Amǝ Mishan 4
4
Bitǝrus andǝ Yohana a ɓadǝmbǝ amǝkurcau
1Bitǝrus andǝ Yohana ka, à ndaban nea aɓwana cau piu, sǝ apǝris andǝ ɓwamǝgule mala amǝyal Ndàmǝgule mala Ɓakuli andǝ amǝ Saduki pǝlǝa à yì tusǝo. 2Yia ka bumia lul kǝrkǝr, acemǝnana Bitǝrus andǝ Yohana na ban kani aɓwana gir ama, nǝ ban Yesu sǝ aɓwana nǝ̀ kum lo a ɓembe. 3Pǝlǝa à bwal Bitǝrus andǝ Yohana à oasǝia a ndakurban, ɓǝa nongŋo she ɓǝ̀ ban fana ka, acemǝnana pwari kpana. 4Kat andǝ amani ka, aɓwana pas mǝnana à ok cau mala Ɓakuli ka à paɓamuria, sǝ mǝnia ka yi tsǝk lakki mala aburana mǝnana à paɓamuria ka, yi bwal á-tongno (5,000).
5Ban fana ka, amǝtala la, andǝ aɓwana-mǝgule mala amǝ Yahudi, andǝ amalǝm Nggurcau mala Musa, à yì kpapi a Urǝshalima. 6Annas Pǝris Mǝgule ka ndakam, andǝ Kayafas, andǝ Yohana, andǝ Alizanda, andǝ aɓea aɓwana amǝtau mala Pǝris Mǝgule. 7Pǝlǝa à yinǝ alaggana mala Yesu mǝnia yia ɓari ka, à came a ɓadǝmbǝia, sǝ à ɗia ama, “Nǝ ya rǝcandǝa, sǝ aɓa lullǝ yana sǝ wu pak mǝnia yì gir ka?”
8Sǝ Bitǝrus ka, lumsǝ nǝ Bangŋo Mǝfele, pǝlǝa nea wia ama:
Wun amǝtala la andǝ aɓwana-mǝgule ma'sǝm! 9Ado ka, wu ndaban ɗi sǝm ace turo mǝɓoarne mǝnana à pakki gbakǝre man ngga le? Wu kǝ earce wu nǝ̀ surǝ njar mǝnana pǝlǝ kam sǝ kum rǝcandǝa ka le? 10Came ɓǝ̀ ǝn bangga wun bwāng, wun, wunǝa amǝ Isǝrayila kat ama, nda aɓa lullǝ Yesu Kǝrǝsti ɓwa Nazarat, yì ɓwa mǝnana wu gballì amur nggun-gangndi, sǝ Ɓakuli loasǝi a ɓembe ka, sǝ mǝnia yì ɓwa ka kum rǝcandǝa.
11Yesu ka nda ɓwa mǝnana Malǝmce na cau amuri, ama,
“Tali mǝnana wun amǝɓa
wu nyesǝi ɓà ka,
nda yi duk kǝ tali
mǝnana kuti aɓea kat
nǝ ɓoaro ka.”#4:11 Ɓalli gbal aɓa: Ang 118:22.
12Amsǝban ngga à kǝ kumi aban Yesu nǝmurǝì, Ɓakuli pa ma ɓe kǝ lullǝu aɓa ɓanza, mǝnana nǝ yì sǝ aɓwana nǝ̀ kum amsǝban ngga ɗang.
13Sǝ aɓwana-mǝgule man kat ka, à pak ndalǝki nǝ mǝsǝkang-kangŋa mala Bitǝrus andǝ Yohana, acemǝnana à sǝnia ka aɓwana na anggo, à kum ɓe kǝ kanigir aɓa Malǝmce ɗang. Pǝlǝa gir nî yi kpakia wia ama Bitǝrus andǝ Yohana ka ado a tarǝia andǝ Yesu. 14Sǝ aɓwana-mǝgule man ngga à pànǝ cau mǝnana ɗǝm à nǝ̀ na ka ɗang, acemǝnana à sǝn ɓwa mǝnana à twali wi ban rǝkwana ka, aban came aban Bitǝrus, andǝ Yohana abanì.
15Pǝlǝa à nea wia ama, ɓǝa nying ndakpapi ɓǝa pur a nza, sǝ yia ka à lidǝmbǝa nǝ na cau a rǝarǝia. 16Sǝ à ɗi rǝarǝia ama, “Lang sǝ sǝm nǝ̀ pang nǝ aman yia aɓwana ka? Acemǝnana koyan a Urǝshalima ka sǝlǝna ama à nda à pak mǝnia yì gir'ndǝlǝki ka, sǝ pa sǝm nǝ̀ tǝmce ɗang. 17Sǝ ace mǝnana sǝm nǝ̀ tamsǝ mǝnia yì cau ɓǝ̀ kǝa lidǝmbǝa nǝ mesǝe aɓalǝ aɓwana ɗǝm raka, ɓǝ̀ sǝm nunkiria, ɓǝa kǝa na ama à nǝ̀ nyare à nǝ̀ ne kǝɓwa cau ɗǝm aɓa lullǝ Yesu ɗang.”
18Pǝlǝa à tunǝia, sǝ à nea wia ama, ɓǝa kǝa na ama à nǝ̀ nyare à nǝ̀ na cau, ko à nǝ̀ kanigir nǝ lullǝ Yesu ɗǝm ɗang. 19Sǝ Bitǝrus andǝ Yohana nea wia ama, “Nggearǝ wun nǝ ɓamur rǝ wun ngga, wu gau mǝnia yì ɓashi ka a ɓadǝm Ɓakuli, amur mana ɓoaro ɓǝa pa; ɓǝa oka wun le, ko ɓǝa oki Ɓakuli? 20Acemǝnana pa sǝm nǝ̀ tamsǝ nacau amur gir mǝnana sǝm sǝni, sǝ sǝm ok ka ɗang.”
21Pǝlǝa aɓwana-mǝgule nyare nunkiria nǝ rǝcandǝa, sǝ à nyia à o. Acemǝnana à sǝni ka, nǝ̀ kwano sǝ à nǝ̀ pea wia tanni, acemǝnana ɓwapǝndǝa na rǝ ɓwangsǝki Ɓakuli, nǝ gir'ndali mǝnana à pe ka. 22Mǝnia yì ɓwa mǝnana à pakki wi gir'ndǝlǝki mala twalban rǝkwana ka, apǝlǝa male a ɓanza kuti lumi-ine.
Hiwi mala amǝkpata Ɓakuli ace mǝsǝkang-kangŋa
23Lang à nyingŋǝnia ka, Bitǝrus andǝ Yohana nyar aban aɓea amǝkpata Yesu, sǝ à yì banggia wia cau mǝnana agbani pǝris andǝ aɓwana-mǝgule mala amǝ Yahudi na ka. 24Lang amǝkpata Yesu o anggo ka, kara à loasǝ gia a tarǝia aban Ɓakuli aban pak hiwi ama:
We Mǝtalabangŋo mǝnana Karban kat ka, a nda ɓwa mǝnana a pusǝ kuli, andǝ nzali, andǝ nggeamur, andǝ agir mǝnana aɓalǝia kat ka! 25A bang cau nǝ Bangŋo mo, nǝ kun kà-sǝm Dauda, yì guro mo, ama:
# 4:25 Ɓalli gbal aɓa:
Ang 2:1-2
.“Palang sǝ bum aɓwana
mala anzali ɓanza lullo,
palang sǝ aɓwana
mala amǝ Isǝrayila
kǝ kur kunarǝia ɓà?
26Amurǝma ɓanza kur rǝia,
sǝ amǝ'talanzali rambǝa,
arǝ Mǝtalabangŋo Ɓakuli,
andǝ Kǝrǝsti male.”
27Acemǝnana anggo sǝ Hirǝdus andǝ Buntu Bilatus kpapi kunarǝia aɓa mǝnia yì la ka. À kpapi kunarǝia andǝ aɓwana mǝnana à surǝ Ɓakuli raka, andǝ amǝ Isǝrayila kat, nǝ ɓibura arǝ Yesu, yì guro mo Mǝfele, yì ɓwa mana a ci nda Kǝrǝsti Mǝ'amsǝban ngga.#4:27 Ɓalli gbal aɓa: Luk 23:1,7-11; Mat 27:1-2; Mar 15:1; Yoh 18:28-29. 28Sǝ gir mǝnana yia à pak kat ka, nda gir mǝnana we, aɓa rǝcandǝa andǝ kane mo ka, a tsǝa ama anggo sǝ nǝ̀ yia pa.
29Sǝ adyan ngga, Mǝtalabangŋo, ok cau ɓunggi ɓabum malea#4:29 ok cau ɓunggi ɓabum malea: Ko “sǝn nabura malea arǝ sǝm.”, pa sǝm sǝnǝa guro mo, rǝcandǝa mala bang cau mo nǝ ɓabumcandǝa. 30Lǝmndǝ buo nǝ rǝcandǝa mala twalban rǝkwana, pakki agir-ndǝlǝki andǝ agir-gyambǝliban nǝ lullǝ guro mo Mǝfele yì Yesu.
31Lang à nǝ̀ mal pak hiwi ani ka, kara ban mǝnana à ram nggam ngga dǝurǝkio. Sǝ yia kat ka, à lumsǝ nǝ Bangŋo Mǝfele, sǝ à hamnǝ cau mala Ɓakuli nǝ ɓabumcandǝa.
Amǝkpata Yesu gapia rǝia agir
32Amǝkpata Yesu kat ka à dum nǝ ɓabumia andǝ ɗenyicau malea mwashat. Acemǝnana kǝɓwa ɓalǝia twal girkuma male ka, male na nǝmurǝì raka, à gaki agir kat a rǝarǝia.#4:32 Ɓalli gbal aɓa: Aturo 2:44,45. 33Amǝ'mishan lidǝmbǝa aɓa rǝcandǝa nǝ banggi aɓwana cau mala loapi ɓembe mala Mǝtalabangŋo Yesu, sǝ ɓwamuru mala Ɓakuli sulǝ amuria kǝrkǝr. 34Kǝ ɓwa pà kàm aɓalǝia mǝnana ɗwanyi kǝgir ka ɗang, acemǝnana aɓwana mana à ndanǝ agirkuma kǝla anzali ko aɓala ka, à mea, 35sǝ à yiu nǝ boale aban amǝ'mishan, acemǝnana ɓǝa pe koyan ngga gir mǝnana pak tǝle ka.
36Sǝm nǝ̀ gandǝ sǝn arǝ Yisǝfu, mǝnana amǝ'mishan pe wi ɓe lullǝu ama Barnabas ka (ɓa lullǝuî nda, Ɓwa mǝnana kǝ ɓakɓabum aɓwana ka). Yì ka, ɓwa tau mala Lawi na, mǝnana pur a Luran mana à tunǝki ama Sayipǝrus ka. 37Yì Barnabas ka, yiu yi mak nzali male, pǝlǝa yinǝ boale kat aban amǝ'mishan.
Currently Selected:
Amǝ Mishan 4: mbu
Tya elembo
Kabola
Copy
Olingi kobomba makomi na yo wapi otye elembo na baapareyi na yo nyonso? Kota to mpe Komisa nkombo
© Wycliffe Bible Translators, Inc. and © The Nigeria Bible Translation Trust 2016