Ntandiliko 5
5
Histoliya ya Adamu na vanu va nnukolo lwake
(1 Mahiku 1:1-4)
1Aino njo histoliya ya Adamu na vanu va nnukolo lwake. Nnungu pavaumbile vanu, ávaumbile malinga mwavelelee mwene Nnungu. 2Ávaumbile nnume na mmahe, nkuvabaliki, nkuvachema lina, “Vanu.”
3Adamu panavele na vyaka myamoja salasini, nkummaleka mwana ánavele mwavelelee mwene mwalehu, nkunchema lina Seti. 4Bada ya kummaleka Seti, Adamu nkuikala vyaka myanane. Na muvyaka anevyo, Adamu ánivaveleka vana vanji vachilume na vachimahe. 5Bahi Adamu áikele myaka myatisa salasini, nkuhila.
6Seti panavele na vyaka myamoja na tano, nkummeleka Enoshi. 7Bada ya kummaleka Enoshi, Seti nkuikala vyaka myanane na saba. Na muvyaka anevyo, Seti ánivaveleka vana vanji vachilume na vachimahe. 8Bahi Seti áikele vyaka myatisa kumi na mbili, nkuhila.
9Enoshi panavele na vyaka tisini, nkummaleka Kenani. 10Bada ya kummaleka Kenani, Enoshi nkuikala vyaka myanane kumi na tano. Na muvyaka anevyo, Enoshi nkuvaveleka vana vanji vachilume na vachimahe. 11Bahi Enoshi áikele vyaka myatisa na tano, nkuhila.
12Kenani panavele na vyaka sabini, nkummeleka Mahalaleli. 13Bada ya kummaleka Mahalaleli, Kenani nkuikala vyaka myanane alubaini. Na muvyaka anevyo, Kenani nkuvaveleka vana vanji vachilume na vachimahe. 14Bahi Kenani áikele vyaka myatisa na kumi, nkuhila.
15Mahalaleli panavele na vyaka sitini na tano, nkummaleka Yaledi. 16Bada ya kummaleka Yaledi, Mahalaleli nkuikala vyaka myanane salasini. Na muvyaka anevyo, Mahalaleli nkuvaveleka vana vanji vachilume na vachimahe. 17Bahi Mahalaleli áikele vyaka myanane tisini na tano, nkuhila.
18Yaledi panavele na vyaka myamoja sitini na mbili, nkummeleka Henoko. 19Bada ya kummaleka Henoko, Yaledi nkuikala myaka myanane. Na muvyaka anevyo, Yaledi nkuvaveleka vana vanji vachilume na vachimahe. 20Bahi Yaledi áikele vyaka myatisa sitini na mbili, nkuhila.
21Henoko panavele na vyaka sitini na tano, nkummeleka Mesusela. 22Henoko ávele munu ánavele pepi namene nawi Nnungu. Bada ya kummaleka Mesusela, Henoko nkuikala vyaka myatatu. Na muvyaka anevyo, Henoko nkuvaveleka vana vanji vachilume na vachimahe. 23Bahi Henoko áikele vyaka myatatu sitini na tano. 24Henoko ávele munu ánavele pepi namene nawi Nnungu, na ániwalawala, kwa kuva, Nnungu ánintwala.
25Mesusela panavele na vyaka myamoja samanini na saba, nkummaleka Lameki. 26Bada ya kummaleka Lameki, Mesusela nkuikala vyaka myasaba samanini na mbili. Na muvyaka anevyo, Mesusela nkuvaveleka vana vanji vachilume na vachimahe. 27Bahi Mesusela áikele vyaka myatisa sitini na tisa, nkuhila.
28Lameki panavele na vyaka myamoja samanini na mbili, nkummaleka mwana wa chilume. 29Lameki nkuchidoni,“Ayu mwana nìmbenchema lina Nuhu,#5:29 Mana ya lina Nuhu nni, kutuja ntima. kwa kuva àmbetutuja mitima ing'anya ya madengo lakamajanga latukola kwa makono letu muulongo auno waulanite Yahwe.” 30Bada ya kummaleka Nuhu, Lameki nkuikala vyaka myatano tisini na tano. Na muvyaka anevyo, Lameki nkuvaveleka vana vanji vachilume na vachimahe. 31Bahi Lameki áikele vyaka myasaba sabini na saba, nkuhila.
32Nuhu panavele na vyaka myatano, nkummaleka Shemu, nkummaleka Yafeti, nkummaleka nawi Hamu.
Currently Selected:
Ntandiliko 5: Chimakonde
Tya elembo
Share
Copy
Olingi kobomba makomi na yo wapi otye elembo na baapareyi na yo nyonso? Kota to mpe Komisa nkombo
© 2020 Pioneer Bible Translators