Amǝ Mishan 11
11
Bitǝrus bǝli amǝkpata Yesu kuni a Urǝshalima
1Amǝ'mishan andǝ aɓea amǝkwaɗi mana a nzali Yahudi ka à o ama aɓwana mana amǝ Yahudi na raka à angŋǝna cau mala Ɓakuli gbal. 2Lang Bitǝrus wario a Urǝshalima ka, amǝ Yahudi mana a paɓamuria aban Yesu ka à loarǝi nǝ cau ama, 3“Palang sǝ a waria ɓala mala aɓwana mǝnana amǝ Yahudi na raka, nyare a li girlina wunǝia!”
4Pǝlǝa Bitǝrus bǝlia wia ɓa gir mana kat pak ka, twal a tite, ama:
5Mǝ nda aɓa nggeala Jopa, lang mǝ nda ban hiwi ka, kara Ɓakuli mǝn mǝsǝam. Ən sǝn ɓe kǝgir aban sulǝo a nzali kǝla nggurbyau mǝgule mana à mǝnni, à kǝ sulǝi nǝ kuli nǝ abui mana ine ka, pǝlǝa yiu yi came abanam. 6Ən sǝn ɓālǝi pepe, kara ǝn sǝn ambalang agirkusǝu-ɓala, andǝ anyam ɓabondo, agir-nzali, andǝ anyal ɓabondo. 7Pǝlǝa ǝn ok ɓe giu banggam ama, “Bitǝrus lo, walo she!”
8Sǝ ǝn na nǝma, “Pa nǝ̀ pa anggo ɗang, Mǝtalabangŋo! Acemǝnana kǝ girlina mǝɓeami ko mana Nggurcau nyesǝi mǝpǝndǝke na ka malaká kutia kunam ɗang.”
9Pǝlǝa giu nî nyare na cau ɗǝm nǝ kuli ama, “Kǝa nyesǝ gir mǝnana Ɓakuli langŋǝni ɓoarnansari ka ama mǝpǝndǝke na ɗang.” 10Mǝnia pa anggo kusǝ tārú, sǝ a masǝlǝate ka à yì nyesǝ gir ni a kuli.
11Aɓa mǝno anggo ka, aɓwana tārú mǝnana à pur a Kaisariya, à turia abanam ngga, à yì tusǝna a ɓala mana mǝ nda kam nǝ do ka. 12Pǝlǝa Bangŋo banggam ama mǝ ngga ɓukibumam ɗang, ɓǝ̀ sǝm o sǝnǝia. Pǝlǝa amǝkwaɗi mǝnia tongno-nong-mwashat a Jopa ka à lo atam aban ká Kaisariya, sǝm kat sǝm wario a ɓala mala Karnilus. 13Pǝlǝa bangga sǝm cau mala mǝturonjar mala Ɓakuli mǝnana sǝni aban came a ɓala male, sǝ banggi wi ama, “Tasǝ ɓwa a Jopa aban ɓwa mana lullǝi ama Shiman Bitǝrus ka. 14Yì nda ɓwa mǝnana nǝ̀ banggo cau mana nǝ̀ amsǝo andǝ amǝɓala mo kat ka.”
15Lang ǝn tinata na cau ka, kara Bangŋo Mǝfele sulǝo amuria, kǝla mǝnana sulǝo amur sǝm a dǝmbe ka. 16Pǝlǝa ɓalǝam kasǝ arǝ cau mana Mǝtalabangŋo bangŋa ama, “Yohana pak batisǝma nǝ mur, sǝ ma'wun ngga à nǝ̀ pakka wun batisǝma nǝ Bangŋo Mǝfele.” 17Sǝ acemǝnana Ɓakuli pea aɓwana mana amǝ Yahudi na raka, ɓoro mǝ'mwashati andǝ mana pa sǝm, sǝm mǝnana sǝm pana ɓamur sǝm aban Mǝtalabangŋo Yesu Kǝrǝsti ka, mǝ nda yana sǝ mǝ nǝ ginǝ pě mala Ɓakuli!
18Lang à nǝ̀ o ana ka, à pànǝ kun nacau ɗǝm ɗang, kara à tita ɓwangsǝki Ɓakuli. À na ama, “Sǝm sǝnǝni ado, Ɓakuli pani aɓwana mǝnana amǝ Yahudi na raka gbal njargula mala pwanzali a mala pǝlǝ nzǝmia arǝ acauɓikea malea, ɓǝa kum yilǝmu!”
Ikǝlisiya mana a Antiyok mala amǝ Suriya ka
19Aɓea amǝkwaɗi mǝnana pàtanni mesǝkea anzǝm lú mala Itǝfanu ka, à gali à kya bwal bareban Fonishiya, andǝ Luran Sayipǝrus, andǝ nggeala Antiyok aɓa bu-nzali Suriya. À kǝ hamnǝ Cau Amsǝban, sǝ kǝ amǝ Yahudi na nǝmurǝia à hambia wia ka.#11:19 Ɓalli gbal aɓa: Aturo 8:1-4.
20Sǝa ma aɓea amǝkwaɗi mana à pur nǝ luran Sayipǝrus andǝ nggeala Sayirin ka, à kutio à wario a Antiyok, à kya tita hamnǝ Cau Amsǝban mala Mǝtalabangŋo Yesu aban aɓwana mala aɓea anzali. 21Rǝcandǝa mala Mǝtalabangŋo ka nda tea, sǝ aɓwana mala aɓea anzali pas à earnǝ Cau Amsǝban à paɓamuria aban Mǝtalabangŋo.
22Cau mala mǝnia yì gir ka yi bwal ban amǝkwaɗi a Urǝshalima, pǝlǝa à tasǝ Barnabas a Antiyok. 23Lang yiu yi bwalǝna Antiyok sǝ sǝnǝna tsǝkbu mala Ɓakuli amur aɓwana ka, bumi pwasǝo, camarǝ kwarkiria ɓǝa cam kàngkàng aɓa paɓamuru malea sǝ ɓǝa do nǝ mǝsǝcau aban Mǝtalabangŋo. 24Barnabas ka ɓwa mǝɓoarne na, lumsǝ nǝ Bangŋo Mǝfele andǝ paɓamuru. Aɓwana pas à ak Mǝtalabangŋo.
25Pǝlǝa Barnabas wario a Tarsus a sǝn ban Sawul. 26Lang kumǝni ka, twali wari nǝi a Antiyok. Yia kǝm à pak pǝlǝa mwashat aban amǝkwaɗi aban kani aɓwana pas cau mala Ɓakuli. Àkǝ̀ Antiyok sǝ à tita tunǝ amǝkwaɗi ama a Kǝrǝsta.
27Àkǝ̀ ɓalǝ anongge mǝno ka aɓea amǝ'ɓangna mala Ɓakuli pur a Urǝshalima sǝ à wario a Antiyok. 28Mwashat aɓalǝia, à tunǝki ama Agabus,#11:28 Ɓalli gbal aɓa: Aturo 21:10. lo came aɓa rǝcandǝa mala Bangŋo mala Ɓakuli bangŋa ama, nzala mǝgule na nǝ̀ yia kpa a bu ɓanza mǝno ka kat. (Anggo sǝ gir nî yi lumsǝo, nzala kpa a baku mana Kǝlaudiyus nda murǝm mǝgule ka). 29Pǝlǝa amǝkwaɗi nea rǝia ama, koyan aɓalǝia ka ɓǝ̀ pa ɓoro mana nǝ̀ gandǝi ka, ɓǝa tasǝi ace pa gbasha aban amǝ'eamrǝarǝu mana a nzali Yahudi ka. 30Anggo sǝ à pa, à tasǝ boale aban aɓwana-mǝgule mala amǝkwaɗi nǝ bu Barnabas andǝ Sawul.
Currently Selected:
Amǝ Mishan 11: mbu
Tya elembo
Kabola
Copy
Olingi kobomba makomi na yo wapi otye elembo na baapareyi na yo nyonso? Kota to mpe Komisa nkombo
© Wycliffe Bible Translators, Inc. and © The Nigeria Bible Translation Trust 2016