi n dõnnɩ tɩ ba nãmsra, la kʋlkã'arsɩ n dolɩ sɛba, la nẽrba n luti kinki'ire, la kɔɔrnɔ wa'am a zẽ'am, tɩ a botɩ ba wuu yẽ ĩmã'asʋm. 25Tɩ nẽr-kʋʋŋɔ zozo'e ze'ele Galile, la Dekapɔlɩ, la Zerizalɛm, la Zude, la tẽnsɩ n boe Zʋrdẽ doone ke bɔba doose ẽ.

Currently Selected:

Amatie 4: gurDBL

Tya elembo

Copy

Olingi kobomba makomi na yo wapi otye elembo na baapareyi na yo nyonso? Kota to mpe Komisa nkombo

Yekola Koleka na Ntina ya Farefare, Ninkaré