Amǝ Mishan 6
6
À tarki amǝturo tongno nong-ɓari
1Aɓalǝ amǝno yì anonggeo, lang lakki mala amǝkpata Yesu nǝ̀ nggǝ lidǝmbǝa ka, nggwani kutio a nre ka amǝ Yahudi mǝnana à kǝ na kun Gǝrik, andǝ amana à kǝ na kun Ibǝru ka. Amǝnana à kǝ na kun Gǝrik ka, à na ama à kǝ tsǝkir aman-lú malea aban gau girlina mala koya pwari ka ɗang. 2Pǝlǝa amǝ'mishan mana lum-nong-ɓari ka, à tunǝ amǝ kpata Yesu kat aban kpapi, à na ama, “Pa nǝ̀ ɓoaro ɓǝ̀ sǝm bwaki bu sǝm arǝ turo hamnǝ cau mala Ɓakuli, ɓǝ̀ sǝm nyare a gaki girlina ɗang. 3Ace mani ka, wun amǝ'eamrǝarǝu, wu tarki aɓwana tongno-nong-ɓari aɓalǝ wun, amǝnana à kǝ ɓwangsǝia, ɗǝm ngga à lumsǝ nǝ Bangŋo mala Ɓakuli, andǝ sǝlǝe, mǝnana sǝm nǝ̀ pea wia mǝnia yì turo ka. 4Sǝ sǝm ngga, sǝm nǝ̀ pa rǝcandǝa ma'sǝm arǝ pakki Ɓakuli turo nǝ hiwi andǝ hamnǝ cau.”
5Mǝnia yì cau à bang ngga, banɓoari koyan ngga a rǝì. Pǝlǝa à twal Itǝfanu, ɓwa mǝnana lumsǝ nǝ paɓamuru aban Ɓakuli andǝ Bangŋo Mǝfele ka, andǝ Filip, andǝ Pǝrokorus, andǝ Nikano, andǝ Timon, andǝ Pamena, andǝ Nikolas. Nikolas ka ɓwa nggeala Antiyok na, mǝnana kuti a kpata peri mala amǝ Yahudi ka. 6Amǝnia yia aɓwana ka, nda à yì tamsǝia a ɓadǝmbǝ amǝ'mishan, à pakkia wia hiwi, sǝ à tsǝkia wia bu ka.
7Anggo sǝ cau mala Ɓakuli lidǝmbǝa kǝ akiban. Amǝkwaɗi mǝnana a Urǝshalima ka, à lidǝmbǝa nǝ lakki. Sǝ apǝris pas paɓamuria aban kpata Yesu.
À bwal Itǝfanu
8Itǝfanu ka, lumsǝ nǝ ɓwamuru andǝ rǝcandǝa mala Ɓakuli, kǝ pakki agir-gyambǝliban andǝ agir-ndali mǝgulke aɓalǝ aɓwana. 9Sǝ aɓea amǝ Yahudi mǝnana à pur nǝ anggea-là Sayirin andǝ Alizandǝriya, mǝnana à nda ɓalǝ amǝ ndakpapi mǝnana à tunǝki ama Ndakpapi mala aɓwana mǝnana à panzǝia ka, à mgbicau a rǝi. Yia andǝ aɓea mǝnana à pur arǝ abu-nzali mala amǝ Sǝlisiya andǝ Asiya ka, à lo nǝ makgir a rǝi. 10Sǝ Bangŋo mala Ɓakuli pe Itǝfanu sǝlǝe mǝnana ɓǝ̀ na cau ka, kǝɓwa atea gandǝ makgirì ɗang.
11Pǝlǝa à soakita aɓea aɓwana aɓa sǝmbǝrǝa ama ɓǝa na ama, “Sǝm oe aban kyauwiki Musa, sǝ kǝ na cau mǝɓane amur Ɓakuli.”
12Anggo sǝ à soa bum amǝ Yahudi andǝ aɓwana-mǝgule andǝ amalǝm Nggurcau mala Musa. À lo à bwal Itǝfanu à um nǝi aban amǝɓashi. 13Pǝlǝa à loasǝ aɓea aɓwana ɓǝa na nyir amuri ama, “Mǝnia yì ɓwa ka, koya pwari ka nda mur na mǝɓane amur Ndàmǝgule mala Ɓakuli andǝ Nggurcau mala Musa. 14Sǝm oe bangŋa ama, mǝnia yì Yesu, Ɓwa Nazarat ka, nǝ̀ arki Ndàmǝgule mala Ɓakuli, sǝ nǝ̀ nggaɗi akuncau mǝnana Musa nyingga sǝm mia ka!”
15Mǝsǝ ɓwapǝndǝa mǝnana kat a ndaɓashi ka, ueo arǝ Itǝfanu aban sǝne kyap-kyap. Sǝ à sǝn ɓamǝsǝi ka, nda kǝla mala mǝturonjar mala Ɓakuli.
Currently Selected:
Amǝ Mishan 6: mbu
Tya elembo
Kabola
Copy
Olingi kobomba makomi na yo wapi otye elembo na baapareyi na yo nyonso? Kota to mpe Komisa nkombo
© Wycliffe Bible Translators, Inc. and © The Nigeria Bible Translation Trust 2016