Logo ya YouVersion
Elilingi ya Boluki

Amǝ Mishan 14

14
Bulǝs andǝ Barnabas aɓa Ikoniya
1A nggeala Ikoniya a bu-nzali Likoniya ka Bulǝs andǝ Barnabas kutio aɓa ndakpapi mala amǝ Yahudi, kǝla mana à pakkiyi ka. À bang cau mala Ɓakuli kam nǝ rǝcandǝa, sǝ mǝnia ka tsǝa amǝ Yahudi andǝ aɓwana mǝnana amǝ Yahudi na raka pas, à paɓamuria, à pǝlǝ amǝkwaɗi. 2Sǝ amǝ Yahudi mana à paɓamuria raka, à soakita aɓwana mana amǝ Yahudi na raka, ɓǝa pǝlǝ arǝ amǝkwaɗi, ɓǝa ɓinǝ mǝsǝia.
3Sǝ Bulǝs andǝ Barnabas ka à akrǝia abanì, a sau kam, aban hamnǝ cau ɓwamuru mala Mǝtalabangŋo nǝ rǝcandǝa. Ɓakuli lumsǝ cau malea, nǝ pea wia rǝcandǝa mala pakkia agir-ndǝlǝki andǝ agir-gyambǝliban, lǝmndǝia aɓwana ama, cau male mana à banggia wia ka, mǝsǝcau na. 4Sǝ aɓwana mana a mǝnia yì nggeala ka, à gau banì ɓari: aɓea ɓwana ka à nda ta amǝ Yahudi, sǝ acilia ka à nda ta amǝ'mishan.
5Pǝlǝa aɓea aɓwana mana amǝ Yahudi na raka, andǝ aɓea amǝ Yahudi, nǝ pu'nzǝm mala aɓwana-mǝgule mala nggeala ka, à kurkunia amur amǝ'mishan, à nǝ̀ pakkia wia mǝɓane, à nǝ̀ ɓukkia nǝ atali. 6Lang ce nǝ̀ yia kpa a kir amǝ'mishan ngga, kara à ɓangŋa à o arǝ anggea-là Listǝra andǝ Dabe mala amǝ Likoniya, andǝ cili bum-ban mana kàrǝì ban mǝno ka. 7Akano ka, à lidǝmbǝa nǝ hamnǝ Cau Amsǝban.
Bulǝs andǝ Barnabas aɓa Listǝra andǝ Dabe
8A Listǝra ka, ɓeɓwa nakam gbakǝri arǝ akusǝi, anggo sǝ à ɓǝli, mwam gya àkǝ̀ pwari ɗang. 9Yì ka, do kǝ kwaki kiri arǝ cau mana Bulǝs kǝ na ka. Bulǝs sǝni kyap-kyap, kara sǝlǝ ama ɓwabure ka, ndanǝ paɓamuru mana karǝna ɓǝa twaliban rǝkwana ka, 10pǝlǝa Bulǝs loasǝ gi kpǝm, ne wi ama, “Lo cam amur akusǝo!” Anggo, sǝ ɓwa man lo yàl a kuli, pǝlǝa tita gya.
11Lang ɓwabunda sǝnǝna gir mana Bulǝs pe ka, kara à tita mak zwalo nǝ kun Likoniya malea ama, “Aɓakuli pǝlǝna aɓwapǝndǝa, ndya à sulǝo aban sǝm ngga!” 12Pǝlǝa à eare ama Barnabas ka nda mǝɓakuli mala amǝ Gǝrik mana à tunǝki ama Zǝyos ka. Sǝ Bulǝs ka à pe wi lullǝu ama Hamis, acemǝnana yì ka, nda murǝm nacau ka. 13Sǝ pǝris mala Zǝyos, mana ndàperi male na tu anzǝm la ka, yiu nǝ ajamnda andǝ anlang pwasǝobondo a kun njar kutio aɓa nggeala. Yinǝia ace mǝnana yì andǝ ɓwabunda ka, à kǝ earce ama à nǝ̀ pwan meal ajamnda mǝno ka, à nǝ̀ ɗarǝna amǝ'mishan nǝia.
14Lang ɓa ce yi kpa akir amǝ'mishan, yì Barnabas andǝ Bulǝs ka, kara à sànggi agir-nggurǝu malea, à kutia mire aɓalǝ aɓwabunda, nǝ zwalo a kunia ama:
15Wun aɓwana, palang sǝ wu kǝ pak mǝnia yì gir ka? Sǝm gbal ka sǝm ndaka ɓwapǝndǝa kǝla wun. Sǝm yina wun nǝ Cau Amsǝban mala Ɓakuli. Cau mǝnana ama ɓǝ̀ wu nying kpata amǝnia yì agir mǝɓane mǝnana à panǝ yilǝmu raka. Wu nyare aban Ɓakuli mana nǝ yilǝmu, yì ɓwa mǝnana pusǝ kuli, andǝ nzali, andǝ nggeamur andǝ agir mǝnana aɓalǝia kat ka.#14:15 Ɓalli gbal aɓa: Pur 2:11; Ang 146:6. 16A pwaryan ngga, ɗeki aɓwana a ɓanza ɓǝa pak gir mana bumia kania wia ka, 17sǝ kat andǝ amǝno ka, nying ɓamuri aɓa ɗwanyi gir mana nǝ̀ nakuni aban aɓwana ama yì ka, ndakam, andǝ lǝmndǝ pě mǝɓoarne male abania ka ɗang. Kǝ̀ pa wun mbulo andǝ agir-soro mǝɓoarne, ɓǝ̀ kunì karǝna ka. Sǝ kǝ pa wun girlina andǝ ɓabum banɓoarnado.
18Sǝ kat andǝ amǝno yì acau a Barnabas andǝ Bulǝs banggia wia ka, kwanbi ɓwabunda sǝ à nying ɗárǝia.
19Aɓea amǝ Yahudi pur nǝ Antiyok (a bu-nzali Pisidiya) andǝ Ikoniya, à yì nun ɓwabunda a bui malea. Pǝlǝa à ɓukki Bulǝs nǝ atali, à nunggi, à pusǝì, à kya turi anzǝm nggeala, à kǝ sǝni kǝla wuna. 20Lang amǝkwaɗi yi karǝì aɓalǝu ka, kara par bui lo nyare kutio aɓa nggeala. Ɓe banfana ka, yì andǝ Barnabas, à lo, à kutio a Dabe.
Amǝ'mishan nyare aban ka Antiyok mala Suriya
21Bulǝs andǝ Barnabas hamnǝ Cau Amsǝban a Dabe. À kum aɓwana kam pas mana à pǝlǝ amǝkpata Yesu ka. Pǝlǝa à nyare a Listǝra, andǝ Ikoniya, à kya kutio a Antiyok mana aɓa bu-nzali Pisidiya ka. 22À camarǝ pe amǝkwaɗi rǝcandǝa, à kǝ kwarkiria ama, ɓǝa lidǝmbǝa nǝ paɓamuru malea. À kǝ kasǝ ɓalǝia nǝ mǝnia yì cau ka ama, “Dumǝna pup sǝm nǝ̀ nu tanni ɗàngɗáng, sǝ sǝm nǝ̀ kutio a Domurǝm mala Ɓakuli.” 23Bulǝs andǝ Barnabas twal aɓwana-mǝgule mǝnana à cia amur amǝkwaɗi a koya ikǝlisiya ka. Nǝ hiwi andǝ gilmur, à tsǝk aɓwana-mǝgule mǝnia aɓata yalban mala Mǝtalabangŋo mana à guli a rǝi ka.
24Pǝlǝa a Bulǝs andǝ Barnabas nyar nǝ nzǝmia nǝ ɓa bu-nzali Pisidiya, à yì puri wi a kutio a bu-nzali Pamfiliya. 25À yì hamnǝ Cau Amsǝban a Parga, pǝlǝa à sulǝo aban ká Ataliya.
26À nying Ataliya ka, à kutia waru sǝ à samsǝa aban ká a Antiyok mala bu-nzali Suriya, aban mǝnana à tita gya malea kam ngga, àkǝ̀ ban mǝnana à cia aɓata ɓwamuru mala Mǝtalabangŋo, ɓǝa kya turo mǝno ado à kǝ nyari pe ka.
27Lang à bingŋǝna ka, pǝlǝa à rambǝa amǝkwaɗi abanɓwáná, sǝ à banggia wia agir mǝnana kat Ɓakuli pe nǝ ta buia, andǝ njar mala paɓamuru mǝnana Ɓakuli mǝnmbi aɓwana mana amǝ Yahudi na raka gbal. 28Pǝlǝa à do, bania sau kano a tarǝia andǝ amǝkwaɗi.

Currently Selected:

Amǝ Mishan 14: mbu

Tya elembo

Kabola

Copy

None

Olingi kobomba makomi na yo wapi otye elembo na baapareyi na yo nyonso? Kota to mpe Komisa nkombo