Matìyò 22
22
Yesò mò ngàyn byìʼì viʼi a və nlaʼà a kəzhɨ kə lam
(Luk 14.15-24)
1Yesò bè mò ngàyn tsen à vəwenə gàʼà la, 2“Və zì və shəʼmə Fòyn Nyìngòŋ nə̀ fətitì fə fòyn tsen a ghə̀ nlù baʼtə kəzhɨ kə lam wàyn wen wùlɨm. 3Ghə̀ nè bàʼtə myètə̀ ə̀ tɨ̀m viʼi shwèʼ wen la və dyʉ̀ dzàŋtə̀ viʼi vi a ghə̀ tə làʼà, alì viʼi a vyi tyen la vəwenə ko a vì. 4Ghə̀ bè tɨm ə̀ kwʉ̀ʼsə̀ viʼi shwèʼ wen vətsenvə la və dyʉ̀ gàʼà à viʼi a vyi la və baʼtə li kəzhɨ kì mwetə. Və bvaʼa li vəmbòŋ bènə̀ nyamsə sətsensə. No ghò sə̀ diʼ və nzhɨ tò zhɨ, la vəwenə vi lì a kəshi kə kəzhɨ. 5Vəwenə dyʉ̀ làʼà, kò wìʼ lù ghʉ̀ kətʉ a kənyʉ̀ a yì. No ndò bòŋsə̀ sə̀ dyʉ̀ tò a wen a kəshi. Wutsen lù fʉ̀ à wen a sɨm, wutsen bòŋsə̀ lù dyʉ̀ à wen a mbàʼànkùm. 6Viʼi ntɨm fòyn a vyi dyʉ̀ a vətsenvə vəwenə ghaʼ viʼi ntɨm a vyi nyàblə̀ nə̀ vəwenə ə̀ zhwilə. 7Fòyn nè zhʉ̀ kənyʉ̀ akì kə zaf wen no nə̀ ŋàŋ, ghə̀ tɨm vəsugyèʼ və wen və dyʉ̀ zhwilə viʼi vyi a və nzhwilə̀ viʼi shyèʼ wen lì bè nyùʼ ntə̀ʼ vəwenə. 8Ghə̀ mù gàʼ à viʼi shwèʼ wen vətsenvə la və baʼtə li kəzhɨ kə lam kèn kə mwetə alì viʼi vi a ma tə̀ làʼà lì ko kwʉ̀ʼ əvì. 9Ghə̀ŋ fʉ dyʉ̀ a fàfə jisə làʼà no məndò yì a ghə̀ŋ yenə. 10Viʼi shwèʼ a vyi fʉ̀ dyʉ̀ dzàŋtə̀ no məndò a vəwenə nyenə, viʼi və byɨvə nə̀ və jùŋvə vì lwin a ngə̀ŋ lam ayì.”
11Fòyn vì ətoŋtə viʼi ə̀ yèn wìʼ kènla ghə̀ shɨtə̀ li nlaf. 12Bèm à wen la, “Wù jèʼ ale sə diʼ a shèn a awèn kə̀ʼə̀ alə̀ a?” Wìʼ ayì chɨmə tò la kùʼ. 13Fòyn mù gàʼ à viʼi shwèʼ wen la, “Ghə̀ŋ kwiʼ akwoŋ wen bènə̀ afwen wen shìsə̀ wen mòʼò dyʉ̀ a kəbəŋ kə fenəkə a kəshi a ghə̀ a nlyuŋlyuŋ dì tsu be pfiʼi asoŋ wen.”
14Yesò sə mwètə̀ ə̀ gàʼ la və dzàŋə̀ viʼi no vəghoʼo alì diʼi tetə tò viʼi və tyetə və.
Və Falàsi bèm la kə boŋə li vəwenə mòʼò kənsè à fòyn ghoʼo lo?
(Mak 12.13-17; Luk 20.20-26)
15Və Falàsi vətsenvə lù dyʉ̀ zhùŋtə̀ sə baʼtə̀ jì ndi nè la Yesò gàʼ shwè və ghaʼ wen, 16vəwenə mù tɨm ndzɨ̀mtə̀sə bàm vəwenə sətsensə bènə̀ viʼi shwèʼ Helòd vətsenvə gàʼà la vəwenə dyʉ̀ gàʼà Yesò la, “Ndìʼsə̀, yès kɨ la wù gàʼà tò nəmwèʼè, ziʼi tò kənyʉ̀ à diʼ tò kənyʉ̀ kə nəmwèʼè byìʼì Nyìngòŋ, kènla wù fwaynə təkwòʼtə̀ tə viʼi byìʼàndo à dìʼ à wù viʼi vətsèm diʼ tò ndə̀ŋndəŋ. 17Shə̀ʼtə̀ lì à yès la à wù a kwòʼtə̀ soʼo vəghəŋ lè byɨmə la və loʼ kənsè à Kaysa andiʼì fòyn ghoʼo a loʼ Lum mu ghə̀ ko byɨmə à?”
18Yesò kɨ mənàŋ mì a vəwenə nkwiʼi mù gàʼ à vəwenə la, “Ghə̀ŋ viʼi kəmbɨ̀lə̀ venə! ghə̀ŋ zhʉtə̀ chʉ̀ ghomə byìʼì ghò? 19Ghə̀ŋ diʼi ko kəkas ayi a və mòʼò kənsè tsu lì à mò.” No a zhʉ kò və vì nə̀ ko kəkas ayi à wen. 20Ghə̀ mù bèm à vəwenə la, “A dìʼ kəndemndem kə kə̀ʼ ndò bènə̀ zhiʼ ndo tsu lə̀?”
21Vəwenə gàʼ la, “A dìʼ kəʼə Kaysa nə̀ zhiʼi wen tsu.” Yesò mù gàʼ à vəwenə la,“Kə ndiʼ a lì ghə̀ŋ kù fo Kaysa a Kaysa, bè kù fo Nyìngòŋ à Nyìngòŋ.”
22Vəwenə nè zhʉ̀ ando ghə̀ bwènsə̀ a lì mù sə diʼ nə̀ kanə ə̀ lù fà wen a mbyɨ̀.
Yesò ziʼi kənyʉ̀ kùmə̀ məlù fa pfʉ
(Mak 12.18-27; Luk 20.27-40)
23Tò a kətsi ayì Vəsadùsis vətsenvə lù vì à Yesò, adiʼ viʼi vyi a və ko mbyɨmə la wìʼ zì ghə̀ lu fa pfʉ, bèm à wen la, 24“Ndìʼsə̀ Mosìs nlù gàʼ à yès la, Lèmə wìʼ sətsèn pfʉ kiʼ wùwì alì kènla ghə̀ kìʼ vunə, lèmə̀ wu pfʉ ayì dìʼi nyòŋsə̀ wùwì mpfʉ ayì ndi wenə wen bwi vunə lèmə wen. 25Vəlèmə̀ vətsenvə ndìʼ sòmbo, wù mbì dyʉ̀ làm wùwì pfʉ mòʼtə̀ wen kènə̀ wàyn, ghʉ̀sə wì wen a yì à lèmə̀ wen. 26Lèmə̀ wen bè pfʉ ghʉ̀sə wì wen ayì tò a lì. Kənkùmtə̀ kə bè lyɨ̀ bè pfʉ tò ndə̀ŋndəŋ. Vəlèmə̀ və wen vətsenvə vi bè nè lyɨ̀ bè pfʉkə tò a lì dyʉ̀ mè. 27Fa yì a bàm, wùwì ayì bè pfʉ. 28A lè lu ndiʼ a kətsi a viʼi lùkə̀ fa pfʉ, wùwì ayì ndiʼ wì ndò ando wùwì ayì nlam li vəlèmə̀ a vyi no vətsèm a?”
29Yesò mù gàʼ à vəwenə la, “Ghə̀ŋ ə shwe li kənyʉ̀ byìʼàndo ghə̀ŋ ko kɨ̀ kənyʉ̀ kì a ŋwàʼlə̀ Nyìngòŋ gàʼà ko kənyʉ̀ kì a Nyìngòŋ zì ghə̀ ne. 30A lu ndiʼ a tʉʼ a viʼi lù li fa pfʉ və ko lə nlamə. Viʼi lu ndiʼ ando ntsɨ̀ŋsə ngə̀ŋ Nyìngòŋ sə dìʼ a kàŋ. 31Anə̀ kənyʉ̀ kùmə̀ məlù fa pfʉ a viʼi və pfʉkəvə lu nlù, kə diʼ la ghə̀ŋ ko təmə̀ dzàŋ əzhʉ kənyʉ̀ kì a Nyìngòŋ gàʼà mu? Nyìngòŋ nlù gàʼ la, 32Mà dìʼ Nyìngòŋ Ablaham, diʼ Nyìngòŋ Izìk, dìʼ Nyìngòŋ Jàkob. Viʼi avenə diʼ vəto. Na kènkə diʼì la ghə̀ dìʼ Nyìngòŋ viʼi a və diʼì və to a ko diʼ Nyìngòŋ viʼi və pfʉkəvə.”
33Nòyn yi nè zhʉ̀ ziʼi aghenə sə̀ diʼ nə̀ kanə.
Soʼ yi a ghə̀ chò təsoʼ no tətsèm
(Mak 12.28-34; Luk 10.25-28)
34Andìʼ ando viʼi Falàsi nzhʉ̀ la Yesò chiʼi li təchʉ̀ tə Vəsadùsis vəwenə tsèntə̀. 35Wìʼ muʼ fà vəwenə a ntìntìn, andìʼ ndìʼsə̀ soʼ mwòmsə̀ Yesò bèm à wen la, 36“Ndìʼsə̀, àdìʼ soʼo kò fa tì təsoʼ tə Mosìs a ghə̀ to chò tətsentə a?”
37Yesò bwènsə̀ gàʼ la, “A dìʼ yi a ghə̀ gàʼ à la, Wù diʼ kòŋ Bobo Nyìngòŋ wù nə̀ tyɨm wu no tsèm, nə̀ kəzhwì kə̀ no kə tsèm, bènə̀ kwòʼtə̀ wu no tsèm. 38A lè soʼ yi a ghə̀ to chò no təsoʼ tətsèm. 39Kənkùmtə̀ ki kə diʼ la, Wù kòŋ lèmə̀ wu tò ndə̀ŋndəŋ ando wù kòŋə̀ wen wu. 40Təsoʼ tə Mosìs tì no tətsèm bènə̀ ziʼi nshə̀ʼtə̀sə sə ghoʼkəsə no tətsèm əti tò a wen təsoʼ tèn tə bò.”
Wìʼ yì a Nyìngòŋ ntsuʼ li ə̀ ghʉ dìʼ ndo?
(Mak 12.35-37; Luk 20.41-44)
41Və Falàsi vi mbò mbu tò a nòyn mùʼ. Yesò mù bèm à vəwenə la, 42“Ghə̀ŋ kwòʼtə̀ la ghò byìʼì Wìʼ yì a Nyìngòŋ ntsuʼ li ə̀ ghʉ a? Ghə̀ŋ kɨ la ghə̀ dìʼ wàyn ndò?” Vəwenə gàʼ la ghə̀ dìʼ wàyn Devìt.
43Yesò bèm à vəwenə la, “A zhʉ a kə diʼ a lì byìʼì ghò a kəzhwì kə ŋwoʼəkə ne la ghə̀ dzàŋ wàyn wen aghèn la Bobo a? Mà bèm alə̀ byìʼàndo Devìt nlù gàʼ la, 44Bobo Nyìngòŋ ngàʼa à Bobo ghom la ŋwʉʼmə a shyə kwoŋ toghə mò zaʼa fa zhʉ a ma ghʉ viʼi kəbàyn wù a mò a ti aghʉ̀. 45Devìt sətsèn ndzàŋə̀ wen la Bobo ghə̀ be a ndiʼ wàyn wen ale?”
46No wìʼ nko mwòm ə bwènsə̀ kənyʉ̀ akì. Əzìtə̀ fa kətsi ayì wìʼ nko bè mwòmsə̀ əbèm kənyʉ̀ à wen.
Currently Selected:
Matìyò 22: bbkDBLnt
Tya elembo
Share
Copy
Olingi kobomba makomi na yo wapi otye elembo na baapareyi na yo nyonso? Kota to mpe Komisa nkombo